Zistwar 47

Enn Voler dan Israël

GET seki sa misie-la pe antere dan so latant! Enn zoli linz, enn bar lor ek de-trwa pies larzan. Li’nn pran sa dan lavil Jéricho. Me ki ti bizin fer ar bann zafer ki ti ena dan lavil Jéricho? Eski to rapel?

Zot ti sipoze detrir sa bann zafer-la, me zot ti bizin gard lor ek larzan pou trezor tabernak Jéhovah. Alor sa bann dimounn-la finn dezobeir Bondie. Zot finn kokin bann kitsoz ki pou Bondie. Sa misie-la apel Akân ek bann lezot dimounn ki ar li se so fami. Anou gete ki arive.

Apre ki Akân kokin sa bann kitsoz-la, Josué avoy bann zom pou lager kont lavil Aï. Me zot perdi lager. Sertin mor ek leres sove. Josué bien tris. Li azenou, so figir ater ek li priye Jéhovah: ‘Kifer to’nn permet ki sa ariv nou?’

Jéhovah reponn: ‘Leve! Israël inn fer pese. Zot finn pran sertin kitsoz ki ti sipoze detrir ouswa ki ti sipoze met dan tabernak Jéhovah. Zot finn kokin enn zoli linz ek zot finn gard sa enn sekre. Mo pa pou beni twa tanki to pa detrir sa kitsoz-la, ek sa kikenn ki’nn pran sa bann kitsoz-la.’ Jéhovah dir ki Li pou montre Josué kisannla sa move dimounn-la sa.

Alor, Josué rasanble lepep, ek Jéhovah fer kone ki se Akân, sa move dimounn-la. Akân dir: ‘Mo finn fer pese. Mo’nn trouv enn zoli linz, enn bar lor ek bann pies larzan. Mo ti telman anvi gagn sa bann kitsoz-la ki mo finn pran zot. Zot pou trouv bann kitsoz-la antere dan mo latant.’

Kan finn trouv sa bann kitsoz-la, finn amenn zot devan Josué, ek lerla Josué dir Akân: ‘Kifer to finn amenn maler lor nou? Asterla Jéhovah pou amenn maler lor twa!’ Apre sa lepep avoy ros lor Akân ek so fami ziska zot mor. Eski sa pa montre ki fode zame nou pran bann kitsoz ki pa pou nou?

Plitar, Israël al lager kont Aï ankor enn fwa. Sa fwa-la Jéhovah ed so pep, ek zot gagn lager.

Josué 7:1-26; 8:1-29.