1-2. (a) Dahaka dainai Iesu na ena mase baita laloatao dala haraḡana ta e haheitalaida? (b) Iesu ena kara namodia haida be dahaka?

LAḠANI ta ta Keriso ena mase Ilalotaona hebouna ai dahaka e varamu? Lohiabada ena Anibou ai vaevae e varamu ḡaudia na mai dibada. Dahaka dainai? Badina una hebou ai ḡau momo asita ḡaukaralaimu. To, una na mai anina bada hebouna. Reana baita henanadaimu, ‘Dahaka dainai una hebou ai ḡau momo asita ḡaukaralaimu?’

² Iesu na tanobada ai ena hesiai ḡaukara e karaiava neganai, momo na e diba ia e hahedibalaiva hereva momokanidia na dia auka, anidia e hahedinarai ḡoevaḡoevava, bona e lalopararalaiva. (Mat. 7:28, 29) Una heḡereḡerena, iena mase baita laloatao totona, ia ese dala haraḡana e haheitalaida. Mani Memorial * hebouna bona Iesu ena hereva bona e kara ḡaudia haida aita herevalai. Baita lalopararamu Iesu na manau tauna, se gari, bona lalokau e hahedinaraia, bona baita tohotohoa daladia baita dibamu.

3. Mataio 26:26-28 ena hereva heḡereḡerena, dahaka dainai Iesu ese e hamatamaia hebouna na dia auka, bona e ḡaukaralai ḡaudia ruaosi be dahaka e laulaulai?

³ Iesu na ena aposetolo 11 ida ena mase Ilalotaona hebouna e hamatamaia. Ia ese Lagau-hanai ariana ai e ḡaukaralai ḡaudia oredia amo una hebou e karaia. (Mataio 26:26-28 ba duahi.) Asie hatubua paraona bona wain mo e ḡaukaralai. Iesu ese ena aposetolo e hamaorodia unu ḡau ruaosi na ia tauanina bona rarana ḡoevadaedia e laulaulaidia,  idia daidia do baine bouboulai. Una hebou matamatana ai Iesu ese ḡau momo se ḡaukaralai neganai aposetolo taudia na se daradara. Dahaka dainai?

4. Edena dala ai Iesu ena sisiba Mareta enai ese e durudamu Iesu ese Memorial hebouna ai ḡau momo se ḡaukaralai badina baita lalopararalaia?

⁴ Iesu ena hesiai ḡaukara laḡanina ihatoina ai, hua haida gunadiai e vara ḡaudia mani aita lalo; ia na turana namodia Lasaro, Mareta, bona Maria e vadivadidia. Edia ruma ai, Iesu ese e hadibadia matama. Mareta danu noho, to ia na Iesu dainai aniani bada herea e heḡaeḡaelaiva. Iesu ese una e itaia neganai, Mareta e sisiba henia, e durua unu amo baine laloparara aniani momo baine heḡaeḡaelai na dia ḡau badana. (Luka 10:40-42) Gabeai, Iesu na ena mase negana e kahikahiva neganai, e gwauraia sisibana na ia sibona ese e badinaia danu. Memorial hebouna ai ḡau momo se ḡaukaralai. Unu amo Iesu enai dahaka ta dibamu?

5. Memorial hebouna ese e hahedinaraiamu Iesu be tau ede bamona, bona edena dala ai una na Filipi 2:5-8 ida heḡereḡere?

⁵ Iesu na ena hereva bona kara amo e hahedinaraia ia na manau tauna. Una dainai ia ese ena hanuaboi ginigabena ai una kara namona e hahedinaraia na asita daradaralaiamu. (Mat. 11:29) Ia na e diba ia ese baine heni boubou ḡauna hereadaena na nega ta ta ese do se karaia ḡauna, bona dibana Iehova ese baine hatorea isi lou bena guba ai king dagina baine henia. Ena be una na mai dibana, to ena mase ilalotaona totona se ura aria badana ta baine karaia sibona baine heimodai totona. Ena hahediba e hamaorodia laḡani ta ta ai una hebou amo ia bae laloatao. (Ioa. 13:15; 1 Kor. 11:23-25) Una hebou ese e hahedinaraiamu Iesu na dia hekokoroku tauna. Ta moalemu badina manau karana na iseda guba Pavapavana ena kara badana ta.​—Filipi 2:5-8 ba duahi.

6. Hahetoho negadiai Iesu ena manau karana be ede baita tohotohoa toma?

⁶ Iesu ena manau karana be ede baita tohotohoa toma? Haida edia namo baita tahu guna, dia siboda eda. (Fili. 2:3, 4) Iesu ena hanuaboi ginigabena mani aita laloa lou. Iesu na dibana ia na kahirakahira baine mase; to ia e badinaiava aposetolo taudia e lalodia bada, idia na ena mase dainai do bae daradoko. Una dainai ena hanuaboi ginigabena ai e hadibadia, e hagoadadia, bona e durudia.  (Ioa. 14:25-31) Iesu ese e hahedinaraia ia na sibona ena namo se laloa, a haida edia namo e lalo bada. Una na haheitalai namona ita edai!

7. Iesu ese ena Memorial hebouna e hamatamaia murinai, edena dala ai e hahedinaraia ia na se gari?

⁷ Iesu ese ena Memorial hebouna e hamatamaia murinai, e hahedinaraia ia na se gari. Edena dala ai? Iesu na Tamana ena ura e abia dae, ena be dibana unu baine kara toma neganai bae hamasea badina e gwauraiava ia na Dirava ladana ihadikana tauna. (Mat. 26:65, 66; Luka 22:41, 42) Iesu na hanaihanai Dirava e badinaiava, unu amo Iehova ladana e hahelaḡaia, iena lohia siahuna e abia isi, bona dala e kehoa helalo-kerehai taudia ese mauri hanaihanai bae abia. Danu, Iesu na ena hahediba taudia e haheḡaeḡaedia gabeai bae davari hahetohodia bae haheaukalaidia totona.

8. (a) Iesu ese ena aposetolo taudia be dahaka e hamaorodia? (b) Iesu e mase murinai, edena dala ai hahediba taudia na ia heḡereḡerena se gari?

⁸ Iesu se gari dalana ma ta na, ena lalohekwarahi ḡaudia na se lalodia momo to ena aposetolo taudia edia dabu ḡaudia hari e lalo. Iuda e siaia oho murinai, Iesu ese Memorial hebouna e hamatamaia, una hebou ese baine horodia taudia baine hadibadia Iesu rarana bona kontraka matamatana amo namo bae davaria. (1 Kor. 10:16, 17) Iesu ida guba ai bae noho hahenamona bae abia totona, ia ese ia bona Tamana edia ura na idia ediai e gwauraia hedinarai. (Ioa. 15:12-15) Danu ena aposetolo taudia e hamaorodia idia na daḡedaḡe be davarimu. Bena e hagoadadia ia bae tohotohoa bona bae “haheauka.” (Ioa. 16:1-4a, 33) Laḡani momo muridiai, Iesu ena hahediba taudia na ia  heḡereḡerena sibodia edia ura e dadarai bona se gari. Ena be hisihisi bada e davariva, to e heduru heheniva.​—Heb. 10:33, 34.

9. Edena dala ai Iesu heḡereḡerena basita gari?

⁹ Hari ina negai danu, ita na Iesu heḡereḡerena asita garimu. Heḡereḡere, edia abidadama dainai daḡedaḡe e davarimu tadikakadia baita durudia totona basita gari na namo. Nega haida tadikakada na dibura ruma ai e atodiamu, ena be asi edia kerere. Una e varamu neganai, namona na baita durudia, heḡereḡere idia daidiai baita ḡuriḡuri, eiava idia daidiai gavamani bona kota vairadiai baita hereva. (Fili. 1:14; Heb. 13:19) Danu, ta ‘haroro goadagoadamu’ karana amo ta hahedinaraiamu ita na asita garimu. (Aposetolo 14:3) Iesu heḡereḡerena, Basileia sivaraina baita harorolaia goadagoada, ena be taunimanima ese bae inai henida eiava bae daḡedaḡe henida. To, nega haida baita garimu. Dahaka baita kara diba?

10. Memorial negana e kahikahimu lalonai, dahaka baita kara, bona dahaka dainai?

¹⁰ Keriso ena mauri davana dainai ta abia helarona baita laloamu neganai una ese be hagoadadamu basita gari. (Ioa. 3:16; Efe. 1:7) Memorial negana e kahikahimu lalonai, nega baita ato mauri davana baita laloa totona. Danu, Memorial Baibul duahiduahi ena sediual baita badinaia bona Iesu ena mase negana e kahikahiva ai e vara ḡaudia baita lalodia dobu. Bena Lohiabada ena Anibou negana ai ta heboumu neganai, parao bona wain anidia bona e laulaulaimu ḡaudia baita lalopararalaimu. Iesu bona Iehova ese ita daidai e kara ḡaudia bona e durudamu daladia ta lalopararalaimu neganai, eda helaro e hagoadaiamu, bona e durudamu baita haheauka ela bona dokona.​—Heb. 12:3.

11-12. Tame diba ḡaudia haida be dahaka?

 ¹¹ Tame dibaia ḡauna na, Lohiabada ena Anibou ese e hadibadamu, Iesu ena mauri davana na mai anina bada bona ta dibamu ia na manau tauna bona se garimu. Ta moalemu badina Iesu ese unu kara namodia na doini e hahedinaraimu; ia na iseda Hahelaḡa Tauna Badana guba ai, bona ita daidai Dirava e noiamu baine hamaurida totona. (Heb. 7:24, 25) Eda tenkiu karana baita hahedinaraia totona, namona na Iesu ena haheḡani, ena mase baita laloatao haheḡanina, baita badinaia. (Luka 22:19, 20) Una ta karaiamu dinana na Nisan 14 ida heḡereḡere; laḡani ta ta ai una na mai anina bada dinana.

¹² Lohiabada ena Anibou hebouna amo Iesu ena kara namona ma ta ta dibaiamu, una kara ese Iesu e hagoadaia bena ita daidai e mase. Tanobada ai e nohova neganai, momo ese una kara namona na ienai e itaia. Una be edena kara?

13. Ioane 15:9 bona 1 Ioane 4:8-10 ese Iehova bona Iesu edia lalokau be ede e herevalaia toma, bona edia lalokau ese daidia e durudiamu?

¹³ Iesu na e kara ḡaudia iboudiai lalodiai Iehova ena lalokau e hahedinaraia ḡoevaḡoeva. (Ioane 15:9; 1 Ioane 4:8-10 ba duahi.) Mai anina bada ḡauna na, Iesu na mai kudouna idoinai ida ita daidai ena mauri e heni. Herevana ita na horoa taudia eiava “mamoe idaudia,” to Iehova bona Natuna ese una boubou ḡauna amo e hahedinaraia lalokauna ese e durudamu. (Ioa. 10:16; 1 Ioa. 2:2) Danu, Memorial hebouna ai e ḡaukaralai ḡaudia mani aita lalo; unu ese Iesu ena lalokau e hahedinaraia bona ena hahediba taudia e lalodia bada. Edena dala ai?

14. Iesu ese ena hahediba ediai ena lalokau e hahedinaraia dalana ta be dahaka?

¹⁴ Iesu ese ena horoa tadikakadia ediai ena lalokau e hahedinaraia dalana ta na, e hamatamaia hebouna ai ḡau momo se ḡaukaralai, unu amo idia ese bae badinaia na dia auka. Una nega amo, unu horoa taudia na e laloparara laḡani ta ta ai Memorial hebouna bae karaia na namo, ena be edia noho daladia na idauidau, eiava dibura ruma ai bae atodia. (Apok. 2:10) Idia ese Iesu ena haheḡani e badinaia eiava? Oibe.

15-16. Edena dala ai haida na nega aukadia ai Lohiabada ena Anibou hebouna e karaiava?

¹⁵ Aposetolo edia nega amo ema bona hari, Kristen momokanidia na e ḡaukara goadamu Iesu ena mase bae laloatao totona. Idia na Lohiabada ena Anibou ai Iesu ese e karaia dalana e badinaiamu, ena be nega haida una na auka. Ini haheitalai mani aita lalo. Tadikaka Harold King na China dibura rumana ta ai sibona e nohova neganai, ia na dala e tahu Memorial hebouna baine karaia. Ia na hehuni dalanai dekenai miadia ḡaudia e ḡaukaralaiva Memorial paraona bona wain baine heḡaeḡaelai. Danu Memorial dinana baine diba totona deit na e hagau namonamova. Memorial dinana e kauva neganai, ia na sibona ena dibura rumana lalonai ane e abiva, e ḡuriḡuriva, bona tok e heniva.

¹⁶ Haheitalai ma ta na ina: Tanobada Tuarina Iharuana ai, dibura kamepana ta ai e nohova taihu haida na Lohiabada ena Anibou hebouna e karaia, ena be edia mauri bae haboio diba. Una hebou ai ḡau momo se heḡaukaralaimu dainai, idia na aonega dalanai Memorial hebouna e karaia. Idia na eto: “A gini heḡeḡeva, bogaraḡimai  ai teibolo maraḡina ta na dabua kurokurona amo a koua bona latanai Memorial paraona bona wain a ato kau. Kendolo ta a ha-araia, badina asia urava gadi ese bae itamai. . . . Emai gwauhamata na Tamada enai a gwaurai louva, goada baine henimai Ia ladana helaḡana baia hahelaḡaia totona.” Una na abidadama korikorina! Momokani, Iesu ena lalokau dainai nega aukadia ai danu Memorial na baita karaia diba.

17. Ededia henanadai na siboda ese baita lalo?

¹⁷ Memorial negana e kahikahimu lalonai, siboda ini henanadai baita lalo: ‘Edena dala ai Iesu ena lalokau baina tohotohoa? Lau be tadikaka taihu edia namo na lalomu eiava sibogu egu namo na lalomu? Lau be na uramu tadikaka bona taihu ese ḡaukara iboudiai bae kara, eiava edia goada hetoana na laloamu?’ Namona na Iesu baita tohotohoa bona baita “hekaha heheni.”​—1 Pet. 3:8.

18-19. (a) Baita laloataomu ḡauna be dahaka? (b) Lalomu ba hadaia dahaka ba kara?

¹⁸ Keriso ena mase ilalotaona hebouna na basita karaia hanaihanaimu. Hisihisi badana negana ai Iesu “bainema” neganai, “e abidia hidi taudia” na guba ai baine haboudia, una nega amo Memorial na ma basita karaia loumu.​—1 Kor. 11:26; Mat. 24:31.

¹⁹ Ena be nega ta Memorial hebouna na basita karaiamu, to baita laloataomu ḡauna na, una hebou amo ta diba Iesu na manau tauna, se gari, bona lalokau e hahedinaraia. Una nega ai, guna Memorial hebouna ela taudia ese una hebou na mauri taudia iboudiai ediai be herevalaiamu. To hari una hebou baita moalelaia totona, namona na laloda baita hadai Iesu heḡereḡerena baita manau, basita gari, bona lalokau baita hahedinaraia. Bema unu baita kara tomamu, Iehova ese ahuda namona be henidamu.​—2 Pet. 1:10, 11.