1. Baita hereva diba karana be ede amo ta abia?

 BAITA hereva diba karana na eda lalokau Diravana ena harihari ḡauna ta. Taunimanima ginigunana, Adam, e karaia neganai, hereva karana amo Tamana guba ai ida e herevahereva. Danu ia ese hereva haida e lalo, unu amo ena gado ai hereva matamatadia e havaradia. Adam ese una dala e ḡaukaralaia animal iboudiai ladadia ihatodia ḡaukarana ai. (Gen. 2:19) Bona e moale dikadika taunimanima ma ta​—ia adavana mai hairaina, Heva na nega ginigunana e hereva henia!​—Gen. 2:22, 23.

2. Edena dalai, guna bona hari hereva karana na e ḡaukaralaia kerere?

² Una harihari ḡauna, baita hereva diba karana, na gabeai e ḡaukaralaia kerere. Satana Diabolo ese Heva e koia, bona una koikoi dainai taunimanima na kara dika taudia ai ela. (Gen. 3:1-4) Adam ese ena kerere gwauna na Heva​—bona Iehova​—e henidia neganai ena hereva ai e kerere. (Gen. 3:12) Kain na tadina Abel e alaia murinai, Iehova e koia. (Gen. 4:9) Gabeai, Kain tubuna ta ladana Lamek, ese e gwaurai herevadia amo ena nega ai e varava daḡedaḡe karana na e hahedinaraia. (Gen. 4:23, 24) Hari ina nega ai taunimanima ese hereva karana be ede e ḡaukaralaia tomamu? Ta itaiamu politikol igunalaina taudia na taunimanima vairadiai e hegwau-henimu bona hereva mirodia e gwauraimu. Bona hereva mirodia se gwauraimu muvina ta idavarina na auka. Sikuli ai bona ḡaukara gabudiai, hereva mirodia na e ḡaukaralai momomu. Hari ina negai tanobada heḡeḡemadai ai, hereva mirodia igwauraidia karana ese e hahedinaraiamu, taunimanima edia hereva bona kara na e dika e laomu.

3. Dahaka dainai baita henahua toho, bona ina atikol ai dahaka baita herevalaimu?

³ Bema basita henari namonamomu, hereva mirodia ihakaladia karana baita manadalaiamu bena baita gwauraidia dibamu. Ita na Kristen tauda dainai, ta uramu Iehova baita hamoalea, bona  una anina na dia hereva mirodia mo baita dadarai to kara haida baita kara danu. Ta uramu una harihari ḡauna hereadaena, hereva karana​—na dala maorona ai baita ḡaukaralaia Dirava baita hanamoa. Ina atikol ai, ita ese (1) hesiai ḡaukara ai, (2) kongrigeisin heboudia ai, bona (3) dina ta ta eda herevahereva ai una baita badinaia daladia baita herevalaimu. To ḡau ginigunana na, dahaka dainai eda hereva karana Iehova enai na mai anina bada, aita herevalaia.

4. Malaki 3:16 ena hereva heḡereḡerena, dahaka dainai eda hereva karana Iehova enai na mai anina bada?

⁴ Malaki 3:16 ba duahia. Dahaka dainai ‘Iehova garina e garimu bona ia ladana e helalolaiamu taudia ilalo-taodia bukana’ ai, edia hereva amo e hahedinaraiamu Dirava e gari heniamu bona ia ladana e laloa dobumu taudia ladadia ba hetore na maoro? Eda hereva ese kudouda ai e miamu ḡauna e hahedinaraiamu. Iesu na e gwa: “Lalona e honu honu daemu ḡaudia amo uduna e herevamu.” (Mat. 12:34) Ta herevalaimu ḡaudia ese eda lalokau ena bada Iehova enai e hahedinaraiamu. Bona Iehova na e uramu ia e lalokau heniamu taudia na tanobada matamatana ai mauri bae moalelaia hanaihanai.

5. (a) Dahaka dainai eda hereva na mai anina bada eda tomadiho karana ai? (b) Laulau heḡereḡerena, ta herevamu neganai dahaka baita laloa na ḡau badana?

⁵ Eda hereva dalana ese be hahedinaraiamu, Iehova ese eda tomadiho be abia daemu eiava lasi. (Iak. 1:26) Dirava asie lalokau heniamu taudia haida na mai badudia, bona mai hekokorokudia ida e herevamu. (2 Tim. 3:1-5) Ita na asita uramu idia heḡereḡeredia ai baitala. Ta ura dikadikamu eda hereva amo Iehova baita hamoalea. To Iehova be, be moalemu bema Kristen heboudia eiava hesiai ḡaukara ai baita hereva ḡoevaḡoeva mai manauda ida, to ruma ai eda bese taudia be mai baduda bona dia lalokau dalana ai baita hereva henidia, a?​—1 Pet. 3:7.

6. Kimberly ena hereva karana e naria namonamo dainai, dahaka e vara?

⁶ Iehova ena harihari ḡauna, hereva karana, baita ḡaukaralaia namonamomu neganai, ta hahedinaraiamu ita na Iehova ta tomadiho heniamu tauda. Badidai e nohomu taudia ese  “Dirava isiaina e lao heniamu tauna bona isiaina se lao heniamu tauna” ena idau be itaiamu. (Mal. 3:18) Una na taihu Kimberly enai e vara, mani aita herevalaia. b Ia na e skuli hebouva kekenina ta ida projek ta e karaia hebou. E ḡaukara hebou murinai, una stiuden ese e itaia Kimberly na dia stiuden ma haida heḡereḡeredia. Kimberly na se hegwau-heniva, mai manauna ida e herevava, bona hereva mirodia na se gwauraiva. Una kekeni na Kimberly ena kara dainai e hoa bona Baibul stadi e abia dae. Iehova na e moale badamu bema eda hereva amo taunimanima baita durudia hereva momokani bae abia dae!

7. Dirava ese e heni harihari ḡauna, baita hereva diba karana, be ede baita ḡaukaralaia toma na namo?

⁷ Ta uramu eda hereva amo Iehova baita hanamoa bona eda hetura karana tadikakada ida baita hanamoa. Una dainai, namona na baita badina diba daladia haida aita lalodia, unu amo hanaihanai ita na “hereva ai” haheitalai namona ai baitala.

8. Iesu ena hesiai ḡaukara lalonai, ena hereva dalana amo dahaka e hadibadamu?

⁸ Bae ere dika henimui neganai, manau bona hemataurai dalana ai ba hereva. Ena hesiai ḡaukara e karaia lalonai, Iesu na e gwauraia kekero tauna, ani-lavadae tauna, Diabolo ena hesiai tauna, Sabati taravatuna iutuna tauna, bona danu e gwauraia Dirava ladana ihadikana tauna. (Mat. 11:19; 26:65; Luka 11:15; Ioa. 9:16) To, Iesu ese mai baduna ida idia na se haere henidia. Iesu heḡereḡerena, e hereva henida aukamu neganai mai baduda ida na basita haere. (1 Pet. 2:21-23) Momokani, mai baduda ida basita haere na dia haraḡa. (Iak. 3:2) Dahaka ese baine duruda diba?

9. Dahaka ese baine duruda diba, haroro ḡaukara lalonai eda hereva baita naria namonamo?

⁹ E badumu ruma tauna ena badu badina baita laloa na namo. Tadikaka ladana Sam na e gwa, “Lau ese na lalodia badamu ḡaudia na, ruma tauna ese hereva momokani baine diba na namo bona ena kara na baine haidaua diba.” Nega haida ruma tauna e badumu badina na ita na nega kererena ai tala. E badumu tauna ta ta hedavari heniamu neganai, taihu ladana Lucia e kara heḡereḡerena baita kara diba. Iehova baita ḡuriḡuri henia diba, baita noia baine duruda basita badu, unu amo hereva kererena ta eiava hemataurai lasi herevana ta basita gwauraia.

10. Timoteo Ginigunana 4:13 ena hereva heḡereḡerena, dahaka baita kara na namo?

¹⁰ Hahediba tauna namona ai baola. Ena be Timoteo na mai ena diba Kristen tauna ta, to dounu lauma dalana ai baine tubu na namo. (1 Timoteo 4:13 ba duahia.) Edena dala ai hesiai ḡaukara ai hahediba taudia namodia ai baitala  diba? Baita heḡaeḡae namonamo. Ta moalemu, badina hahediba taudia namodia ai baitala totona iduruda tuludia na momo herea. Heduru herevadia haida na buklet ladana Duahiduahi Bona Hahediba Ba Goadalai bona Eda Kristen Mauri Bona Hesiai Ḡaukara Hebou Pepana ai ina kaha “Emu Haroro Ihanamona Dalana” bo davari dibamu. Unu heduru ḡaudia o ḡaukaralaimu, a? Baita heḡaeḡae namonamomu neganai, basita garimu bona baita hereva ḡoevaḡoevamu.

11. Edena dala ai Kristen taudia haida na hahediba taudia namodia ai ela?

¹¹ Hahediba taudia namodia ai baitala dalana ma ta na, kongrigeisin ai ma haida edia hahediba dalana baita ita bena unu amo diba baita abi. Sam, matamanai tame herevalaia tadikakana, na sibona e henanadai, “Dahaka dainai Kristen taudia haida na hahediba taudia namodia?” Ia ese hahediba mai dibadia taudia edia hahediba daladia e stadilaimu bena e tohotohomu. Taihu ta ladana Talia na tok heni mai dibadia taudia ese pablik tok e henimu neganai, e hakala namonamomu. Una ese e durua, hesiai ḡaukara ai e herevalai momomu topik-dia baine herevalaidia namonamo diba.

12. Tadikaka taihu haida ediai dahaka be auka?

¹² Eda kongrigeisin heboudia bae heau namonamo totona, hebou ai ane baita abi bona haere namodia baita heni. (Sal. 22:22) Haida ediai na auka, taunimanima vairadiai ane bae abi eiava bae hereva. Oi be unu bamona, a? Bema oibe, oi na bo uramu ba diba, dahaka ese ma haida e durudia una kara e hahanaia.

13. Dahaka ese baine durumu diba hebou ai mai kudoumu idoinai ida ane bavabi?

¹³ Mai kudoumu idoinai ida ane bavabi. Basileia anedia ta abimu badina badana na, ta uramu Iehova baita hanamoa. Taihu ladana Sara na e laloamu ia na dia ane abi namonamo tauna. To, e uramu ane amo Iehova baine hanamoa. Una dainai, ruma ai ane na e heḡaeḡaelaimu, hebou kahana haida bema heḡaeḡaelai heḡereḡerena. Ia ese ane na e abidia hetohomu bona e uramu baine diba edena dala ai unu ane herevadia ese hebou ai be herevalaimu topik-na e hahedinaraiamu. Ia na e gwa, “Una ese e durugumu ane herevadia baina lalodia to dia lauegu ane abi dalana baina laloa.”

14. Bema oi na o hemaraimu, dahaka ese baine durumu diba hebou ai ba haere?

¹⁴ Nega iboudiai ba haere. Momokani, haida ediai una na auka. Matamanai tame herevalaia taihuna, Talia, na e gwa, “Taunimanima ida hebou karana na lauegu gari ḡauna, haida ese una na se lalopararalaiamu badina na herevamu neganai, gari mamina na se hedinaraimu. Una dainai haere karana lauegu ai na auka.” To, una ese Talia na se kouamu hebou ai baine haere. Hebou totona e heḡaeḡaemu neganai, e  helalotaomu namona na una topik ena haere ginigunana na baine kwadoḡi bona henanadai haerena korikorina mo. Ia na e gwa: “Anina na lauegu haere baine kwadoḡi, point baine hahedinaraia bona dia auka na namo badina hebou e hakauamu tauna ese haere unu bamodia e tahumu.”

15. Ta uramu baita haere neganai dahaka baita laloatao na namo?

¹⁵ Ena be Kristen taudia haida na asie hemaraimu, to haere karana na e hemarailaiamu. Dahaka dainai? Taihu ladana Juliet ese badina na e gwauraia, e gwa: “Nega haida asina haeremu badina reana egu haere na kwadoḡi bona dia namo momokani dainai.” To, namona na baita helalotao, Iehova na e uramu ita ese baita heni diba haeredia baita heni. c Ia ese laloda ta hadaimu kongrigeisin heboudia ai baita hanamoa karana na e laloa badamu bona se uramu eda gari karana ese baine kouda.

16. Ededia hereva basita gwaurai na namo?

¹⁶ “Hereva mirodia” o hegwau-heni herevadia basio gwaurai. (Efe. 4:31) Matamanai tame herevalaia heḡereḡerena, Kristen tauna ese hereva mirodia eiava hegwau-heni herevadia na basine gwaurai. To namona na baita henari namonamo badina nega haida hegwau-heni karana na asita laloamu dalanai baita karaia diba. Heḡereḡere, baita henari namonamo bese, kastom, bona tano idaudia taudia edia kara na basita gwauraidia dika. Danu, asita uramu taunimanima ihabadudia herevadia baita gwaurai. Tadikaka ta na e gwa: “Nega haida, na lalova na gwairai herevadia na hevaseha herevadia mo, a ḡau be unu hereva ese ta ena hemami na e hadikaia. Laḡani momo lalodiai, adavagu ese una kaha ai e durugu bada herea, bema e itaiava egu hereva na dia nanamo bona egu hereva amo ia bona ma haida na hahisidiava, sibomai a nohova neganai una na e hadibalaiguva.”

17. Efeso 4:29 ena hereva heḡereḡerena, edena dalai ma haida baita hagoadadia diba?

¹⁷ Hahegoada dalana ai ba hereva. Hahenamo herevadia igwauraidia ai ba haraḡa to dia hegwau-heni o maumau herevadia ai. (Efeso 4:29 ba duahia.) Israel taudia na ḡau momo daidiai bae tenkiu diba, to idia na nega momo e maumauva. Maumau momo karana dainai ma haida danu bae maumau diba. O helalotaomu hasinadoa gwauta edia hari dikana dainai ‘Israel taudia iboudiai ese Mose . . . e maumauraia.’ (Num. 13:31–14:4) To, hahenamo herevadia igwauraina karana ese namo baine havaraia diba. Ta dibamu Iefeta natuna kekenina danu bamona edia amo hahenamo herevadia e abi karana ese e durua bada ena hesiai ḡaukara dounu baine karaia. (Hah. 11:40) Matamanai  tame herevalaia taihu ladana Sara, na e gwa: “Hahenamo herevadia ta gwauraimu neganai, ma haida ta durudiamu bae diba Iehova bona kongrigeisin taudia ma haida ese idia na e lalokau henidiamu.” Una dainai dala baita tahu mai kudouda idoinai ida tadikaka taihu ediai hahenamo herevadia baita gwaurai.

18. Salamo 15:1, 2 ena hereva heḡereḡerena, dahaka dainai hereva momokani baita gwaurai na namo, bona anina be dahaka?

¹⁸ Hereva momokani ba gwaurai. Iehova na basita hamoalea dibamu bema baita koikoimu. Ia ese koikoi daladia iboudiai e inai henimu. (Her. 6:16, 17) Ena be hari ina nega ai taunimanima momo ese koikoi herevadia na edia hereva ai e ḡaukaralai hanaihanaimu, to namona na Iehova ese koikoi e laloamu heḡereḡerena baita laloa. (Salamo 15:1, 2 ba duahi.) Momokani, asita uramu baita koikoi, to danu asita uramu eda hereva daidiai haida ese se vara ḡauna bae hamomokania.

19. Dahaka ḡau ma ta ai danu nahuada baita tohoa na namo?

¹⁹ Ma haida isivarailaidia o imaumauraidia karana ba dadaraia. (Her. 25:23; 2 Tes. 3:11) Matamanai tame herevalaia taihu, Juliet na maumau karana ese e hahisia dalana e herevalaia. E gwa: “Maumau herevadia ikamonaidia karana ese basine hagoadadamu, bona una ese lauegu abidadama e maumaumu tauna enai na e haoreamu. Badina, ede baina diba toma haida vairadiai e maumauraigumu eiava lasi?” Bema o itaiamu emui herevahereva lalonai haida na de maumaumu, namona na edia hereva na basio durua to ḡau namona ta ba sivarailaia.​—Kol. 4:6.

20. Lalomu ba hadaia emu hereva karana be ede ba ḡaukaralaia toma?

²⁰ Hereva mirodia amo e honu tanobadana ai ta nohomu dainai, namona na baita ḡaukara goada Iehova ese eda hereva karana baine moalelaia. Baita helalotao, hereva karana na Iehova ena harihari ḡauna, bona ia ese ede baita ḡaukaralaia toma karana na e laloa bada. Ia ese eda hekwarahi na be hanamoamu, bema eda hesiai ḡaukara ai, kongrigeisin heboudia ai, bona eda dina ta ta herevahereva karana ai eda hereva karana na dala maorona ai baita ḡaukaralaia. Ina Dirava se badinaiamu tanobadana ena lalo-veri karana be oremu neganai, eda hereva amo Iehova baita hanamoamu na dia auka. (Iuda 15) To hari, lalomu ba hadaia ‘udumu herevadia’ amo Iehova ba hanamoa.​—Sal. 19:14.