1, 2. Momo ese edia ḡaukara be ede e laloa tomamu?

NEGA momo taunimanima na e karamu ḡaukaradia amo sibodia edia kara e hahedinaraimu. Momo edia lalohadai na, ta ese e karaiamu ḡaukarana o e dogoataomu dagina ese e hahedinaraiamu ia be ede bamona tauna. Tano haida ai, bema ta na e uramu ma ta baine hetura henia, be henimu henanadai ginigunana na, “Oi be dahaka ḡaukara o karamu?”

² Nega haida Baibul ese taunimanima e herevalaidiamu neganai, idia e karamu ḡaukaradia danu e gwauraimu. Heḡereḡere, “tax gogo tauna Mataio”; “Simona, boromakau kopidia iseudia tauna”; bona “Luka, muramura tauna.” (Mat. 10:3; Kara 10:6; Kol. 4:14) Dirava ena hesiai ḡaukara lalonai ta abimu madunadia o hahenamodia ese ta karaiamu ḡaukarana danu e hahedinaraiamu. King David, peroveta tauna Elia, bona aposetolo Paulo aita lalodia. Unu tatau na Dirava ese e henidia ḡaukaradia e lalodia badava. Ita danu bema hesiai ḡaukara lalonai hahenamo haida baita abi, namona na baita lalodia bada.

3. Dahaka dainai burukadia ese eregabe bae hadibadia na namo? (Rau 27 ai laulau ba itaia.)

³ Ita momo ese eda ḡaukara na ta ura heniamu bona ta uramu baita karaia hanaihanai. To, Adam ena nega amo ema bona hari, uru ta e oremu bena uru ta ese gabudia e abimu. (Koh. 1:4) Una e varamu dainai, hari ina negai Kristen momokanidia na  hekwakwanai haida e davarimu. Heḡereḡere, Iehova ena taunimanima edia ḡaukara na e bada e laomu bona ḡau momo e idaumu. Ḡaukara matamatadia ta karamu lalonai, ḡau ikaradia daladia matamatadia e varamu—nega momo unu dala na teknoloji ena idau heḡereḡerena ai e varamu. Burukadia haida ediai unu dala matamatadia iḡaukaralaidia na auka. (Luka 5:39) Ena be nega haida idia ese unu dala matamatadia na bae badina diba, to eregabe edia goada ese burukadia edia goada na e hereaia. (Her. 20:29) Una dainai, burukadia ese eregabe bae durudia maduna badadia bae hua karana na aonega bona lalokau karana.—Salamo 71:18 ba duahia.

4. Dahaka dainai haida na asie uramu ḡaukara na ma haida bae henidia? (Maua ladana “ Haida ese Edia Ḡaukara Na Ma Haida Asie Henidiamu Badidia” ba itaia.)

⁴ Maduna e huamu taudia na reana asie uramu edia ḡaukara haida na eregabe bae henidia. Haida na asie uramu e moalelaiamu ḡaukarana bae rakatania. Ma haida na e lalohekwarahimu, e laloamu eregabe taudia ese ḡaukara na basie kara namonamomu. Haida na e laloamu idia na asi edia nega ma ta bae hadibadia. To danu, eregabe taudia na maduna ma haida do asie abi neganai, bae haheauka na namo.

5. Ina stadi ai ededia henanadai rua baita herevalaimu?

⁵ Ḡaukara iharina karana ai mani ini henanadai rua aita herevalai. Ginigunana na, edena dalai burukadia ese eregabe bae durudia maduna ma haida bae hua, bona dahaka dainai una na mai anina bada? (2 Tim. 2:2) Iharuana na, dahaka dainai eregabe tadikakadia ese lo tadikakadia bae durudia neganai lalohadai maorona bae abia, bona idia edia amo diba bae abi na namo? King David ese natuna e durua mai anina bada ḡaukarana ta baine karaia totona. Mani aita herevalaia.

6. King David be e ura dahaka baine kara, bona Iehova be dahaka e gwa?

⁶ Laḡani momo lalodiai David na gabu idauidau ai e nohova, gabeai ia na king ai ela bona ruma namona ta ai e nohova. To ia na e lalohisihisiva, badina Iehova na asi ena “ruma” o dubu, una dainai  e ura ta baine haginia. Ia ese peroveta tauna Natan e hamaoroa, eto: “A itaia, lau na sida rumana ai na nohomu, a Iehova ena taravatu mauana na kalaga ai e miamu.” Natan ese e haere henia, eto: “Lalomu ai e miamu ḡauna idoinai do ba karaia, badina be Dirava na oi ida.” To, Iehova ena lalohadai na idau. Ia ese Natan e hamaoroa David baine hadibaia, baineto: “Egu noho rumana auta basio haginia.” Ena be Iehova na mai lalokauna ida David e hamaoroa dounu baine hanamoa, to Dirava ese dubu ihaginina ḡaukarana na David natuna Solomon e henia. David be dahaka e kara?—1 Sis. 17:1-4, 8, 11, 12; 29:1.

7. David na Iehova ena hereva e kamonai neganai, dahaka e kara?

⁷ David ese Solomon na e durua, ena be e diba dubu ihaginina ḡaukarana ena hahenamo na ia ese basine abia. Momokani, gabeai una ruma na e gwauraia Solomon ena dubu, to dia David ena. Reana David na e lalohisihisi badina ena ura ḡauna na se haḡuḡurua, to una ḡaukara na e durua. Mai ena ura ida ḡaukara ikarana taudia e haheḡaeḡaedia, auri, auri labora-labora, silva, golo, bona sida audia e haboudia. Bena Solomon e hagoadaia, eto: “Natugu e, Iehova ese baine bamomu, bona Iehova, emu Dirava, ena dubu do ba haginia vaitani, ia ese vada e herevalaimu heḡereḡerena.”—1 Sis. 22:11, 14-16.

8. Dahaka dainai David na e lalo Solomon na dia heḡereḡere, to dahaka e kara?

⁸ Sisiga Ginigunana 22:5 ba duahia. Reana David na e lalo Solomon na dia heḡereḡere una mai anina bada ḡaukarana baine karaia. Badina una dubu “hairaina baine herea dae vaitani,” bona una negai Solomon na “eregabe, bona ḡaukara ai” do se manada. To, David na mai dibana Iehova ese Solomon na baine durua e henia ḡaukarana baine karaia namonamo totona. Una dainai David ese Solomon iduruna daladia e lalo, bona bae ḡaukaralai kohudia momo e heḡaeḡaelaidia.

9. Tadikaka burukadia ese edia maduna haida e heni hanaimu neganai, edia hemami be ede bamona? Haheitalai mani a gwauraia.

⁹ Tadikaka burukadia ese edia maduna haida na eregabe tadikakadia bae henidia neganai, basie lalohisihisi na namo. To, ḡaukara baine heau namonamo totona, eregabe tadikakadia bae hadibadia maduna bae hua. Namona na e abidia hidi taudia na bae moale bema idia ese e hadibadia eregabe tadikakadia na ḡaukara e kara namonamomu. Mani ina haheitalai aita laloa, tama ta ese natuna na motuka tari dalana e hadibaiamu. Natu na maraḡi dainai, tamana ena taritari dalana mo be itaiamu. Natu taina baine bada neganai, tamana ese taritari dalana baine hadibalaia. Bena, laḡanina baine 18 neganai, ia na motuka baine taria matama, to tamana ese dounu baine hadibaia. Nega haida natu be taritarimu, nega haida tamana be taritarimu,  to gabeai nega momo natu mo be taritarimu, badina tamana na da iahu. Tama mai aonegana na be moalemu badina natuna ese motuka e tariamu bona natuna na basine biaguamu. Una heḡereḡerena, tadikaka burukadia na e moalemu, bema e hadibadiamu eregabedia na tiokratik maduna idauidau e huamu.

10. Mose ese hahenamo bona siahu be ede e lalodia toma?

¹⁰ Ita na iahu dainai, baita henari namonamo basita mama totona. Mose aita laloa. Israel taudia bogaraḡidia ai haida na e perovetava neganai, ia be dahaka e kara? (Numera 11:24-29 ba duahi.) Mose iduruna tauna, Iosua, na e ura idia baine koudia. Ia na e lalova idia ese Mose ena dagi o siahu na asie matauraiava. To Mose e hamaoroa: “Lau daigu ai o vaḡeḡemu a? Iehova ena orea taudia iboudiai bema peroveta bona Iehova ena siahu be iboudiai latadiai bema kau bema namo.” Mose na e laloparara Iehova ena heduru dainai una e vara. Bona ia na se ura ia mo hahenamo baine abi, to e ura ia e abi hahenamodia na Iehova ena hesiai taudia iboudiai ese danu bae abi. Mose heḡereḡerena, kongrigeisen ai haida ese hahenamo e abimu neganai, ita ta moalemu, a?

11. Tadikaka ta ese ena maduna e heni hanai karana be ede e herevalaia toma?

¹¹ Hari ina negai, tadikaka momo na laḡani momo lalodiai e ḡaukara goadagoada bona haida e hadibadia maduna ma haida bae huadia namonamo. Heḡereḡere, tadikaka ta ladana Peter na laḡani 74 mai kahana ful-taim hesiai ḡaukara e kara, unu laḡani 35 be Europe brens ofesina ai e ḡaukara. Una negai, ia na Service Department e nariava, to vanegai ena ḡaukara na e idau. Hari, ia ida laḡani haida e ḡaukara eregabe tadikakana, Paul, ese una dipatmen e nariamu. Peter na e nanadaia una senisi be ede e laloa toma neganai, ia na ini e gwau toma, “Lau na, na moalemu badina tadikaka unu bamodia na treinin e abimu, unu amo maduna ma haida bae hua, bona edia maduna na e hua namonamomu.”

12. Rehoboam ena sivarai amo dahaka ta dibamu?

¹² Solomon e mase murinai, natuna Rehoboam na king ai ela. Rehoboam na e ura ena maduna baine hua daladia baine diba dainai, tatau badadia e nanadaidia guna. To edia heduru herevana na e dadaraia! A ia ese eregabe taudia, ia ida e tubu dae bona hari ena hesiai ḡaukara e karamu taudia, edia sisiba e abi dae. Una dainai dika bada herea e vara. (2 Sis. 10:6-11, 19) Una sivarai amo dahaka ta dibamu? Burukadia edia heduru baita tahu bona edia sisiba baita badina na aonega karana. Namona na eregabe taudia ese burukadia e ḡaukaralaiva daladia na basie lalodia maraḡi, bona burukadia edia sisiba na basie dadarai.

13. Edena dalai eregabe na burukadia ida bae ḡaukara hebou?

¹³ Eregabe tadikakadia haida na hari burukadia ese e karava ḡaukaradia haida e karamu. Ena be unu eregabe na maduna unu bamodia e huamu, to abi hidi ta do asie karaia neganai, namona na burukadia edia heduru bae tahu, unu amo namo bae davari. Matamanai ta herevalaia tadikakana, Paul, na Peter gabuna e abia bona Betele dipatmen ta e nariamu, ia na ini e gwau toma, “Lau ese nega na ato Peter ena amo heduru herevadia baina tahu, bona dipatmen ai haida na hagoadadia idia danu unu bae kara toma.”

¹⁴Eregabe tauna, Timoteo na  laḡani momo aposetolo Paulo ida e ḡaukara hebou. (Filipi 2:20-22 ba duahi.) Paulo ese Korinto taudia e tore henidia, eto: “Timoteo vada na siaia vasi dekemui ai; ia na egu lalokau merona mai momokanina ida, Lohiabada lalonai. Ia ese egu ḡaukara Keriso Iesu lalonai baine hahelalolaimui, gabu idoidiai ekalesia iboudiai na hadibalaidia heḡereḡerena.” (1 Kor. 4:17) Una hereva ese e hahedinaraiamu, Paulo bona Timoteo na e ḡaukara hebou namonamova. Paulo na nega e ato Keriso ihesiai henina ai e badinava daladia na Timoteo e hadibalaia. Timoteo na ḡau momo e diba bona Paulo ese e lalokau henia bada, danu Paulo na e diba Timoteo ese Korinto kongrigeisen na lauma dalanai baine durudia diba. Hari ina negai, elda taudia ese Paulo ena haheitalai bae tohotohoa bona tadikaka ma haida bae hadibadia kongrigeisen ai maduna bae hua totona!

15. Senisi e varamu neganai, edena dalai Paulo ena sisiba Roma Kristen taudia ediai ese baine duruda?

¹⁵ Hari ina negai, ḡau namodia momo e varamu. Iehova ena tanobada oreana na dala idauidau ai e tubumu, una dainai ḡau momo e idaumu. Senisi e varamu neganai, namona na baita manau bona Iehova ena ura baita laloa bada, to dia ita siboda eda. Unu baita kara tomamu neganai, lalotamona ai baita nohomu. Paulo ese Roma Kristen taudia e hamaorodia: “Umui ta ta na haduamuimu, basio hekokoroku, a lalomui bae manau, Dirava ese heabidadama ahuna ta ta e henimui hagau-hagau heḡereḡerena. Ita heḡereḡereda, tau ta regena na momo, a edia ḡaukara na idau-idau; unuhetomana, ita na hoho, a tau-anina tamona Keriso enai.”—Roma 12:3-5.

16. Iehova ena orea na maino bona lalotamona ai baine noho totona, tadikaka burukadia, eregabedia bona hahine be dahaka bae kara?

¹⁶ Ena be eda noho daladia na idauidau, to namona na iboudai baita ḡaukara Iehova ena Basileia baita durua. Tadikaka burukamui e, namona na eregabe ba durudia o karamu ḡaukaradia bae kara. Bona eregabe tadikakadia e, e henimuimu ḡaukaradia na bavabi dae, ba manau, bona tadikaka burukadia ba matauraidia. Bona hahine e, Akula adavana, Priskila ba tohotohoa, edia noho dalana e idau neganai, ia na mai ena ura ida Akula e bamoa bona e durua.—Kara 18:2.

17. Iesu ese ena hahediba be ede e lalodia toma, bona dahaka ḡaukara e hadibalaidia?

¹⁷ Iesu na haheitalai hereadaena, ia ese haida e hadibadia maduna ma haida bae hua. Ia na mai dibana ena hesiai ḡaukara tanobada ai na baine doko dainai ma haida e durudia e karaia ḡaukarana bae karaia. Ena be ena hahediba na dia ḡoḡoevadae, to e abidadama henidia bona e hamaorodia edia ḡaukara ese ia e kara ḡaukaradia na be hereadiamu. (Ioa. 14:12) Ia ese e hadibadia namonamo, bona sivarai namo na taunimanima iboudiai e harorolai henidia.—Kol. 1:23.

18. Vaira negana ai dahaka hahenamo baita abimu, bona hari dahaka baita kara diba?

¹⁸ Iesu ese ena mauri e bouboulaia murinai, ia na e toreisi lou bena guba ela, unuseni ai ia e abi ḡaukaradia ese ‘ḡaubada iboudiai, gavana iboudiai, siahu taudia iboudiai, lohia iboudiai’ e hereadia. (Efe. 1:19-21) Aramagedono do se vara ai bema mai eda abidadama ida baita masemu, tanobada matamatana ai baita toreisi loumu, bona ḡaukara namodia momo baita karamu. To hari, namona na iboudai ese ina mai anina bada ḡaukarana baita karaia—sivarai namona baita harorolaia bona taunimanima na hahediba ai baita halaodia. Namona na ita iboudai, eregabe bona burukadia, na ‘Lohiabada ena ḡaukara lalonai baita goada balaheni.’—1 Kor. 15:58.