1-2. (a) Iesu ese ena hahediba taudia be dahaka sisiba e henidia? (b) Dahaka dainai tauanidia e manoka? (Laulau danu ba itadia.)

 “LAUMA na e uramu, a tau-anina na eme manoka.” a (Mat. 26:41b) Una hereva amo Iesu na e hahedinaraia, ita na dia ḡoevadae dainai kerere na baita kara dibamu. To ena hereva amo danu sisiba e heni: Namona na basita lalo hedibaḡani ai ita na basita morumu. Una hanuaboi ai Iesu ese una hereva do se gwaurai neganai, ena hahediba na e gwauhamata ia na basie rakatania. (Mat. 26:35) Idia na e ura kara maorona bae karaia. To se laloparara nega aukadia ai idia na bae moru haraḡa diba. Una dainai, Iesu ese e haḡanidia, eto: “Ba gima, ba ḡuriḡuri, hedibaḡani ai ba vareai na garina.”—Mat. 26:41a.

² To, ena hahediba taudia na se gima. Iesu e dogoatao neganai, idia be ia e badinaia eiava e rakatania? Idia na se gima dainai, Iesu e rakatania.—Mat. 26:56.

3. (a) Iehova baita badinaia totona, dahaka dainai basita lalo hedibaḡani ai ita na basita morumu? (b) Ina atikol ai dahaka baita herevalaimu?

³ Basita laloa ita na basita morumu. Momokani, ita na asita uramu baita karaia ḡauna ta ese Iehova lalona baine hahisia. To danu, ita na dia ḡoevadae bona hedibaḡani ai baita moru  dibamu. (Roma 5:12; 7:​21-23) Nega haida, asita lalomu negadiai hedibaḡani baita davarimu. To Iehova bona Natuna baita badinadia totona, Iesu ese e gwauraia herevana, hanaihanai ba gima hedibaḡani ai ba vareai na garina, baita badinaia na mai anina bada. Ina atikol ese be durudamu unu baita kara toma. Baita herevalaimu ḡaudia na ini: Ginigunana, hedibaḡani bae vara gabudia o ḡaudia baita dadarai. Iharuana, siboda baita hegima daladia. Ihatoina, hanaihanai baita gima daladia.

HEDIBAḠANI BAE VARA GABUDIA O ḠAUDIA BAITA DADARAI

4-5. Dahaka dainai baita henahua toho kerere maraḡidia danu basita kara?

⁴ Kerere maraḡidia ese danu eda hetura karana Iehova ida na be hadikaia dibamu. Bona, bema basita henari namonamomu, kerere badadia danu baita kara dibamu.

⁵ Ita iboudai na hedibaḡani ta davarimu. To eda manoka ḡaudia na idauidau, una dainai hahetoho idauidau ese bae hamoruda diba. Heḡereḡere, reana ta be e hekwarahimu matabodaḡa hedibaḡanidia baine dadarai. Ma ta be kara mirodia, unu na tauanina igadaralaina eiava ponografi i’itadia karana baine dadaraia. Ma ta be e hekwarahimu taunimanima igari henidia karana, hekokoroku, badu haraḡa, eiava ma ḡau ta baine dadaraia totona. Iakobo na e gwa, “taunimanima ta sibona ena ura dikadia ese lalona e aniamu bona e koiamu.”—Iak. 1:14.

6. Mai momokanida ida dahaka baita kara be namo?

⁶ Oi mai dibamu edena hedibaḡani ai bo moru haraḡa dibamu, a? Bema ita na ta gwaumu asi eda manoka ḡaudia eiava kara dika badana ta basita karaiamu, ita na siboda ta hekoimu. (1 Ioane 1:8) Ba helalotao, Paulo na e gwa ‘lo Kristen tauna’ basine henari namonamomu neganai hedibaḡani ai be moru dibamu. (Gal. 6:​1, NWT) Namona na mai momokanida ida baita abia dae ita na mai eda manoka ḡaudia.—2 Kor. 13:5.

7. Ededia ḡau daidiai baita gima? Haheitalai ta ba gwauraia.

⁷ Bema e hamorudamu hedibaḡanidia na ta lalopararalaimu, dahaka baita kara be namo? Baita hekwarahi unu hedibaḡani baita dadaraidia! Haheitalai na ina, Baibul negadiai hanua ta maḡuna ena manoka gabudia na ia ikoukouna. Una dainai, gima taudia momo e atodiava hanua bae gimaia totona. Una heḡereḡerena, e hamanokadamu ḡaudia baita dibadiamu ese be durudamu, baita gimamu.—1 Kor. 9:27.

 SIBODA BAITA HEGIMA DALADIA

8-9. Hereva Lada-isidia karoa 7 ai e herevalaia eregabe tauna be edena dala ai kara dika bema dadaraia? (Hereva Lada-isidia 7:​8, 9, 13, 14, 21)

⁸ Edena dala ai siboda baita hegima? Hereva Lada-isidia karoa 7 ese e herevalaia eregabe tauna ena amo baita diba ḡaudia baita lalodia. Ia na ariara hahinena ta ida matabodaḡa karadia e kara. Siri 22 ese e hadibadamu eregabe tauna na una hahine murina amo ela. To siri matamadia ese e hahedinaraiamu una eregabe tauna na kara haida e kara bena gabeai kara dika badana e karaia.

⁹ Eregabe tauna be dahaka e kara bena e kara dika? Ginigunana, hanuaboi ai, ia na ‘una hahine ena ariara daigunina e raka henia.’ Bena, ena ruma lao dalana ai e raka. (Hereva Lada-isidia 7:​8, 9 ba duahidia.) Hahine e itaia neganai, ia na se raka oho. Una dainai, hahine ese e harahua bona ena boubou ḡaudia e kara sivaraidia na e hakala heni. (Hereva Lada-isidia 7:​13, 14, 21 ba duahidia.) Bema una eregabe tauna ese abi hidi kereredia basinema kara, ia na hedibaḡani bema dadaraia bona basinema kara dika.

10. Edena dala ai ta na una eregabe tauna heḡereḡerena baine kerere diba?

¹⁰ Una sivarai ese Iehova e tomadiho heniamu taudia ediai baine vara diba ḡauna e hahedinaraiamu. Reana kara dika badana ta be karaiamu murinai be laloamu ḡau iboudiai na e vara “haraḡa”. Eiava reana be gwaumu, “Una na e vara kava.” To, e vara ḡaudia be haeromu neganai, be dibamu ia na abi hidi kereredia e kara guna dainai kara dika badana e karaia. Reana ia na Iehova asie lalokau heniamu taudia e bamodia, moale karadia kereredia ai e vareai, eiava intanet ai websait dikadia e ita o Kristen taudia basiela gabudia ela. Danu reana ia na ḡuriḡuri karana e hadokoa, Baibul se duahiava, hebou se laova, bona se harorova. Hereva Lada-isidia ai e gwauraia eregabe tauna heḡereḡerena, abi hidi kereredia momo e kara murinai kara dika badana e karaia.

11. Dahaka baita dadarai kara dika ai basita moru totona?

¹¹ Ina sivarai amo dahaka ta dibamu? Namona na kara dika bona kara dika baine havara karadia bona gabudia baita dadarai. Solomon ese eregabe tauna bona ariara hahinena e herevalaidia murinai una e gwauraia. Hahine e herevalaia neganai, e gwa: “Ena dala lalodiai basio raka lao.” (Her. 7:25) Bona ma e gwa: “Hahine unuhetomana na dauhai ba rakaia hanai; ena ruma iduarana basio raka henia kahi.” (Her. 5:​3, 8) Kara dika badana ta basita karaia totona, namona na hedibaḡani e havaramu karadia bona gabudia baita dadarai. b Anina na ḡau haida na Kristen taudia ese bae kara diba to bema unu ese hedibaḡani bona kerere be havaramu, namona na baita dadarai.—Mat. 5:​29, 30.

12. Iobu na lalona e hadaia dahaka baine kara, bona edena dala ai una ese e durua hedibaḡani e dadarai? (Iobu 31:1)

¹² Siboda baita henahua toho totona, namona na laloda baita hadai, kara dika bae havara karadia bona gabudia baita dadarai. Iobu na unu e kara toma. Ia na ‘matana taravatudia e ato’ mata bodaḡa dalana ai hahine ta basine raraia. (Iobu 31:1 ba duahia.) Una taravatu ibadinana ese baine durua heuda-hanai karana ai basine moru. Ita danu laloda baita hadai hedibaḡani bae havara karadia bona gabudia baita dadarai.

13. Dahaka dainai laloda baita gimaia na mai anina bada? (Laulau danu ba itadia.)

¹³ Ita laloda baita gimaia na mai anina bada.  (Eso. 20:17) Haida na e abia daemu lalohadai dikadia bae abi na asi ena kerere badina karadia na se karamu. To una na lalohadai kererena. Bema ta na lalohadai kererena be abiamu bona basine dadaraiamu, una e laloamu ḡauna na be karaiamu. Unu be kara tomamu neganai, ia enai na be aukamu dika baine dadaraia. Momokani, nega ta ta ai lalohadai kereredia na baita abimu. Unu e varamu negadiai, namona na kara haraḡa lalohadai namodia baita abi. Unu amo kara dika badana ta ai basita vareaimu, badina lalohadai kereredia na ta dadaraidia haraḡamu.—Fili. 4:8; Kol. 3:2; Iak. 1:​13-15.

14. Dahaka ese baine duruda hedibaḡani ai basita vareai totona?

¹⁴ Dahaka ese baine duruda hedibaḡani ai basita vareai totona? Namona na baita abia dae hanaihanai Iehova ena taravatu baita badinadiamu neganai namo baita davarimu. Nega haida edai na be aukamu eda lalohadai bona ura na Dirava ena ida bae heḡereḡere. To baita ḡaukara goadamu neganai baita moalemu.

15. Edena dala ai lalohadai maorodia baita abi karana ese be durudamu hedibaḡani baita dadarai?

¹⁵ Namona na lalohadai maorodia baita abi. Bema “dika ba inai henia, namo ba ura henia” karana baita manadalaiamu, una ese kara maorona ikarana urana na be habadaiamu bona dika e havaramu karadia bona gabudia na baita dadaraimu. (Amos 5:15) Danu, bema lalohadai maorodia baita abimu, asita lalomu hedibaḡanidia be varamu neganai baita gini goadamu.

16. Edena dala ai Iehova itomadiho henina karana ese be durudamu baita gima? (Laulau danu ba itadia.)

¹⁶ Edena dala ai lalohadai maorodia baita abi? Namona na Iehova itomadiho henina karadia ai baita bisi. Kristen heboudia baita laomu bona baita haroromu neganai, baita uramu Iehova baita hamoalea bona hedibaḡani ai na basita vareaimu. (Mat. 28:​19, 20; Heb. 10:​24, 25) Baibul baita duahiamu, baita stadilaiamu bona baita laloa dobumu neganai, namo baita ura heniamu bona dika baita inai heniamu. (Ios. 1:8;  Sal. 1:​2, 3; 119:​97, 101) Ba helalotao, Iesu ese ena hahediba taudia e hamaorodia eto: “Ba ḡuriḡuri [hanaihanai], hedibaḡani ai ba vareai na garina.” (Mat. 26:41) Nega baita atomu Tamada guba ai baita ḡuriḡuri heniamu neganai, Ia ese be durudamu bona be hagoadadamu Ia baita hamoalea.—Iak. 4:8.

HANAIHANAI BA GIMA

17. Petro ena manoka ḡauna be dahaka?

¹⁷ Reana eda manoka ḡaudia haida na baita hanai dibamu. To manoka ḡaudia haida ese ita na doini be hahekwakwanaidamu. Aposetolo Petro ena haheitalai aita laloa. Ia na taunimanima garidia e gari dainai nega toi Iesu e ḡorea. (Mat. 26:​69-75) Petro na Sanhedrin vairanai Iesu sivaraina e gwauraia neganai toana na una gari karana na e hanaia. (Apos. 5:​27-29) To, laḡani haida muridiai, ia na nega sisina idau bese taudia ida se aniani hebou badina Iuda Kristen taudia garidia e gariva. (Gal. 2:​11, 12) Petro na dounu taunimanima garidia e gari. Bona reana una gari karana na se hanaia.

18. Dahaka dainai baita gwau diba iseda manoka ḡaudia haida na do asita hanai?

¹⁸ Petro heḡereḡerena, nega haida ita ese eda manoka ḡaudia baita hanai na mai hekwarahina. Heḡereḡere, tadikaka ta na e gwa: “Laḡani ten lalodiai ponografi i’itana karana na na hadokoa bona na lalo una hekwakwanai na da na hanaia. To egu manoka ḡauna na daḡedaḡe animal ta bamona, e komu bona nega maorona ai lau baine hadikagu.” Una tadikaka na dounu e hekwarahi ena manoka ḡauna baine hanaia. Ia na e diba namona na hanaihanai baine hekwarahi ena manoka ḡauna baine hahanaia, bona reana ina nega dikana lalonai una na iena mauri ibounai lalonai baine karaia ḡauna. Ena kongrigeisin elda taudia bona adavana ese e durua, bona ia danu e hekwarahi ponografi i’itana karana baine dadaraia.

19. Bema eda manoka ḡauna ta na do asita hahanaia, dahaka baita kara be namo?

¹⁹ Bema eda manoka ḡauna na do asita hahanaia, dahaka baita kara be namo? Iesu ena hereva baita badinaia, ia na e gwa: “Ba gima” anina na hedibaḡani amo siboda baita hegima.  Ena be nega haida eda manoka ḡaudia ikarana urana na be goadamu, to dounu baita ḡaukara goada hedibaḡani baine havara ḡaudia bona gabudia baita dadarai. (1 Kor. 10:12) Danu, manoka ḡaudia o hahanaidia neganai e durumu ḡaudia na dounu ba kara. Hanaihanai “ba goada” hedibaḡani amo sibomu ba hegima.—2 Pet. 3:14.

HANAIHANAI BAITA GIMA ENA NAMO

20-21. (a) Hanaihanai baita gimamu neganai, dahaka hahenamo baita moalelaimu? (b) Bema baita ḡaukara goadamu bona hedibaḡani baita dadaraimu, Iehova be ita daidai dahaka be karamu? (2 Korinto 4:7)

²⁰ Ta dibamu hanaihanai hedibaḡani amo baita hegima na mai ena namo. Kara dika ese e havaraiamu moalena na nega sisina mo, to Iehova ena taravatu heḡereḡerena ai baita maurimu moalena be bada. (Heb. 11:25; Sal. 19:8) Badina ita e karada dalana na iena ura heḡereḡerena ai baita mauri. (Gen. 1:27) Bema unu baita kara tomamu, laloda mamina na be ḡoevamu bona baita mauri hanaihanai dibamu.—1 Tim. 6:12; 2 Tim. 1:3; Iuda 20, 21.

²¹ Oibe, ‘tauanina na manoka.’ To una ese se hahedinaraiamu eda manoka ḡaudia na basita hanai diba. Iehova na noho heḡaeḡae goada eiava siahu baine henida. (2 Korinto 4:7 ba duahia.) Una na Dirava amo e maimu siahu hereadaena. Ita ese baita karaia ḡauna na dina iboudiai baita hekwarahi hedibaḡani baita dadaraidia. Bena, Iehova ena amo goada baita noiamu neganai, ia ese be henidamu. (1 Kor. 10:13) Momokani, Iehova ena heduru amo, ita ese hedibaḡani na baita hanai dibamu.