1. Dirava imatauraina anina be dahaka, bona dahaka dainai Iehova e lalokau heniamu taudia ediai una na mai anina bada?

DIRAVA e lalokau heniamu Kristen taudia ese ia na e matauraiamu. Dirava baita matauraia anina be dahaka? Dirava e matauraiamu taudia na asie uramu ia bae habadua, badina asie uramu edia hetura karana ia ida bae hadikaia.​—Sal. 111:10; Her. 8:13.

2. King David ena hereva Salamo 86:11 ai heḡereḡerena, ededia ḡau rua baita herevalaimu?

² Salamo 86:11 ba duahia. Una siri ena hereva bo laloamu neganai, bo itaiamu King David na e diba Iehova baita matauraia na mai anina bada. Mani David ena ḡuriḡuri ai e gwaurai herevadia baita badina daladia aita herevalai. Ginigunana na, Dirava ladana baita matauraia badidia haida baita herevalaimu. Iharuana be, dina ta ta lalodiai edena dala ai baita hahedinaraia ita ese Dirava ladana na ta matauraiamu.

3. Dahaka ese Mose e durua Dirava baine matauraia totona?

³ Mani Mose ena hemami a laloa, ia na nadi kohuanai bona matahanai lalonai e itaia Iehova hairaina na ia badina amo e hanai. Insight on the Scriptures na e gwaumu: “Iesu Keriso do sema neganai e noho taudia ediai ḡau unu bamona ta se vara.” Mose na aneru ta ese e gwaurai herevadia e kamonai, eto: “Iehova;  Iehova, hebogahisi bona harihari-bada Diravana. Badu ai na halahemu; hebogahisi ai bona uraheni ai na haraḡamu. Daha daha na bogadia hisimu; kara-havara bona kara rea bona kara-dika na gwau taomu.” (Eso. 33:17-23; 34:5-7) Mose ese Iehova ladana e ḡaukaralaiava negadiai, reana una e vara ḡauna na e laloava. Una dainai gabeai Mose na Israel taudia e hamaorodia eto: ‘Iehova, emui Dirava, ladana ḡoeva-daena bona herea-daena boma matauraia.’​—Deu. 28:58.

4. Dahaka ese baine duruda Iehova baita matauraia totona?

⁴ Iehova ladana ta laloamu negadiai, iena kara danu baita lalodia. Heḡereḡere, siahu, aonega, hahemaoro maoromaoro, bona lalokau. Unu kara badadia bona ena kara ma haida baita lalodiamu neganai, be durudamu ia baita matauraia.​—Sal. 77:11-15.

5-6. (a) Dirava ladana anina be dahaka? (b) Esodo 3:13, 14 bona Isaia 64:8 heḡereḡerena, ededia dala ai Iehova ese ena ura baine haḡuḡurua?

⁵ Ita ese Dirava ladana anina vada ta dibaia, a? Diba bada taudia momo na e abia daemu ina lada Iehova anina na “Dahaka ai Na Uramu Baina Hahelao Na Vada Baina Hahelao.” Una lada anina ese e hahedinaraiamu Iehova ena ura na ḡau ta ese basine koua diba bona ia na ḡau idauidau baine kara diba. Edena dala ai?

⁶ Iehova na ena ura baine haḡuḡurua totona, sibona ḡau idauidau ai baine hahelao diba. (Esodo 3:13, 14 ba duahi.) Eda pablikeisin ai, nega momo e hadibadamu Dirava ena kara na baita lalodia bada. Danu, Iehova na dia ḡoevadae taudia baine ḡaukaralaidia diba, ia bae hesiai henia bona ena ura baine haḡuḡurua totona. (Isaia 64:8 ba duahia.) Unu dala amo Iehova ese ena ura baine haḡuḡurua. Momokani, ḡau ta ese Iehova na basine koua diba ena ura baine haḡuḡurua totona.​—Isa. 46:10, 11.

7. Edena dala ai Tamada gubai e nohomu enai eda tenkiu karana baita hahedinaraia?

⁷ Tamada gubai e nohomu baita tenkiu henia dalana na, ia e kara ḡaudia bona ena heduru amo ta karamu ḡaudia baita lalodia dobu. Heḡereḡere, ia ese e havara ḡaudia iboudiai  baita lalodiamu neganai baita hoamu. (Sal. 8:3, 4) Bona iena ura baita karaia totona e duruda daladia baita lalodia dobumu neganai, Ia na baita matauraia badamu. Momokani ina lada Iehova na mai hoana. Una lada anina ese Tamada ena kara, e kara ḡaudia, bona be karamu ḡaudia iboudiai e hahedinaraimu.​—Sal. 89:7, 8.

8. Deuteronomi 32:2, 3 heḡereḡerena Iehova na e uramu iena hesiai taudia be dahaka bae kara?

⁸ Israel taudia na Gwauhamata Tanona ai do asie vareai neganai, Iehova ese ane ta na Mose e hadibalaia. (Deu. 31:19) Bona Mose ese una ane na Israel taudia e hadibalaidia. (Deuteronomi 32:2, 3 ba duahi.) Siri 2 bona 3 baita lalodiamu neganai baita lalopararamu, Iehova na se uramu ladana na baine hehuni o taunimanima na bae laloa una na helaḡa herea dainai basie gwauraia. Ia na e uramu taunimanima iboudiai ese ia ladana bae dibaia. Israel taudia ediai Mose ese Iehova ena kara bona ladana hairaina e hadibadia na hahenamo ta. Una ese edia abidadama na e hagoadaia, una na heḡereḡere medu hetuturuna tubutubu ḡaudia latadiai na heto. Dahaka baita kara unu amo eda hahediba daladia na unu bae heto?

9. Iehova ladana ihahelaḡana karana be ede baita durua toma?

⁹ Ruma-ta-ruma-ta ai eiava pablik gabudia ai ta haroromu negadiai, eda Baibul baita ḡaukaralaia Dirava ladana, Iehova, na taunimanima baita hadibalaidia. Pablikeisin baita henidia, vidio baita haheitalaidia, bona eda websait amo ḡau ma haida baita hahedinaraidia. Ḡaukara gabudiai, sikuli gabudiai, ta loamu negadiai, dala baita tahu eda Dirava lalokauna bona ena kara baita herevalai. Iehova ese ita daidai bona tanobada ai be karamu ḡau namodia na ta davaridiamu taudia ediai baita herevalaimu neganai, reana idia ediai una na nega ginigunana be lalopararamu Iehova ese taunimanima na e lalokau henidiamu. Tamada lalokauna sivaraina momokanidia ta herevalaimu neganai, ita na Dirava ladana ihahelaḡana karana ta duruamu. Taunimanima ta durudiamu bae laloparara idia na hereva koikoidia e hadibalaidia. Baibul amo taunimanima ta hadibadiamu hereva momokanidia na hereva namo hereadia.​—Isa. 65:13, 14.

10. Dahaka dainai eda Baibul stiuden na Dirava ena taravatu mo baita hadibalaidia na dia heḡereḡere?

¹⁰ Baibul stadi ta ta karaiamu neganai, ta uramu eda stiuden baita durua Iehova ladana baine dibaia bona baine ḡaukaralaia. Bona ta uramu baita durua Iehova ladana anina baine dibaia namonamo. Unu baita kara toma totona, Dirava ena haheḡani, ena dala bona ena taravatu mo baita hahedibalai, a? Reana stiuden namona na Dirava ena taravatu be dibaiamu bona be ura heniamu. To, ia be lalokau dainai Iehova be kamonai heniamu, a? Ba helalotao, Heva na Dirava ena taravatu na mai dibana, to unu taravatu e heni Tauna na se lalokau henia, Adam danu unu e kara toma. (Gen. 3:1-6) Una dainai, Dirava e uramu karadia bona ena kara maoromaoro taravatudia mo baita hahedibalai na dia heḡereḡere.

11. Bema eda stiuden na Dirava ena taravatu ta hadibadiamu, edena dala ai baita durudia taravatu e heni Tauna bae lalokau henia?

¹¹ Iehova e uramu karadia bona ena taravatu na iseda namo dainai e ato. (Sal. 119:97, 111, 112) To eda stiuden ese una na basie abia daemu, bema basie lalopararamu Iehova na ita e lalokau henidamu dainai unu taravatu e ato. Una dainai, eda stiuden baita nanadaia: “Dahaka dainai o laloamu Dirava ese ena hesiai taudia e noidiamu ini bae kara toma eiava unu basie kara toma? Ia be Dirava ede bamona?” Bema eda stiuden baita durudiamu Iehova  bae laloa bona ladana bae matauraia, idia kudoudiai una na be laloa badamu. Eda stiuden ese dia taravatu mo to taravatu e heni Tauna danu be lalokau heniamu. (Sal. 119:68) Edia abiadadama na be goadamu bona be durudiamu hahetoho badadia bae haheaukalai totona.​—1 Kor. 3:12-15.

12. Edena dala ai David lalona na se tamona, bona una dainai dahaka e vara?

¹² Salamo 86:11 ai King David ese e torea herevana “lau lalogu ba haheboua tamona” na mai anina bada. King David na ena mauri lalonai e laloparara, ta ese abi hidi kererena baine karaia na haraḡa. Dina ta, David na ena ruma guhina amo tau ta adavana e diguva e itaia. Una negai, David be e ura kara maorona baine karaia eiava? Ia na mai dibana Iehova ena taravatu na: “Dekemu tauna, . . . adavana danu basio ḡahusia.” (Eso. 20:17) To, David na dounu una hahine e raraiava. Unu amo e hahedinaraia, ia lalona na se tamona badina ia na Bataseba e ura henia, to se ura Iehova baine hamoalea. Ena be David na laḡani daudau Iehova e hesiai henia, to ia na sibona ena ura e laloa bada. Una negai, David na dala kererena e badinaia. Una ese Iehova ladana na e hadikaia. Bona David na asi edia kerere taudia bona ena ruma bese ediai dika bada e havaraia.​—2 Sam. 11:1-5, 14-17; 12:7-12.

13. Ede ta diba tomamu David lalona na e tamona lou?

¹³ Iehova ese David na e matahakani henia, bona edia hetura karana na e namo lou. (2 Sam. 12:13; Sal. 51:2-4, 17) David na e lalo lou ia na sibona ena ura e laloa bada neganai, hekwakwanai bona hisihisi e havara. Iehova ese David e durua, a? Oibe, Iehova ena Hereva ese David na ini e herevalaia toma: “Iehova, ena Dirava, . . . e badinaiava.”​—1 Han. 11:4; 15:3.

14. Siboda ese edena henanadai baita heni, bona dahaka dainai?

¹⁴ David ena haheitalai amo ita na goada bona sisiba ta abimu. Iena kara dika badana amo Dirava ena hesiai taudia hari inai negai na e dibamu namona na bae henari namonamo. Ena be harihari eiava laḡani daudau lalonai Iehova ta hesiai henia, namona na siboda baita henanadai: ‘Kara maorona ikarana totona Satana ena hedibaḡani na dadaraimu, a?’

15. Edena dala ai Dirava imatauraina karana ese ita baine duruda matabodaḡa laulaudia basita ita?

¹⁵ Heḡereḡere, bema TV ai eiava intanet ai matabodaḡa laulauna ta be hedinaraimu bona una ese lalohadai dikadia na baine havara diba, oi be dahaka ba kara? Reana oi na haraḡa herea sibomu bo gwaumu, una laulau eiava muvi na dia ponografi laulauna. To, reana  Satana na una dala e ḡaukaralaiamu oi baine dibaḡanimu totona, a? (2 Kor. 2:11) Una laulau na ira ida baita haheḡereḡerea, tau ta ese ira e ḡaukaralaiamu au ta baine siria totona. Matamanai, ia ese ira matana na au ai be hatubuamu. Ira na una gabu tamona ai be hatubua louloumu neganai, au na be pararamu. Matabodaḡa laulaudia be ira matana ida baita haheḡereḡereamu, a? Reana ta na be lalomu laulau unu bamodia na dia didika, to be ita louloumu amo gabeai ia na Iehova vairanai baine kara dika diba. Una dainai, kudoumu ai ḡau kereredia na basio lalo. To lalomu idoinai ida Iehova ladana ba matauraia.

16. Hahetoho ta davarimu negadiai, ededia henanadai baita lalo?

¹⁶ Satana na dia matabodaḡa laulaudia mo, to ḡau idauidau amo e dibaḡanidamu kara kereredia baita kara totona. Ita be dahaka baita kara? Reana baita lalomu unu na dia didika. Heḡereḡere reana ini baita lalo tomamu: ‘Ini ba kara tomamu neganai orea murimurinai na basie atogumu, una na dia kara dika badana.’ Lalohadai unu bamona na kerere. Namona na siboda baita henanadai: ‘Satana be uramu una hedibaḡani baine ḡaukaralaia lau baine hamorugu totona, a? Bema ini ura dikadia ba lalo momomu, Iehova ladana ba hadikaiamu, a? Ina kara ese egu hetura karana Dirava ida be hanamoamu eiava be hadikaiamu?’ Unu henanadai na ba lalodia dobu. Iehova ba ḡuriḡuri henia aonega baine henimu bena mai momokanimu ida unu henanadai ba haerelai. (Iak. 1:5) Una ese oi na be gimamumu. Bona be durumumu hedibaḡani ba dadaraidia, Iesu e kara bamona, ia na eto: “Satana e, dauha aola.”​—Mat. 4:10.

17. Bema dia laloda idoinai ida ḡau ta baita karaiamu, dahaka dainai una na dia namo? Haheitalai ta ba gwauraia.

¹⁷ Bema ita na dia mai laloda idoinai ida ḡau ta baita karaiamu, una na dia namo. Mani a laloa,  spot tim ta lalonai spot taudia na asie ḡaukara heboumu. Haida na e uramu bae heaḡilaidia, a haida be asie uramu spot taravatudia bae badina, bona ma haida be e gunalaidiamu tauna asie matauraiamu. Unu e kara tomamu taudia na edia gadara helulu ai basie kwalimu. To, spot tim ta lalonai spot taudia na e ḡaukara heboumu bona e lalotamonamu neganai, e kwalimumu. Bema Iehova ihesiai henina karana ai emu lalohadai, emu ura, bona emu hemami na tamona, oi na vaitani una e ḡaukara heboumu spot tim bamona. Ba helalotao, Satani na e uramu ḡau kereredia bavabi hidi. Ia na e uramu emu lalohadai, hemami, bona ura na Iehova ena taravatu amo baine idau. To, namona na mai lalomu idoinai ida Iehova ba hesiai henia. (Mat. 22:36-38) Satana ena dala na basio lailaia.

18. Mika 4:5 ena hereva heḡereḡerena, lalomu ba hadaia dahaka ba kara na namo?

¹⁸ David heḡereḡerena Iehova ba ḡuriḡuri henia, ia na eto: “Lau lalogu ba haheboua tamona, oi ladamu imatauraina ai.” Emu mauri lalonai, una ḡuriḡuri heḡereḡerena ba kara. Dina ta ta ai, lalomu ba hadaia emu abi hidi badadia bona maraḡidia ese bae hahedinarai oi ese Iehova ladana helaḡana na o matauraiamu. Unu bo kara tomamu neganai, bo hahedinaraiamu oi na Iehova ena Witnes tauna ta. (Her. 27:11) Ita iboudai na peroveta tauna Mika ese e gwauraia herevana heḡereḡerena baita gwaumu: “Ita ese Iehova, eda Dirava, ladana ai baita raka, ela bona hanaihanai.”​—Mika 4:5.