Premie Larkansiel
Zistwar 11
Premie Larkansiel
ESKI to kone ki premie kitsoz Noé fer kan li sorti dan lars? Li ofer Bondie enn sakrifis. To kapav trouv sa lor zimaz anba. Noé ofer bann zanimo pou remersie Bondie parski Li’nn sov so fami dan sa gran deliz-la.
Eski Jéhovah finn aksepte so sakrifis? Wi. Ek Li promet Noé ki zame Li pa pou detrir lemond ankor par enn deliz.
Later pa tarde pou sek. Lerla, Noé ek so fami koumans enn nouvo lavi andeor lars. Bondie beni zot ek dir zot: ‘Zot bizin gagn boukou zanfan. Zot bizin vinn boukou ziska ki later ranpli ar dimounn.’
Me plitar, kan bann dimounn pou tann koz lor deliz, kitfwa zot pou per atansion enn zour enn lot deliz vinn lor zot. Akoz sa, Bondie donn enn sign ki pou fer bann dimounn rapel so promes ki zame Li pa pou re-avoy enn lot deliz ankor lor later. Sa sign-la se enn larkansiel.
Bien souvan, apre ki lapli inn tonbe ek ki soley pe koumans briye, nou trouv enn larkansiel dan lesiel, avek plizir zoli kouler. Eski to’nn deza trouv enn larkansiel? Get seki lor sa zimaz-la.
Bondie ti dir: ‘Mo promet ki zame bann dimounn ek bann zanimo pou detrir ankor enn fwa par enn deliz. Mo pe met mo larkansiel dan bann niaz. Kan larkansiel pou paret, mo pou trouv li ek mo pou rapel mo promes.’
Alor, kan to trouv enn larkansiel, ki sa bizin fer twa rapel? Promes ki Bondie ti fer ki zame Li pa pou re-avoy enn deliz pou detrir lemond.
