1. Hebogahisi tauna ena kara be dahaka?

HEBOGAHISI tauna ta laloamu neganai, ita ese kara namo, lalokau, bona hariharibada tauna ta laloamu. Reana Iesu ese e gwauraia Samaria tauna sivaraina baita laloamu. Ena be ia na idau bese tauna to dadidadi taudia ese e dadabaia Iuda tauna na e “bogaia hisi.” Una Samaria tauna ese e bero Iuda tauna e “bogaia hisi” bona mai ena lalokau ida ia iduruna daladia e heḡaeḡaelaia. (Luka 10:29-37) Ina sivarai ese eda Dirava ena kara namo hereana ta e hahedinaraia​—hebogahisi. Una kara na Dirava ena lalokau amo e varamu karana ta, bona dina ta ta ita edai una na e hahedinaraiamu.

2. Hebogahisi ena kara ma ta be dahaka?

² Hebogahisi ena kara ma ta baita laloa na namo. Una na badi maorodia dainai ta basita hahemaoro henia neganai baita hahedinaraia hebogahisi karana. Una kara ai, Iehova ese momokani ita edai ena hebogahisi na e hahedinaraia. Badina Salamo itorena tauna na e gwa: “Eda kara dika heḡereḡeredia se kara henidamu.” (Sal. 103:10) To nega haida, Iehova ese kara dika tauna na matana e hakaniamu.

3. Ededia henanadai baita herevalaimu?

³ Ina atikol ai, henanadai toi baita herevalaimu: Dahaka dainai Iehova ese hebogahisi karana e hahedinaraiamu? Matahakani bona hebogahisi karana be nega tamonai ba hahedinarai diba, a? Bona dahaka ese baine duruda diba hebogahisi karana baita hahedinaraia? Mani Dirava ena Hereva ese ini henanadai e haerelai daladia aita ita.

4. Dahaka dainai Iehova ese hebogahisi karana e hahedinaraiamu?

⁴ Iehova na e ura dikadikamu hebogahisi karana baine hahedinaraia. Aposetolo Paulo na e gwa Iehova na “hebogahisi-bada Diravana.” Ina hereva amo ia na Dirava ena hebogahisi karana e herevalaia,  badina Dirava ese ena horoa hesiai taudia, ena be dia ḡoḡoevadae, to guba helarona e henidia. (Efe. 2:4-7) To Iehova ena hebogahisi karana na dia idia ediai mo e hahedinaraia. Salamo itorena tauna David na e gwa: “Iehova ese taunimanima iboudiai e kara namo henidiamu, vada e kara ḡaudia iboudiai na ia ese e bogadia hisimu.” (Sal. 145:9) Iehova ese taunimanima na e lalokau henidiamu dainai, hebogahisi baine hahedinaraia diba negadia ai ia ese hebogahisi na e hahedinaraiamu.

5. Iesu ese Iehova ena hebogahisi karana be ede e dibaia toma?

⁵ Iesu sibona mo mai dibana ḡoevaḡoeva Iehova na e ura dikadikamu hebogahisi karana baine hahedinaraia. Iesu tanobada do sema neganai ia na Tamana ida laḡani daudau herea guba ai e noho. (Her. 8:30, 31) Nega momo, Iesu na Tamana ese kara dika taudia e bogadia hisi karana na e itaia. (Sal. 78:37-42) Iesu e hahedibava neganai nega momo una kara, Tamana ena kara namona ta, na e herevalaiava.

6. Edena dalai Iesu ese e hahedinaraia Tamana na hebogahisi tauna?

⁶ Atikol gunanai, Iesu ese boio merona parabolena amo e hahedinaraia ḡoevaḡoeva, Iehova na e ura dikadikamu hebogahisi karana baine hahedinaraia. Una mero ese ena ruma e rakatania bona “ena kohu eha lebulebulai.” (Luka 15:13) Gabeai, ena matabodaḡa karadia amo e helalo-kerehai, sibona e hahemanau, bona ena ruma e lou lao. Tamana be dahaka e kara? Una mero na haraḡa herea tamana ena hebogahisi karana na e mamia. Iesu na e gwa, una mero na dala amo e raka e laova lalonai “dauhai tamana ese e mataia davari, bena e bogaia hisi, e heau lao, aiona ai e hahegagiu dae, e harahua.” Tamana ese natuna na se hahemaraia. To, mai ena hebogahisi ida mero ena dika e gwauatao bona ruma bese lalonai ma e abia vareai lou. Mero na kara dika bada herea e kara, to e helalo-kerehai dainai tamana ese ena dika na e gwautao. Una parabole lalonai una tama mai ena hebogahisi ese Iehova e laulaulaia. Ina hebogahisi sivaraina lalonai, Iesu ese e hahedinaraia ḡoevaḡoeva Tamana na e ura dikadikamu e helalo-kerehai momokanimu kara dika taudia edia dika baine gwautao.​—Luka 15:17-24.

7. Edena dalai Iehova ena aonega na iena hebogahisi karana ese e hahedinaraia?

⁷ Iehova ese hebogahisi karana e hahedinaraiamu badina ia na aonega bada Diravana. Iehova ena aonega e ḡaukaralaiamu neganai iseda namo e havaraiamu. Baibul na e gwaumu, “atai amo e maimu aonegana” na “hebogahisi bona huahua namodia amo e honu.” (Iak. 3:17) Lalokau tama  ta o sina ta heḡereḡerena, Iehova na mai dibana ena hebogahisi dainai iena hesiai taudia na namo bae davari diba. (Sal. 103:13; Isa. 49:15) Dirava ena hebogahisi dainai ena be idia na kara dika taudia to helaro e henidiamu. Una dainai Iehova ena aonega bada karana dainai hebogahisi baine hahedinaraia diba negadiai hebogahisi na e hahedinaraiamu. To danu, Iehova na mai dibana edena negai hebogahisi karana basine hahedinaraia. Ia na aonega Diravana dainai, e uramu hebogahisi baine hahedinaraia neganai se uramu kara dikana e karaia tauna ena kerere na baine abia dae.

8. Elda taudia be dahaka bae kara diba, bona dahaka dainai?

⁸ Bema Dirava ena hesiai tauna ta na mai ena ura ida matabodaḡa karana ta baine karaia, dahaka baita kara be namo? Paulo na e gwa ia ida “basio hetura.” (1 Kor. 5:11) Se helalo-kerehaimu kara dika tauna na kongrigeisin murimurinai e atoamu. Una kara bae karaia na namo, unu amo abidadama tadikaka taihu bae gimadia bona Iehova ena helaḡa daladia bae badina. To, haida na asie uramu bae abia dae ta murimuri ai e atoamu karana na Dirava ena hebogahisi karana. Una be momokani, a? Mani aita itaia.

9-10. Heberu 12:5, 6 ena hereva heḡereḡerena, dahaka dainai baita gwa diba ta murimuri ai e atoamu karana na Iehova ese e atoa hebogahisi dalana ta? Haheitalai ta a gwauraia.

⁹ Kristen hebouna ai ta kamonaimu ita mai dibada tauna ta bona ta lalokau heniamu tauna na “hari dia Iehova ena Witnes tauna” neganai, ta lalohisihisi badamu. Reana baita lalomu ta lalokau heniamu tauna murimuri ai e atoa be maoro eiava. Ta murimuri ai e atoamu karana be hebogahisi karaia eiava? Oibe, una na hebogahisi karana. Matahakani baine abi na namo tauna matana basita hakaniamu neganai, una na dia aonega, hebogahisi bona lalokau karana. (Her. 13:24) Se helalo-kerehaimu kara dika tauna murimuri ai e atoamu karana ese baine durua diba ena kara baine haidaua, a? Oibe. Kara dika badadia e kara taudia momo na e davaria elda taudia ese murimuri ai e atodia karana ese e durudia, e laloparara edia kara bae haidau bona Iehova bae lou henia na namo.​—Heberu 12:5, 6 ba duahi.

¹⁰ Mani ina haheitalai a laloa. Mamoe ireḡudia tauna ta na e itaia ena mamoe ta na e gorerea. Mai dibana una gorere baine hanamoa totona, e gorerea mamoena na mamoe ma haida amo baine atoa siri. To, mamoe na e noho heboumu animal, idia na e uramu mamoe serina ai bae noho, bona basie moalemu bema mamoe serina amo be atodia sirimu. To anina be una mamoe ireḡudia tauna ese gorere mamoena e atoa siri neganai e kara auka, a? Lasi. Mai dibana bema una gorere mamoena na baine rakatania seri ida bae noho hebou, ena gorere na mamoe ma haida ediai baine hanai diba. Gorere mamoena e atoa siri karana ese seri ibounai e gimaiamu.​—Levitiko 13:3, 4 ida ba haheḡereḡerea.

11. (a) Ededia dalai murimuri ai e atoa tauna na e gorerea mamoena ida baita haheḡereḡerea diba? (b) Murimuri ai e atodia taudia bae durudia ḡaudia be dahaka?

¹¹ Kristen tauna ta na murimuri ai e atoamu neganai, ia na una e gorerea mamoena ida baita haheḡereḡerea dibamu. Ia na lauma dalanai e gorerea. (Iak. 5:14) Lauma dalanai e gorerea tauna ena gorere na gorere ma haida heḡereḡeredia, ma haida ediai bae heni hanai diba. Una dainai nega haida lauma dalanai e gorerea tauna na kongrigeisin amo bae atoa siri na namo. Una matahakani karana ese Iehova ena lalokau, ia e abidadama heniamu taudia ma haida ediai e hahedinaraiamu, bona una kara ese kerere tauna kudouna baine hamarerea diba bena baine helalo-kerehai. Murimuri ai e nohomu lalonai, hebou bainela diba, unuseniai Baibul ena hahediba herevadia baine abi unu amo ena abidadama baine hagoadaia lou diba. Danu pablikeisin baine abi sibona ese baine stadilai totona, bona JW Broadcasting^® baine ita diba. Bena elda taudia  ese ena tubu lauma dalanai bae itaia neganai, nega ta ta ai bae hagoadaia bona bae durua lauma dalanai baine goada lou, unu amo bae abia vareai lou diba bona Iehova ena Witnes ai ma bainela. *

12. Do se helalo-kerehai kara dika tauna enai elda taudia be edena dalai lalokau bona hebogahisi karana bae hahedinaraia?

¹² Namona na ina baita laloatao na ḡau badana, se helalo-kerehaimu kara dika taudia mo orea murimurinai e atodiamu. Elda taudia na mai dibadia una kara na mai anina bada, bona idia ese na asie laloa maraḡimu. Idia na mai dibadia Iehova ese matahakani e henimu neganai dika “davana korikorina” e henimu. (Ier. 30:11) Idia ese tadikakadia na e lalokau henidiamu, bona asie uramu edia kara ese lauma dalanai baine hahekwakwanaidia. To nega haida, kara dika tauna na kongrigeisin murimurinai bae atoa karana na lalokau bona hebogahisi karana.

13. Dahaka dainai Korinto ai Kristen tauna ta na murimuri ai e atoa?

¹³ Mani Kristen ginigunadia edia negai aposetolo Paulo ese se helalo-kerehai kara dika tauna ta e kara henia dalana aita itaia. Korinto ai Kristen tauna ta na tamana adavana ida e heudahanaiva. Una na dika herea! Paulo na mai dibana, idaunegai Iehova ese Israel taudia e hamaorodia, eto: “Tau ta na tamana adavana ida bae heuda hanai, tamana baine hahemaraia, raruosi bae aladia mase.” (Lev. 20:11) Momokani, Paulo na basine gwau dibamu una tau na bae alaia. To Korinto taudia e hamaorodia murimuri ai bae atoa. Una tau ena matabodaḡa karana ese kongrigeisin taudia ma haida na e hahekwakwanaidia, idia haida na asie laloava ia na kara dika badana ta e karaia!​—1 Kor. 5:1, 2, 13.

14. Paulo ese edena dalai Korinto ai murimuri ai e atoa tauna enai hebogahisi karana e hahedinaraia, bona dahaka dainai? (2 Korinto 2:5-8, 11)

¹⁴ Gabeai, Paulo na e diba una tau ese ena kara na e haidaua. Una kara dika tauna na e helalo-kerehai momokani! Ena be una tau ena kara ese kongrigeisin ladana e hadikaia, to Paulo ese elda taudia e hamaorodia una kerere tauna na basie kara auka henia. Bona e gwa: “Ena dika ba gwau tao bona tauna ba haloa.” Paulo unu e gwau toma badina mani a itaia: “Dara-doko ese baine gugubaia mase na garina.” Ia ese una helalo-kerehai tauna na e bogaia hisi. Se ura una tau na ena kerere dainai, dounu baine daradoko bena ena kara dika igwautaona dalana basine tahua.​—2 Korinto 2:5-8, 11 ba duahi.

15. Edena dalai elda taudia ese hahemaoro e karaiamu neganai, matahakani bona hebogahisi karana bae lalopararalaia bena bae badinaia?

 ¹⁵ Iehova heḡereḡerena, elda taudia na e ura dikadikamu hebogahisi karana bae hahedinaraia. Idia ese matahakani bae heni na maoro neganai bae karaia na namo, to hebogahisi karana bae hahedinaraia diba bema badi maorona ta na mia neganai. Bema kerere tauna basie matahakani heniamu, una na dia hebogahisi karana to idia ese ena kerere na e abia daemu. To elda taudia mo hebogahisi karana bae hahedinaraia eiava?

16. Hereva Lada-isidia 21:13 heḡereḡerena, Iehova ese hebogahisi karana asie hahedinaraiamu taudia be ede e kara henidia tomamu?

¹⁶ Kristen taudia iboudiai na e uramu Iehova ena hebogahisi karana bae tohotohoa. Dahaka dainai? Badi ta na, haida ediai hebogahisi karana asie uramu bae hahedinaraia taudia na Iehova ese basine kamonai henidiamu. (Hereva Lada-isidia 21:13 ba duahia.) Ita ta asita uramu Iehova ese eda ḡuriḡuri basine kamonai, una dainai namona na taunimanima na basita kara auka henidia. Dia namo e hisihisimu Kristen tauna baita dadaraia, to namona na hanaihanai baita noho heḡaeḡae e lalometaumu taudia edia “taitai” baita hakala. Una heḡereḡerena, namona na ina sisiba na baita laloa bada: “Asi ena hebogahisi tauna enai hahemaoro na asi ena hebogahisi.” (Iak. 2:13) Bema baita helalotaomu ita danu hebogahisi karana baita abia na namo, una ese be durudamu ma haida ediai hebogahisi karana baita hahedinaraia. Hebogahisi karana baita hahedinaraia na ḡau badana bema helalo-kerehai tauna na kongrigeisin e lou heniamu.

17. Edena dalai King David na mai kudouna ibounai ida hebogahisi karana e hahedinaraia?

¹⁷ Baibul ese e sivarailaidia taudia edia haheitalai ese be durudamu, hebogahisi karana baita hahedinaraiamu bona basita kara aukamu, heḡereḡere, mani King David a laloa. Hanaihanai mai kudouna ibounai ida hebogahisi karana e hahedinaraia. Ena be Saulo na e urava ia baine hamasea, to David ese Saulo, Dirava ese horoa pavapavana, enai hebogahisi karana e hahedinaraia, bona se ura ena kara davana baine heni o baine daḡedaḡe henia.​—1 Sam. 24:9-12, 18, 19.

18-19. Ededia nega rua ai David ese hebogahisi na se hahedinaraia?

¹⁸ To, David na dia nega iboudiai hebogahisi karana e hahedinaraia. Heḡereḡere, nega ta kara auka tauna Nabala na David e gwau henia, bona se ura David bona ena tatau na aniani baine henidia neganai, David na e badu dikadika bona e ura Nabala bona ena ruma tataudia iboudiai baine aladia mase. To Nabala adavana Abigail, haheauka bada hahinena, na mai aonegana ida kara ta e karaia haraḡa dainai, David ese Nabala bona ena tatau na se aladia.​—1 Sam. 25:9-22, 32-35.

¹⁹ Nega ma ta ai, peroveta tauna Natan na taḡa tauna ta ese dekena tauna ena mamoe e henaoa sivaraina na David e hamaorolaia. David na e badu dikadika bona e gwa: “Iehova e maurimu heḡereḡerena, una kara e karaia tauna na bema mase hari namo.” (2 Sam. 12:1-6) David na Mose ena Taravatu na mai dibana. Mamoe ta e henaoa tauna ese davana na mamoe foa baine heni. (Eso. 22:1) To bae hamasea ba maoro, a? Lasi, una na hahemaoro aukana. Natan na una sivarai amo  kara kerere badadia e urava baine hahedinarai​—unu na David sibona ese e kara kereredia! Iehova ese hebogahisi karana na David enai e hahedinaraia, to David ese Natan ena sivarai ai mamoe e henaoa tauna enai hebogahisi na se hahedinaraia!​—2 Sam. 12:7-13.

20. David ena haheitalai amo dahaka ta dibamu?

²⁰ David na e badu dikadika neganai, e gwa Nabala bona ena tatau iboudiai bae aladia. Bona gabeai, David na e gwa Natan ena sivarai lalonai e gwauraia tauna baine mase na maoro. Ina sivarai iharuana ai, reana baita lalomu dahaka dainai una lalokau tauna ese hahemaoro aukana e karaia. David enai e vara ḡauna mani a laloa. Una neganai, David na ena kerere e lalova dainai ena hemami na dia namo. Ta na ena kara auka o hahemaoro auka karana amo baita dibamu ena hetura karana Iehova ida na dia goada. Iesu ese murinai e raka taudia e sisiba henidia, e gwa: “Taunimanima basio hahemaoro henidia, bena idia ese danu basie hahemaoro henimui. Badina be umui emui hahemaoro heḡereḡerena ai ma bae hahemaoro henimui.” (Mat. 7:1, 2) Una dainai namona na baita henari namonamo, basita hahemaoro auka, bona baita hekwarahi eda Dirava heḡereḡerena “hebogahisi-bada” karana baita hahedinaraia.

21-22. Ededia dala haida ai hebogahisi karana baita hahedinaraia diba?

²¹ Hebogahisi karana na dia hemami ai mo baita hahedinaraia. Hebogahisi anina na kara haida baita kara ma haida baita durudia. Una dainai, ita iboudai na dala baita tahu eda ruma bese, kongrigeisin bona ta nohomu gabunai hebogahisi karana baita hahedinaraia. Momokani, hebogahisi karana baita hahedinaraia daladia na momo herea! Tauhalo e uramu baine abi tauna ta noho, a? Iduruna karadia haida baita kara diba, heḡereḡere aniani haida baita heni eiava ia totona ḡau haida baita kara, a? Oreai e abia vareai lou Kristen tauna ta be e uramu baita hagoadaia bona baita durua, a? Ma haida ediai sivarai namona baita harorolaia diba, a? Una na baita hedavari henidia taudia iboudiai ediai hebogahisi karana baita hahedinaraia dalana namona ta.​—Iobu 29:12, 13; Roma 10:14, 15; Iak. 1:27.

²² Bema unu dala idauidau baita lalodiamu neganai, baita itaiamu ita ese hebogahisi karana baita hahedinaraia negadia na momo herea. Hebogahisi karana baita hahedinaraiamu neganai, Tamada guba ai e nohomu, “hebogahisi-bada” Diravana, baita hamoalea badamu!