1. Ede ta diba tomamu ita na “dina gabedia” ai ta nohomu?

OI BE laḡani 1914 murinai o vara, a? Bema oibe, anina na oi na “dina gabedia” ai o nohomu. (2 Tim. 3:1) Ita iboudai na Iesu ese e perovetalai ḡaudia na vada ta itamu o ta kamonaimu. Unu na tuari, doe, tano laga, dai-hanai goreredia, kara havara bona Iehova ena taunimanima e daḡedaḡe henidiamu karadia danu e badamu. (Mat. 24:3, 7-9, 12; Luka 21:10-12) Bona ta itamu taunimanima na aposetolo Paulo ese e gwaurai guna ḡaudia heḡereḡeredia e karamu. (Maua ladana “Hari Ina Negai Taunimanima Edia Kara” ba itaia.) Ita Iehova ta toma henia dihomu taudia na ta dibamu ita na “dina gabedia ai” ta nohomu.​—Mika 4:1.

2. Ededia henanadai haeredia baita diba na namo?

² Laḡani 1914 amo ema bona hari laḡani momo vada eme ore dainai, ita na “dina gabedia” dokodia ai vada ta nohomu. Dokona na kahirakahira momokani dainai, henanadai badadia haida haeredia baita diba na ḡau badana: “Dina gabedia” dokodiai dahaka do bae vara? Bona unu ta naridiamu lalonai Iehova be e uramu dahaka baita kara?

3. Tesalonika Ginigunana 5:1-3 heḡereḡerena, tanobada besedia be edena hereva be gwauraiamu?

³ Tesalonika Ginigunana 5:1-3 ba duahi. Paulo na “[‘Iehova,’ NWT] ena dina” e gwauraia. Una dina be matamamu neganai “Babulono badana,” tomadiho koikoi ibounai e laulaulaiamu ḡauna, be haoreamu bena dokonai Aramagedono be kaumu. (Apok. 16:14, 16; 17:5) Iehova ena “dina” do se matama ai, tanobada besedia na be gwaumu: “Maino” bona noho “namo”! Tanobada ena hegunalai taudia na tanobada besedia edia noho baine namo totona hereva unu bamodia e gwauraimu. * To Baibul ese e gwauraiamu “maino” bona  noho “namo” na idau. Dahaka dainai? Una be varamu neganai taunimanima na be laloamu tanobada ena hegunalai taudia ese tanobada na noho gabuna namona ai vada e halaoa, to una na dia momokani. Baine vara momokanimu ḡauna na, “hisi bada-herea” baine hematama, haraḡa herea “hebuatari” baine kau.​—Mat. 24:21.

4. (a) “Maino” bona noho “namo” herevana ai ita asi dibada ḡaudia be dahaka? (b) Ita mai dibada ḡauna be dahaka?

⁴ “Maino” bona noho “namo” herevana do se gwauraia ai be vara gunamu ḡaudia bona be gwauraiamu dalana na asi dibada. Danu ita na asi dibada una be hereva momo be gwauraimu eiava hereva badana tamona be gwauraiamu. Herevana dahaka be varamu to ita mai dibada ḡauna na ina: Dia namo una hereva ese baine koida bena baita laloa tanobada ena hegunalai taudia ese maino bae havaraia. To, Baibul ese e hamaorodamu una “maino” bona noho “namo” herevana baita naria. Una na toa, ita be hadibadamu “Iehova ena dina” vada be hematamamu!

5. Edena dalai 1 Tesalonika 5:4-6 ese e durudamu “Iehova ena dina” dainai baita heḡaeḡae?

⁵ Tesalonika Ginigunana 5:4-6 ba duahi. Paulo ena haheḡani ese e hadibadamu ita be dahaka baita kara bena “Iehova ena dina” dainai baita heḡaeḡae. Ita na “basita mahuta, haida e mahutamu na heto.” Namona na baita noga eiava baita gima. Heḡereḡere, namona na baita henahua toho bona tanobada ena politikol karadia lalodiai basita vareai. Bema unu kara lalodiai baita vareaimu, ta hahedinaraiamu ita na “tanobada ena.” (Ioa. 15:19) Ita na mai dibada, Dirava ena Basileia sibona ese tanobada ai maino baine havaraia.

6. Taunimanima baita durudia dahaka bae kara, bona dahaka dainai?

⁶ Ita ta gimamu lalonai ma haida danu baita durudia Baibul ese e perovetalai ḡaudia bae diba bona bae gima. Badina baita helalotao hisihisi bada hereana be varamu negana na dia taunimanima ese Iehova bae tahua negana. Una dainai, hari haroro ḡaukara baita karaia na mai anina bada! *

7. Hari, Iehova be e uramu dahaka baita kara?

⁷ “Lohiabada [‘Iehova’] ena dina” do se hematama ai, ia na e uramu ita na haroro ḡaukara ai baita bisi. Namona na baita hahedinaraia ‘Lohiabada ena ḡaukara lalonai baita goada balaheni nega idoinai.’ (1 Kor. 15:58) Ita ese baita karaia ḡaukarana na Iesu ese e gwauraia guna. Ia ese dina gabedia ai bae vara ḡaudia e perovetalai neganai, ia na ma eto: “A sivarai namo na bese loḡora iboudiai bae harorolai henidia guna.” (Mar. 13:4, 8, 10; Mat. 24:14) Mani a laloa: O haroromu negadia iboudiai, oi ese una Baibul ena peroveta herevana e ḡuḡurumu karana o duruamu.

8. Edena dalai ta dibamu Basileia iharorolaina ḡaukarana na e badamu?

⁸ Basileia iharorolaina ḡaukarana ena bada be ede bamona? Laḡanai ta ta iboudiai lalodiai, taunimanima momo na Basileia sivaraina namona e kamonaiamu. Heḡereḡere, mani dina gabediai tanobada heḡeḡemadai Basileia e harorolaiamu taudia edia namba e badamu a laloa. Laḡani 1914 ai, tano 43 ai pablisa edia namba na 5,155. To hari, tano 240 ai, pablisa edia namba na 8.5 milion mai kahana. Ena be pablisa nambana na e bada e laomu, to iseda ḡaukara na do se ore. Namona na ma haida baita hadibadia Dirava ena Basileia sibona ese taunimanima edia hekwakwanai baine haoredia.​—Sal. 145:11-13.

9. Dahaka dainai Basileia iharorolaina ḡaukarana basita hadokoa na namo?

⁹ Basileia iharorolaina ḡaukarana na basine doko ela bona Iehova ese baine koua. O laloamu nega doini bada taunimanima ese Iehova Dirava bona Iesu Keriso bae dibaia totona? (Ioa. 17:3) Ita na asi dibada. To mai dibada ḡauna na ina, hari amo ela bona hisihisi bada hereana baine hematama, ‘mauri hanaihanai e uramu bae abia kudou-maoro taudia’ ese sivarai namona be abia daemu. (Apos. 13:48, NWT) Una nega do se kau ai, edena dalai hari taunimanima baita durudia?

10. Hereva momokani na taunimanima baita hadibalaidia totona Iehova ese ita be ede e duruda tomamu?

¹⁰ Iehova na ena orea amo ita iduruda ḡaudia e henimu, hereva momokani na taunimanima baita hadibalaidia totona. Heḡereḡere, pura ta ta heboudia amo treinin ta abimu. Una hebou ese e durudamu dahaka baita gwaurai haroro ginigunadia bona lou henia ta karamu negadia ai. Bona Baibul stadi ikaradia daladia e hadibadamu. Danu Iehova ena orea ese Hahediba Toolbox amo haroro ḡaukara ai bae duruda tulu idauidau e ato. Unu tulu ese be durudamu . . .

•   herevahereva baita hamatama

• kamonai taudia lalodia baita veri

• taunimanima baita durudia Baibul bae dibaia namonamo

• Baibul stadi taudia ediai hereva momokani baita hahedibalaia bona

• kamonai taudia baita hagoadadia eda website baela bona baita vavedia Kingdom Hall baema diba.

Momokani, unu tulu na dia baita abidia mo to namona na baita ḡaukaralaidia. * Heḡereḡere, bema kamonai tauna ta ida o herevaherevamu murinai pepapepa eiava magasin ta na ienai ba rakatania, unu amo ba lou henia negana e nariamu lalonai, baine duahi. Una na eda maduna dainai, hua iboudiai lalodiai Basileia iharorolaina ḡaukarana ai baita bisi.

11. Dahaka dainai eda website ai Online Bible Study Lessons e atoa?

¹¹ Iehova ese taunimanima e durudiamu hereva momokani bae dibaia dalana ma ta na, jw.org^® ai, Online Bible Study Lessons. (BIBLE TEACHINGS > ONLINE LESSONS kahanai ba itaia.) Dahaka dainai ini lessons e atodia? Hua ta ta ai, tanobada heḡeḡemadai taunimanima ten tausen mai kahana na eda website ai Baibul lessons e tahumu. Unu lessons ese unu taunimanima baine durudia diba Dirava ena hereva momokani bae dibaia. O hereva henidiamu taudia haida ese Baibul stadi na basie abia daemu. Unu e vara tomamu neganai, eda website ai una kaha na idia ediai ba hahedinarai eiava lessons haida ba siai henidia. *

12. Ta be Online Bible Study Lessons amo dahaka ḡau haida baine diba?

¹² Iseda Online Bible Study Lessons ai, ini topik mimia: “The Bible and Its Author,” “The Bible’s Main Characters,” bona “The Bible’s Message of Hope.” Ta na ini topik ta ta be stadilaimu neganai be dibamu:

• Baibul ese edena dalai ta baine durua diba

• Iehova, Iesu, bona aneru be daidia

• Dahaka dainai Dirava ese taunimanima e havaradia

• Dahaka dainai hisihisi bona kara dika na doini e varamu

Danu unu lessons ese be hahedinaraiamu Iehova ese edena dalai . . .

• hisihisi bona mase baine haoredia

• mase taudia baine hamauridia lou, bona

• taunimanima edia gavamani gabudiai iena Basileia baine haginia.

13. Online Bible Study Lessons ese vaevae taunimanima ida Baibul ta stadilaiamu karana gabuna e abia, a? Ba herevalaia.

¹³ Online Bible Study Lessons ese vaevae taunimanima ida Baibul ta stadilaiamu karana gabuna na se abia. Badina una ḡaukara na Iesu ese e gwauraia hahediba ḡaukarana bona ia na hahenamo ta. Unu lessons ese kamonai taudia bae durudia, e diba ḡaudia bae moalelai bona bae ura diba ma haida bae abi. Unu amo reana be uramu Baibul bae stadilaia. Unu lesson ta ta dokodiai, e duahiamu tauna ese iseda website amo ta baine noia ia ida Baibul bae stadilaia diba. Eda website ai, tanobada heḡeḡemadai dina tamona lalonai taunimanima 230 mai kahana na e uramu Baibul bae stadilaia! Oibe, ta ida Baibul bae stadilaia na mai anina bada!

14. Iesu ena haheḡani Mataio 28:19, 20 ai heḡereḡerena, baita hekwarahi dahaka baita kara, bona dahaka dainai?

¹⁴ Mataio 28:19, 20 ba duahi. Baibul stadi ta karamu neganai, namona na baita hekwarahi haida na ‘hahediba ai baita halaodia . . . , baita hadibadia [Iesu ese e] heni haheḡanidia iboudiai bae badina.’ Namona na taunimanima baita durudia, bena bae laloparara Iehova bae hesiai henia bona iena Basileia bae durua na mai anina bada. Anina na, baita hekwarahi idia  baita durudia e dibamu hereva momokanidia na edia mauri ai bae badina, edia mauri na Iehova enai bae gwauhamatalai bona bae bapatiso. Unu bae kara toma neganai idia na Iehova ena dina badana amo bae roho mauri diba.​—1 Pet. 3:21.

15. Ita na asi ta uramu dahaka baita kara, bona dahaka dainai?

¹⁵ Matamanai tame herevalaia heḡereḡerena, nega na kwadoḡi. Una dainai, edia mauri asie haidaumu bona asie uramu Iehova bae hesiai henia taudia ediai eda nega na basita haorea. (1 Kor. 9:26) Eda ḡaukara na mai anina bada! Nega do mianai, taunimanima momo ese Basileia sivaraina namona bae kamonaia na namo.

16. Apokalupo 18:2, 4, 5, 8, heḡereḡerena, dahaka baita kara na namo? (Futnout danu ba itaia.)

¹⁶ Apokalupo 18:2, 4, 5, 8 ba duahi. Unu siri amo ta dibamu Iehova na e uramu ia e tomadiho heniamu taudia ese kara ta bae karaia. Namona na Kristen taudia momokanidia ese tomadiho koikoi karadia iboudiai bae dadarai. Baibul stiuden ta na hereva momokani do se dibaia neganai, reana ia na tomadiho koikoi oreana ta ena memba ta. Reana una dubu e laova bona dubu ḡaukaradia lalodiai e vareaiva. Eiava reana una orea baine durua totona moni e heniva. Baibul stiuden ta na bapatiso lasi pablisa ai do sela neganai, ia ese tomadiho koikoi karadia iboudiai baine dadarai na ḡau badana. Namona na revareva ta baine torea eiava baine hahedinaraia ena tomadiho gunana eiava Babulono Badana e duruamu oreana vada e rakatania vaitani. *

17. Kristen tauna ese ededia moni ḡaukara baine dadarai, bona dahaka dainai?

¹⁷ Namona na Kristen tauna momokanina ese baine hahedinaraia iena moni ḡaukara ese Babulono Badana ena ḡaukara na se duruamu. (2 Kor. 6:14-17) Heḡereḡere, dubu ta lalonai basine ḡaukara. Eiava, bema Kristen tauna ta na kampani ta ai e ḡaukaramu bona una kampani na tomadiho koikoi e duruamu rumana ta ai ḡaukara badana ta bae karaia, una danu basine karaia. Bema ia na sibona ena bisnes e haheauamu, namona na tomadiho koikoi ḡaukarana ta basine karaia eiava basine abia dae. Dahaka dainai unu ta hereva tomamu? Dirava matanai tomadiho koikoi karadia na mimiro dainai asita uramu lalodiai baita vareai.​—Isa. 52:11. *

18. Edena dalai tadikaka ta na moni ḡaukara dainai Baibul ena hahekau herevadia e badina?

¹⁸ Laḡani gunadiai, sibona ena bisnes e haheauava elda tadikakana ta na konstraksin kampani biaguna ta ese e noia dubu ai ḡaukara ta baine karaia, una dubu na ia e nohova gabunai. Una kampani biaguna na mai dibana tadikaka na hanaihanai e gwauva ia na dubu ta ai basine ḡaukara. To una negai, una kampani biaguna ese una ḡaukara baine karaia tauna ta se davaria. To, elda tadikakana ese Baibul ena hahekau herevadia na e badina bona una ḡaukara na se abia dae. Vaira wiki ai, niuspepa ai kapenta ta na una dubu ai korosi ta e kokoa kauva laulauna e halasia. Bema eda tadikaka ese Baibul ena hahekau herevadia basinema badina bona una ḡaukara bema abia dae, reana niuspepa ai na ia laulauna bema hedinarai. Una ese kongrigeisin tadikaka taihu padadiai ia ladana na bema hadikaia! Mani a laloa, Iehova ena hemami una tadikaka enai be ede bema heto.

19-20. (a) Ina stadi amo dahaka tame diba? (b) Stadi atikol 41 ai dahaka baita herevalaimu?

¹⁹ Baibul ena peroveta herevadia heḡereḡerena, kahirakahira be varamu ḡauna badana na tanobada besedia ese “maino” bona noho “namo” herevana be gwauraiamu. Ita na Iehova ese e hadibadamu dainai, ta dibamu tanobada besedia ese maino korikori na basie havaraiamu. Una nega do se matama bona hebuatari do se vara ai dahaka baita kara na namo? Iehova na e uramu ita na Basileia sivaraina iharorolaina ḡaukarana ai baita bisi bona baita hekwarahi haida na hahediba ai baita halaodia. Namona na tomadiho koikoi karadia iboudiai baita dadarai. Anina na tomadiho koikoi oreadia bona e duruamu moni ḡaukaradia danu baita dadarai.

²⁰ “Dina gabedia” dokodiai, ḡau ma haida be varamu. Danu, Iehova na e uramu kara haida baita kara. Unu be dahaka, bona edena dalai vaira negai bae vara ḡaudia daidiai baita heḡaeḡae? Stadi atikol 41 ese unu be herevalaimu.