LAU tamagu Arthur na Dirava garina e gariva tauna, bona e urava Metodist haroro tauna ta ai bainela. To, Bible Student taudia edia buka e duahia bona e bamodia matama neganai, ena ura na e haidaua. Laḡani 1914 ai, ia laḡanina 17 neganai, ia na e bapatiso. Una na Tanobada Tuarina Ginigunana e matama negana, bona ia na e boiria ami ai baine vareai. To, ia na se ura baine tuari dainai, e siaia Kingston Dibura Rumana ai hua 10 baine noho, una na Ontario, Canada ai. Tamagu na dibura ruma amo e lasi murinai, ful-taim hesiai ḡaukara ai e vareai, una na kolpota (o painia) ḡaukarana.

Laḡani 1926 ai, Arthur Guest ese Hazel Wilkinson e adavaia, Hazel sinana na laḡani 1908 ai hereva momokani e dibaia. Lau na April 24, 1931 ai na vara, ai taumai hani amo lau be iharuana. Ai ese Iehova itomadiho henina karana na a laloa badava, Tamagu ese Baibul e matauraia badava dainai, ai danu Dirava ena Hereva na a laloa badava. Hanaihanai ruma-ta-ruma-ta haroro ḡaukarana a karaia hebouva.—Kara 20:20.

Laḡani 1939 ai, Tanobada Tuarina Iharuana e vara, bena una laḡani murinai Canada ai Iehova ena Witnes taudia edia haroro ḡaukara na e taravatua. Sikuli momo ai bese iabi isidia karadia e karava, heḡereḡere fleg e salutiva bona bese iabi isina anedia (o national anthem) e abiva. Nega unu bamodia ai, emai titsa ese lau bona kakagu Dorothy na klasrum amo e lulumai lasiva. Dina ta, na hoa badina egu titsa na e ura baine hahemaraigu dainai e gwauva lau na kava. Sikuli murinai, egu klas taudia haida ese e dadabagu bona tano ai na moru. To una daḡedaḡe karana ese lalogu na e hagoadaia Dirava baina kamonai henia na namo, to dia taunimanima.—Kara 5:29.

 July 1942 ai, lau laḡanigu 11 neganai, farm ta ena ranu tanikana lalonai na bapatiso. Sikuli holidei negadia ai lau na vacation painia (hari e gwauraiamu heduru painia) ḡaukarana na karaiava. Laḡani ta ai, lau bona tadikaka tatoi na ala emai daudau teritori not Ontario ai, unuseniai au utu taudia (loggers) baia haroro henidia totona.

May 1, 1949 ai, regula painia ḡaukarana na hamatamaia. Una negai brens na konstraksen ḡaukara e karaiava dainai, lau na e boirigu baina heduru bona December 1 ai Canada ena Betele famili memba ta ai nala. Lau na e abigu hidi printa ḡaukarana baina karaia bona printa masini (flatbed press) iḡaukaralaina dalana na dibaia. Pura haida lalodiai, lau na hanuaboi ai na ḡaukarava, Canada ai Iehova ena taunimanima ese e davari daḡedaḡe karana e herevalaia pepapepana baia printia totona.

Gabeai, Service Department ai na ḡaukarava lalonai, lau ese brens ai e vadivadi painia taudia haida na hereva henidia, idia na Quebec baela hesiai ḡaukara bae karaia, unuseniai daḡedaḡe na bada. Idia padadiai taihu ta ladana na Mary Zazula, ia na Edmonton, Alberta amo ema. Ia bona kakana, Joe, na asie ura Baibul istadilaina karana bae hadokoa dainai, tamadia sinadia—Otodoks dubu e badinaiava taudia—ese ruma amo e luludia. June 1951 ai, Mary bona kakana na e bapatiso, bona hua siks muridiai painia ḡaukara e hamatamaia. Idia ida na herevahereva neganai, na itaia Mary na lauma ḡaudia e lalo badava. Sibogu ini na lalo toma, ‘Bema dahaka baine vara, toana na baina adavaia kekenina bina.’ Hua 9 muridiai, January 30, 1954 ai, raruosi a headava. Pura ta murinai, ai na e boirimai seket ḡaukara ena treinin baia abia, bena murina laḡanidia rua ai, not Ontario ai seket ḡaukara a karaia.

Tanobada heḡeḡemadai haroro ḡaukarana e bada e laova dainai, misinari ḡaukara bae karaia taudia momo e boiridia. Ai na a lalo, bema Canada ena keru negana na a manadalaia bona siahu negana ai nāmo (mosquitoe) a haheaukalaidia, anina na asainmen matamatana ai bae vara ḡaudia danu baia haheaukalai diba. July 1956 ai, Gilead Sikuli ena klas namba 27 amo a gradueit, bena November ai emai asainmen, Brazil, ala.

Brazil ena brens ai a kau neganai, ai na Portuguese gado e hadibamai. Hahenamo herevadia igwauraidia dalana bona miniti tamona ai magasin iherevalaina dalana a diba murinai, haroro ḡaukara a karaia matama. E hadibamai bema ruma tauna baine kamonai, Dirava ena Basileia henunai baine vara maurina e herevalaia sirina ta baia duahia. Emai haroro dinana ginigunana ai, hahine ta na e kamonai namonamo dainai, lau ese Apokalupo 21:3, 4 na duahia—bena na maserea! Lau na gabu siahudia ai asina manada dainai na hekwarahiva tauanigu baine manada totona.

 Campos taonina ai emai misinari ḡaukara a karaia, hari unuseniai kongrigeisen iboudiai na 15. Una taoni ai a kau neganai, grup maraḡina tamona mo noho bona misinari rumana ta ai taihu hani e nohova, idia na: Esther Tracy, Ramona Bauer, Luiza Schwarz, bona Lorraine Brookes (hari be Wallen). Misinari rumana ai egu ḡaukara na, dabua huri gabunai baina heduru bona aniani inadudia audia baina habou. Monday hanuaboi ta ai, emai Gima Kohorona Stadi murinai, ḡau ta e vara. Adavagu na sea (sofa) ta ai e tabekau bona dina ai e vara ḡaudia a herevalaiva. Kwarana e abia isi neganai, kusini henuna amo gaigai ta e rau lasi, bona gari dainai mai lolona ida e heau siri murinai gaigaina na alaia!

Laḡani tamona lalonai Portuguese gado a stadilaia murinai, lau na e abigu hidi seket ḡaukara baina karaia. Ai na dia kohu momo maurina a noholaiava—a nohova gabunai paoa na lasi, geda ai a mahutava, bona emai loaloa ai hosi bona hosi ese e veriamu ruma-rumana a ḡaukaralaiava. Daudau teritori ai haroro ḡaukara negana ta ai, ai na treini amo ororo ai taoni ta ala bona unuseniai ruma ta a rentia. Brens ofesi ese magasin 800 e siai haroro ai baia ḡaukaralaidia totona. Nega momo post ofesi a laova magasin boksidia baia abidia bona baia laohaidia a nohomu gabuna.

Laḡani 1962 ai, Basileia Hesiai Ḡaukara Sikulina na Brazil ai e heabi, tadikaka bona misinari taihudia idurudia totona. Hua 6 lalodiai, lau na unu gabu idauidau na laova una sikuli baina hahedibalaia totona—Mary na e noho. Na hahediba gabudia haida na Manaus, Belém, Fortaleza, Recife, bona Salvador. Manaus ai ruma badana ta (opera house) ai distrik hebouhebou ta a karaia. Hebouhebou gabunai medu bada herea e diho, bona una ese emai inuinu ranudia bona aniani gabudia e hadika. (Unu negadia ai, aniani na hebouhebou gabudiai e heḡaeḡaelaiva.) Ami taudia na hadibadia bona ofesa ta na mai moalena ida inuinu ranudia e heni, bona soldia haida e siaidia emai kisini bona aniani gabudia ai palai badadia rua e hagini.

Egu loaloa ḡaukarana na karaiava negana ai, Mary na Portuguese ena bisnes gabudia ai e harorova, unuseniai momo na moni davari daladia mo e lalova. Ta ida Baibul baine herevalaia na auka, una dainai ia ese Betele taudia haida e hamaorodia, “Portugal na basinama lou.” To se daudau murinai, revareva ta abia, una revareva ai e boirimai Portugal baiala. Una nega ai, una tano ai eda haroro ḡaukara na e taravatua, to una asainmen na abia dae, ena be matamanai Mary na se ura.

August 1964 ai, Lisbon, Portugal ai a kau. Unuseniai eda tadikaka na Portuguese pulisidia (PIDE) ese e  daḡedaḡe henidiava. Una dainai, a lalo unuseniai baia kau neganai, tadikaka na basia hedavari henidia bona basia hadibadia. Ai na renti rumana ta ai a nohova, bona emai visa abi murinai, apartment ta a rentia. January 1965 ai, dala na e hekeho dainai ai ese brens ofesi a rini henia. Hua faiv muridiai, emai hebou ginigunana abia neganai, a moale dikadika!

Ai na a kamonai pulisi na dina ta ta e laova tadikaka edia ruma bae sekedia. Kingdom Hall na e koudia dainai, kongrigeisen heboudia na gabu hehunidia ai a karava. Witnes taudia momo na e laohaidiava pulis steisen ai, bae nanadaidia totona. Pulis taudia ese tadikaka na e daḡedaḡe henidia, badina e urava hebou e hakauva taudia ladadia bae henidia. Una dainai, tadikaka ta ta na sibodia ladadia korikori e gwauraiva, heḡereḡere José eiava Paulo, to tamadia ladadia na asie gwauraiva. Una dainai ai danu unu a kara toma.

A laloa bada ḡauna na, eda tadikaka ese lauma aniani bae abia na namo. Mary ese Gima Kohorona stadi atikol bona ma buka haida na pepa idauna ta (stencils) ai e taipidiava, una pepa amo kopi momo e printiva.

June 1966 ai, Lisbon ai kota badana ta e heabi. Feijó Kongrigeisen tadikaka bona taihu iboudiai 49 na e laohaidia una kota, badina hehuni ai edia hebou e karava. Una kota totona na haheḡaeḡaedia bona loea ta heḡereḡerena na kara idia idurudia. Mai dibamai ai na basia kwalimu diba, to a diba una ese haroro namona baine heni. Emai loea na ena hereva dokonai aposetolo edia negai e nohova tauna, Gamaliel, sivaraina e gwauraia. (Kara 5:33-39) Nius oreadia ese una kota sivaraina e halasia, bona tadikaka taihu 49 na dibura ruma ai e atodia, haida be dina 45 bae noho, bona haida be hua 5 mai kahana. A moale badina emai loea na do se mase neganai, ia na Baibul stadi e abia dae bona hebou e laova.

December 1966 ai, lau na e abigu hidi brens ovasia, bona nega momo legal depatmen ai na heduruva. Iehova ena Witnes taudia ese edia tomadiho ḡaukaradia bae kara ena maoro a gwaurai hedinarai. (Fili. 1:7) December 18, 1974 ai, gavamani ese una maoro na e heni. Hedkwota amo Tadikaka Nathan Knorr bona Frederick Franz na Portugal ema, bona hebou badana ta Oporto bona Lisbon ai a karaia, una hebou ema taudia iboudiai na 46,870.

 Iehova ese dala e kehoa dainai, Portuguese gado e herevalaiava motumotudia haida, bona Azores, Cape Verde, Madeira, São Tomé bona Príncipe ai danu a haroro. Laḡani 1988 ai, brens rumadia a habadadia. April 23, 1988 ai, Tadikaka Milton Henschel ese una brens rumadia ihahelaḡana ena tok e heni, bona ema taudia iboudiai na 45,522. Moale ḡauna na, guna Portugal ai misinari ḡaukara e karava tadikaka taihu 20 na una hebou ema.

E hanai laḡanidia lalodiai, abidadama taudia ibamodia karana ese ai na e durumai bada. Tadikaka Theodore Jaracz ena zone vadivadi ai a ḡaukara hebou neganai, mai anina bada ḡauna ta na dibaia. A vadivadia brens na ta ai hekwakwanai badana ta e vara, bona Brens Komiti na ḡau iboudiai e kara una bae hamaoromaoroa totona. Tadikaka Jaracz na idia ihagoadadia totona, ini e gwau toma: “Hari na nega baita heni lauma helaḡa baine ḡaukara.” Laḡani haida gunadiai Brooklyn a vadivadia negana ai, lau bona adavagu, Mary, na adorahi ta ai Tadikaka Franz bona ma haida ida a noho bouva. Emai noho bou dokonai, Tadikaka Franz a nanadaia laḡani momo Iehova e hesiai henia sivaraina ta baine gwauraia neganai, ia na ini e gwau toma: “Egu hahegoada herevana bina: Iehova ena orea lalonai ba noho, nega namodia ai bona nega dikadia ai. Ina orea sibona na Iesu ese ena hahediba e haḡanidia ḡaukarana e karaiamu—Dirava ena Basileia sivaraina namona e harorolaiamu!”

Lau bona adavagu ese una ḡaukara na a moalelaia. Brens idauidau ai a kara zone vadivadidia na dounu a lalodiataomu. Unu vadivadi ese ai na e durumai eregabe bona iahudia edia ḡaukara goadagoada karana baia laloa bada, bona baia hagoadadia Iehova ihesiai henina ḡaukarana bae karaia hanaihanai.

Laḡani momo vada e hanai, bona hari ai laḡanimai na 80 heḡereḡerena. Mary na gorere idauidau e haheaukalaimu. (2 Kor. 12:9) Hahetoho idauidau ese emai abidadama e hagoadaia bona e durumai Dirava baia badinaia hanaihanai totona. Emai mauri a laloamu neganai, baia gwau dibamu ai ese Iehova ena hariharibada na dala momo ai a itaia. *