1, 2. (a) Iehova ese ita edai dahaka vada e hahedinaraia? (b) Isaia 46:10, 11 bona 55:11 ai dahaka ta dibamu?

BAIBUL ena hereva ginigunadia na ini e gwau toma: “Matamana negana ai na Dirava ese guba bona tanobada e karadia.” (Gen. 1:1) Momokani, ita na Dirava ese e kara ḡaudia momo na do asita lalopararalaidia namonamomu, heḡereḡere guba ḡaudia (o space), diari, ḡau iboudiai e veridia taomu siahuna (o gravity), bona guba hisiudia danu, haida mo ta itadia dibamu. (Koh. 3:11) To, Iehova ese ena ura tanobada bona taunimanima ediai na ita e hadibalaidamu. Dirava na e uramu ia heida-idana ai e karadia tatau bona hahine ese ina tanobada bae noholaia. (Gen. 1:26) Idia na Ia natuna ai baela, bona Iehova na idia Tamadia ai bainela.

² Genese karoa 3 ese e hahedinaraia heḡereḡerena, e vara hekwakwanaina ta ese Iehova ena ura na e hadikaia. (Gen. 3:1-7) To, Iehova ese una hekwakwanai na baine hamaoromaoroa diba. Bona ta ese Ia na basine koua diba. (Isa. 46:10, 11; 55:11) Una dainai, ta diba momokanimu Iehova ena ura ginigunana na nega korikori ai baine ḡuḡuru diba!

3. (a) Ededia mai anidia bada hereva momokanidia amo Baibul baita lalopararalaiamu? (b) Dahaka dainai hari unu hahediba herevadia baita herevalaimu? (c) Ededia henanadai baita lalodiamu?

³ Buka Helaḡa ai ta diba hereva momokanidia haida bini: Iehova ena  ura tanobada bona taunimanima ediai, bona Iesu Keriso ena ḡaukara Dirava ena ura ihaḡuḡuruna ai. Unu na Baibul ta stadilaia matama neganai ta diba ḡaudia haida. Una dainai, ta uramu kudou namo taudia baita durudia unu mai anidia bada hahediba herevadia bae diba. Kongrigeisen ai ina atikol ta stadilaiamu lalonai, ta uramu taunimanima momo baita boiridia Keriso ena mase Ilalotaona hebouna baema. (Luka 22:19, 20) Una hebou be maimu taudia na Dirava ena ura be dibaia namonamomu. Una dainai, Memorial dinana do se kau ai, namona na henanadai namodia haida baita lalodia bona baita ḡaukaralai, eda stadi taudia bona kamonai taudia lalodia baita veri, una mai anina bada hebouna baema totona. Hari, ita ese henanadai toi baita herevalaimu: Matamanai Dirava ena ura tanobada bona taunimanima ediai be dahaka? Dahaka e vara? Bona dahaka dainai Iesu ena mauri davana ihenina karana ese dala e kehoa Dirava ena ura baine ḡuḡuru totona?

4. Iehova e kara ḡaudia ese Ia hairaina be ede e hahedinaraia tomamu?

⁴ Iehova na ḡau iboudiai e karadia ḡoevaḡoeva Diravana. Ia ese e havaradia ḡaudia iboudiai na nanamo heherea. (Gen. 1:31; Ier. 10:12) E kara ḡaudia iboudiai hairaidia bona edia heau dalana amo dahaka ta dibamu? Mauri ḡaudia baita haerodiamu neganai, edia heau dalana na mai hoana, e kara ḡaudia badadia bona maraḡidia na mai anidia bada. Tauanida ena cell e ḡaukaramu daladia baita lalomu, bona natu karukaruna ta ta itaiamu, eiava dina e dihomu hairaina ta itaiamu neganai ta hoalaimu, ani? Unu na ta moalelaimu badina Dirava ese una hemami namona e henida.—Salamo 19:1; 104:24 ba duahi.

5. Iehova be dahaka e kara, unu amo e havara ḡaudia iboudiai bae ḡaukara hebou namonamo?

⁵ Iehova ese e kara ḡaudia iboudiai na ia e ato taravatudia e badinamu. Ia ese guba ḡaudia bona tanobada ḡaudia bae heau namonamo taravatudia bona taunimanima ede bae kara toma taravatudia e ato, unu amo ḡau iboudiai na bae ḡaukara hebou namonamo diba. (Sal. 19:7-9) Ḡau iboudiai guba ai bona tanobada ai na edia gabu korikori ai e atodia, bona Dirava ena ura heḡereḡerena ai e ḡaukaramu. Iehova ese taravatu e ato, ia e kara ḡaudia iboudiai bae ḡaukara hebou helaoreana. Heḡereḡere, gravity taravatuna dainai tanobada na hodahoda (o atmosphere) ese e ḡeḡeamu, davara ena aru dalana e biaguamu, bona tanobada ai mauri ḡaudia e durudiamu. Dirava ese e kara ḡaudia iboudiai, taunimanima danu, na unu taravatu heḡereḡeredia ai e ḡaukaramu bona e mareremu. Unu iboudiai ese Dirava ena ura tanobada bona taunimanima ediai na e hahedinaraiamu. Eda haroro ḡaukara ai, unu ḡau iboudiai e havara Diravana baita herevalaia diba, ani?—Apok. 4:11.

6, 7. Iehova ese Adam bona Heva e henidia harihari ḡaudia haida be dahaka?

⁶ Matamanai Iehova ena ura na taunimanima ese tanobada bae noholaia hanaihanai. (Gen 1:28; Sal. 37:29) Ia ese Adam bona Heva na harihari ḡaudia idauidau e henidia, mauri bae moalelaia totona. (Iakobo 1:17 ba duahia.) Iehova ese ura kwalimu e henidia, ḡau idauidau bae haero diba, ma haida bae lalokau henidia bona bae hetura henidia diba. Ḡau iboudiai e karadia Diravana ese Adam na kamonai karana baine hahedinaraia dalana e hadibalaia. Danu, Adam na sibona baine henari dalana, animal bona tano baine nari daladia e diba. (Gen. 2:15-17, 19, 20) Danu, Iehova ese Adam bona Heva e karadia neganai, idia ese ḡau idauidau bae mami, bae dogotao diba, bae roharoha, bae kamonai diba, bona bae hairu diba. Una dainai, idia na  Paradaiso ai ḡau iboudiai bae moalelai diba. Idia raruosi na ḡau idauidau bae kara, bae haḡuḡuru, bona ḡau matamatadia momo bae dibadia diba.

⁷ Iehova ena ura ma ta be dahaka? Iehova ese Adam bona Heva e karadia neganai, idia ese natudia ḡoevadaedia bae havara diba. Ia na e ura natudia ese natudia danu bae havara, ela bona besedia ese tanobada bae hahonua. Iena ura na Adam bona Heva bona tama sina iboudiai ese natudia bae lalokau henidia, Iehova ese natuna ḡoevadaedia ginigunadia e lalokau henidia heḡereḡerena. Bena idia ese tanobada bona lalona ḡaudia iboudiai bae biagudia.—Sal. 115:16.

8. Dahaka dainai Dirava ese Genese 2:16, 17 ai e herevalaia taravatuna e henidia?

⁸ Dirava ena ura una negai na se ḡuḡuru. Dahaka dainai? Iehova ese Adam bona Heva e henidia taravatuna na dia auka, una taravatu amo idia na edia ura kwalimu hetoana bae lalopararalaia. Ia na eto: “Imea audia iboudiai huahuadia bavani, emu ura heḡereḡerena; a namo bona dika idibalaidia auna huahuana una mo basio ania; badina be ia bavania dinana ai oi na ba mase vaitani.” (Gen. 2:16, 17) Adam bona Heva ese una taravatu bae lalopararalaia na dia auka, bona una taravatu na bae badinaia diba. Badina bae ani diba anianidia na momo herea.

9, 10. (a) Satana ese Iehova be ede e habadelaia koikoi toma? (b) Adam bona Heva be dahaka abi hidi e karaia? (Rau 3 ai laulau ba itaia.)

⁹ Satana Diabolo ese gaigai ta ena amo Heva e koia Tamana, Iehova, baine gwau-edeede henia totona. (Genese 3:1-5 ba duahia; Apok. 12:9) Satana na e ura Adam bona Heva na bae lalo Dirava ese idia na e koudia “imea audia iboudiai huahuadia” basie ani totona. Una na vaitani bema gwau: ‘Emu hereva anina be o uramu ḡaudia be basio kara diba, a?’ Una murinai, ina koikoi herevana e gwauraia, eto: “Momokani, umui na basio mase.” Bena Heva lalona e ania Dirava basine kamonai henia, eto: “Dirava vada dibana raruosi bavania dinana ai na matamui bae papa.” Satana na ena koikoi amo e ura baine hahedinaraia, Iehova na se ura idia ese una au huahua bae ania bena lalodia bae diari. Danu, Satana na ina koikoi gwauhamata e gwauraia: “Dirava ida ba heḡereḡere, namo bona dika ba diba.”

¹⁰ Namona na Adam bona Heva ese abi hidi bae karaia. Idia be Iehova bae badinaia, eiava gaigai bae kamonai henia? Idia ese Dirava na asie badinaia. Unu e kara toma neganai, idia na Satana ena gwau-edeede karana e durua. Idia ese Tamadia Iehova e dadaraia bona ena lohia dalana namona amo e daudau.—Gen. 3:6-13.

11. Dahaka dainai Iehova ese gwau-edeede karana na se raraia tao?

¹¹ Adam bona Heva ese Iehova e gwau-edeede henia neganai, mauri ḡoevadaena e haboioa. Danu, edia gwau-edeede dainai, idia na Iehova ena amo e daudau, badina Ia ‘matana na ḡoeva-dae dainai, kara dika basine itaia.’ Bona ‘kara kerere basine raraia diba.’ (Hab. 1:13) Bema Dirava ese Adam bona Heva edia kara dika bema raraia tao, mauri ḡaudia iboudiai—guba ai bona tanobada ai—edia mauri na bema dika. Danu, bema Dirava na Eden ai e vara kara dikana dainai ḡau ta basinema karaia, readia Ia na basiema abidadama henia. To Iehova na nega iboudiai ena taravatu e badinadiamu; se hamakohidiamu. (Sal. 119:142) Una dainai, ena be Adam bona Heva na mai edia ura kwalimu, to una ese maoro na se henidia Dirava ena taravatu bae utua. Iehova e gwau-edeede henia dainai, idia na e mase bona tano ḡahuna e lou henia, badina be tano amo e karadia.—Gen. 3:19.

12. Adam natuna ediai be dahaka e vara?

 ¹² Adam bona Heva ese una au huahua e ania neganai, Dirava ese ena ruma bese lalonai se abidia dae. Dirava ese Eden amo e luludia, bona basie vareai lou diba. (Gen. 3:23, 24) Unu amo Iehova ese edia kara dika davana e henidia. (Deuteronomi 32:4, 5 ba duahi.) Idia na vada dia ḡoevadae dainai, Dirava ena kara na asie tohotohodia ḡoevaḡoeva. Adam na nega vaira helarona mo se haboioa, to ia natuna na kara dika bona mase e henidia hanai. (Roma 5:12) Ia ese natuna edia mauri hanaihanai iabina dalana e koua. Danu, Adam bona Heva ese natudia ḡoevadaena ta asie havaraia; idia natudia ese danu natudia ḡoevadaena ta asie havaraia. Satana Diabolo ese Adam bona Heva na Dirava ena amo e hakaudia siri murinai, ia na taunimanima e koidiamu ema bona hari.—Ioa. 8:44.

13. Iehova ena ura taunimanima ediai be dahaka?

¹³ Dirava ese taunimanima na doini e lalokau henidiamu. Ena be Adam bona Heva na e gwau-edeede, to Iehova na e uramu taunimanima ese ia bae hetura henia namonamo. Ia na se uramu taunimanima bae mase. (2 Pet. 3:9) Una dainai, gwau-edeede karana e vara murinai, Dirava ese dala e karaia unu amo taunimanima na Ia bae hetura henia lou, to danu Ia ese ena taravatu maoromaorodia na e badina. Edena dala ai Iehova ese una e haḡuḡurua?

14. (a) Ioane 3:16 ena hereva heḡereḡerena, Dirava be dahaka e kara taunimanima baine durudia totona? (b) Edena henanadai na kamonai taudia ida baita herevalaia?

¹⁴ Ioane 3:16 ba duahia. Memorial ai baita boiridiamu taudia momo na una siri na mai dibadia. To henanadai na ina, Edena dalai Iesu ena boubou ḡauna dainai mauri hanaihanai baine vara? Memorial pepana ihariharilaina ḡaukarana, Memorial negana, bona Memorial baema taudia baita lou henidia karana ese dala baine kehoa diba, hereva momokani e tahuamu kudou-maoro taudia baita durudia, una henanadai badana haerena bae lalopararalaia totona. Unu bamona taudia na Iehova ese mauri davana ihenina karana amo ena lalokau bona aonega e hahedinaraia dalana bae lalopararalaia namonamo neganai, bae moale diba. Una mauri davana ihenina karana ai, ededia point baita herevalai diba?

15. Edena dalai Iesu na Adam ena amo idau?

¹⁵ Iehova ese tau ḡoevadaena ta e heni mauri davana ihenina tauna ai bainela. Namona na una tau ḡoevadaena ese Iehova baine badinaia bona mai ena ura ida kara dika taudia ihamauridia totona ena mauri baine heni. (Roma 5:17-19) Iehova ese natuna vara-edeana na guba amo e siaia tanobada. (Ioa. 1:14) Una dainai Iesu na tau ḡoevadaena ai ela, guna Adam e ḡoevadae heḡereḡerena. Iehova e ura tau ḡoevadaena ese baine kara karadia iboudiai na Iesu ese e kara, to Adam be dia unu bamona. Ena be hahetoho aukadia e davari, to Iesu na se kara dika eiava Dirava ena taravatu se utua.

16. Dahaka dainai mauri davana ihenina karana na harihari ḡauna hereadaena?

¹⁶ Iesu na tau ḡoevadaena dainai, taunimanima na kara dika bona mase amo baine hamauridia diba bema idia daidiai baine mase. Ia ese Adam bema kara ḡaudia iboudiai e kara—ia na tau ḡoevadaena, bona hanaihanai Dirava e badinaia bona e kamonai henia. (1 Tim. 2:6) Iesu ese mauri davana e heni, unu amo “hutuma”—tatau, hahine, bona natu—ese mauri hanaihanai bae abia diba. (Mat. 20:28) Momokani, una mauri davana ihenina karana na vaitani Dirava ena ura ginigunana ihaḡuḡuruna iduarana bema kehoa.  (2 Kor. 1:19, 20) Mauri davana ihenina karana amo abidadama taudia iboudiai ese mauri hanaihanai bae abia diba.

17. Mauri davana ihenina karana dainai dahaka hahenamo bae vara diba?

¹⁷ Iehova ese mauri davana ihenina totona, dava bada hereana e heni. (1 Pet. 1:19) Ia ese ita taunimanima e laloda badamu dainai, mai ena ura ida Natuna vara-edeana e heni ita daidai baine mase. (1 Ioa. 4:9, 10) Una na heḡereḡere, Iesu ese ita tamada ginigunana, Adam, gabuna bema abia. (1 Kor. 15:45) Iesu na unu e kara toma dainai, ia ese dia mauri mo e henida, to Dirava ena ruma bese ai baitala hahenamona danu e henida. Oibe, Iesu ena boubou ḡauna dainai, Iehova ese taunimanima na baine abidia dae lou diba ena ruma bese ai, bona una ese ena kara maoromaoro taravatudia na se utu. Abidadama taudia iboudiai bae ḡoevadae negana ta laloamu neganai, ta moalemu, ani? Dirava ena guba ruma besena bona tanobada ruma besena na maino ai be nohomu. Ita na Dirava natuna korikoridia ai baita lao momokanimu.—Roma 8:21.

18. Edena negai Iehova na “ḡau iboudiai kwaradia ai bainela”?

¹⁸ Satana ena gwau-edeede karana ese Iehova ena lalokau taunimanima ediai na se koua, eiava ita na se kouda Dirava baita badinaia totona. Mauri davana ihenina karana amo, Iehova ese natuna iboudiai baine durudia kara maoromaoro taudia ai baela. Mani a laloa, mauri be ede be hetomu bema Dirava Natuna “bae raraia tao bona bae abidadama henia taudia” iboudiai ese mauri hanaihanai bae abia. (Ioa. 6:40) Iehova na mai ena lalokau bada bona aonega ida, taunimanima na ḡoevadae taudia ai baine halaodia, iena ura ginigunana heḡereḡerena. Bena Iehova, ita Tamada, na “ḡau iboudiai kwaradia ai bainela.”—1 Kor. 15:28, NWT.

19. (a) Mauri davana ihenina karana baita laloa bada karana ese baine dorida dahaka baita kara? (Maua ladana, “ Namona Na Gaiho Namo Taudia Baita Tahudia” ba itaia.) (b) Stadi gabena ai dahaka baita herevalaiamu?

¹⁹ Mauri davana ihenina karana baita laloa bada karana ese baine hagoadada, ma haida baita durudia idia danu una harihari ḡauna hereadaena amo namo bae davari. Namona na taunimanima na bae diba, una mauri davana ihenina karana amo Iehova ese mauri hanaihanai hahenamona na taunimanima e henidia. To, una mauri davana ihenina karana ese ḡau ma haida danu e kara. Stadi gabena ai, Iesu ena boubou ḡauna amo Eden imeana ai Satana ese e havaraia hepapahuahuna e hamaoromaoroa dalana baita herevalaiamu.