1. “Dirava ena maino” anina be dahaka,” bona una maino ese ede baine duruda toma? (Filipi 4:6, 7)

 MAINO ta na mia, ina tanobada taudia asi dibadia mainona. Una na “Dirava ena maino,” bona una na Tamada guba ai ihetura henina karana amo e varamu mainona. Dirava ena maino dainai eda noho na be namomu bona basita garimu. (Filipi 4:6, 7 ba duahidia.) Dirava e lalokau heniamu taudia ida hetura karana namona ta moalelaiamu. Bona “maino Diravana” ida eda hetura karana danu ta moalelaiamu. (1 Tes. 5:23) Tamada baita dibaiamu, baita abidadama heniamu, bona baita badinaiamu neganai, ena maino ese dika negadiai laloda baine hamainoa diba.

2. Dahaka dainai ta dibamu Dirava ena maino na baita abia diba?

² Ḡau dikadia e varamu, heḡereḡere daihanai goreredia, disasta, heiriheiri, eiava daḡedaḡe negadiai, Dirava ena maino baita abia diba, a? Unu dika daidiai baita lalo hekwarahimu o baita gari dibamu. To, Iesu ese ena hahediba e hamaorodia, eto: “Dia namo lalomui bae hekwarahi bona ba gari.” (Ioa. 14:27, NWT) Ta moalemu, badina tadikaka taihu ese Iesu ena hereva e badinaiamu. Iehova ena heduru amo, idia na maino ai e nohomu bona dika badadia e haheaukalaimu.

3. Daihanai goreredia o pandemic ese taunimanima edia maino be ede e hadikaia toma?

³ Gabu momo ai daihanai goreredia o pandemic ese taunimanima edia mauri na e haidaumu. Mani COVID-19 ese momo edia mauri e haidau daladia aita lalo. Hetahu ḡaukarana ta ai, e hereva henidia taudia momo na e gwa una pandemic lalonai idia  na asie mahuta namonamova. COVID-19 dainai lalohekwarahi, lalometau, alkahol inuna karana, drag abi karana, ruma bese lalodiai daḡedaḡe, bona sibodia e ura bae hahemase karadia na e bada. Bema o nohomu gabunai daihanai gorerena ta baine vara, edena dala ai basio lalohekwarahi bada bona Dirava ena maino bavabia?

4. Dahaka dainai Iesu ese dina gabedia e perovetalaia herevadia ta dibamu ese laloda e hamainoamu?

⁴ Iesu na e peroveta dina gabediai daihanai goreredia na “gabu idau-idau ai” bae vara. (Luka 21:11) Una ta dibamu ese laloda be ede e hamainoa tomamu? Gabu momo ai daihanai goreredia e varamu neganai asita daradaramu. Ta dibamu e varamu ḡaudia na Iesu ena hereva heḡereḡerena e varamu. Una dainai ita na Iesu ese ina nega dokonai e nohomu taudia e hamaorodia herevana ta badinaiamu, eto: “Lalomui basie daradara.”​—Mat. 24:6.

5. (a) Daihanai goreredia e varamu neganai, Filipi 4:8, 9 heḡereḡerena dahaka baita ḡuriḡurilai be namo? (b) Baibul ena audio rekodin ihakaladia karana ese ede baine durumu toma?

⁵ Gabu momo ai e varamu daihanai goreredia ese gari bona daradara e havaramu. Una na taihu ta ladana Desi enai e vara. b COVID-19 dainai, vavana, ena kasen, bona ena dokta e mase murinai, ia na e gari una gorere ese baine abia bena sinana burukana baine henia hanai garina. Dia una amo, to ena moni ḡaukara danu baine haboioa diba dainai, e lalo aniani bona ruma davana be ede baine heni toma. Unu lalohekwarahi ḡaudia daidiai hanuaboi ai na se mahutava. To Desi lalona na ma e maino lou. Edena dala ai? Ia na Iehova e ḡuriḡuri henia, lalona baine maino bona lalohadai maorona baine abia totona. (Filipi 4:8, 9 ba duahidia.) Ia ese Iehova e kamonai henia dalana na, Baibul ena audio rekodin e hakaladiava. E gwa: “Duahiduahi taudia gadodia namodia ese egu lalohekwarahi na e haorea bona Iehova ena hebogahisi na mamia.”​—Sal. 94:19.

6. Sibomu emu stadi bona kongrigeisin heboudia ese oi be ede bae durumu toma?

⁶ Daihanai goreredia ese emu mauri ai o karamu ḡaudia haida na be haidaumu, to unu ese sibomu emu stadi eiava hebou karadia basie hadika na namo. Iseda pablikeisin bona vidio ai ekspiriens ese e hahedinaraimu, tadikaka taihu na abidadama ai e gini tutuka-tutukamu, ena be hekwakwanai unu bamodia e davarimu. (1 Pet. 5:9) Hebou amo lalomu na lauma ḡaudia ai be honumu. Danu dala be kehoamu haida bo hagoadaidiamu bona idia ese oi be hagoadamumu. (Roma 1:11, 12) Iehova e tomadiho heniamu taudia na e gorere, e gariva, o sibodia noho hemamina e abiava negadiai, Iehova ese e durudia dalana bo laloa dobumu neganai, emu abidadama be goadamu bona bo abia daemu ia ese oi danu be durumumu.

7. Aposetolo Ioane ena amo dahaka o dibamu?

 ⁷ Tadikaka taihu edia heduru ba tahua. Gabu momo ai daihanai gorerena ta dainai, tadikaka taihu ida ta hedavarimu negadiai padada na bae daudau. Nega unu bamodiai, oi na aposetolo Ioane e lalo bamona bo lalo dibamu. Ia na e ura turana Gaio baine itaia. (3 Ioa. 13, 14) To, Ioane na e laloparara nega taina be laomu murinai, Gaio baine itaia diba. Una dainai Ioane na baine karaia diba ḡauna e karaia, ia ese Gaio ena revareva ta e torea. Bema tadikaka taihu na basio itadia dibamu, telefon o video calls amo ba hereva henidia, eiava teks meseij ba siaia. Unu bo kara tomamu neganai, emu hemami na be namomu bona bo lalo mainomu. Elda taudia ba hereva henidia bema o lalo hekwarahimu, bona edia heduru bona hahegoada herevadia na bavabi dae.​—Isa. 32:1, 2.

8. Edena dala ai disasta ese emu maino baine hadikaia diba?

⁸ Bema abata, tano laga, o lahi e vara dainai dika bada herea o davari, doini bo lalo hekwarahimu. Bema emu lalokau taudia bona kohu o haboiodia, reana o lalohisihisi bada, eiava o mamia emu mauri na asi anina, eiava o badu danu. Una ese na se hahedinaraiamu oi na kohu o lalo badamu eiava asi emu abidadama. Oi ese hahetoho badana ta o davaria, bona reana haida na be lalomu una na vaia mai lalo metauna. (Iobu 1:11) To, unu nega aukadia ai, oi na maino ai ba noho diba. Edena dala ai?

9. Iesu be dahaka e perovetalai amo disasta totona e ha heḡaeḡaeda?

⁹ Iesu ese e perovetalai herevadia ba lalotao. Taunimanima haida na e laloamu disasta na basie varamu, to mai dibada unu na be varamu bona unu disasta haida ese eda mauri na bae hadikaia diba. Iesu ese ena hahediba e hamaorodia, dokona do basine kau ai ‘tano laga badadia’ bona disasta ma haida bae vara. (Luka 21:11) Danu, e peroveta “kara havara baine vara rohoroho,” bona hari una na e varamu, heḡereḡere raskol, daḡedaḡe bona terorist karadia. (Mat. 24:12) Iesu na se gwa unu dika na Iehova e rakataniamu taudia ediai mo bae vara. To, Iehova ena hesiai taudia momo ediai danu e varamu. (Isa. 57:1; 2 Kor. 11:25) Iehova na dia hoa dalanai unu disasta iboudiai amo be gimadamu, to iduruda ḡaudia iboudiai be henidamu laloda baine maino totona.

10. Dahaka dainai hari baita heḡaeḡae karana ese e hahedinaraiamu ita na mai eda abidadama? (Hereva Lada-isidia 22:3)

¹⁰ Dika ta do se vara ai baita heḡaeḡae gunamu neganai, una ese be durudamu basita lalohekwarahi. To heḡaeḡae karana ese e hahedinaraiamu ita be Iehova asita abidadama heniamu, a? Lasi. Disasta dainai baita heḡaeḡaemu karana ese be hahedinaraiamu, ita na Iehova ena henari karana ta abidadama heniamu. Edena dala ai? Dirava ena Hereva ese e durudamu bae vara disasta idauidau daidiai baita heḡaeḡae. (Hereva Lada-isidia 22:3 ba duahia.) Bona Dirava ena orea ese magasin, kongrigeisin heboudia, bona nega korikori ai e henimu hahediba herevadia amo e hadibada louloumu, dika do se vara ai baita heḡaeḡae. c Ita ese Iehova be ta abidadama heniamu, a? Bema oibe, hari unu sisiba baita badina na namo, disasta ta do se vara ai.

11. Margaret ena haheitalai amo dahaka o dibamu?

¹¹ Taihu ta ladana Margaret ena ekspiriens mani aita laloa. Gavamani taudia ese e hamaoroa ena noho gabuna baine rakatania badina unuseniai lahi badana ta e hekara. Taunimanima hutuma na nega tamona e urava bae  heau dainai, dala na motuka e honu bona se heau haraḡava. Gabu ibounai na kwalahu korema-koremadia ese e hahonua, bona Margaret na ena motuka amo baine lasi na auka. To, ia na e mauri badina e heḡaeḡae guna. Ena baege ai na mapu ta mia, una mapu amo dala idauna ta e itaia. Ia na guna una dala na e heaua, unu amo dika baine vara neganai mai dibana ede kaha bainela. Margaret na e heḡaeḡae guna dainai, e mauri.

12. Dahaka dainai dika basita davari totona hahediba herevadia baita badina?

¹² Ita bona ma haida na dika basita davari totona, siahu taudia ese be hamaorodamu curfew baita badinaia, gabu ta baita rakatania, eiava ma hahediba hereva unu bamodia be henimu. Taunimanima haida na unu hahediba herevadia se badina haraḡamu, badina se uramu edia kohu o noho gabudia bae rakatani. To Kristen taudia be dahaka bae kara? Baibul na e gwaumu: “Taunimanima edia taravatu iboudiai ba badina, Lohiabada dainai. Hanua pavapavana ba kamonai henia, badina be ia na herea. Bona gavana taudia . . . ba kamonai henidia.” (1 Pet. 2:13, 14) Dirava ena orea ese danu hahediba herevadia e henimu, dika basita davari totona. Hanaihanai e hahelaloda taomu eda fon namba na elda taudia baita henidia, unu amo dika negadiai bae rini henida diba. Oi be una do karaia? Danu be hadibadamu edena gabu ai baita noho, o gabu baita rakatania, heduru ḡaudia ma haida baita abi, o edena dala ai bona edena nega ai haida baita durudia. Bema unu hahediba herevadia basita badinamu, iseda mauri bona elda taudia edia mauri na dika ai baita atoa diba. Baita helalotao, unu abidadama tadikakadia na ita e gimadamu. (Heb. 13:17) Margaret na e gwa: “Na abia dae momokanimu elda taudia bona eda orea ena hahediba herevadia ibadinadia karana ese e hamaurigu.”

13. Dahaka ese edia noho gabudia e haboio Kristen taudia na e hamoaledia bona lalomaino e henidia?

¹³ Disasta, tuari o heiriheiri karadia daidiai edia gabu e rakatani tadikaka taihu momo na, e ḡaukara goada edia noho dalana matamatana e badinaia, bona maoromaoro tiokratik ḡaukaradia e kara. Daḡedaḡe karadia daidiai e heau Kristen ginigunadia heḡereḡeredia, idia ese “sivarai namo” na gabu idauidau ai e harorolaiamu. (Apos. 8:4) Haroro ḡaukara ese e durudia Basileia bae laloa bada, dia edia hekwakwanai. Una dainai, e moale bona e lalomaino.

14. Edena dala ai daḡedaḡe ese eda maino baine hadikaia diba?

¹⁴ Daḡedaḡe ese maino e havaraiamu ḡaudia momo na e hadikadiamu. Ta heboumu, ta haroromu, bona vaevae ta karamu ḡaudia ta karamu negadiai ta moalemu, bona bae arestida garina na asita garimu. Bema unu be koudiamu, baita lalo hekwarahimu, bona kerukeru edai be varamu ḡaudia daidiai baita garimu. Unu na vaia baita mamimu hemamidia. To, baita henari namonamo na namo. Iesu ese e hahedinaraia daḡedaḡe karadia ese ena hahediba taudia na baine hahekwakwanaidia. (Ioa. 16:1, 2) Una dainai daḡedaḡe negadiai edena dala ai dounu baita maino diba?

15. Dahaka dainai daḡedaḡe karadia daidiai basita gari? (Ioane 15:20; 16:33)

¹⁵ Dirava ena Hereva na e gwaumu: “Keriso Iesu lalonai Dirava ibadinana bae ura taudia iboudiai na daḡedaḡe do bae hisihisilai.” (2 Tim. 3:12) Tadikaka ta ladana Andrei, ena tano ai eda ḡaukara e taravatua neganai, ienai na e auka baine abia dae. Ia na e gwa: ‘Ini kaha ai Witnes taudia na momo herea. Siahu taudia ese ai iboumai be ede bae arestimai toma?’ Una ese Andrei lalona na e ha hekwarahia bada. Tadikaka ma haida be Iehova e abidadama henia bona e abia dae idia na bae arestidia diba, bona asie lalohekwarahi bada, Andrei e lalohekwarahi bada heḡereḡerena. Una dainai Andrei na lalona e hadaia, unu tadikaka heḡereḡeredia e lalo bona Dirava e abidadama henia. Gabeai, ena lalohekwarahi na e ore, bona hari e moalemu ena be hekwakwanai e varamu. Ita edai danu una na baine vara diba. Iesu na e gwa daḡedaḡe na baita davarimu, to ma e hagoadadamu abidadama ai baita gini goada diba.​—Ioane 15:20; 16:33 ba duahidia.

16. Daḡedaḡe negadiai ede amo e maimu hahekau herevadia baita badina na namo?

¹⁶ Eda ḡaukara e taravatumu o kahana badadia e koumu negadiai, brens ofes bona elda taudia amo hahekau herevadia baita abimu. Unu amo be gimadamu, lauma aniani dounu baita abimu, bona baita haroro diba. Namona na ba ḡaukara goada unu hahekau herevadia ba badina, ena be e henimu badidia na so lalopararalai namonamomu. (Iak. 3:17) Danu, eda tadikaka taihu bona kongrigeisin ḡaukaradia sivaraidia na asi edia maoro bae diba taudia ediai basio gwaurai.​—Koh. 3:7.

17. Aposetolo taudia heḡereḡeredia, laloda baita hadai dahaka baita kara?

 ¹⁷ Satana ese Dirava ena taunimanima e tuari henidiamu badina badana ta na, idia ese “Iesu e gwauraia hedinaraimu.” (Apok. 12:17, NWT) Satana bona ena tanobada ese basie hagarimu na namo. Ena be daḡedaḡe bae vara, to haroro bona hahediba ḡaukaradia ese moale bona maino be henidamu. Kristen ginigunadia edia negai, Iuda igunalaina taudia ese aposetolo taudia e hamaorodia basie haroro neganai, unu abidadama taudia ese Dirava e kamonai henia. Idia na dounu haroro ḡaukara e karaia, bona una ese e hamoaledia. (Apos. 5:27-29, 41, 42) Momokani, eda ḡaukara e kouamu neganai, namona na mai eda aonega ida baita haroro. (Mat. 10:16) To bema baita ḡaukara goadamu, Iehova ihamoalena karana bona hahemauri sivaraina iharorolaina ḡaukarana amo be varamu mainona baita abiamu.

18. Daika ena amo maino korikorina baita abia diba?

¹⁸ Namona na bavabia dae nega auka hereadia lalodiai, maino ai ba noho diba. Nega unu bamodia ai, namona na baita helalotao, baita abia mainona na Dirava ena maino, una na Iehova sibona ese baine heni diba mainona. Gorere, disasta o daḡedaḡe e varamu neganai, Iehova enai ba tabekau. Iena orea ba badinaia namonamo. Vaira nega maurina namona ba laloa. Unu bo kara tomamu neganai, “maino Diravana ese” be bamomumu. (File. 4:9) Atikol gabena ai, baita itaiamu edena dala ai hisihisi e davarimu tadikakadia baita durudia, Dirava ena maino bae abia totona.