1, 2. (a) Ki kitsoz bann nouvo marye espere? (b) Ki bann kestion nou pou examine dan sa sapit-la?

 MAZINN bann nouvo marye zour zot maryaz. Zot bien zwaye ek zot mazinn zot lavenir ansam. Enn lavenir ranpli ar rev ek lespwar. Zot espere ki zot lavi maryaz pou dire bien-bien lontan ek ki li pou bien zwaye.

² Boukou maryaz koumans bien. Me avek letan, zot gate. Pou ki enn maryaz ere ek dire, enn koup bizin direksion Bondie. Alor, anou examinn bann repons ki Labib done pou sa bann kestion-la: Ki bann bienfe ena dan maryaz? Si to anvi marye, kouma to kapav bien swazir to konzwin? Kouma to kapav vinn enn bon mari ouswa enn bon madam? Ek ki kitsoz kapav ed enn maryaz pou dire?​—Lir Proverb 3:5, 6.

3. Eski to panse ki enn dimounn bizin marye pou ki li ere? Explike.

³ Sertin dimounn panse ki enn kikenn bizin marye pou ki li kapav ere. Me sa li fos. Zezi ti dir ki lavi  selibater se enn don, ouswa enn kado. (Matie 19:11, 12, NW) Ek lapot Pol ti explike ki ena sertin lavantaz kan enn kikenn res selibater. (1 Korintien 7:32-38, NW) Se twa ki bizin swazir si to pou marye ouswa non. Fode pa to les to kiltir, to bann kamarad, ouswa to fami met presion lor twa pou marye.

4. Ki bann lavantaz ena kan enn maryaz mars bien?

⁴ Labib explike ki maryaz osi se enn don Bondie ek ki li ena sertin lavantaz. Zeova ti dir lor premie zom, Adan: “Li pa bon ki zom res tousel. Mo pou fer enn led pou li, enn kikenn ki al bien ar li.” (Zenez 2:18) Zeova ti kree Ev pou ki li vinn Adan so madam ek zot ti vinn premie fami imin. Si enn koup ena bann zanfan, sa bann zanfan-la bizin grandi dan enn lanvironnman stab. Me se pa zis pou gagn bann zanfan ki bann dimounn marye.​—Psom 127:3; Efezien 6:1-4.

5, 6. Kouma enn maryaz kapav vinn kouma “enn lakord trwa brin”?

⁵ Lerwa Salomon ti ekrir: “De pli bon ki enn, parski zot gagn enn zoli rekonpans pou travay dir ki zot fer. Parski si enn ladan tonbe, lot-la kapav lev so kamarad. Me ki pou ariv enn kikenn ki tousel ek ki tonbe kan pena enn deziem pou lev li? . . . Enn lakord trwa brin pa kase vit.”​—Ekleziast 4:9-12.

⁶ Enn bon maryaz kapav vinn enn lamitie pli for ki ena ant de dimounn ki rekonfort, protez, ek ed sakenn zot kamarad. Lamour kapav fer enn maryaz vinn solid. Me enn maryaz pou vinn pli solid ankor kan enn mari ek so fam ador Zeova. Lerla, zot  maryaz kapav vinn kouma “enn lakord trwa brin,” ki’nn trese bien sere ansam. Enn lakord trwa brin pli solid ki enn lakord ki ena zis de brin. Enn maryaz pou vinn pli solid kan Zeova form parti dan sa maryaz-la.

7, 8. Ki konsey Pol ti done lor maryaz?

⁷ Apre zot maryaz, enn mari ek so fam kapav satisfer zot bann dezir sexiel natirel. (Proverb 5:18) Selman, si enn kikenn marye zis pou satisfer sa bann dezir sexiel la, li riske mal swazir so konzwin. Akoz sa ki Labib ankouraz enn dimounn pou marye apre ki li’nn fini pas “sa peryod . . . kot so bann dezir sexiel bien for.” (1 Korintien 7:36, NW) Li pli bon atann ki sa bann dezir-la diminie avan marye. Lerla, sa dimounn ki anvi marye la, pou kapav reflesi pli bien ek fer enn pli bon swa.​—1 Korintien 7:9; Zak 1:15.

⁸ Si to pe pans pou marye, to bizin realist ek to bizin konsian ki dan tou maryaz ena bann difikilte. Lapot Pol ti dir ki bann dimounn marye ‘pou fer fas ar enn kantite difikilte.’ (1 Korintien 7:28) Mem pli bon maryaz ki ena pou pas par bann difikilte. Alor, si to deside pou marye, swazir to konzwin avek sazes.

9, 10. Ki kapav arive si nou marye ar enn kikenn ki pa servi Zeova?

⁹ Kan to swazir to konzwin, rapel sa prinsip Biblik inportan la: “Pa al asosie zot avek bann non-krwayan.” (2 Korintien 6:14) Kan li ti ekrir sa bann parol-la, lapot Pol ti pe pans enn metod travay ki servi dan  lagrikiltir. Pou travay dan karo, enn planter pa met de zanimo ki pa mem groser ouswa ki pena mem lafors anba mem zoug. Si li fer sa, toulede zanimo pou soufer. Dan mem fason, kan enn serviter Zeova marye ar enn kikenn ki pa servi Zeova, zot gagn boukou problem dan zot maryaz. Se pou sa rezon-la ki Labib donn sa konsey bien saz la: marye “selman dan Lesegner.”​—1 Korintien 7:39, NW.

¹⁰ Parfwa, sertin Kretien panse ki li preferab zot marye ar enn kikenn ki pa servi Zeova, olie ki zot res tousel. Me kan nou pa swiv bann konsey ki Labib done, bien souvan nou malere ek nou soufer. Antan ki bann serviter Zeova, servi Zeova se kitsoz pli inportan dan nou lavi. Kouma to pou santi twa, si to pa kapav partaz avek to konzwin, sa parti pli inportan dan to lavi la? Boukou Kretien inn prefer res selibater olie ki marye ar enn kikenn ki pa kontan ek pa servi Zeova.​—Lir Psom 32:8.

11. Kouma to kapav bien swazir to konzwin?

¹¹ Me sa pa vedir ki ninport kisannla ki servi Zeova pou enn bon konzwin pou twa. Si to pe pans pou marye, rod enn kikenn ki to bien kontan ek avek ki to santi twa bien. Atann ziska ki to trouv enn kikenn ki ena bann mem lobzektif ki twa ek ki met Zeova an premie dan so lavi. Pran letan pou lir ek reflesi lor bann bon konsey ki ena lor maryaz dan bann piblikasion ki nou gagne ar lesklav fidel ek saz.​—Lir Psom 119:105.

12. Dan Labib, ki nou kapav aprann lor bann maryaz aranze?

¹² Dan sertin kiltir, bien souvan se bann paran ki  swazir enn konzwin pou zot zanfan. Dan sa bann kiltir-la, bann dimounn panse ki bann paran kone ki pli bon pou zot zanfan. Dan lepok Biblik osi ti ena sa koutim-la. Alor, si to fami swazir pou swiv sa koutim-la, Labib kapav itil pou zot. Li kapav ed bann paran pou kone ki bann kalite zot bizin rode kan zot pe swazir enn konzwin pou zot zanfan. Par exanp, kan Abraam ti swazir enn madam pou so garson Izaak, li pa ti donn priorite larzan ouswa ran sosial. Me seki ti pli inportan pou Abraam, se ki sa tifi-la ti kontan Zeova.​—Zenez 24:3, 67; get Not 25.

13-15. (a) Kouma enn zom kapav prepar li pou vinn enn bon mari? (b) Kouma enn fam kapav prepar li pou vinn enn bon madam?

¹³ Si to pe pans pou marye, to bizin fer sir, pa zis krwar ki to’nn pare pou marye. Me anou gete ki savedir vremem pare pou marye. To kapav etone ar sa repons-la.

¹⁴ Labib montre ki bann mari ek bann fam ena diferan responsabilite dan lafami. Alor, enn zom ek enn fam pa prepar zot dan mem fason pou lavi maryaz. Si enn zom pe pans pou marye, li bizin demann limem si li’nn pare pou vinn enn sef fami. Zeova atann ki enn mari pran swin so fam ek so bann zanfan lor plan materyel ek afektif. Me pli inportan, enn mari bizin pran latet dan ladorasion ki so fami donn Bondie. Kan enn zom pa pran swin so fami, Labib dir ki li pli “pir ki enn dimounn ki pena lafwa.” (1 Timote 5:8, NW) Alor, si to enn zom ek ki to pe pans pou marye, reflesi kouma to kapav aplik sa prinsip Labib la: “Prepar to travay andeor, organiz to travay dan to karo. Apre sa, to bizin osi batir to fami.” Dapre sa prinsip-la, avan ki to marye, to bizin fer sir ki to kapav vinn enn mari kouma Zeova anvi.​—Proverb 24:27.

¹⁵ Enn fam ki pe pans pou marye bizin demann limem si li’nn pare pou asim bann responsabilite enn madam marye, ek kitfwa osi responsabilite enn mama. Labib explike ki enn bon madam pran swin so mari ek so bann zanfan dan plizir fason. (Proverb  31:10-31) Azordi, boukou mari ek fam mazinn zis seki zot konzwin kapav fer pou zot. Me Zeova anvi ki nou reflesi lor seki nou, nou kapav fer pou nou konzwin.

16, 17. Si to pe pans pou marye, lor ki kitsoz to bizin reflesi?

¹⁶ Avan ki to marye, reflesi lor seki Zeova atann ar bann mari ek bann fam. Kan enn zom vinn enn sef fami, sa pa donn li drwa pou fer dominer ar so fami lor plan fizik ouswa afektif. Enn bon sef fami li imit Zezi, ki touletan azir avek lamour ek bonte anver bann ki anba so responsabilite. (Efezien 5:23, NW) Enn madam li, li bizin reflesi lor seki vedir soutenir bann desizion so mari ek korper avek li. (Romin 7:2, NW) Li bizin demann limem si li pou ere kan li pou bizin soumet ar enn zom inparfe. Si li panse ki li pa pou ere, kitfwa li pou deside ki li pli bon ki li res selibater pou linstan.

¹⁷ Bann mari ek bann fam bizin plis interese ar boner zot konzwin ki zot prop boner. (Lir Filipien 2:4.) Pol ti ekrir: “Sakenn parmi zot bizin kontan so madam parey kouma li kontan limem; madam-la li, li bizin ena enn profon respe pou so mari.” (Efezien 5:21-33, NW) Mari ek fam toulede bizin santi ki zot konzwin kontan zot ek respekte zot. Me pou ki enn maryaz mars bien, enn mari bizin vremem santi ki so madam respekte li, ek enn madam bizin vremem santi ki so mari kontan li.

18. Kifer bann koup bizin fer bien atansion pandan frekantasion?

¹⁸ Frekantasion bizin enn moman bien agreab pou bann koup, parski se la ki sakenn pou aprann  konn zot kamarad pli bien. Se dan sa moman-la osi ki zot pou bizin realist ek onet, pou ki zot kapav deside si zot vremem anvi viv ansam pou touletan. Pandan frekantasion, enn zom ek enn fam pou aprann kominike ek zot pou aprann seki vremem ena dan leker zot kamarad. Pli zot relasion pou vinn for, pli zot pou santi zot atire fizikman ar zot kamarad, ek sa li normal. Me tanki zot pa marye, zot bizin ena kontrol lor fason ki zot exprim zot santiman, pou ki zot pa fer nanye ki imoral. Vre lamour pou ed  zot pou kontrol zot ek anpes zot fer enn kitsoz ki pou gat zot relasion ek osi relasion ki zot ena avek Zeova.​—1 Tesalonisien 4:6, NW.

19, 20. Kouma bann Kretien konsider maryaz?

¹⁹ Boukou liv ek fim fini par enn gran maryaz ki ere. Me dan larealite, maryaz se zis enn koumansman. Zeova ti prevwar ki maryaz dire pou touletan.​—Zenez 2:24.

²⁰ Azordi, boukou dimounn konsider maryaz kouma enn kitsoz ki zis pou enn letan. Li bien fasil pou marye, ek li bien fasil osi pou divorse. Sertin dimounn panse ki, kan koumans gagn difikilte dan maryaz, sa montre ki’nn ariv ler pou ki zot kit zot konzwin ek divorse. Me rapel sa lexanp Biblik ki dir ki enn lakord trwa brin ki’nn tres bien sere ansam, li bien solid. Enn lakord koumsa pa pou kase, mem si li anba boukou tansion. Pou nou maryaz kapav dire, nou bizin rod led Zeova. Zezi ti dir: “Fode pa dimoun separ seki Bondie finn met ansam.”​—Matie 19:6.

21. Ki kitsoz pou ed enn mari ek so fam pou kontan zot kamarad?

²¹ Nou tou nou ena bann pwin for ek bann febles. Li bien fasil pou konsantre lor febles lezot, sirtou lor febles nou konzwin. Me si nou fer sa, nou pa pou ere. Parkont, si nou fixe nou latansion lor bann bon kalite ki nou konzwin ena, nou maryaz kapav ere. Eski li realist ki nou ena sa lopinion pozitif la lor nou konzwin ki inparfe? Wi! Zeova kone ki nou inparfe.  Kanmem sa, Li fixe so latansion lor nou bann bon kalite. Mazine ki ti pou arive si Zeova pa ti fer sa! Enn ekrivin Psom ti dir: “Si to ti vey tou bann pese, O Yah, O Zeova, kisannla ti pou kapav tini devan twa?” (Psom 130:3, NW) Mari ek fam kapav imit Zeova kan zot fixe zot latansion lor seki bon kot zot konzwin ek kan zot pardone san tarde.​—Lir Kolosien 3:13.

22, 23. Kifer Abraam ek Sara zot bann bon lexanp pou bann dimounn marye?

 ²² Avek letan, enn maryaz kapav vinn pli solid. Abraam ek Sara ti viv lontan ansam ek zot ti ere. Kan Zeova ti dir Abraam kit so lakaz dan lavil Our, kitfwa Sara ti ena plis ki 60 an. Mazine ki kantite sa ti bizin difisil pou Sara kit so lakaz konfortab, pou al viv anba latant. Me Sara ti enn bon kamarad ek enn bon konzwin pou Abraam, ek li ti vremem respekte li. Sara ti soutenir bann desizion Abraam ek li ti ede pou ki sa bann desizion-la reisi.​—Zenez 18:12; 1 Pier 3:6.

²³ Biensir, kan enn mari ek so fam zot ere dan zot maryaz, sa pa vedir ki zot pou touletan tom dakor lor tou kitsoz. Enn zour, Abraam pa ti dakor ar Sara. Me Zeova ti dir Abraam: “Ekout li.” Abraam ti ekout Sara, ek zot ti gagn bann bon rezilta. (Zenez 21:9-13) Si parfwa to konzwin ek twa pa tom dakor, pa dekouraze. Mem kan zot pa dakor, seki pli inportan se ki zot kontign tret zot kamarad avek lamour ek respe.

24. Kouma nou maryaz kapav donn Zeova laglwar?

²⁴ Dan lasanble Kretien, ena bann milye koup ki ere. Si to anvi marye, rapel ki enn parmi bann pli gran desizion ki to pou bizin pran, se swazir ar kisannla to pou marye. Sa desizion-la pou ena enn gran lefe lor to lavi. Alor, rod direksion Zeova. Koumsa, to pou kapav swazir to konzwin avek sazes, ek prepar twa bien pou to maryaz. Ek to pou kapav osi devlop enn relasion bien for avek to konzwin, ek sa pou donn Zeova laglwar.