1-2. Atikol gunanai ita be dahaka ta herevalai, bona ina atikol ai dahaka baita herevalaimu?

ATIKOL gunanai, ita ese Levitiko karoa 19 ai sisiba namodia haida ta herevalai. Heḡereḡere, siri 3 ai Iehova ese Israel taudia e haḡanidia tamadia sinadia bae matauraidia. Bona hari ina negai, ita ese tama sina na tauanina, hemami, bona lauma dalanai ta naridiamu lalonai, una haheḡani baita badinaia daladia ta herevalai. Una siri tamona lalonai, Dirava ena taunimanima na Dina-helaḡana bae laloa bada badina e hadibadia. Ena be hari Dina-helaḡana na asita hahelaḡaiamu, to una taravatu ena hahekau herevana baita badinaia totona, hanaihanai nega baita ato Iehova itomadiho henina ḡaukaradia baita kara. Unu baita kara tomamu neganai, baita hahedinaraiamu ita na ta hekwarahimu baita helaḡa, Levitiko 19:2 bona 1 Petro 1:15 edia hereva heḡereḡerena.

² Ina atikol ai ita na dounu Levitiko karoa 19 baita herevalaiamu. Ina karoa ai, edena dalai tauanidia regena ta dia namo taudia baita bogadia hisi, mai momokanida ida bisnes ḡaudia baita kara, bona ma haida ediai lalokau baita hahedinaraia daladia baita dibamu. Ita na ta uramu baita helaḡa badina Dirava na helaḡa, una dainai baita diba ḡaudia mani aita herevalai.

3-4. Levitiko 19:14 heḡereḡerena, taia kudima bona matakepulu be ede bae kara henidia toma?

³ Levitiko 19:14 ba duahia. Iehova ena ura na ena taunimanima ese tauanidia regena ta dia namo taudia bae lalodia bada. Heḡereḡere, Israel taudia ese taia kudima tauna basie gwauraia  dika. Anina na basie hagaria o ihadikana herevadia basie gwaurai. Taia kudima tauna enai una na kara dikana! Idia e gwauraimu herevadia na basine kamonaimu dainai, ia na dia heḡereḡere ena maoro baine gwauraia hedinarai.

⁴ Danu, siri 14 ai Dirava ese ena hesiai taudia e haḡanidia matakepulu tauna vairanai ‘ihahekwakwanaina’ ḡauna ta basie atoa. Buka ta ese tauanidia regena ta dia namo taudia e herevalaidia neganai, eto: “Guna Israel badina hanuadia ai, [idia] na asie kara henidia namonamova bona e hahisidiava.” Reana taunimanima edia namo asie lalomu taudia haida ese matakepulu tauna vairanai ihahekwakwanaina ḡauna ta be atoamu badina e uramu bae hahisia o bae kirikirilaia. Una na dia namo! Levitiko 19:14 ena haheḡani amo, Iehova ese ena taunimanima e durudia regedia dikadia taudia bae bogadia hisi.

5. Tauanidia regena ta dia namo taudia ediai hebogahisi be ede baita hahedinaraia toma?

⁵ Iesu ese tauanidia regena ta dia namo taudia na e bogadia hisi. Ia ese Ioane Bapatiso e siai henia herevana mani a laloa: “Mata-kepulu taudia matadia e papamu: ae-hedairike taudia e raka namonamomu, lepra taudia e ḡoevaḡoevamu, taia-kudima taudia e kamonaimu, [bona] mase taudia e toreisimu.” Iesu ena hoa karadia e ita taudia “iboudiai ese Dirava e hanamoa.” (Luka 7:20-22; 18:43) Kristen taudia na Iesu e tohotohoamu, mai edia moale ida tauanidia regena ta dia namo taudia e bogadia hisimu. Una dainai ita ese unu bamona taudia ta kara namo henidiamu, ta lalodia badamu, bona ta haheauka henidiamu. Momokani, Iehova ese siahu na se henida hoa karadia baita kara. To, ta moalemu badina tauanina bona lauma dalanai matakepulu taudia na paradaiso sivaraina namona na ta hadibadiamu, una neganai taunimanima na tauanina bona lauma dalanai basie gorere loumu. (Luka 4:18) Una sivarai namona ese momo na e durudia dainai, Dirava e hanamoa.

6. Edena dalai Levitiko karoa 19 ese Taravatu 10 ai e gwaurai taravatuna ta anina e hahedinarai?

⁶ Levitiko karoa 19 ena siri haida ese Taravatu 10 ai e gwaurai taravatudia anidia e  hahedinarai. Heḡereḡere, taravatu ihataurahanina na e gwa: “Basio henao.” (Eso. 20:15) Reana ta na be lalomu, bema ḡau ta na dia iena dainai basine abiamu, una taravatu na e badinaiamu. To reana dala ma haida ai ia na e henaohenaomu.   

7. Edena dalai hoihoi tauna ese taravatu ihataurahanina ai e gwauraia henaohenao taravatuna baine utua diba?

⁷ Hoihoi tauna ta na reana be laloamu ia na se henaohenao, badina ma ta ena kohu na se abi. To iena bisnes karadia be ede bamona? Levitiko 19:35, 36 ai, Iehova na eto: “Basio hahetoho koikoi. Lata hahetohodia bona metau hahetohodia bona anina hahetohodia basio ha-idau koikoi. Emui hahetoho ḡaudia bona edia metau ḡaudia bae maoro; bona emui efa bona emui hini danu bae maoro.” Hoihoi tauna ese hahetoho ḡauna koikoina o maka koikoina amo kohu davadia baine kara neganai, ia na ena kastoma amo e henaohenaomu. Levitiko karoa 19 ena siri ma haida ese una na e hahedinaraia.

8. Edena dalai Levitiko 19:11-13 ai e herevalai herevadia ese Iuda taudia e durudia taravatu ihataurahanina bae badinaia, bona edena dalai baita badinaia neganai hahenamo baita abi?

⁸ Levitiko 19:11-13 ba duahia. Levitiko 19:11 matamana na ini e gwa toma: “Ḡau ta basio henaoa.” Siri 13 ai na e gwaumu: “Dekemu tauna . . . ena ḡau ta danu [koikoi dalanai, NWT] basio dadia.” Una dainai bisnes lalonai koikoi karadia na e henaohenao karana. Taravatu ihataurahanina ai henaohenao karana na e taravatua, to Levitiko bukana ai e gwaurai ḡaudia ese Iuda taudia e durudia una taravatu bae badinaia daladia e dibadia. Bema Iehova ena lalohadai koikoi bona henaohenao karana ai baita laloamu neganai, hahenamo baita abi dibamu. Reana siboda baita henanadai: ‘Levitiko 19:11-13 ena hereva dainai, egu mauri ai ḡau haida baina hanamo diba? Egu bisnes o moni ḡaukara ai ḡau haida baina haidaudia, eiava?’   

9. Levitiko 19:13 ai e hetore taravatuna ese ḡaukara taudia be ede e gimadia toma?

⁹ Mai ena bisnes Kristen tauna ese baina laloa momokani karana ma ta na mia. Levitiko 19:13 na e gwa: “Ḡaukara tauna ena ḡaukara davana basio dogoa tao ela bona daba ai.” Israel ai, momo na biru ḡaukara e karava, bona dina ta ta ḡaukaradia dokodiai ḡaukara taudia na davadia e heniva. Ḡaukara tauna davana se heniva neganai, ia na da asi ena moni una dina ai ena ruma bese baine ubua. Iehova na e gwa: “Badina be ia na e ogoḡamimu, bona davana iabina e uramu.”​—Deu. 24:14, 15; Mat. 20:8.

10. Levitiko 19:13 amo dahaka ta dibamu?

¹⁰ Hari ina negai, ḡaukara taudia momo na hua ta lalonai nega ta o rua e peidiamu, dia dina ta ta ai. To, Levitiko 19:13 ena hahekau herevana na dounu mai anina bada. Bisnes biagudia haida ese edia ḡaukara taudia davadia korikori na asie henimu. E dibamu unu ḡaukara taudia na dounu be ḡaukaramu, ena be davadia na dia bada. Baita gwau dibamu, bisnes biaguna ese ‘ḡaukara tauna ena ḡaukara davana e dogoa taomu.’ Namona na mai ena bisnes Kristen tauna ese una hahekau herevana baine laloa bada na ḡau badana. Hari, Levitiko karoa 19 ai baita diba ḡauna ma ta mani aita herevalaia.

11-12. Iesu ese Levitiko 19:17, 18 ena hereva e gwauraia neganai, ia be e ura dahaka baine hahedinaraia?

¹¹ Dirava ese taunimanima ta kara henidiamu lalonai, dia basita hahisidia karana mo e gwauraia. Una na Levitiko 19:17, 18 ai e hahedinaraia. (Ba duahia.) Una haheḡani na gwa:  “Dekemu tauna ba lalokau henia, sibomu o helalokaumu heḡereḡerena.” Kristen tauna na unu baine kara toma na mai anina bada, bema e uramu Dirava baine hamoalea.

¹² Iesu ese e hahedinaraia Levitiko 19:18 ai e hetore haheḡanina na mai anina bada. Farisea tauna ta ese Iesu e nanadaia, eto: “Taravatu ai haheḡani hereana be edena?” Iesu na gwa “haheḡani gini-gunana bona hereana” na Iehova baita lalokau henia mai kudouda idoinai, mai eda mauri idoinai, bona mai darada idoinai ida. Bena Iesu ese Levitiko 19:18 ena hereva e gwauraia: “Iharuana binai, ia heḡereḡerena, dekemu tauna ba lalokau henia, sibomu o helalokaumu heḡereḡerena.” (Mat. 22:35-40) Dekeda taudia ediai lalokau na dala idauidau ai baita hahedinaraia diba, to Levitiko karoa 19 ese unu kaha ai danu be durudamu.

13. Edena dalai Iosef sivaraina ese Levitiko 19:18 ai e gwauraia herevana e hahedinaraia?

¹³ Dekeda taudia ediai lalokau baita hahedinaraia dalana ta na, Levitiko 19:18 ena haheḡani baita badinaia. Eto: “Kara dika davana basio haloua. Emu bese taudia natudia na basio lalo-hisihisi henidia.” Ita momo na ta ese ena ḡaukara hebou, o skul hebou turana, eiava varavara ta, o ruma bese tauna ta e badu henia bona laḡani momo lalodiai e hemaka na mai dibada. Ba helalotao, Iosef tadikakana 10 ese na e badu henia dikadika dainai, gabeai idia ese kara dika badana ta e karaia. (Gen. 37:2-8, 25-28) To Iosef ese idia na se kara dika henidia! Dagi badana e abia neganai tadikakana edia dika davana bema heni diba, to e bogadia hisi. Iosef ese idia na se badu henidia noho badu henidia noho. To, ia na Levitiko 19:18 ai e hetore sisibana e badinaia.​—Gen. 50:19-21.

14. Dahaka ese e hahedinaraiamu Levitiko 19:18 ena hahekau herevadia na dounu mai anidia?

¹⁴ Iosef ese tadikakana edia dika e gwautao, bona se badu noho badu noho karana ese Dirava e uramu bae hamoalea Kristen taudia ese bae badinaia dalana e hahedinaraia. Una na Iesu ese e hahedibalaia ḡuriḡurina heḡereḡerena, badina ia ese ita na e hagoadada, e hadikadamu taudia edia dika baita gwautao. (Mat. 6:9, 12) Una heḡereḡerena, aposetolo Paulo ese Kristen taudia e sisiba henidia: “Egu lalokau taumui e, dika basio hadavaia.” (Roma 12:19) Danu e hagoadadia: “Ba haheauka heheni. Ta  ese bamona baine habadelaia negana ai, emui dika ba hegwautao heheni.” (Kol. 3:13) Iehova ena hahekau herevadia na asie idaumu. Levitiko 19:18 ena hahekau herevadia hari ina negai na dounu mai anidia.

15. Dika baita gwautao bona baita laloboio karana be edena haheitalai ese e hahedinaraia?

¹⁵ Mani haheitalai ta aita laloa. Ta ena hemami ba hadikaia karana na bero ta ida baita haheḡereḡerea diba. Bero haida be mamaraḡi, to ma haida be babada. Heḡereḡere, ḡau mai matana ta ese imada baine ivaia. Reana be hisihisimu, to una ese ita na basine hamasedamu. Dina ta o rua murinai, reana e ivada gabuna na basine hedinaraimu. Una heḡereḡerena, kerere haida na mamaraḡi. Haheitalai ta na, reana turada ta na basine lalo namonamomu dainai be hereva kereremu o be kara kereremu, to ena dika na baita gwauatao haraḡa dibamu. To bema eda bero na bada, dokta ese be turiamu bona kumiamu. Bema una bero na baita duriamu eiava baita kinia momomu, ia na be badamu bona toto dikana ai be laomu. Madi, nega haida e hahisia bada tauna na una haheitalai heḡereḡerena be karamu. E hahisia karana bona e hahisia tauna ena kara be lalodia louloumu. To, e badu noho badu nohomu taudia na sibodia e hahedikamu. Una dainai Levitiko 19:18 ena sisiba baita badinaia na aonega karana!

16. Levitiko 19:33, 34 heḡereḡerena, Israel ai noho hedoa taudia be ede bae kara henidia toma, bona una ese dahaka e hadibadamu?

¹⁶ Iehova ese Israel taudia e haḡanidia dekedia taudia bae lalokau henidia neganai, ia na se gwa edia bese eiava hanua taudia ediai mo lalokau bae hahedinaraia. Danu, e hamaorodia idia ida e noho hedoava taudia bae lalokau henidia. Una na Levitiko 19:33, 34 ai e hahedinaraia ḡoevaḡoeva. (Ba duahia.) Israel taudia ese noho hedoa tauna na edia “bese tauna korikori heḡereḡerena” bae kara henia, bona bae “lalokau henia” sibodia e helalokaumu heḡereḡerena. Heḡereḡere, Taravatu na e gwa noho hedoa taudia bona ogoḡami taudia na uma ai aniani bae gogomu neganai basie koudia. (Lev. 19:9, 10) Una hahekau herevana na hari Kristen taudia ese bae badinaia danu. (Luka 10:30-37) Edena dalai? Taunimanima milion momo na tano idauna ma ta ai e nohomu, bona reana idia haida na oi o nohomu gabunai e nohomu. Unu taunimanima baita kara henidia mai hematauraida ida na mai anina bada.

17-18. (a) Levitiko 19:2 bona 1 Petro 1:15 ese ita be ede e duruda tomamu? (b) Aposetolo Petro ese e hagoadadamu edena ḡaukara badana baita karaia?

¹⁷ Levitiko 19:2 bona 1 Petro 1:15 ese Dirava ena taunimanima e hagoadadia bae helaḡa. Levitiko karoa 19 ena siri ma haida ese be durudamu, dahaka baita kara Iehova ena lalonamo baita abia. Tame herevalai siridia ese baita kara diba ḡaudia bona basita kara ḡaudia eme hahedinarai. * Kristen Grik Revarevadia ese danu, unu baita kara toma na ḡau badana e hahedinaraia. To aposetolo Petro ese ḡau ma ta danu e herevalaia.

¹⁸ Ena be Iehova itomadiho henina karadia idauidau baita kara bona kara namodia ma momo baita kara, to Petro ese ita baita karaia ḡauna ma ta e hahedinaraia danu. Petro ese eda kara idoidiai lalodiai baita helaḡa karana do se herevalaia neganai, ia na e gwa: “Ḡaukara badana totona lalomui ba heḡaeḡaelaia.” (1 Pet. 1:13, 15, NWT) Una ḡaukara be dahaka? Petro na e gwa, Keriso tadikakana horoa taudia, na e boiridia Diravana ‘ena kara namodia bae gwaurai hedinarai.’ (1 Pet. 2:9) Hari ina negai, Kristen taudia iboudiai ese una ḡaukara badana e karaiamu, una ḡaukara ese taunimanima na e durudiamu. Eda kara na ḡoeva dainai, mai eda goada ida haroro bona hahediba ḡaukarana ta karaia hanaihanaimu na hahenamo badana! (Mar. 13:10) Bema baita ḡaukara goadamu Levitiko karoa 19 ena hahekau herevadia baita badinamu, baita hamomokaniamu eda Dirava bona dekeda taudia na ta lalokau henidiamu. Bona baita hahedinaraia eda kara idoidiai lalodiai ta uramu baita helaḡa.