1. Iehova ese ena taunimanima ediai be dahaka e itamu?

IEHOVA DIRAVA ese “ena orea taudia na e moalelaidiamu.” (Sal. 149:4) Una na hereva namo hereana, ani? Iehova ese eda kara namodia na e itamu; baita kara diba ḡaudia e itamu bona e durudamu ia turana ai baitala. Bema baita abidadama heniamu, ita dekedekedai be noho hanaihanaimu!​—Ioa. 6:44.

2. Dahaka dainai haida ediai na auka, bae abia dae Iehova ese e lalokau henidiamu?

² Haida na reana be gwaumu, ‘Mai dibagu Iehova ese ena taunimanima iboudiai na e lalokau henidiamu, to ede baina diba toma lau na e lalokau henigumu?’ Dahaka dainai ta na unu be henanadai tomamu? Oksana * na maraḡinai haida edia kara ese e hahisia. Ia na e gwa: “Na bapatiso bena na painiava neganai na moale bada. To, laḡani 15 muridiai, guna egu ai e vara ḡaudia na lalodia lou neganai na lalometau bada. Na laloava Iehova ese se moale heniguva bona lau na dia heḡereḡere ia ese baine lalokau henigu.” Yua, painia taihuna ta, danu hekwakwanai unu bamona ta e davaria, ia na e gwa: “Egu mauri Iehova na gwauhamatalai henia badina na, na urava baina hamoalea. To na laloava ia ese lau na basine lalokau henigu diba.”

3. Ina atikol ai dahaka baita herevalaimu?

³ Tame herevalaidia taihudia rarua heḡereḡeredia, oi ese Iehova na o lalokau henia badamu, to reana o daradaramu Ia ese oi e lalokau henimumu eiava lasi. Dahaka dainai bavabia dae momokani oi na e lalomu badamu? Bona lalohadai kereredia bavabi neganai dahaka ese baine durumu diba? Mani ini henanadai haeredia aita lalo.

4. Dahaka dainai Iehova ena lalokau ita edai basita daradaralaia?

⁴ Lalokau ese ta baine hagoadaia diba ḡau ta baine karaia.  Bema Iehova ena lalokau bona heduru baita abi daemu, una ese be doridamu, mai kudouda idoinai ida ia baita hesiai heniamu ena be hahetoho be varamu. To, bema Iehova ese e laloda badamu karana baita daradaralaiamu, ‘eda goada na be maraḡi-maraḡimu.’ (Her. 24:10) Bona bema baita lalo-manokamu bona basita abia daemu Iehova ese e lalokau henidamu, Satana ena hedibaḡani ai baita moru haraḡa dibamu.​—Efe. 6:16.

5. Dirava ena lalokau e daradaralaia taudia haida ediai be dahaka e vara?

⁵ Iseda negai, tadikaka taihu haida na daradara karana ese edia abidadama e hamanokaia. Elda ladana James na e gwa: “Ena be Betele ai na ḡaukarava bona idau gado kongrigeisin ta ai egu hesiai ḡaukara na moalelaiava, to na lalova Iehova ese egu hekwarahi e abia daeva eiava lasi. Nega ta, na lalova Iehova ese egu ḡuriḡuri e kamonaimu eiava lasi.” Eva, ia danu fultaim hesiai ḡaukara e karaiamu taihuna, na e gwa: “Na davaria Iehova ena lalokau baita daradaralaia karana ena dika na bada, badina una ese ita na be hamoruda dibamu. Basita uramu Dirava e uramu ḡaudia baita kara bona eda moale Iehova ihesiai heninai na be maraḡimu.” Michael, ia na regula painia bona elda, na e gwa: “Bema basio abia daemu Dirava ese oi na e lalomumu, oi na taina ruana ia amo bo daudaumu.”

6. Dahaka baita kara diba bema baita laloamu Dirava ese ita na se lalokau henidamu?

⁶ Unu ekspiriens ese e hahedinaraimu, lalohadai kereredia ese eda lauma dalana baine hadikaia diba. Dahaka baita kara diba bema baita laloamu Dirava ese ita na se lalokau henidamu? Kara haraḡa una lalohadai baita dadaraia! Iehova ba noia baine durumu “lalo-hadai” kereredia gabudiai ‘Dirava ena maino ese laloda bona darada baine gima’ ḡauna baine atoa. (Sal. 139:23; Fili. 4:6, 7) Bona ba helalotao, dia oi mo sibomu, abidadama tadikaka bona taihu haida danu e hekwarahimu lalohadai kereredia bae dadarai. Idaunegai Iehova e hesiai heniava taudia haida ediai una na e vara. Mani aposetolo Paulo enai e vara ḡauna amo baita diba ḡaudia aita herevalai.

7. Paulo ese e davari hekwakwanaidia be dahaka?

⁷ Nega haida o mamiamu maduna momo ese e hametaumumu dainai, oi na dia heḡereḡere ba huadia, a? Bema oibe, Paulo  enai e vara ḡauna bo lalopararalaiamu. Ia na “ekalesia oreadia” iboudiai daidiai e lalo-hekwarahiva. (2 Kor. 11:23-28) Gorere badana ta daina so moalemu, a? Paulo na “ḡiniḡini ta” ese e gwadaia loulouva, reana una na tauanina ai gorere ta, bona e urava bema ore. (2 Kor. 12:7-10) Emu kerere ta dainai o lalo-manokamu, a? Nega haida Paulo danu unu e hemami tomava. Ia na sibona e hegwauraiva, “lau madi ihabaigu,” badina hanaihanai lalonai e miava kara dikana e tuari heniava.​—Roma 7:21-24.

8. Dahaka ese Paulo e durua ena hekwakwanai e haheaukalai?

⁸ Ena be hahetoho idauidau bona lalona ihamanokadia ḡaudia e varava, to Paulo na dounu Iehova e hesiai heniava. Dahaka ese e hagoadaia dainai unu e kara toma? Ena be ena manoka ḡaudia na mai dibana, to ena abidadama mauri davana ai na goada. Mai dibana Iesu na e gwauhamata, ia “bae abidadama henia taudia iboudiai . . . mauri hanaihanai bae abia.” (Ioa. 3:16; Roma 6:23) Momokani, Paulo ese una mauri davana na e abidadama heniava. E abia dae momokani, Iehova ese kara dika badadia e kara taudia edia dika na baine gwautao diba, bema idia na bae helalo-kerehai.​—Sal. 86:5.

9. Galatia 2:20 ai Paulo ena hereva amo dahaka ta dibamu?

⁹ Danu, Paulo ese Dirava ena lalokau, Keriso ese e hahedinaraia lalokauna, na e abidadama henia. (Galatia 2:20 ba duahia.) Una siri dokonai e torea hahegoada herevana mani a itaia. Paulo na e gwa: “Dirava Natuna . . . ese e ura henigu bona sibona e heni, lau daigu ai.” Paulo ese Dirava ena lalokau hetoana na se atoa, dia se gwa, ‘Na dibamu Iehova ese tadikakagu na e lalokau henidiamu, to lau na se lalokau henigumu.’ Paulo ese Roma taudia na e hadibadia, eto: “Ita na dounu kara dikadia ta karava negadia ai Keriso na ita daidai e mase.” (Roma 5:8) Dirava ena lalokau na asi hetoana!

10. Roma 8:38, 39 amo dahaka ta dibamu?

¹⁰ Roma 8:38, 39 ba duahi. Paulo ese Dirava ena lalokau na e abia dae momokani. Ia na e gwa, ḡau ta ese “Dirava ena ura heni” amo “basine bibida oho diba.” Paulo na mai dibana, Iehova na mai ena haheauka ida Israel besena e kara henidia. Danu mai dibana, Iehova ese ia na e bogaiahisi. Reana Paulo ena lalohadai na ini baita gwauraia tomamu, ‘Dirava ese Natuna na e siaia lau daigu ai baine mase dainai, ena lalokau baina daradaralai na asi anina, ani?’​—Roma 8:32.

11. Ena be Paulo ese 1 Timoteo 1:12-15 ai e gwaurai kara dikadia e kara, to dahaka dainai e abia dae Dirava ese ia na e lalokau heniava?

 ¹¹ Timoteo Ginigunana 1:12-15 ba duahi. Nega haida Paulo na reana ena kerere gunadia ese lalona e hahekwarahiava. Ia na sibona e hegwauraiva, kara ‘dika herea’ tauna. Hereva momokani do se diba neganai, Paulo na hanua ta amo hanua ta e laova Kristen taudia e daḡedaḡe henidiava, haida dibura ai e atodiava bona ihamasedia e gwauraiva. (Apos. 26:10, 11) Mani a laloa, bema Paulo ese Kristen merona o kekenina ta bema hedavari henia, to tamana sinana na Paulo ena hereva dainai e hamasedia, o laloamu Paulo ena hemami be ede bamona? Paulo na e kara kereredia dainai e lalohisihisi, to mai dibana guna e vara ḡaudia na basine haidau diba. Ia ese e abia dae Keriso na ia dainai e mase, bona mai lalo goadana ida e gwa: “Dirava ena harihari-bada dainai lau ini name heto.” (1 Kor. 15:3, 10) Dahaka ta dibamu? Namona na bavabia dae Keriso na oi daimuai e mase, bona dala e karaia oi na Iehova ida ba hetura diba. (Apos. 3:19) Dirava ese hari ta karamu ḡaudia bona vaira negai baita kara ḡaudia na e lalo badamu, dia guna Iehova ena Witnes ai tala eiava do lasi neganai, ta karava kereredia e lalo badamu.​—Isa. 1:18.

12. Bema ta hemamimu ita na dia heḡereḡere o ta ese se lalodamu, edena dalai 1 Ioane 3:19, 20 ena hereva ese baine duruda diba?

¹² Iesu na emu dika dainai e mase karana bo laloamu neganai, reana bo gwaumu, ‘Lau na dia heḡereḡere una harihari ḡauna hereadaena baina abia.’ Dahaka dainai reana unu bo lalo tomamu? Kudouda ese baine koida diba, bena baita mamia ita na dia heḡereḡere eiava ta ese se lalodamu. (1 Ioane 3:19, 20 ba duahi.) Nega unu hetomadiai, namona  na baita helalotao, “Dirava ese ita laloda e hereadiamu.” Tamada gubai e nohomu ena lalokau bona dika igwautaona karana ese kudoudai e miamu hemami dikadia na e hereadia momokani. Namona na baita abia dae momokani Iehova ese ita na e lalodamu. Unu baita kara toma totona, namona na hanaihanai ena Hereva baita stadilaia, baita ḡuriḡuri henia, bona ia e badinaiamu taudia baita bamodia. Dahaka dainai unu baita kara toma na mai anina bada?

13. Edena dalai Dirava ena Hereva istadilaina karana ese baine duruda diba? (Maua ladana “ Dirava Ena Hereva ese E Durudia Dalana?” ba itaia danu.)

¹³ Dina ta ta ai Dirava ena Hereva ba stadilaia, unu amo Iehova ena kara namodia bo diba ḡoevaḡoevamu. Iena lalokau oiemu ai bo lalopararalaiamu. Dina ta ta ai Baibul sirina ta bo laloa dobumu karana ese be durumumu, daramu bona kudoumu ai e miamu ḡaudia bo “hamaoromaoromu.” (2 Tim. 3:16, NWT) Elda ta ladana Kevin na e hemamiva ta ese ia na se laloava. Ini e gwau toma: “Salamo 103 na duahia bona na laloa dobu neganai, una ese e durugu egu lalohadai na haidaua bona na laloparara Iehova ese lau na e lalogu badamu.” Eva, matamanai tame herevalaia, na e gwa: “Adorahi kahadiai, nega na atomu Iehova ena lalohadai na laloa dobumu. Una ese lalogu e hamainoamu bona egu abidadama e hagoadaiamu.”

14. Edena dalai ḡuriḡuri karana ese baine duruda diba?

¹⁴ Ba ḡuriḡuri hanaihanai. (1 Tes. 5:17) Ta ida ba hetura namonamo totona, hanaihanai ia ida ba herevahereva bona emu hemami na ia ba hamaorolaia. Iehova ida eda hetura karana danu unu heto. Bema eda hemami, lalohadai, bona lalohekwarahi ḡaudia na ḡuriḡuri amo ia baita hamaorolaiamu, ta hahedinaraiamu ia na ta abidadama heniamu bona ta dibamu ia ese ita na e lalokau henidamu. (Sal. 94:17-19; 1 Ioa. 5:14, 15) Yua, matamanai tame herevalaia taihuna, na e gwa: “Na ḡuriḡurimu neganai, dia dinai na kara ḡaudia mo na herevalaimu. Ḡau iboudiai na herevalaimu, egu hemami korikoridia na hamaorolaiamu. Taina ruana, Iehova na dia kampani biaguna ta bamona na itaiamu, to natuna e lalokau henidiamu Tamana ta na heto.”​—Maua ladana “ Do Duahia, A?” ba itaia.

15. Edena dalai Iehova ese e hahedinaraiamu ita ta ta na e laloda badamu?

¹⁵ Tura namodia baita bamodia; idia na Iehova ena harihari ḡaudia. (Iak. 1:17) Tamada gubai ese ita ta ta na e laloda badamu, badina kongrigeisin ai tadikaka bona taihu e henida, bona idia ese ‘nega iboudiai e lalokau henidamu.’ (Her. 17:17)  Paulo ese Kolose taudia e tore henidia neganai, ia e durua Kristen taudia haida ladadia e hato bona e gwa, idia ese “lalogu vada eme hakerua.” (Kol. 1:10, 11) Keriso Iesu danu ia turana, aneru bona taunimanima, edia heduru na e laloa bada.​—Luka 22:28, 43.

16. Edena dalai tura namodia ese bae duruda diba Iehova baita hakahikahia?

¹⁶ Iehova ese e heni tura namodia edia heduru o abia daemu, a? Lauma dalanai e goadamu tura namona ta enai eda lalo-hekwarahi baita gwauraia na dia manoka toana, to ita baine gimada diba. Mani James, matamanai tame herevalaia tadikaka, na e gwa: “Lo Kristen taudia edia hetura karana namona ese lau na e durugu bada. Lalohadai kereredia ese lalogu e hahekwarahiamu neganai, ini tura namo hereadia na mai edia haheauka ida e hakalamu, bona e hahelalogu taomu, idia ese e lalokau henigumu. Idia edia amo, na mamiamu Iehova ese e lalokau henigumu bona e lalogu badamu.” Tadikaka bona taihu ida eda hetura karana baita hanamoa bona baita goadalaia hanaihanai na mai anina bada!

17-18. Daika baita kamonai henia bona dahaka dainai?

¹⁷ Satana na e uramu kara namona ikaranai baita hesiku. Ia na e uramu baita laloa Iehova ese ita na se lalokau henidamu, bona baine hamaurida na asi anina. To tame itaia heḡereḡerena, una na dia momokani.

¹⁸ Iehova ese oi na e lalokau henimumu. Ia matanai oi na dava bada ḡauna ta. Bema bo kamonai heniamu, Iesu heḡereḡerena, iena ‘lalokau ai bo noho’ hanaihanaimu. (Ioa. 15:10) Una dainai Satana na basio kamonai henia eiava basioto Iehova ese oi na se lalokau henimumu. To, Iehova ba kamonai henia, ia ese ita ta ta eda kara namodia na e itamu. Bavabia dae vaitani Ia ese ena taunimanima, oi danu, na e lalomui badamu!