1. Iesu ena kara namo hereana ta be dahaka? Ba herevalaia.

IESU ena kara namo hereana ta na, ita ese ta davarimu hekwakwanaidia e lalopararalaimu. Tanobada ai e nohova neganai, ‘e moaleva taudia ida e moale’ bona ‘e taitaiva taudia ida e tai.’ (Rom. 12:15) Heḡereḡere, ena hahediba 70 na edia haroro ḡaukara amo mai moaledia ida e lou neganai, “Iesu na Lauma Helaḡa bagunai e hisi dae.” (Luk. 10:17-21) To danu, Lasaro ena mase dainai e taitaiva taudia e itadia neganai, “lalona e hisihisi bada, darana e doko.”​—Ioa. 11:33.

2. Dahaka dainai Iesu ese taunimanima e bogadia hisimu?

² Ena be Iesu na tau ḡoevadaena, to dia ḡoevadae taudia edia hisihisi na e mami bona e bogadia hisi. Dahaka dainai? Mai anina bada ḡauna na, Iesu na taunimanima e lalokau henidiamu. Vanega stadi ese e hahedinaraia, ia ese “taunimanima natudia iboudiai na e moalelaidiava.” (Her. 8:31) Taunimanima e lalokau henidiamu dainai, edia lalohadai na mai dibana namonamo. Aposetolo Ioane na eto: “Taunimanima lalodia vada e diba vaitani.” (Ioa. 2:25) Iesu ese taunimanima na e bogadia hisiva. Bona e lalokau henidiava dainai, idia ese Basileia sivaraina na e abia dae. Bema Iesu heḡereḡerena taunimanima baita bogadia hisimu, eda haroro ḡaukara ai baita durudia namonamomu.​—2 Tim. 4:5.

3-4. (a) Bema taunimanima baita bogadia hisimu, eda haroro ḡaukara be ede baita laloa tomamu? (b) Ina stadi ai dahaka baita herevalaimu?

³ Aposetolo Paulo na mai dibana iena maduna ta na, sivarai namona baine harorolaia; ita danu namona na unu baita kara toma. (1 Ko. 9:16) Bema ita ese haida na ta bogadia  hisimu eda haroro ḡaukara na baita laloa badamu. Ta uramu baita hahedinaraia edia namo ta lalomu dainai ta durudiamu. Dibada “ḡau ihenina be namo bada, ḡau iabina be namo maraḡi.” (Apos. 20:35) Bema una siri ena hereva baita laloa badamu, eda haroro ḡaukara na baita moalelaiamu.

⁴ Ina stadi ai, ita ese haroro ḡaukara ai hebogahisi baita hahedinaraia daladia baita dibamu. Ginigunana na, Iesu ena hemami taunimanima ediai baita herevalaiamu. Bena, iena haheitalai baita tohotohoa daladia 4 baita herevalaimu.​—1 Pe. 2:21.

5-6. (a) Iesu be daidia e bogadia hisi? (b) Isaia 61:1, 2 ai e perovetalaia heḡereḡerena, dahaka dainai Iesu na e haroro henidia taudia e bogadia hisi?

⁵ Iesu ese haida e bogadia hisi dalana ta mani aita laloa. Nega ta, Iesu na ena hahediba ida sivarai namona e harorolaia dina diho bona asie laḡa-ani. Idia na “asi edia nega bae aniani.” Una dainai, Iesu ese ena hahediba na “gabu ḡaḡaena ta” e laohaidia, ‘laḡadia bae ani.’ To hutuma na Iesu bona ena hahediba baela gabunai e kau guna. Iesu e kau bena hutuma e itadia neganai, ena hemami be ede bamona bona dahaka e kara? Ia ese “e bogadia hisi, * e kara mamoe asi ireḡudia na heheto. Bena e hadibadia.”​—Mar. 6:30-34.

⁶ Dahaka dainai Iesu ese taunimanima e bogadia hisi? Badina e itadia idia na “e kara mamoe asi ireḡudia na heheto.” Reana Iesu ese e itadia haida na ogoḡami taudia bona haida na e hekwarahiva edia ruma bese bae naridia. Ma haida na edia lalokau taudia e mase dainai e dara dokova. Iesu ese edia metau na e lalopararalai. Vanega stadina ai ta herevalaia heḡereḡerena, Iesu danu hekwakwanai unu bamodia haida e davari. Iesu ese idia na e bogadia hisi bona sivarai namona amo tauhalo e henidia.​—Isaia 61:1, 2 ba duahi.

7. Iesu ena haheitalai be ede baita tohotohoa toma?

 ⁷ Iesu ena haheitalai amo dahaka ta dibamu? Iesu ena nega heḡereḡerena, hari taunimanima momo na “e kara mamoe asi ireḡudia na heheto.” Idia na hekwakwanai momo e davarimu. Baita durulaidia ḡauna ta na mia, una na Basileia sivaraina. (Apok. 14:6) Una dainai, Biaguda baita tohotohoa, “manoka-manoka taudia bona ogoḡami taudia” ediai sivarai namona baita harorolaia. (Sal. 72:13) Taunimanima ta bogadia hisimu dainai, ta uramu kara ta baita karaia idia idurudia.

8. Haroro ḡaukara ai hebogahisi baita hahedinaraia dalana ta be dahaka? Haheitalai ba gwauraia.

⁸ Dahaka ese baine duruda ta haroro henidiamu taudia baita bogadia hisi? Namona na edia lalohadai bona hemami baita lalo, bona ta uramu taunimanima ese bae kara henida heḡereḡerena, ita ese unu baita kara henidia toma. * (Mat. 7:12) Baita kara ḡaudia 4 mani aita herevalai. Ginigunana na, ta ta baita durudia daladia baita lalo. Sivarai namona iharorolaina karana na dokta ena ḡaukara ida baita haheḡereḡerea. Dokta namona na gorere taudia ta ta idurudia daladia e lalomu. E nanadaidiamu bona gorere tauna ese ena hemami e herevalaiamu neganai, e hakala namonamomu. Dokta na dia maoromaoro muramura e henimu, to gorere tauna enai test haida e karamu unu amo ena gorere baine diba bena muramura maorona baine heni. Una heḡereḡerena, haroro ai ta davaridiamu taudia ediai haroro dalana tamona mo basita badinaia. To, ta ta ena noho dalana baita laloa bona ena lalohadai heḡereḡerena baita durua.

9. Edena lalohadai basita abia na namo? Bona haroro ai baita badinaia dala namona ta be dahaka?

⁹ Haroro ḡaukara ai ta o davariamu neganai, basioto ena noho dalana, e abi daemu hahediba herevadia bona badidia na vada mai dibamu. (Her. 18:13) To, henanadai namodia amo ena lalohadai ba tahua. (Her. 20:5) Bema emu gabu ai ta ena ḡaukara, ena ruma bese, ena mauri dalana eiava lalohadai ba henanadailai na dia kerere, unu ba kara toma. Bema henanadai maorodia baita henimu, edia haere amo sivarai namona e uramu bae diba badina baita dibaiamu. Ta ta edia dabu ḡaudia baita lalo bona una heḡereḡerena baita durudia namonamo, Iesu e kara bamona.​—1 Korinto 9:19-23 ba itaia.

10-11. Korinto Iharuana 4:7, 8 heḡereḡerena, haida baita bogadia hisi dalana iharuana be dahaka? Haheitalai ta a gwauraia.

¹⁰ Iharuana na, edia mauri dalana baita laloa. Nega haida, e davarimu hekwakwanaidia  na baita lalopararalai dibamu. Badina ita na dia ḡoevadae tauda bona edai hekwakwanai e varamu danu. (1 Ko. 10:13) Ta dibamu ina nega lalonai mauri na auka. To Iehova ena heduru dainai ta haheaukamu. (2 Korinto 4:7, 8 ba duahi.) To mani Iehova asie hetura heniamu taudia a lalodia, reana ediai na auka bae haheauka. Iesu heḡereḡerena, ta bogadia hisimu dainai ta uramu idia ediai sivarai namona baita herevalaia.​—Isa 52:7.

¹¹ Tadikaka ta ladana, Sergey, ena ekspiriens aita laloa. Hereva momokani do se diba neganai, ia na hemarai tauna. Una dainai Ienai na auka haida baine hereva henidia. Gabeai, Baibul stadi e abia dae. Sergey na eto: “Baibul na stadilaia neganai, na laloparara Kristen taudia edia maduna na haida ediai edia abidadama bae gwauraia hedinarai. Na laloava lau na dia heḡereḡere unu baina kara toma.” To, ia ese hereva momokani do asie kamonai taudia na e lalodiava, bona e diba reana edia mauri na auka badina Iehova na asi dibadia. Sergey na ma eto: “Na diba hereva momokanidia dainai na moalemu bona lalomaino na abia. Bona na dibamu haida ese unu hereva momokani bae diba na mai anina bada.” Sergey ese haida e bogadia hisi dainai, asi garina ida e haroro henidia. Ia na eto: “Na hoa badina haida ediai Baibul iherevalaina karana ese e durugu basina hemarai bona basina gari. Una ese danu egu abidadama e hagoadaia.” *

12-13. Dahaka dainai haroro ḡaukara ai haida ta hadibadiamu neganai baita haheauka na namo? Haheitalai mani a herevalaia.

¹² Ihatoina na, haida o hadibadiamu neganai ba haheauka. Ba helalotao, ita mai dibada hereva momokanidia haida na asi dibadia. Bona momo na edia tomadiho ai e hadibadia ḡaudia na dounu e badinamu. Reana e laloamu edia tomadiho ese edia ruma bese, kastom, bona hanua taudia e hatamonadiamu. Ede baita durudia toma?

¹³ Ina haheitalai aita laloa: Nese gunana  ta e dika neganai, bae hanamoa totona dahaka e karamu? Nese matamatana e karaiamu lalonai nese gunana na dounu e ḡaukaralaiamu. Matamatana e haoreamu neganai, gunana na e kokiamu. Una heḡereḡerena, bema ta uramu taunimanima na e abi daeva hahediba hereva ‘gunadia’ bae rakatani, ḡau ginigunana na baita durudia e dibamu hereva momokani ‘matamatadia’ bae lalopararalai bona bae abi dae. Unu amo edia tomadiho ai e diba hahediba hereva gunadia bae rakatani. Unu senisi bae kara totona namona na mai haheaukada ida baita durudia.​—Rom. 12:2.

14-15. Tanobada paradaisona ai mauri hanaihanai helarona asi dibadia namonamo taudia be ede baita durudia toma? Haheitalai ta ba gwauraia.

¹⁴ Bema mai haheaukada ida taunimanima baita haroro henidiamu, basitato nega ginigunana e kamonaimu hereva momokanidia na be lalopararalaimu eiava be abi dae haraḡamu. To, ta bogadia hisimu dainai baita durudia, unu amo taina ruana Baibul ena hereva bae lalopararalaia. Heḡereḡere, reana ta baita durua tanobada paradaisona ai baita abia mauri hanaihanai helarona baine lalopararalaia. Momo na una hahediba herevana na asie lalopararalaia namonamomu eiava asi dibadia. Edia lalohadai na, ta e masemu neganai ia na ma basine mauri loumu. Eiava e laloamu kara namo taudia iboudiai guba baela. Ede baita durudia toma?

¹⁵ Tadikaka ta ese taunimanima e durudiamu dalana namona ta mani aita laloa. Ginigunana na, Genese 1:28 e duahia. Bena, ruma tauna e nanadaia, ‘Dirava ese taunimanima ginigunadia be edeseniai e atodia bona mauri ede bamona e moalelaia?’ Momo na e haere, eto, “Tanobada ai, bona mauri namona bae moalelaia.” Bena, tadikaka na ma Isaia 55:11 e duahia, bena e henanadai, ‘Dirava ena ura be ma e haidaua eiava?’ Nega momo, ruma tauna na e gwaumu, lasi. Dokonai, tadikaka ese Salamo 37:10, 11 e duahia bena e henanadai, ‘Vaira negana ai dahaka be varamu?’ Baibul na unu e ḡaukaralaia namonamo tomamu dainai, momo e durudia e laloparara Dirava na e uramu taunimanima namodia na tanobada Paradaisona ai bae mauri hanaihanai.

16-17. Hereva Lada-Isidia 3:27 baita laloamu neganai, ededia dala ai hebogahisi baita hahedinaraia? Ekspiriens ta a herevalaia.

¹⁶ Ihahanina na, dala ba tahu ma haida ba durudia. Heḡereḡere, nega haida na nega kereredia ai ruma taudia ta vadivadiamu, ani? Baita sori henidia bona baita hadibadia nega namona ma ta ai baita vadivadidia. Bema ruma tauna ta na ḡaukara maraḡina ta e karaiamu dainai heduru e uramu, dahaka baita kara? Eiava bema ta na gorere o buruka dainai ruma ai mo e nohomu bona e uramu ta ese ena ura ḡauna ta baine karaia, heḡereḡere stoa bainela, dahaka baita kara?  Nega unu bamodia ai, namona na baita heduru.​—Hereva Lada-isidia 3:27 ba duahia.

¹⁷ Taihu ta ena kara namona ese anina namona e havaraia. Ruma bese ta na natudia ta e mase, bona taihu na e hebogahisi dainai ihagoadadia revarevana ta e torea. Una revareva ai hahegoada siridia haida e tore. Una revareva ese ruma bese be ede e durua toma? E mase merona sinana ese una revareva ihalouna herevana na ini e torea toma: “Varani egu dina na se namo. To emu revareva ese e hagoadamai bada herea. Una dainai na tenkiu henimumu. Varani emu revareva na reana nega 20 na duahia. Emu hebogahisi karana ese tauhalo e henimai. A uramu mai kudoumai idoinai ida baia tenkiu henimu.” Haida ese e davarimu hisihisidia baita mamimu bena idurudia totona kara haida baita karamu neganai, anina namona be havaraiamu.

18. Korinto Ginigunana 3:6, 7 ai, eda haroro ai dahaka baita laloatao be namo, bona dahaka dainai?

¹⁸ Haroro ai, iseda ḡaukara na haida baita durudia Dirava bae dibaia. A Dirava ese anina baine havaraia. (1 Korinto 3:6, 7 ba duahi.) Iehova sibona ese taunimanima e veridia maimu. (Ioa. 6:44) To, ta na sibona abi hidi baine kara diba sivarai namona baine kamonaia eiava lasi. (Mat. 13:4-8) Ba helalotao, momo ese Iesu ena hereva na asie abi daeva, ena be Iesu na Hahediba Tauna hereadaena. Una dainai, ta durudiamu taudia momo ese eda hereva se abi daemu neganai, namona na basita lalomanoka.

19. Bema haroro ḡaukara ai hebogahisi baita hahedinaraiamu, dahaka hahenamo baita davarimu?

¹⁹ Eda haroro ḡaukara ai hebogahisi karana baita hahedinaraiamu neganai, hahenamo baita davarimu. Eda haroro ḡaukara bona haida ta durudiamu karana na baita moalelaiamu. Bona “mauri hanaihanai bae abia” kudou namo taudia baita durudia dibamu sivarai namona bae abia dae. (Apos. 13:48) Una dainai “dala baita davaria negadia ai, taunimanima iboudiai baita kara namo henidia.” (Gal. 6:10) Unu amo mai moaleda ida Tamada guba ai baita heatolaia.​—Mat. 5:16.