1. Dahaka dainai iahudia edia amo diba baita abi?

 ITA IBOUDAI na abi hidi badadia ta karamu neganai, ta uramu haida edia amo hahekau herevadia baita abi. Unu hahekau herevadia momo na elda taudia bona lo Kristen taudia amo baita abimu. Bema idia na iahu, namona na basita lalo edia hahekau herevadia ese ita na basie duruda dibamu. Iehova na e uramu iahudia edia amo diba baita abi. Mauri ai e varamu ḡau momo na mai dibadia, edia diba bona aonega danu bada.—Iobu 12:12.

2. Ina atikol ai dahaka baita herevalaimu?

² Baibul negadiai, Iehova ese abidadama iahudia amo ena taunimanima e hagoadadiava bona e hakaudiava. Heḡereḡere, Mose, David, bona aposetolo Ioane aita lalodia. Idia na nega idauidau ai e nohova, bona edia noho daladia danu i’idau. Edia mauri dinadia oredia ai, edia sisiba namodia amo matamatadia e hagoadadia. Idia ta ta na Dirava ibadinana ena namo e herevalaia badabada. Iehova ese edia sisiba namodia na Baibul ai e tore unu amo diba baita abi. Ena be ita na matamata eiava iahu, to edia sisiba baita stadilaimu neganai namo baita davarimu. (Roma 15:4; 2 Tim. 3:16) Ina atikol ai, unu tatau tatoiosi edia hereva oredia bona unu hereva amo ta dibamu ḡaudia baita herevalaimu.

“EMU MAURI DINADIA BAE HOHO”

3. Edena dala ai Mose ese Dirava e hesiai henia bona Israel besena e durua?

³ Mose na ena mauri ibounai lalonai Iehova e hesiai henia. Ia na peroveta tauna, hahemaoro tauna, hegunalai tauna, bona toretore tauna. Mose ena mauri lalonai e vara ḡaudia amo ḡau momo e diba. Ia ese Israel besena na Aigupto ena iḡui amo e  hakaudia lasi bona Iehova ena hoa karadia momo na matana ai e ita. Iehova ese e ḡaukaralaia Baibul bukadia ginigunadia faiv, Salamo 90, bona reana Salamo 91 e toredia. Iobu bukana danu e torea.

4. Mose be daidia e hagoadadia, bona dahaka dainai?

⁴ Mose laḡanina 120 bona kahirakahira baine mase neganai, Israel taudia e hadibadia Iehova ese idia daidiai e kara ḡaudia bae lalodia tao. Idia haida na laḡani momo gunadiai, Iehova ese e kara toa bona hoa karadia momo bona Aigupto taudia e hahemaoro henidia karana danu e itaia. (Eso. 7:​3, 4) Iehova ese Davara Kakakakana e hapararaia na e itaia bona e rakaia hanai, bona Farao mai ena tuari oreana ida e hamasedia karana danu matadia ai e itaia. (Eso. 14:​29-31) Tano ḡaḡaena ai, Iehova ese idia na e gimadia bona e naridia. (Deu. 8:​3, 4) Gwauhamata Tanona ai bae raka vareai neganai, Mose ese una nega na e ḡaukaralaia idia baine hagoadadia totona. a

5. Mose ena hereva oredia Deuteronomi 30:​19, 20 ai ese Israel taudia be dahaka e hadibadia?

⁵ Mose be dahaka e gwa? (Deuteronomi 30:​19, 20 ba duahidia.) Ia ese Israel besena e hadibadia vaira negai idia na mauri namona bae moalelaia. Iehova ena heduru dainai, Israel taudia e gwauhamata henidia tanona ai bae noho daudau diba. Una tano na tano namo hereana, aniani momo e tubu! Mose ese ini e herevalaia toma, eto: “Unuseni ai hanua badadia bona namodia, umui ese asio daidia, bona ruma, kohu namodia amo e honu umui ese asio habou, bona ranu guridia, umui ese asio ḡei, bavabi; bona vine imeadia bona olive audia umui ese asio hadodia.”—Deu. 6:​10, 11.

6. Dahaka dainai bese ma haida ese Israel besena e tuari henia neganai, Dirava ese una na se koua?

⁶ Mose ese Israel taudia na hahediba herevana ta e henidia. Una tano namo hereana ai bae noho hanaihanai totona, Iehova ena taravatu bae badinadia na namo. Mose ese e hamaorodia ‘mauri bae abia hidi’ dalana na Iehova bae kamonai henia bona ia bae “badinaia tarika-tarika.” To, Israel taudia na Iehova asie kamonai henia. Una dainai, Asuria taudia bona gabeai Babulono taudia ese e tuari henidia bona e abidia mauri neganai, Dirava ese idia na se koudia.—2 Han. 17:​6-8, 13, 14; 2 Sis. 36:​15-17, 20.

7. Mose ena hereva amo dahaka ta dibamu? (Laulau danu ba itaia.)

⁷ Dahaka ta dibamu? Kamonai karana amo mauri baita davariamu. Israel taudia heḡereḡeredia, ita danu kahirakahira Dirava ese e gwauhamatalai tanobada matamatana ai baita vareaimu, una negai tanobada na paradaiso ai be laomu. (Isa. 35:1; Luka 23:43) Diabolo mai ena demoni ida na be haorediamu. (Apok. 20:​2, 3) Tomadiho koikoi ese taunimanima na Iehova ena amo basie hakaudia kerere loumu. (Apok. 17:16) Taunimanima edia gavamani ese e lohiadiamu taudia na basie hahisidia loumu. (Apok. 19:​19, 20) Paradaiso ai kara dika taudia na lasi. (Sal. 37:​10, 11) Taunimanima iboudiai ese Iehova ena kara maoromaoro taravatudia be badinamu, lalotamona bona maino ai be nohomu. Idia na be helalokau hehenimu bona be hemataurai hehenimu. (Isa. 11:9) Una na nega namo hereana! Bema Iehova baita badinaiamu, ita na tanobada paradaisona ai baita nohomu, dia laḡani handred mo to hanaihanai.—Sal. 37:29; Ioane 3:16.

8. Mauri hanaihanai gwauhamatana ese misinari ta be ede e durua toma? (Iuda 20, 21)

 ⁸ Bema Dirava ena gwauhamata mauri hanaihanai ai baita laloamu, una ese be durudamu ia baita badinaiamu herevana dahaka hekwakwanai be varamu. (Iuda 20, 21 ba duahidia.) Danu, una gwauhamata ese ita na be durudamu eda manoka ḡaudia baita hanaidia. Laḡani momo Africa ai misinari ḡaukarana e karaia tadikakana ta na e gwa nega momo e hekwarahiva Dirava ese se moalelaimu karadia baine dadarai. Ia na ma e gwa: “Na laloparara bema Iehova basina badinaiamu, paradaiso ai na basina nohomu. Una ese e durugu baina hekwarahi una hahetoho baina hanaia bona Iehova enai baina ḡuriḡurilaia. Iena heduru amo una hahetoho na na hanaia.”

“OI NA BO KWALIMUMU”

9. David ena mauri lalonai dahaka hahetoho e davari?

⁹ David na king namona. Danu, ia na miusik mai dibana tauna, ane e toreva, tuari tauna, bona peroveta tauna. Hahetoho momo e davari. Laḡani haida lalodiai, ia na e komu loava, badina King Saulo na e urava ia baine alaia. King ai ela murinai danu, David na ena mauri dainai e heau badina natuna Absalom na e urava iena king dagina baine dadia. Ena be David na unu hahetoho e davari bona kerere badadia haida e kara, to dounu Iehova e badinaia ela bona e mase. Una dainai, Iehova ese ia na e gwauraia “[ena] lalokau tauna.” David ena sisiba namodia baita badina na namo!—Apos. 13:22; 1 Han. 15:5.

10. Dahaka dainai David ese natuna Solomon na king ai do sela neganai, e sisiba henia?

¹⁰ Mani David ese natuna Solomon na king ai do sela neganai, e henia sisibana aita laloa. Iehova ese Solomon na e abia hidi dubu baine haginia unu amo taunimanima na unuseniai Iehova bae tomadiho henia. (1 Sis. 22:5) Una na ḡaukara badana bona Solomon ese Israel besena baine hakaua namonamo totona, Iehova ena heduru baine abia na namo. David be dahaka be gwaumu? Mani aita itaia.

11. 1 Hanua Pavapavadia 2:​2, 3 heḡereḡerena, David ese Solomon be dahaka sisiba e henia, bona unu hereva be edena dalai e ḡuḡuru? (Laulau danu ba itaia.)

¹¹ David be dahaka e gwa? (1 Hanua Pavapavadia 2:​2, 3 ba duahidia.) David ese natuna na e hamaoroa bema Iehova be badinaiamu, ena lohia ḡaukarana na be karaia namonamomu bona Iehova ese be hanamoamu. Laḡani momo lalodiai, Iehova ese Solomon na ḡau namodia momo e henia bona dala idauidau ai e durua. (1 Sis. 29:​23-25) Ia na dubu mai hairaina e haginia bona Baibul bukadia haida e tore. Ena aonega bona taḡa daidiai momo ese e dibaia. (1 Han. 4:34) To David ena hereva heḡereḡerena, Solomon na Iehova Dirava ibadinana karana ai mo hahenamo be abimu. Madi, Solomon na e buruka  neganai, dirava idaudia e tomadiho henidia. Iehova ese ena lalonamo na Solomon ena amo e kokia; aonega dalana ai taunimanima e lohiadiava karana, kara maoromaoro bona hahemaoro maoromaoro karana danu e haboioa.—1 Han. 11:​9, 10; 12:4.

12. David ena hereva amo dahaka ta dibamu?

¹² Dahaka ta dibamu? Iehova baita badinaiamu neganai, be hanamodamu bona be durudamu. (Sal. 1:​1-3) Vaia, Iehova na se gwa Solomon heḡereḡerena taḡa bona lada bada baine henida. To bema eda Dirava baita badinaiamu, aonega be henidamu abi hidi maorodia baita karamu. (Her. 2:​6, 7; Iak. 1:5) Ena hahekau herevadia ese be durudamu, ḡaukara, skuli, moni, bona moale karadia ta abi hidimu neganai. Bema ena sisiba baita badinaiamu, eda hetura karana ia ida baita gimaiamu bona mauri hanaihanai baita abiamu. (Her. 2:​10, 11) Tura namodia baita bamodiamu. Bona eda ruma bese maurina na baita moalelaiamu.

13. Dahaka ese Carmen e durua ena mauri e hanamoa?

¹³ Mozambique ai e nohomu hahinena ta ladana Carmen na e lalo, skuli badana be laomu neganai ena mauri na be namomu. Una dainai iunivesiti ela. Ia na e gwa, “Na dibava ḡaudia na na ura heniva. To egu nega bona goada e haoreva. Daba 7:30 a.m. lau na da skuli gabuna ai ela bona adorahi 6:00 p.m. skuli na rakataniava. Hebou ilao henidia na auka, bona lauma dalanai na manoka. Na laloparara, Iehova ena sisiba na asina badinaiava.” (Mat. 6:24) Enai e varava ḡaudia na e ḡuriḡurilai bona eda pablikeisin ai research e kara. Ia na ma e gwa: “Elda taudia bona sinagu edia amo sisiba namodia na abi murinai, lalogu na hadaia iunivesiti baina rakatania bona Iehova baina hesiai henia hanaihanai. Una ese e durugu egu mauri ai abi hidi namodia na kara, bona una na asina lalohisihisilaia.”

14. Mose bona David edia hereva amo mai anina bada ḡauna be dahaka?

¹⁴ Mose bona David ese Iehova e lalokau henia bona e diba ia bae badinaia na mai anina bada. Edia hereva oredia ai, idia ese ma haida e hagoadadia edia haheitalai bae tohotohoa bona Iehova edia Dirava bae badinaia. Idia na ma e gwa Iehova e rakataniamu taudia ese iena lalonamo bona hahenamo iboudiai be haboiomu. Hari iseda negai danu, edia  sisiba na mai anina bada. Laḡani momo muridiai, Iehova ena hesiai tauna ma ta ese ia iabidadama henina karana ena namo e hahedinaraia.

“LAU NA NA MOALE BADAMU”

15. Aposetolo Ioane ena mauri ai dahaka e vara?

¹⁵ Ioane na Iesu Keriso ese e lalokau heniava aposetolo tauna. (Mat. 10:2; Ioane 19:26) Iesu ena haroro ḡaukara ai Ioane ese e bamoava, ena hoa karadia e ita, bona nega aukadiai danu ia na dounu Iesu e badinaiava. Iesu e hamasea neganai, ia na unuseniai bona e toreisi lou murinai danu e itaia. Bona Kristen kongrigeisin e tubu dalana e itaia, ‘sivarai namona taunimanima iboudiai guba henunai vada e harorolai henidia na e itaia.’—Kol. 1:23.

16. Daidia be Ioane ena revareva amo namo e abi?

¹⁶ Ioane ena mauri ginigabedia ai, Dirava ena Hereva kahana taina e torea. Ia ese “Iesu Keriso ihahedinaraina herevana” e torea. (Apok. 1:1) Evanelia bukana ta danu e torea. Bona revareva toi, Ioane Ginigunana, Ioane Iharuana, bona Ioane Ihatoina e toredia. Ena revareva ihatoina na abidadama Kristen tauna Gaio dainai e torea, Ioane ese ia e lalokau heniava, natuna na heto. (3 Ioane 1) Una negai, Ioane ese momo na unu e lalodia toma. Una abidadama tauna ese e tore herevadia na Iesu e badinaiamu taudia iboudiai e hagoadadia.

17. Ioane Ihatoina 4 heḡereḡerena, dahaka ese moale bada be havaraiamu?

¹⁷ Ioane be dahaka e torea? (3 Ioane 4 ba duahia.) Ioane na Dirava ibadinana amo e varamu moalena e herevalaia. Ena revareva ihatoina e torea neganai, haida na hahediba koikoidia e halasiva bona kongrigeisin ai hekwakwanai badadia e vara. To, haida na dounu ‘hereva momokani dalana ai e rakava.’ Iehova e badinaiava bona ‘iena haheḡani dalana ai e rakava.’ (2 Ioane 4, 6) Unu abidadama Kristen taudia ese Iehova bona Ioane danu e hamoaledia.—Her. 27:11.

18. Ioane ena hereva amo dahaka ta dibamu?

¹⁸ Dahaka ta dibamu? Abidadama ese moale e havaraiamu. (1 Ioane 5:3) Heḡereḡere, ita na ta moalemu badina ta dibamu Iehova ta hamoaleamu. E itadamu tanobada ena hedibaḡani ta dadaraimu bona hereva momokani ta abia daemu neganai, ia na e moalemu. (Her. 23:15) Aneru guba ai danu e moalemu. (Luka 15:10) Ita danu eda tadikaka bona taihu ta itadiamu, hahetoho bona hedibaḡani  negadiai edia abidadama ai e gini goadamu neganai ta moalemu. (2 Tes. 1:4) Bona Satana ena tanobada be oremu neganai, baita moalemu badina Iehova ta badinaia.

19. Taihu ta ladana Rachel ese ma haida ediai hereva momokani ihahedibalaina karana be ede e herevalaia toma? (Laulau danu ba itaia.)

¹⁹ Ita na ta moalemu bema hereva momokani na ma haida ediai ta herevalaiamu. Rachel, ia na Dominican Republic ai e nohomu, na e mamia ma haida ediai eda Dirava ta herevalaiamu na hahenamo badana ta. Ia na haida e durudia Iehova bae tomadiho henia, eto: “Na itaiamu na durudia taudia ese Iehova e lalokau heniamu, e abidadama heniamu, bona ia ihamoalena totona edia mauri e haidaumu neganai, na abiamu moalena na idau herea. Una ese egu hekwarahi bona na dadarai ḡaudia na e hereadiamu.”

ABIDADAMA TATAUDIA EDIA HEREVA OREDIA AMO NAMO BAVABI

20. Ededia dala ai ita na Mose, David, bona Ioane heḡereḡeredia?

²⁰ Mose, David, bona Ioane edia noho negadia bona edia noho daladia na i’idau ita eda amo. To dala momo ai ita na idia heḡereḡeredia. Idia na Dirava momokanina e tomadiho heniava, bona ita danu unu ta kara tomamu, Iehova ta ḡuriḡuri heniamu, bona iena amo heduru bona hahekau herevadia ta tahumu. Danu ta abia daemu Iehova ese ia e badinaiamu taudia na e hanamodiamu.

21. Mose, David, bona Ioane edia sisiba baita badinamu neganai, dahaka hahenamo baita abimu?

²¹ Namona na unu tatau edia hereva oredia bona Iehova ena taravatu baita badina. Bena ta karamu ḡaudia iboudiai lalodiai baita kwalimumu. Eda “mauri dinadia [na] bae hoho” ela bona hanaihanai! (Deu. 30:20) Bona baita moalemu badina Tamada lalokauna guba ai ta hamoaleamu, ia ese ena gwauhamata iboudiai na be haḡuḡurumu, ita ese asita laloamu dalana ai.—Efe. 3:20.