1. Dahaka dainai hebou ai haere ta henimu?

 KONGRIGEISIN heboudia ta laomu badina be dahaka? Badi badana na, Iehova baita hanamoa. (Sal. 26:12; 111:1) Danu badi ma ta na, ini nega aukadia ai baita hahegoada heheni. (1 Tes. 5:11) Imada ta abi isimu bona haere ta henimu neganai, ita na unu badi ruaosi heḡereḡeredia ta karamu.   

2. Hebou lalodiai ededia nega ai baita haere diba?

² Wiki ta ta ai, ita na eda hebou lalodiai haere baita heni diba. Heḡereḡere, wiken ai kongrigeisin Gima Kohorona Stadi lalonai baita haere diba. Wiki lalodiai ta abimu heboudia ai, ita ese Dirava Ena Hereva Ba Tahua Namonamo, Kongrigeisin Baibul Stadi, bona tok bona henanadai kahadia ma haida ai baita haere diba.

3. Dahaka ese eda haere karana baine koua diba, bona Heberu 10:24, 25 ese ede e duruda tomamu?

³ Ita iboudai na ta uramu Iehova baita hanamoa bona tadikakada  baita hagoadadia. To, haere ta uramu baita heni neganai, ḡau haida ese e koudamu. Reana haere ihenina ai ta garimu, eiava ta ura dikadikamu baita haere to se abida hidimu. Unu be ede baita hanaidia toma? Haere na Paulo ese Heberu taudia e tore henidia revarevana ai baita davariamu. Paulo ese hebou ena namo e herevalaia neganai, e hahedinaraia baita “hahealo heheni” na namo. (Heberu 10:24, 25 ba duahidia.) Haere ihenina na basita garimu bema baita helalotaomu eda haere kwadoḡina ese ma haida na be hagoadadiamu. Bona bema nega momo haere ihenina ai se abida hidimu, baita moale badina una ese dala e kehoamu ma haida bae haere.​—1 Pet. 3:8.   

4. Ina atikol ai ededia point toi baita herevalaimu?

⁴ Ina atikol ai, point toi baita herevalaiamu. Ginigunana na, kongrigeisin maraḡina lalonai ede baita hahegoada heheni toma bema haere taudia na dia momo. Iharuana na, kongrigeisin badana ai ede baita hahegoada heheni toma bema haere taudia na momo. Bona ihatoina be, eda haere lalodiai ta gwauraimu herevadia amo haida be ede baita hagoadadia toma.   

5. Ede baita hahegoada heheni toma bema hebou taudia na dia momo?

⁵ Kongrigeisin maraḡina o grup ta lalonai, reana haere taudia na dia momo dainai nega haida tadikaka na do be narimu ma haida bae haere totona. Una ese hebou negana na be halataiamu bona hesiku be havaraiamu. Dahaka ba kara diba? Mai emu ura ida haere momo ba heni. Unu bo kara tomamu neganai, ma haida bo hagoadadiamu haere momo bae heni.

6-7. Bema haere ihenina na ta garimu, dahaka baita kara?

⁶ Bema haere ihenina na o garimu be ede bamona? Momo na unu e hemami tomamu. To, tadikaka taihu baita hagoadadia totona, haere ihenina ai basita gari daladia baita tahu na namo. Una be ede baita karaia toma?   

⁷ Heduru herevadia haida na Gima Kohorona b gunadia ai bo davaridia dibamu. Heḡereḡere, ba heḡaeḡae namonamo. (Her. 21:5) Oi ese bo stadilaiamu ḡauna bo lalopararalaia namonamomu neganai, haere ihenina na basio garimu. Danu, emu haere ba hakwadoḡidia na namo. (Her. 15:23; 17:27) Haere na kwadoḡi dainai basio lalohekwarahimu. Emu haere na sentens ta eiava rua ai bo henimu neganai, tadikaka taihu ese be lalopararalaiamu. Bema sibomu emu hereva amo haere kwadoḡina ta bo henimu, bo hahedinaraiamu oi na o heḡaeḡae namonamo bona stadi na o lalopararalaiamu.   

8. Iehova ese eda hekwarahi be ede e laloa tomamu?   

⁸ Bema unu heduru herevadia na do tohodia to dounu o garimu be ede bamona? Ba helalotao Iehova ese emu hekwarahi na e laloa badamu. (Luka 21:1-4) Iehova ese ita na se hamaorodamu basita karaia diba ḡauna baita karaia. (Fili. 4:5) Ba karaia diba ḡauna ba laloa, bona una na emu tahua ḡauna ai ba halaoa, bona Iehova ena heduru ba noia. Emu tahua ḡauna ginigunana na, haere kwadoḡina ba heni.   

9. Dahaka dainai kongrigeisin badana ai haere ihenina na auka?

⁹ Bema emu kongrigeisin ai pablisa na momo, haere ihenina na taina be aukamu. Reana oi na nega momo imamu o abia isimu to haere taudia na momo dainai oi na basie abimu hidimu. Mani Danielle aita laloa, ia na hanaihanai haere karana e moalelaiava. c Ia enai una na tomadiho kahana ta, haida e hagoadadiamu dalana, bona Baibul ena hereva momokanidia ai ena abidadama e hagoadaiamu dalana. To, kongrigeisin badana ta ela neganai, e urava baine haere to nega ta ta mo e abia hidiva, a nega haida be da lasi. Ia na e gwa: “Na lalohisihisi bona na laloava hahenamo ta na reaia. Bema una be vara louloumu, bo mamimu oi na se lalomumu.”   

10. Edena dala ai haere baita heni diba?

¹⁰ Oi danu Danielle heḡereḡerena, a? Bema oibe, reana bo lalomanokamu bona basio uramu haere ba heni. To emu haere karana na basio hadokoa. Dahaka ese baine durumu diba? Dala ta na haere momo ba heḡaeḡaelai. Bena stadi matamana ai haere ihenina totona se abimu hidimu neganai, oi na mai emu dala kaha ma haida ai haere ba heni. Gima Kohorona Stadi o heḡaeḡaelaiamu neganai, paragraf ta ta ese stadi ena point badana e hahedinaraiamu dalana ba haeroa. Unu bo kara tomamu neganai, stadi lalonai haere namodia bo henimu. Danu, ba heḡaeḡae hereva momokani dobudia e herevalaimu paragraf ai haere ba heni totona. (1 Kor. 2:10) Dahaka dainai? Badina paragraf unu bamodia ai haere taudia na dia momo. To, bema unu dala na o badinamu, to nega momo haere ihenina ai na se abimu hidimu be ede bamona? Hebou do se hematama lalonai, stadi inarina tadikakana ba hadibaia, oi be edena henanadai o uramu ba haerelaia.

11. Filipi 2:4 ese e hagoadadamu dahaka baita kara?

¹¹ Filipi 2:4 ba duahia. Lauma helaḡa ena heduru amo, aposetolo Paulo ese Kristen  taudia e hagoadadia ma haida edia namo bae lalo. Hebou lalodiai una sisiba be ede baita badinaia toma? Baita helalotao, haida danu e uramu bae haere.

12. Hebou ai ma haida baita hagoadadia dalana namona ta be dahaka? (Laulau danu ba itaia.)

¹² Mani ina a laloa: Turamu ida bo herevaherevamu neganai, oi mo bo hereva momomu dainai idia na asi edia nega bae hereva, a? Lasi. Oi na bo uramu idia danu bae hereva. Una heḡereḡerena, hebou ai, ita na ta uramu momo bae haere. Momokani, iseda tadikaka taihu baita hagoadadia dalana ta na, nega baita henidia edia abidadama bae herevalai. (1 Kor. 10:24) Unu baita kara toma dalana mani aita laloa.

13. Dahaka baita kara unu amo momo bae haere?

¹³ Dala ta na, iseda haere baita hakwadoḡidia, unu amo momo bae haere diba. Elda taudia bona lo tadikaka taihu ese haheitalai namona bae hahedinaraia. Ena be emu haere na kwadoḡi, to point momo basio herevalai. Bema paragraf lalonai point iboudiai bo herevalaimu, haida na asi edia haere herevadia. Heḡereḡere, ina paragraf ai, heduru herevadia rua be ini: Emu haere bae kwadoḡi bona point momo basio herevalai. Bema oi e abimu hidi gunamu ina paragraf ai be haere, namona na point tamona mo ba herevalaia.

14. Dahaka ese baine duruda unu amo baita diba nega hida imada baita abi isi? (Laulau danu ba itaia.)

¹⁴ Namona na nega hida haere baita heni na baita haeroa namonamo. Bema imada baita abi isi momomu, stadi inarina tadikakana ese ita mo be abida hidimu, ena be haida na do se haere. Una ese haida lalodia na be hamanokamu dainai basie uramu imadia bae abi isi.​—Koh. 3:7.

15. (a) Bema haere ihenina ai na se abida hidimu, dahaka baita kara? (b) Edena dala ai stadi e nariamu tadikakana ese baine hahedinaraia hebou taudia na e lalodiamu? (Maua ladana “ Bema Hebou Kahana ta O Nariamu” ba itaia.)

¹⁵ Stadi lalonai pablisa momo ese imadia e  abi isimu neganai, reana ita na haere momo basita henimu. Nega haida, stadi e nariamu tadikakana ese ita na basine abida hidimu. To namona na basita lalohisihisilaia eiava basita badu.​—Koh. 7:9.

16. Edena dala ai haere e henimu taudia baita hagoadadia?

¹⁶ Bema oi na o uramu haere momo ba heni to una na se varamu, namona na haida edia haere ba hakala namonamo bona hebou murinai ba hanamodia. Una ese tadikaka taihu na be hagoadadiamu, emu haere ai boma hagoadadia heḡereḡerena. (Her. 10:21) Haere e henimu taudia ta hanamodiamu na hahegoada heheni dalana ta.   

17. (a) Tama sina ese natudia be ede bae durudia toma haere maorodia bae heḡaeḡaelai? (b) Vidio ai e hahedinaraia heḡereḡerena, haere ba heḡaeḡaelai daladia 4 be dahaka? (Futnout danu ba itaia.)

¹⁷ Hebou ai ededia dala ma haida ai baita hahegoada heheni diba? Bema oi na tama ta eiava sina ta, natumu ba durudia laḡanidia heḡereḡeredia ai bae heni haeredia bae heḡaeḡaelai. (Mat. 21:16) Nega haida, hekwakwanai badadia, heḡereḡere headava lalonai e varamu hekwakwanaidia o kara ḡoevadia e hadikamu ḡaudia, na stadi ai ta herevalaimu, to reana natu ese paragraf ta o rua ai haere baine heni diba. Danu, natumu  ba durudia bae laloparara dahaka dainai nega haida imadia be abi isimu neganai tadikaka ese basine abidia hidimu. Una ese be durudiamu basie lalohisihisi.​—1 Tim. 6:18. d   

18. Edena dala ai eda haere ai siboda na basita helalo? (Hereva Lada-isidia 27:2)

¹⁸ Ita iboudai eda haere karana ese Iehova be hanamoamu bona eda tadikaka taihu be hagoadadiamu. (Her. 25:11) Reana nega haida eda ekspiriens kwadoḡina ta baita gwauraia, to namona na siboda sivaraida basita herevalai momo. (Hereva Lada-isidia 27:2 ba duahia; 2 Kor. 10:18) To, namona na Iehova, ena Hereva, bona ena taunimanima baita herevalaidia. (Apok. 4:11) Momokani, bema paragraf ta ena henanadai na eda hemami o lalohadai baita herevalaia henanadaina, una na nega maorona baita herevalaia. Ina atikol ena paragraf ginigabena ai henanadai ta na unu bamona.

19. (a) Dahaka be varamu bema hebou ai ma haida edia namo baita lalomu? (Roma 1:11, 12) (b) Oi ese hebou ai haere ihenina karana be ede o laloa tomamu?

¹⁹ Ena be haere ihenina karana ai taravatu aukana ta na lasi, to namona na baita hekwarahi eda haere amo baita hahegoada heheni. Anina na haere momo baita heni. Eiava haere ta o rua baita heni na heḡereḡere, unu amo ma haida bae haere diba. Kongrigeisin heboudia ai, ma haida edia namo baita lalomu neganai, “baita hahealo heheni” dibamu.​—Roma 1:11, 12 ba duahidia.