1. Dahaka dainai daḡedaḡe totona baita heḡaeḡae na mai anina bada?

ISEDA Lohiabada Iesu bae hamasea hanuaboina ai, ia eto ena hahediba ai baela taudia iboudiai na tanobada ese baine inai henidia. (Ioa. 17:14) Ema bona hari, tomadiho korikorina e inai heniamu taudia ese Iehova ena Witnes e daḡedaḡe henidiamu. (2 Tim. 3:12) Ina nega dokonai, ta dibamu inaida ese ita idaḡedaḡe henida karadia na be habadamu.​—Mat. 24:9.

2-3. (a) Dahaka dainai basita gari na ḡau badana? (b) Ina atikol ai be dahaka baita herevalaimu?

² Edena dala ai harihari ita siboda baita heḡaeḡae, gabeai bae vara daḡedaḡe karadia baita haheaukalaidia totona? Vaia, asita uramu edai be varamu ḡau dikadia baita lalohadailai momo. Bema unu baita kara tomamu, ita na baita garimu bona baita lalohekwarahi dibamu. Eiava unu lalohadai dikadia daidiai baita gari dikadikamu bena Dirava ihesiai henina ḡaukarana baita rakataniamu. (Her. 12:25; 17:22) ‘Inaida diabolo’ ese gari karana e ḡaukaralaia momomu, ita ihamoruda totona. (1 Pet. 5:8, 9) To harihari dahaka baita kara diba, goada baita abia totona?

³ Ina atikol ai baita itaiamu dahaka baita kara diba eda hetura karana Iehova ida baine goada totona, bona dahaka dainai harihari unu baita kara toma na mai anina bada. Danu, basita gari totona dahaka baita kara be namo. Bona dokonai baita itaiamu dahaka baita kara diba, herevana daḡedaḡe taudia ese ita bae inai henida.

4. Heberu 13:5, 6 ese ita be dahaka e hadibadamu, bona dahaka dainai una hereva baita abia dae na namo?

⁴ Bavabia dae vaitani Iehova na oi e lalokau henimumu bona basine rakatanimu. (Heberu 13:5, 6 ba duahi.) Laḡani momo  gunadiai The Watchtower eto: “Dirava e dibaia namonamo tauna na hahetoho negana ai [Dirava] be abidadama heniamu.” Una hereva na momokani! Daḡedaḡe baita haheaukalai totona, namona na Iehova baita lalokau henia bona baita trastia o baita abidadama henia, bona baita abia dae vaitani ia ese ita na e lalokau henida badamu.​—Mat. 22:36-38; Iak. 5:11.

5. Dahaka ese baine durumu Iehova ena lalokau ba mamia?

⁵ Dina ta ta ai Baibul ba duahia badina o ura dikadikamu Iehova ba raka heni kahi. (Iak. 4:8) Baibul o duahiamu lalonai, Iehova ena kara namodia ba lalo. Una duahiduahi lalonai, iena hereva bona kara amo ena lalokau bona hebogahisi e hahedinarai daladia ba lalopararalai toho. (Eso. 34:6) Haida e laloamu Dirava ese idia na se lalokau henidiamu badina reana ta ese idia e lalokau henidiamu dalana na nega ta ai do asie mamia. Bema oi danu unu o lalo tomamu, namona na Iehova ese dina ta ta ai oi e bogamu hisimu bona e kara namo henimumu daladia ena lista ta ba karaia. (Sal. 78:38, 39; Roma 8:32) Emu mauri ai e varamu ḡaudia bona Buka Helaḡa ai o duahimu ḡaudia bo lalo dobumu neganai, Iehova ese oi daimu ai e karamu ḡaudia momo herea bo lalo davarimu. Bema lalohadai unuhetomadia bo abimu, emu hetura karana Iehova ida na be goadamu.​—Sal. 116:1, 2.

6. Salamo 94:17-19 ena hereva heḡereḡerena, ḡuriḡuri karana ese oi be ede baine durumu toma?

⁶ Nega iboudiai ba ḡuriḡuri. Tama lalokauna ese e rosia mero maraḡina ta mani a laloa. Ia na mai moalena ida una dina ai e vara ḡau namodia bona dikadia na tamana enai e herevalaimu. Oi danu unu ba kara toma diba, heḡereḡere dina ta ta ai Iehova ba ḡuriḡuri henia amo ia ba raka henia kahi. (Salamo 94:17-19 ba duahi.) Iehova o ḡuriḡuri heniamu neganai, “lalomu anina ba bubua nege ranu na heto,” o garilaimu bona o lalohekwarahilaimu ḡaudia iboudiai na Tamamu lalokauna ba hamaoroa. (Roh. 2:19) Bena dahaka baine vara? Baibul e gwaumu, “Dirava ena maino, eda diba idoinai e hereaiamu mainona” bo mamiamu. (Fili. 4:6, 7) Hanaihanai unu bo ḡuriḡuri tomamu neganai, bo mamiamu oi na Iehova dekedekenai.​—Roma 8:38, 39.

7. Dahaka dainai oi abia dae vaitanimu Dirava e gwauhamata ena Basileia ese baine kara ḡaudia na be vara momokanimu?

⁷ Bavabia dae vaitani Dirava ena Basileia ena hahenamo na be vara momokanimu. (Num. 23:19) Bema bo laloamu Dirava ena gwauhamata na basie vara momokanimu, Satana bona ena orea taudia ese bae hagarimu diba. (Her. 24:10; Heb. 2:15) Edena dala ai harihari Dirava ena Basileia iabidadama henina karana ba hagoadaia diba? Nega bavato Dirava e gwauhamata ena Basileia ese baine kara ḡaudia bona o abia daemu unu gwauhamata bae ḡuḡuru badidia ba stadilai. Una ese oi be ede baine durumu toma? Stanely Jones ena sivarai mani aita laloa​—ia na ena abidadama  dainai laḡani 7 lalodiai dibura ai e noho. Dahaka ese e durua dainai e haheauka? Ia eto: “Egu abidadama na e goada badina dia Dirava ena Basileia mo to ia ese baine haḡuḡuru ḡaudia na mai dibagu, bona asina daradarava. Una dainai, ta ese lau basine dorigu diba Iehova baina rakatania totona.” Bema Dirava ena gwauhamata bo abidadama henidiamu, Dirava bo raka henia kahimu bona ḡau ta garina basio garimu.​—Her. 3:25, 26.

8. Nega iboudiai hebou basita readiamu amo dahaka baita hahedinaraiamu? Anina taina mani ba herevalaia.

⁸ Nega iboudiai Kristen heboudia baola. Hebou ese e durudamu Iehova baita raka henia kahi. Nega iboudiai hebou basita readiamu amo baita hahedinaraiamu, ita na heḡereḡere vaitani gabeai bae vara daḡedaḡe karadia baita haheaukalai totona. (Heb. 10:24, 25) Dahaka dainai unu ta gwau tomamu? Bema hari ina negai ḡau maraḡidia haida ese e kouda dainai hebou baita readimu, o laloamu gabeai be dahaka be varamu bema gavamani ese be taravatudamu tadikaka bona taihu ida basita hebou? A bema hari ina negai eda hebou basita readiamu, ena be daḡedaḡe taudia ese be kouda tohomu, to ita ese eda hebou karadia na basita hadokomu. Una dainai harihari na nega namona eda hebou ilao henidia karana baita ura heni bada. Unu baita kara tomamu neganai, daḡedaḡe o gavamani ena taravatu ese Dirava ta kamonai heniamu karana basine koua dibamu, taunimanima danu basita kamonai henidiamu.​—Apos. 5:29.

9. Dahaka dainai daḡedaḡe totona baita heḡaeḡae dalana namona ta na, Baibul siridia baita memorais?

⁹ Oi emu feiva siridia ba memorais. (Mat. 13:52) Ena be emu memori na dia ḡoevadae, to Iehova na ena lauma helaḡa amo baine durumu diba o feivadiamu siridia ba lalodia lou totona. (Ioa. 14:26) East Germany ena dibura rumana ai e nohova tadikakana ta na ini e gwau toma: “Lau na moalemu badina una negai lau ese siri momo na memorais. Ena be sibogu na nohova, to Baibul topik idauidau mo na lalohadailaiva.” Unu siri ese eda tadikaka e durua dainai, ia na Iehova badibadinai e noho bona e haheauka.

10. Dahaka dainai ane baita memorais na namo?

¹⁰ Iehova ihanamona anedia ba memorais bona bavabi. Paulo bona Sila na Filipi ena dibura ruma ai e nohova neganai, idia na e memorais anedia e abiva. (Apos. 16:26) Una heḡereḡerena, iseda tadikaka na Soviet Union gunana amo Siberia ena dibura ruma e siaidia lao neganai, idia be ede e hahegoada heheni toma? Taihu Mariya Fedun eto: “Ane bukana  amo a dibadia anedia iboudiai abiva.” Ma eto, ‘Unu ane ese iboumai e hagoadamai bona e durumai Iehova dekedekenai a noho.’ Emu feiva anedia o abimu karana ese oi e hagoadamumu, a? Namona na harihari unu ane ba memorais!​—Mani “Asio Gari” mauana ba itaia.

11-12. (a) Dahaka dainai 1 Samuel 17:37, 45-47 ena sivarai o itaiamu David na se gari? (b) David ena sivarai amo dahaka ta dibamu?

¹¹ Daḡedaḡe negadiai basio gari na namo. To dahaka ba kara diba bema oi na o garimu? Ba helalotao, ta na basineto ia na se garimu badina ia tauanina na bada, o mai goadana, o ena aonega na bada. Goliata vairanai e gini merona David ena sivarai mani aita laloa. Goliata be tau ḡau-badabadana (giant), a David na mero maraḡina, manoka, bona tuari kohudia ta se hahedokilai. Ia na asi ena dare o tuari kaia. To ia na ta se gari heniava. Badina ia na e heau ela, una e hekokorokuva tau ḡau-badabadana baine tuari henia totona.

¹² Dahaka dainai David se gari? Badina ia ese e abia dae vaitaniva Iehova na ia e bamoava. (1 Samuel 17:37, 45-47 ba duahi.) David ese ena size na Goliata ena bada ida se haheḡereḡerea. Badina ia dibana, Iehova vairanai Goliata na tau maraḡimaraḡina. Ina sivarai amo dahaka ta dibamu? Ita na basita garimu bema baita abia dae vaitanimu Iehova na ita e bamodamu, bona baita dibamu Siahu Idoinai Diravana vairanai ita e daḡedaḡe henidamu taudia na maraḡimaraḡi heherea. (2 Siv. 20:15; Sal. 16:8) Gabeai bae vara daḡedaḡe karadia lalodiai basita gari totona, harihari dahaka baita kara be namo?

13. Basita gari totona, dahaka baita kara be namo? Anina taina mani ba herevalaia.

¹³ Basita gari totona, taunimanima vairadiai Dirava ena Basileia ena sivarai namona baita harorolaia na namo. Dahaka dainai unu ta gwau tomamu? Badina una ḡaukara ikarana amo ta dibamu ḡaudia bini: Iehova baita abidadama heniamu bona taunimanima basita gari henidiamu. (Her. 29:25) Eksasais amo ta ese tauanina e hagoadaiamu heḡereḡerena, ruma-ta-ruma-ta ai, o pablik gabudiai, bisinesi gabudiai eiava nega bona gabu idauidau ai ta haroromu negadiai, una ese e hagoadadamu basita gari. Bema harihari haroro ḡaukara baita goadalaiamu, gavamani ese eda ḡaukara baine koua neganai danu dounu baita haroromu.​—1 Tes. 2:1, 2.

14-15. Nancy Yuen bona Valentina Garnovskaya edia sivarai amo dahaka ta dibamu?

¹⁴ Asie gari taihudia rarua edia ekspiriens  amo ḡau haida baita dibamu. Nancy Yuen ena lata na five feet (1.5 mita) to ia na ta se gari heniava. * Ia na se ura Dirava ena Basileia sivaraina namona iharorolaina ḡaukarana baine hadokoa. Una dainai, laḡani 20 mai kahana lalodiai ia na Communist China ena dibura ruma ai e noho. Ia e interrogate o e nanadaiava police taudia eto, edia tanobada ai Nancy na “kwara auka dikadika hahinena”!

¹⁵ Bona Valentina Garnovskaya be Soviet Union gunana ai nega idauidau toi ai e hadiburaia bona dibura ai e noho laḡanidia iboudiai na 21 hetomadia. * Dahaka dainai? Ia na haroro gaukara se hadokoava dainai, police taudia ese e gwauraiava “hahine kererena ta.” Unu taihu asie gariva badina be dahaka? Badina idia ese e abia dae vaitani Iehova na idia e bamodiava.

16. Basita gari totona, dahaka baita kara be ḡau badana?

¹⁶ Vada tame herevalaia heḡereḡerena, basita gari totona, siboda eda goada bona aonega ai na basita tabekau. To, namona na baita abia dae vaitani Iehova na ita e bamodamu bona ita daidai baine tuari. (Deu. 1:29, 30; Sek. 4:6) Unu baita kara tomamu neganai ita na basita garimu!

17-18. Ioane 15:18-21 ai, Iesu ese dahaka sisiba be ita e henida? Anina taina mani ba herevalaia.

¹⁷ Taunimanima ese e matauraidamu neganai ta moalemu, to danu, ena be haida ese ita basie matauraida, dounu baita moale. Iesu eto: “Taunimanima ese bae inai henimui, bae dadaraimui, bae uduguiraimui, ladamui bae hadikadia, Taunimanima Natuna bagunai, negadia ai na ba namo [“ba moale,” NWT].” (Luka 6:22) Iesu ena hereva anina be dahaka?

¹⁸ Iesu na se gwaumu Kristen taudia ese una heinai heheni bae moalelaia na namo. Lasi, to ia ese ita e hadibadamu gabeai ita edai be dahaka be varamu. Ita na dia tanobada ena. Danu, ita ese Iesu ena hahediba herevadia na eda mauri ai ta badinamu bona ia e harorolaiava sivaraina ta harorolaiamu. Una dainai,  tanobada ese e inai henidamu. (Ioane 15:18-21 ba duahi.) Ita na ta uramu Iehova baita hamoalea. Bema ta ese ita baine inai henida badina be Iehova ta lalokau heniamu, una na iena problem.

19. Aposetolo taudia be ede baita tohotohodia toma?

¹⁹ Herevana taunimanima ese dahaka bae gwaurai o bae kara, to oi ese Iehova ena Witnes ladana o huaiamu na basio hemarailaia. (Mika 4:5) Iesu e mase murinai Ierusalem ai aposetolo ese taunimanima asie gari henidiava sivaraina amo ḡau haida baita dibamu. Idia na mai dibadia Iuda tomadiho e gunalaiava taudia ese idia na e inai henidiava. (Apos. 5:17, 18, 27, 28) To dina ta ta ai, dubu lalodiai bona taunimanima vairadiai idia ese e hahedinaraia loulouva idia na Iesu ena hahediba taudia. (Apos. 5:42) Gari karana ese idia asie koudia. Ita danu asita uramu taunimanima baita gari henidia, una dainai dina ta ta ai bona taunimanima vairadiai baita hahedinaraia ita na Iehova ena Witnes taudia​—unu baita kara toma eda gaukara gabudiai, sikuli gabudiai, bona dekeda taudia ediai.​—Apos. 4:29; Roma 1:16.

20. Dahaka dainai aposetolo taudia e moale, ena be haida ese idia e inai henidiava?

²⁰ Aposetolo taudia e moale badina be dahaka? Taunimanima ese e inai henidiava badidia na e lalopararalai, bona e abia daeva Iehova ena ura ikaranai e abiva hisidia na hahenamo na heto. (Luka 6:23; Apos. 5:41) Gabeai, aposetolo Petro eto: “Bema hisi bavani, kara maoromaoro dainai, ba namo [“ba moale,” NWT].” (1 Pet. 2:19-21; 3:14) Ena be taunimanima ese ita be inai henidamu, to idia garidia basita garimu badina ta lalopararamu ita na kara maoromaoro dainai idia ese ita e inai henidamu.

21-22. (a) Daḡedaḡe totona, harihari oi be ede o heḡaeḡae tomamu? (b) Atikol gabena ai dahaka baita herevalaimu?

²¹ Ita asi dibada edena negai daḡedaḡe be varamu o gavamani ese Iehova ta tomadiho heniamu karadia be taravatumu. To ta dibamu, harihari baita heḡaeḡae na namo, hegeregere eda hetura karana Iehova ida baita hagoadaia, o basita gari karana baita hagoadaia, bona haida edia heinai heheni karana baita haheaukalaia dalana baita dibaia. Unu baita heḡaeḡae tomamu neganai, gabeai baita gini goadamu.

²² To bema gavamani ese iseda tomadiho karadia bae taravatu be ede heto? Atikol gabena ai, Baibul ena hahekau herevadia baita herevalaimu, unu ese ita bae duruda unu taravatu negadiai Iehova baita hesiai henia totona.