Lau na Quebec City ai na vara, una na Canada ai French gado e herevalaiamu provins ta. Lau tamagu Louis bona sinagu Zélia ese e lalokau henigu bada. Tamagu na hemarai tauna bona e duahiduahi momova. Toretore karana na na moalelaiava, bona na urava nega ta journalist ai bainala.

Laḡanigu na 12 heḡereḡerena neganai, Rodolphe Soucy, tamagu ida e ḡaukara hebouva tauna ta na turana ida emai ruma ema. Idia na Iehova ena Witnes taudia. Una negai Witnes taudia na asi dibagu namonamo bona edia tomadiho na asi na laloa badava. To idia ese Baibul amo emai henanadai e haerelaiva karana na moalelaia. Tamagu bona sinagu danu una na e moalelaia dainai Baibul a stadilaia matama.

Una negai lau na Catholic sikulina ta ai na sikuliva. Baibul stadi ai na dibava ḡaudia na egu klas taudia ida na herevalaiva. Bena una sikuli ai e hahedibava priest taudia na e diba. Idia ese Baibul na se ḡaukaralaia egu hereva bae hakoikoia totona, to idia ta na klas taudia iboudiai vairadiai lau na e gwauraigu gwau-edeede stiuden ta. Ena be una na lalometau ḡauna, to e vara ḡauna ese e durugu bena na laloparara sikuli ai e hahedibalaiva tomadiho herevadia na dia Baibul ena hereva heḡereḡerena. Na diba una sikuli baina rakatania na namo. Tamagu bona sinagu edia gwaumaoro dainai sikuli ma ta ai na sikuli.

Ena be Baibul na stadilaiava, to lauma dalanai na asina goada haraḡa badina na gariva  ruma-ta-ruma-ta haroro ḡaukarana baina karaia. Una negai Catholic tomadihona ena siahu na bada bona emai haroro ḡaukara na e kouava. Maurice Duplessis na politikol oreana e gunalaiava tauna ta, bona ia na Catholic tauna ta. Iena gwaumaoro dainai taunimanima ese Witnes taudia e daḡedaḡe henidiava. Una negai, Witnes taudia na haroro ḡaukara ikarana totona bae boga-auka na namo.

Lau na tadikaka John Rae ese e durugu, ia na Gilead klas namba 9 amo e gradueit tauna ta. John ena diba haroro ḡaukara ai na bada bona ia na manau tauna. Ia ese lau na se sisiba henigu momova to iena haheitalai amo ḡau momo na diba. John na e hekwarahiva French gado ai baine hereva, una dainai haroro ḡaukara ai na bamoava bona na duruava. John na bamoava karana ese e durugu bena lalogu na hadaia Iehova ena Witnes tauna ta ai bainala. Witnes taudia ida na hedavari bena laḡani 10 e ore murinai May 26, 1951 ai na bapatiso.

Quebec City ai, emai kongrigeisin maraḡina lalonai painia taudia na momo. Edia haheitalai namona ese e durugu baina painia totona. Una negai, ruma-ta-ruma-ta haroro ḡaukarana ai Baibul mo a ḡaukaralaiava. Pablikeisin na lasi dainai ai ese Baibul siridia baia ḡaukaralai namonamo na ḡau badana. Una dainai na hekwarahi Baibul siridia baina diba namonamo, unu amo hereva momokani baina herevalaia. To, taunimanima momo na se urava Baibul bae duahia, bema una Baibul na Catholic tomadihona ese asie abia daeva.

Laḡani 1952 ai, lau ese Simone Patry na adavaia. Ai na ala Montreal bena una laḡani lalonai, natumai kekenina Lise e vara. Ena be emai headava negana e kahikahiva neganai painia ḡaukarana na do na hadokoa, to lau bona Simone na a hekwarahiva emai mauri ai ḡau momo basia tahu, unu amo hebou bona haroro ai nega bada baia ato.

Laḡani 10 muridiai lalogu ma na hadaia pania ḡaukarana baina karaia lou. Laḡani 1962 ai, Canada Betele ai hua ta lalonai baine heabi elda taudia edia sikuli, Kingdom Ministry School na lao henia neganai, e hamaorogu tadikaka Camille Ouellette ida daiutu tamona ai baia noho. Ena be ia na mai ena ruma bese, to ia ese haroro ḡaukarana na e goadalaia bona una ese lau na e durugu bada. Una negai, Quebec ai tadikaka bona taihu haida mo e painiava ena be idia na mai  edia ruma bese, una na tadikaka Camille e urava baine karaia ḡauna. A noho hebou neganai, ia ese e hagoadagu baina painia diba ena be lau na mai egu ruma bese. Hua haida muridiai, na diba lau ese regula painia ḡaukara baina karaia lou diba. Haida na e laloava egu abi hidi na kerere, to una na asina laloa badina na diba Iehova ese baine durugu egu haroro ḡaukara baina habadaia.

Laḡani 1964 ai, ai na a lou emai gabu Quebec City ai spesel painia ḡaukara a karaiava. Ena be una gabu ai Witnes taudia e daḡedaḡe henidia taudia na dia momo, to haida na dounu haroro ḡaukarana e kouava.

Saturday adorahi ta ai, lau na Quebec City ena taoni maraḡina ta Sainte-Marie ai pulisi ese e dogogutao. Pulisi tauna ta ese e laohaigu dibura ruma badina lau na ruma-ta-ruma-ta haroro ḡaukarana na karaiava to gwaumaoro pepana ta asina abia. Gabeai, e laohaigu Judge ta ladana Baillargeon vairanai, ia danu Witnes taudia e daḡedaḡe henidiava tauna ta. E nanadaigu, lauegu lawyer be daika. Lau ese Glen How * ladana na gwauraia, ia na Witnes taudia edia lawyer badana ta, una neganai ia na e gari bona e gwa: “Ino lasi, dia ia ma bainema lou.” Unu e haere toma badina dibana Tadikaka Glen How na Iehova ena Witnes edia lawyer badana ta bona nega momo keis momo na ia ese e winiva. Una dainai kota ese e hadibagu lau na asi egu kerere.

Quebec ai emai haroro ḡaukara e kouva dainai hebou gabudia baia renti na auka. Emai kongrigeisin taudia ese motuka e atomu gabuna maraḡina ta e davaria. Paraka bada herea dainai taumai baia hasiahu totona, tadikaka na oela e hasiahuamu heater ta e ḡaukaralaia. Nega momo hebou do se hematama neganai hora haida lalodiai una heater a helaia heḡeḡeva bena emai ekspiriens amo a hahegoada heheniva.

Laḡani haida muridiai haroro ḡaukara ena namo a itaia neganai a moale. Laḡani 1960 lalodiai, Quebec City ai ini gabu rua, Côte-Nord bona Gaspé Peninsula ai kongrigeisin na dia momo. To hari unu gabu ai kongrigeisin na momo, bona Kingdom Hall mai hairaidia ai e heboumu.

Laḡani 1970 ai, lau bona Simone e noimai sekit ḡaukarana baia karaia. Bena laḡani 1973 ai, ma e noimai distrik inarina ḡaukarana baia karaia. Una negai Tadikaka Laurier Saumur * bona David Splane * na sekit ḡaukarana e karaiava, bona idia amo ḡau momo na diba. Hebouhebou ta ta muridiai, David bona lau na emai hahediba karana baia hanamoa daladia a herevalaiva. Na helalotaomu nega ta David ese e hamaorogu, eto: “Léonce, emu tok dokona na name moalelaia. Una na namo, to bema lau oi lau na una tok tamona amo tok toi nama heni diba.” Lau na ḡau momo herea na herevalaiva. Lau  na na diba egu tok na baina hakwadoḡidia bona hereva badadia mo baina gwaurai.

Distrik e nariva tadikakadia ese sekit ḡaukara e kara tadikakadia e hagoadadiava. To, Quebec ai pablisa momo na mai dibadia lau. Edia sekit ai idia na vadivadi henidiava neganai idia na e urava lau ida baia haroro hebou. Ena be una na moalelaiva, to egu nega na dia heḡereḡere sekit tauna ida baia herevahereva. Nega ta, sekit tauna ta ese e hamaorogu, eto: “Tadikaka taihu ida o ḡaukara heboumu na namo, to basio helaloboio ina na lau bavadivadigu wikina. Namona na lau danu ba hagoadagu.” Una ese lau na e durugu lalohadai maorona baina abia totona.

Laḡani 1976 ai, ḡau dikana ta e vara. Adavagu lalokauna, Simone na e gorerea dikadika bena e mase. Ia na hahine namo hereana badina sibona ena ura ḡaudia na se lalo momova bona Iehova na e lalokau henia bada. Haroro ḡaukarana ai na bisiva dainai asina helalo momova bona Iehova na tenkiu heniamu badina una nega aukana lalonai e hagoadagu. Gabeai, Carolyn Elliott na adavaia, ia na painia ta, mai English gado dibana bona Quebec ema pablisa dia momo gabudiai baine haroro totona. Carolyn ihereva henina na basio garimu, bona ia ese ma haida edia namo, heḡereḡere asie herevaherevamu taudia eiava hemarai taudia edia namo na e lalo badamu. Lauegu ai, ia na hahenamo ta badina sekit ḡaukarana ai e durugu bada.

Laḡani 1978 January ai, lau na e noigu Quebec ai Painia Sikuli ginigunana baina hakaua. Lau na na gari badina una sikuli na asinala eiava sikuli bukana do asina itaia, vaitani ḡau iboudiai na matamata lauegu ai. Na moalemu badina klas ginigunana ai laḡani daudau painia ḡaukarana e karaia taudia na momo. Ena be lau na hahediba tauna una klas ai, to stiuden amo ḡau momo na diba.

Una laḡani ai danu, “Victorious Faith” Intanesinol Hebouhebou na Montreal ena Olympic Stadium ai e heabi.Una hebouhebou  ema taudia na 80,000 mai kahana bona guna Quebec ai hebou unu bamona ta se heabi. Una negai lau na News Service Department ḡaukarana na naria. Journalist momo na hereva henidia bona na moale badina ita daidai sivarai namodia momo e tore. Hora 20 mai kahana lalodiai TV, reidio, bona atikol momo amo unu e halasi. Unu amo momo e haroro henidia.

Laḡani 1996 ai ḡau idauna ta ma e vara. Quebec ai na bapatiso negana amo lau na French gado e herevalaiava teritorina ai hesiai ḡaukarana na karaiava, to una murinai Toronto ai English gado e herevalaiamu gabuna e siaigu lao distrik inarina ḡaukarana baina karaia. Na gari English gado ai tok baina heni badina una gado na asina herevalaia namonamova. Una dainai na ḡuriḡuri loulou bona Iehova enai na tabekau.

Distrik inarina ḡaukarana do asina karaia neganai na gariva, to laḡani rua Toronto kahanai hesiai ḡaukarana na moalelaia bada. Carolyn ese e durugu egu English gado baina hanamoa, bona tadikaka taihu ese ai na e durumaiva bona e hagoadamaiva. Tura namodia momo a davari.

Friday ai hebouhebou totona na heḡaeḡaeva bona adorahi ai hora tamona bamona ruma-ta-ruma-ta haroro ḡaukarana na karaiava. Haida na reana e lalova, ‘Dahaka dainai wiken be hebouhebou be heabimu a ia be ma e haroromu?’ To, na itaia haroro ḡaukara ai ma haida ida na herevahereva karana ese e hagoadagu. Hari danu, haroro muridiai na loumu ruma neganai, na moalemu.

Laḡani 1998 ai, lau bona Carolyn na e noimai spesel painia ḡaukarana baia karaia. Laḡani momo lalodiai lau ese na karava ḡaudia haida na, pablik gabudiai haroro ḡaukara daladia na heḡaeḡaelaiva bona nius oreadia ese Iehova ena Witnes e gwauraidia kerereva herevadia na hamaoromaorodiava. Hari lau bona Carolyn na a moalemu badina tano idauidau amo Canada e maimu bona Baibul amo diba ma haida e uramu bae abi taudia a haroro henidiamu.

Iehova ena hesiai ḡaukara na laḡani 68 lalonai na karaia bona una na laloamu neganai, na dibamu Iehova ese lau na e hanamogu. Na moale badamu badina haroro ḡaukara ikarana dalana na dibaia bona momo na durudia hereva momokani e dibaia. Natugu, Lise adavana ida na natudia e bada murinai, regula painia ḡaukarana e hamatamaia. Na moalemu badina ia na dounu haroro ḡaukarana e goadalaiamu. Bona tadikaka taihu na tenkiu henidiamu badina edia haheitalai namodia bona edia sisiba ese e durugu lauma dalanai na goada bona hesiai ḡaukara idauidau na kara. Na dibamu Iehova ena ḡaukara siahuna, lauma helaḡa ena heduru baita abiamu neganai, Iena orea amo ta abimu ḡaukaradia na baita kara dibamu. (Sal. 51:11) Iehova na tenkiu heniamu badina ia ladana ihanamona ḡaukarana e henigu.​—⁠Sal. 54:6.