1, 2. (a) Iehova ena Witnes e hakaudiamu taudia bona tomadiho haida e hakaudiamu taudia be ede e idau toma? (b) Ina stadi bona gabe stadina ai dahaka baita herevalaimu?

“UMUI ihakaumui tauna be daika?” Taunimanima haida ese Iehova ena Witnes taudia na nega momo unu e nanadaidia tomamu. Dahaka dainai? Badina tomadiho momo lalodiai, tau eiava hahine tamona ese dubu taudia e hakaudiamu o e gunalaidiamu. To, ita na mai moaleda ida e nanadaidamu taudia ta hamaorodiamu, ita na tanobada tauna ta ese se hakaudamu. To, ita ese Keriso—vada e toreisi lou tauna—ena hahekau dalana ta badinaiamu, ia ese Tamana, Iehova, ena hahekau dalana e badinaia.—Mat. 23:10.

² Hari ina negai abidadama tataudia haida—“hesiai tauna mai ena kamonai bona mai ena kara maoromaoro”—ese Dirava ena taunimanima e hakaudiamu. (Mat. 24:45) To, ede ta diba tomamu Iehova ese Natuna amo ita e hakaudamu? Ina stadi bona gabe stadina ai baita itaiamu, edena dala ai laḡani momo lalodiai Iehova ese tatau haida e abidia hidi ena taunimanima bae hakaudia. Ini stadi ruaosi ese dala toi be herevalaimu, idia ese be hahedinaraimu Iehova ese unu tatau na e durudiamu, bona una ese e hamomokaniamu Ia na ena taunimanima Ihakaudia Tauna korikorina.—Isa. 58:11.

3. Dahaka ese Mose e hasiahua Israel taudia baine gunalaidia?

³ Dirava ese ena lauma helaḡa amo ena gwaukau taudia e hasiahudia. Mose mani a laloa, ia na Dirava ese e abia hidi Israel taudia baine gunalaidia.  Dahaka ese e durua una ḡaukara badana baine karaia? Iehova ese ‘ena lauma helaḡa’ amo Mose e durua. (Isaia 63:11-14 ba duahi.) Iehova ese ena taunimanima na doini e hakaudiava, badina ena lauma helaḡa amo Mose e hasiahua.

4. Israel taudia be ede e diba toma Dirava ena lauma ese Mose e duruava? (Rau 18 ai laulau ba itaia.)

⁴ Lauma helaḡa na asita itaia dibamu siahuna dainai, Israel taudia be ede e diba toma lauma helaḡa na Mose lalonai e ḡaukarava? Lauma helaḡa ena heduru dainai Mose ese hoa karadia e karava bona Farao vairanai Dirava ladana e gwauraia hedinarai. (Eso. 7:1-3) Danu, lauma helaḡa ese Mose e durua dainai, kara namodia heḡereḡere lalokau, manau, bona haheauka e hahedinarai, unu amo ia na vada e heḡereḡere Israel taudia baine hakaudia. Ia ena kara bona tano haida igunalaidia taudia edia kara na i’idau; idia na daḡedaḡe bona hekokoroku karadia e hahedinarai! (Eso. 5:2, 6-9) Una ese e hahedinaraia, Iehova ese Mose e abia hidi ena taunimanima baine hakaudia.

5. Edena dala ai Iehova ese Israel tataudia haida e hasiahudia ena taunimanima bae hakaudia? Mani a herevalaia.

⁵ Gabeai, Iehova ese e abidia hidi tataudia haida na ena lauma helaḡa amo e hasiahudia ena taunimanima bae hakaudia. “Iosua Nunu na aonega laumana ese e rohea.” (Deu. 34:9) “Iehova ena Lauma ese Gideon e rohea.” (Hahe. 6:34) Bona “Iehova ena Lauma ese David e rohea badabada.” (1 Sam. 16:13) Unu tatau iboudiai na Dirava ena lauma ena heduru ai e tabekau, bona una lauma ese e hasiahudia dainai, sibodia edia goada amo basie kara diba karadia e kara. (Ios. 11:16, 17; Hahe. 7:7, 22; 1 Sam. 17:37, 50) Una dainai, unu e kara karadia amo Iehova e imodaia.

6. Dahaka dainai Iehova na e ura ena taunimanima ese Israel igunalaina taudia bae matauraidia?

⁶ Hahemomokani ḡaudia ese e hahedinarai unu tatau na lauma helaḡa ese e hasiahudia dainai, Israel taudia be dahaka bema kara na namo? Idia ese Mose ena hahekau dalana e maumauraia neganai, Iehova na e henanadai: “Ini taunimanima na bae dadaraigu ela bona edena nega ai?” (Num. 14:2, 11) Momokani, Iehova ese Mose, Iosua, Gideon, bona David e abidia hidi ena taunimanima bae hakaudia. Taunimanima ese unu tatau e kamonai henidia neganai, idia na momokani Iehova, Ihakaudia Tauna, e badinaia.

7. Aneru ese Mose be ede e durua toma?

⁷ Aneru ese Dirava ena gwaukau taudia e durudia. (Heberu 1:7, 14 ba duahi.) Iehova ese aneru e ḡaukaralaidia Mose e durua, e haheḡaeḡaea bona e hakaua. Dirava ese Mose na Israel “edia lohia bona edia hahemaoro tauna ai vada e halaoa; bona au ginigini lalonai e itaia aneruna ese e durua.” (Kara 7:35) Iehova na “aneru” amo ena Taravatu e gwauraia, bena Mose ese Israel taudia e hadibalaidia. (Gal. 3:19) Bona Iehova ese Mose e hamaoroa: “Harihari aola, taunimanima ba hakaudia lao, vada na hamaorolaimu tanona ai ba hakaudia vareai. Momokani, egu aneru ese baine gunalaimui.” (Eso. 32:34) Baibul ese na se hahedinaraia aneru ta na taunimanima ai ela bena Israel taudia ese e itaia unu ḡaukara e kara. To, Mose ese taunimanima e hadibadia bona e hakaudia dalana amo vada e hahedinaraia, ia na aneru ese e duruava.

8. Aneru ese Iosua bona Hesekia be ede e durudia toma?

⁸ Mose ena nega murinai, ia gabuna e abia tauna, Iosua, na “Iehova ena tuari oreana lohiana” ese e hagoadaia, Dirava ena taunimanima baine hakaudia Kanaan taudia bae tuari henidia totona; bona Israel taudia na e kwalimu. (Ios. 5:13-15; 6:2, 21) Gabeai, King Hesekia na e lalohekwarahi, badina Asuria tuari taudia na Ierusalem ihadikana totona hahegari herevadia e gwaurai. Hanuaboi tamona lalonai, “Iehova ena aneru na e raka lasi, taunimanima domaga-ta gerebu-taurahani daha-ima [eiava 185,000] Asuria taudia edia taruha ai e aladia mase.”—2 Han. 19:35.

9. Ena be Dirava ena gwaukau taudia na dia ḡoḡoevadae, to Israel taudia ese dahaka bae kara na namo? Mani a herevalaia.

 ⁹ Momokani, aneru na ḡoḡoevadae, to idia ese e durudia taudia na dia ḡoḡoevadae. Nega ta, Mose ese Iehova ladana na se hahelaḡaia. (Num. 20:12) Iosua na Gibeon taudia ida gwauhamata ta e karaia neganai, Dirava ena heduru na se tahua. (Ios. 9:14, 15) Nega ta ai, Hesekia “lalona na e hekokoroku.” (2 Sis. 32:25, 26) Ena be idia na nega haida kerere e kara, to Dirava na dounu e urava Israel taudia ese edia hahekau dalana bae badinaia na namo. Iehova ese unu tatau na ena aneru goadadia amo e durudia. Oibe, Iehova ese ena taunimanima na e hakaudia.

10. Dirava ena Taravatu ese Mose be ede e hakaua toma?

¹⁰ Dirava ena Hereva ese ena gwaukau taudia e hakaudia. Israel e henidia Taravatuna na Baibul ese e gwauraia “Mose ena taravatu.” (1 Han. 2:3) To, Baibul ese e hahedinaraiamu taravatu ihenina Tauna korikorina na Iehova, bona Mose ese una taravatu danu e badinaiava. (2 Sis. 34:14) Iehova ese Mose na hebou kalaga helaḡana ihaginana dalana e hadibaia murinai, “Mose na unu e kara toma. Iehova ese e haḡania heḡereḡerena.”—Eso. 40:1-16.

11, 12. (a) Iosua bona Dirava ena taunimanima e lohiadia pavapavadia be dahaka bae kara na namo? (b) Dirava ena Hereva ese ena taunimanima Igunalaidia taudia be ede e durudia toma?

¹¹ Iosua na ena hahekau ḡaukarana e matamaia negana amo, Dirava ena Hereva e torea bukana ta e abia. Dirava ese e hamaoroa: “Ina taravatu bukana herevadia na udumu ai bae mia; ia anina ba laloa boi, ba laloa rani. Unu amo ia lalonai e tore herevadia iboudiai ba badinadia bona karadia ba kara.” (Ios. 1:8) Gabeai, Dirava ena taunimanima e lohiadia pavapavadia danu unu e kara toma. Idia ese Taravatu na dina iboudiai bae duahia, bona una Taravatu na bae torea hanai, bona ‘ina taravatu bona ini haheḡani bae badinadia bona karadia bae kara.’—Deuteronomi 17:18-20 ba duahi.

¹² Dirava ena hereva ese ena taunimanima e hakaudia taudia be ede e durudia toma? King Iosia ena haheitalai mani a laloa. Mose ena Taravatu bukana ta e davaria murinai, Iosia ena seketere ese vairanai e duahia. * King be ede e kara toma? “Hanua pavapavana ese taravatu bukana herevadia e kamonai negana ai, ena dabua e dare.” To dia una mo. Iosia na Dirava ena Hereva ese e hakaua dainai, kaivakuku iboudiai e hadikadia ore, bona Lagau-hanai o Pasova aria hereadaena ta e karaia. (2 Han. 22:11; 23:1-23) Iosia bona hahekau taudia haida mai edia abidadama na Dirava ena Hereva e badinaia dainai, Dirava ena taunimanima e henidia hahekau herevadia na mai edia ura ida e hahedinaraidia namonamova. Unu senisi ese idaunegai Dirava ena taunimanima e durudia Iena ura e badinaia.

13. Edena dala ai Dirava ena taunimanima ihakaudia taudia bona bese idaudia ihakaudia taudia na i’idau?

¹³ Unu abidadama pavapavadia bona bese idaudia ihakaudia taudia na idau; bese idaudia ihakaudia taudia na sibodia edia aonega bona edia lalohadai heḡereḡerena ai edia bese e hakaudiava! Kanaan taudia igunalaidia taudia henudiai, taunimanima ese kara dika hereadia e kara, heḡereḡere natudia ida e mahuta hebouva, tatau bona tatau eiava hahine bona hahine e mahuta hebouva, animal ida e mahuta hebouva, natudia e bouboulaidiava bona kaivakuku e tomadiho henidiava. (Lev.  18:6, 21-25) Danu, Babulono bona Aigupto edia hahekau taudia na Dirava ese Israel taudia e henidia haheḡanina heḡoeva karana ai na asie badinaia, saiens dalanai una ḡoeva karana na maoro. (Num. 19:13) To, Dirava ena taunimanima ihakaudia taudia na lauma dalana ai, edia kara ai bona tauani dalana ai ḡoeva karana e hahedinaraia. Una ese e hahedinaraia ḡoevaḡoevamu, Iehova ese idia na e hakaudiava.

14. Dahaka dainai Iehova ese ena taunimanima ihakaudia taudia haida e sisiba henidia?

 ¹⁴ Dirava ena taunimanima e lohiadia pavapavadia haida ese Iena haheḡani na asie badina. Danu, Iehova asie badinaiava taudia ese Dirava ena lauma helaḡa, ena aneru bona ena Hereva na e dadaraidia. Nega haida, Iehova ese unu hahekau taudia e sisiba henidiava eiava gabudia ai ma haida e atodiava. (1 Sam. 13:13, 14) Bena ena nega korikori ai, ia ese unu hahekau tataudia e hereadia tauna ta e abia hidi.

15. (a) Edena dala ai peroveta taudia ese e hahedinaraia hahekau tauna hereadaena ta bainema? (b) E perovetalaia hahekau tauna be daika?

¹⁵ Laḡani momo lalodiai, Iehova na e peroveta Ia ese ena taunimanima ihakaudia tauna hereadaena baine abia hidi. Mose ese Israel taudia e hamorodia: “Iehova, emui Dirava, ese peroveta tauna ta, lau heḡereḡeregu, emui bese bogaraḡina amo baine abia hidi; bena ia erena ba kamonai.” (Deu. 18:15) Isaia na e peroveta una Tau hereadaena na bese idauidau “igunalaidia tauna ai, bona edia lohia ai” bainela. (Isa. 55:4) Bona Daniel na Dirava ena heduru amo “horoa tauna” ena mai e perovetalaia. (Dan. 9:25) Gabeai, Iesu Keriso sibona ese e hahedinaraia ia na Dirava ena taunimanima edia “hahekau tauna.” (Mataio 23:10 ba duahia.) Iesu ena hahediba na mai edia ura ida ia murinai e rakava, bona e abia dae momokani ia na Iehova ese e abia hidi tauna. (Ioa. 6:68, 69) Idia be ede e diba toma Iesu Keriso ena amo Iehova ese ena taunimanima e hakaudiava?

16. Dahaka ese e hahedinaraia lauma helaḡa ese Iesu e hasiahua?

¹⁶ Lauma helaḡa ese Iesu e hasiahua. Iesu e bapatiso negana ai, Ioane bapatiso “ese guba e itaia, e parara, bona Lauma e diho, pune na heto, ia tubuana ai e kau.” Una murinai, Iesu na “lauma helaḡa ese e hasiahua dainai, tano ḡaḡaena ela.” (Mar. 1:10-12; NWT) Tanobada ai Iesu ena haroro ḡaukara orena lalonai, Dirava ena lauma helaḡa ese e hasiahua dainai, hoa karadia e kara bona Dirava ena siahu amo e herevava. (Kara 10:38) Danu, lauma helaḡa ese Iesu e durua dainai lauma huahuadia, heḡereḡere lalokau, moale bona abidadama goadana e hahedinarai. (Ioa. 15:9; Heb. 12:2) Hahekau tauna ma ta ese kara unuhetomadia se hahedinarai. Iehova ese Iesu sibona e abia hidi.

17. Aneru be dahaka e kara Iesu bae durua totona?

¹⁷ Aneru ese Iesu e durua. Iesu e bapatiso murinai, “aneru haida ia dekena ela, ia isiaina e lao heni.” (Mat. 4:11) Ena mase horana e kahikahiva neganai, “aneru ta guba amo ienai e kau, ihagoadana totona.” (Luka 22:43) Iesu na mai dibana Iehova ese aneru baine siaidia diba ia bae durua Dirava ena ura baine haḡuḡurua totona.—Mat. 26:53.

18, 19. Dirava ena Hereva ese Iesu ena mauri bona hahediba dalana be ede e hakaudia toma?

 ¹⁸ Dirava ena Hereva ese Iesu e hakaua. Iesu na ena haroro ḡaukara e matamaia negana amo, Buka Helaḡa ena hereva ese e hakaua. (Mat. 4:4) Momokani, ia na Dirava ena Hereva e badinaia ela bona hisihisi auna ai e mase. Iesu na do se mase neganai, ia ese Mesia e perovetalaia herevadia haida e gwaurai. (Mat. 27:46; Luka 23:46) To tomadiho igunalaina taudia na idau; idia ese Dirava ena hereva na e dadaraiava bema una na sibodia edia hahediba herevadia ida asie heḡereḡereva. Iehova ese peroveta tauna Isaia ena amo e gwaurai herevadia na Iesu ese ini e gwauraidia toma: “Ina bese ese bibinadia ai e imodaigumu, A lalodia be dauha verevai. E toma henigu diho kavamu, A edia hahediba herevadia na taunimanima edia taravatu mo.” (Mat. 15:7-9) Iehova ese tatau unuhetomadia baine abidia hidi diba, ena taunimanima bae hakaudia, a?

¹⁹ Iesu na ena kara bona hahediba dalana amo e hahedinaraia Dirava ena Hereva ese e hakaua. Dubu igunalaina taudia ese e nanadaia neganai, sibona ena aonega bada amo eiava ena mauri ai e diba ḡaudia amo se haere henidia. To ia ese Buka Helaḡa ena hereva e ḡaukaralaia. (Mat. 22:33-40) Bona ia e kamonai henia taudia ediai ena guba maurina eiava guba bona tanobada ai e kara ḡaudia sivaraidia na se gwaurai, to “Buka Helaḡa anina e hadibalaidia, ela bona lalodia e parara.” (Luka 24:32, 45) Iesu ese Dirava ena hereva na e ura henia, bona e ura ma haida baine hadibalaidia.

20. (a) Iesu be edena dala ai e hahedinaraia ia na Dirava e badinaia? (b) Iesu bona Herod Agripa Ginigunana edia kara be ede e idau toma?

²⁰ Ena be taunimanima na Iesu ena “hereva namodia” daidiai e hoa, to ia ese Ihadibana Diravana, Iehova mo e imodaia. (Luka 4:22) Nega ta taḡa tauna ta ese Iesu e imodaia, bena eto, “Hahediba taumu namona” neganai, Iesu na mai manauna ida e haere, eto: “Dahaka lau namogu o gwauraimu? Ta dia namo, Dirava mo sibona.” (Mar. 10:17, 18) To Herod  Agripa Ginigunana—laḡani 8 heḡereḡerena murinai Iudea pavapavana ai ela tauna—na dia unu bamona. Aria dinana ta ai, Herod na “pavapava dabuadia” e hahedokilai. Bena hutuma na e lolo eto: “Ena na dirava ta gadona, dia taunimanima gadona”! Herod ese edia heimodai herevadia na e moalelai. Bena dahaka e vara? “Una nega ai Lohiabada ena aneru ta ese e huaria, badina be ia ese Dirava se heatolaia. Bena gaigai-gaigai ese tau-anina e ania, vada e mase vaitani.” (Kara 12:21-23) Una dainai, taunimanima ta na basine gwau diba Iehova ese Herod e abia hidi hahekau tauna ai bainela. To, Iesu na ena kara amo e hahedinaraia ia na Dirava ese e abia hidi tauna, bona ia ese Iehova, taunimanima Ihakaudia Diravana Hereadaena, e imodaia hanaihanaiva.

21. Stadi gabena ai dahaka baita herevalaimu?

²¹ Iesu na dia laḡani haida mo hahekau ḡaukarana baine karaia. Iesu e tore isi lou murinai, ini e gwau toma: “Siahu idoinai guba ai bona tanobada ai vada eme henigu.” Bena ma eto: “Ba helalo tao danu, lau na daba daba iboudiai umui ida ta nohomu ela bona tanobada dokona.” (Mat. 28:18-20) To Iesu na lauma ta guba ai e nohomu dainai, Dirava ena taunimanima tanobada ai be ede baine hakaudia toma? Keriso ena hahekau henunai Iehova be daidia baine ḡaukaralaidia ena taunimanima baine hakaudia? Bona Kristen taudia ese Dirava ena gwaukau taudia be ede bae dibadia toma? Stadi gabena ese unu henanadai be haerelaimu.