Eski enn kikenn inn deza dir twa enn sekre?​— a Labib koz lor enn sekre ki bien spesial ki sorti kot Bondie. Kifer se enn sekre? Parski bann dimounn pa ti konn nanye lor la. Mem bann anz ti anvi konn plis lor la. Eski to anvi kone ki sa sekre-la sa?​—

Bien-bien lontan, Bondie ti kree premie misie, ki ti apel Adam ek premie madam ki ti apel Ève. Li ti met zot dan enn zoli zardin, zardin Éden. Si Adam ek Ève ti obeir Bondie, ansam avek zot bann zanfan, zot ti pou kapav fer later antie vinn enn paradi parey kouma sa zardin-la. Ek zot ti pou kapav viv pou touletan dan sa Paradi-la. Me eski to rapel ki Adam ek Ève inn fer?​—

Zot finn dezobeir Bondie, ek se akoz sa ki nou pa pe viv dan enn paradi zordi. Me, Bondie ti dir ki Li pou fer later antie vinn zoli. Nou tou nou pou kapav viv pou touletan ek nou pou dan lazwa. Me kouma Bondie pou fer sa? Pandan boukou letan, bann dimounn pa ti kone. Sa ti enn sekre.

Kan Jésus ti vinn lor later, li ti fer bann dimounn konn plis lor sa sekre-la. Li dir ki sa sekre-la konsern Rwayom Bondie. Jésus ti dir bann dimounn priye pou ki sa Rwayom-la vini. Se sa Rwayom-la ki pou fer later vinn enn zoli paradi.

Alor, to kontan to’nn konn sa sekre-la?​— Pa bliye, zis bann ki obeir Jéhovah ki pou viv dan Paradi. Labib koz lor boukou madam ek boukou misie ki’nn obeir Jéhovah. Eski to anvi konn zot?​— Anou al aprann enn tipe plis lor zot ek gete kouma nou kapav imit zot.