1-2. Iehova ena taunimanima momo ese e davarimu hekwakwanaidia be dahaka, bona edia hemami be ede bamona?

MANI ini haheitalai toi a lalodia: Eregabe tadikakana ta na dokta ese e hamaoroa ena gorere dainai tauanina na be manokamu. Tadikaka ta laḡanina na 50 heḡereḡerena, ia na ena moni ḡaukara amo e hadokoa bona ena be e hekwarahi to ḡaukara ta ma se davaria. Nega daudau Iehova e hesiai henia taihu burukana ta na e mamiamu guna e kara ḡaudia na basine kara diba.

² Bema ataiai ta gwaurai ḡaudia ta na emu ai e varamu, reana o hemamimu emu mauri na asi anina. Una dainai reana so moalemu, emu hemami na dia namo, bona emu hetura karana ma haida ida danu e hadikaiamu.

3. Satana bona ia ese e biagudiamu taudia ese taunimanima edia mauri be ede e laloa tomamu?

³ Ina tanobada ese Satana ena lalohadai e hahedinaraiamu. Guna negana amo ema bona hari Satana ese taunimanima na se lalodiamu. Ena be mai dibana Dirava igwau-edeede henina ahuna na mase, to una na se laloa bona ena hereva amo Heva enai e hahedinaraia unu be kara tomamu neganai ena mauri na be namomu. Satana ese bisnes, politikol, bona tomadiho e biagudiamu. Una dainai, ita na asita hoamu bema bisnes taudia, politikol, bona tomadiho igunalaidia taudia ese iena lalohadai e hahedinaraiamu bona taunimanima edia mauri na se lalo badamu.

4. Ina atikol ai dahaka baita herevalaimu?

⁴ To, Iehova na e uramu ita na baita laloa iseda mauri na mai anina bona ḡau haida ese e hametaudamu neganai, ia ese ita na e durudamu. (Sal. 136:23; Roma 12:3) Iehova ese ini hekwakwanai toi ai be durudamu daladia na ina atikol ese be herevalaimu: (1) Gorere badadia ta davarimu neganai, (2) moni ḡaukara idavarina e aukamu neganai, bona (3) ta burukamu neganai ta hemamimu Iehova ena hesiai  ḡaukara lalonai ḡau ta basita karaia diba. To baita herevalaia gunamu ḡauna na, dahaka dainai baita abia dae Iehova ese ita ta ta na e laloda badamu.

5. Dahaka ese e hamomokaniamu Iehova ese taunimanima edia mauri na e laloa badamu?

⁵ Ena be ita na tano kahuna amo e karada, to iseda mauri na mai anina bada. (Gen. 2:7) Mani Iehova ese ita e laloda badamu badidia haida aita lalodia. Ia ese taunimanima e havaradia dalana na idau dainai ia na bae tohotohoa diba. (Gen. 1:27) Una ese e hahedinaraiamu animal bona tanobada ai e karadia ḡaudia iboudiai na taunimanima ese e hereadiamu bona idia ese bae biagudia diba.​—⁠Sal. 8:4-8.

6. Ena be ita na dia ḡoḡoevadadae, dahaka ese e hahedinaraiamu Iehova ese ita na e laloda badamu?

⁶ Adamu e kara dika murinai danu, Iehova ese taunimanima na e lalodia badamu. Una dainai Natuna lalokauna, Iesu e heni eda dika idavalaina. (1 Ioa. 4:9, 10) Una mauri idavalaina boubouna ena namo ta na, Iehova ese Adamu dainai e mase taudia, “kara maoromaoro taudia bona asi edia kara maoromaoro taudia danu,” be hatoredia isi loumu. (Apos. 24:15) Iena Hereva ese e hahedinaraiamu ena be ta goreremu, moni ḡaukara idavarina na e aukamu, eiava ta burukamu to Iehova ese e laloda badamu.​—⁠Apos. 10:34, 35.

7. Ededia badi ma haida daidiai Dirava ena hesiai taudia na e abia daemu Iehova ese idia na e lalodia badamu?

⁷ Ma badi haida daidiai ta abia daemu Iehova ese ita na e laloda badamu. Ia turana ai baitala dalana e kehoa bona sivarai namona ta abia dae karana na ia ese e laloa bada. (Ioa. 6:44) Ia ta hetura henia neganai, ia danu ita turada ai ela. (Iak. 4:8) Iehova na nega e ato bona ena goada e ḡaukaralaiamu ita baine hadibada totona, unu amo e hahedinaraiamu ita na e laloda badamu. Ia na mai dibana ita be taunimanima ede bamodia bona mai dibana edena dalai eda mauri baita hanamoa. Dia una mo to e lalokau henidamu dainai e matahakani henidamu. (Her. 3:11, 12) Momokani unu ese e hadibadamu Iehova ese ita na e laloda badamu.

8. Salamo 18:27-29 ena hereva ese edena dalai baine duruda eda metau baita lalodia maoromaoro?

⁸ Haida ese King David na asie laloa badava, to ia na e diba Iehova ese ia na e lalokau heniava bona e duruava. Una ese David na e durua baine haheauka. (2 Sam. 16:5-7) Bema ta lalometaumu o hekwakwanai ta davarimu, Iehova ese ita na be durudamu baita hanaidia totona. (Salamo 18:27-29 ba duahi.) Iehova ese be durudamu neganai, ḡau ta ese ita na basine koudamu mai moaleda ida Ia baita hesiai henia totona. (Roma 8:31) Hari ita ese hekwakwanai toi lalodiai Iehova ena lalokau bona Ia ese e laloda badamu daladia baita herevalaimu.

9. Gorere dainai ede ta hemami tomamu?

⁹ Gorere dainai baita hemamimu ita na dia heḡereḡere ma haida baita durudia. Ta hemaraimu bema haida ese itadamu eda goada na dia heḡereḡere eiava bema heduru iabina totona haida ediai ta tabekaumu. Bona ena be haida na asi dibadia ita na e gorereda, to dounu ta hemaraimu badina guna ta karava ḡaudia na asita karamu. Iehova ese nega unu bamodiai ita na e hagoadadamu. Edena dalai?

10. Hereva Lada-isidia 12:25 heḡereḡerena, ta goreremu negadiai dahaka ese baine hagoadada diba?

¹⁰ Ta goreremu negadiai, “hereva namona” ese baine hagoadada diba. (Hereva Lada-isidia 12:25 ba duahia.) Ena be e goreredamu to Baibul lalonai Iehova na e tore hereva namodia momo amo e hahedinaraiamu Ia vairanai eda mauri na mai anina bada. (Sal. 31:19; 41:3) Bema Dirava ena lauma helaḡa amo e havara herevadia baita duahi louloumu, una ese be durudamu eda lalometau bona gorere baita haheaukalaimu.

11. Tadikaka ta ese Iehova ena heduru be ede e mamia toma?

¹¹ Mani Jorge ena ekspiriens aita laloa. Eregabenai gorere ta e abia bona una gorere na e bada haraḡa dainai e hemamiva ena mauri na asi anina. Jorge na e gwa: “Lau na na hemaraiva badina egu gorere dainai momo ese e raraiguva. Egu gorere e bada e laova neganai, lau na egu mauri baine haidaua dalana na laloava. Lalogu na e hisihisi bada herea bona Iehova na noia baine durugu.” Iehova be edena dalai ia e durua? Jorge na e gwa: “Egu gorere ese ḡau ta ilalo namonamo karana na e hadikaia dainai, haida ese e hagoadagu Salamo bukana ena siri haida baina duahi bona unu siri amo na diba Iehova ese ena hesiai taudia na e lalodia badamu. Dina ta ta ai unu siri na duahi loulouva bona e hagoadagu bada. Gabeai taunimanima ese e itaguva lau na nega momo na kiriva. Bona e hamaoroguva lau na moaleva dainai una ese idia danu e hagoadadiava. Na laloparara Iehova ese egu ḡuriḡuri na e haerelaidia. Iehova ese e durugu sibogu na helalova dalana baina haidaua. Baibul amo na diba Iehova ese lau na e lalogu bada ena be lau na gorere.”

12. Bema oi na gorere badana ta o haheaukalaiamu, Iehova ena heduru be ede bavabia toma?

¹² Bema oi na gorere badana ta o haheaukalaiamu, bavabia dae Iehova ese una na e lalopararalaiamu. Iena heduru ba noia unu amo lalohadai maorona bavabia. Bona Iehova ena hahegoada herevadia Baibul ai ba duahi. Iehova ese ena hesiai taudia e lalodia badamu siridia na ba lalodia. Unu bo kara tomamu neganai bo itaiamu, Iehova ese ia e abidadama heniamu taudia iboudiai na e durudiamu.​—⁠Sal. 84:11.

13. Bema ruma bese kwarana ta na ena moni ḡaukara e haboioa, ede be hemami tomamu?

¹³ Ruma bese kwaradia ta ta iboudiai na e uramu tauani dalanai ruma bese bae durua, una dainai moni ḡaukara e karamu. Reana tadikaka ta na kerere ta se karaia to ena moni ḡaukara amo e hadokoa. Ena be e hekwarahi moni ḡaukara ma ta baine davaria to una na se vara. Una dainai ia na be hemamimu ena mauri na asi anina. Edena dalai Iehova ena gwauhamata herevadia ilalodia karana ese ia na baine durua?

14. Ededia badi daidiai Iehova ese ena gwauhamata na e hamomokanimu?

¹⁴ Iehova na hanaihanai ena gwauhamata na e badinamu. (Ios. 21:45; 23:14) Badi haida daidiai Iehova na unu e kara tomamu. Ginigunana na, ladana o ena kara e laloamu dainai. Iehova na e gwauhamata ia e badinaiamu taudia na baine naridia bona una na baine haḡuḡurua. (Sal. 31:1-3) Bona badi ma ta na, Iehova na mai dibana ita na baita lalohisihisimu bema ia ese ena bese taudia basine naridiamu. Ia na e gwauhamata tauani bona lauma dalanai ita baine narida, bona ḡau  ta ese ia basine koua una baine haḡuḡurua totona.​—⁠Mat. 6:30-33; 24:45.

15. (a) Kristen ginigunadia ediai be dahaka e vara? (b) Salamo 37:18, 19 ese ita be ede e duruda tomamu?

¹⁵ Ena be moni ḡaukara idavarina na auka, to Iehova ese ena gwauhamata e hamomokani badidia baita lalomu neganai, ita na be durudamu. Mani Kristen ginigunadia ediai e vara ḡauna aita laloa. Ierusalem kongrigeisin e daḡedaḡe henia bada neganai, “ekalesia taudia iboudiai e hakarohodia rohoroho” to “aposetolo mo” e noho. (Apos. 8:1) Bena dahaka e vara? Moni idavarina na e auka. Reana Kristen taudia na edia ruma bona edia bisnes e haboio. To, Iehova ese idia na se rakatanidia bona idia na e moaleva. (Apos. 8:4; Heb. 13:5, 6; Iak. 1:2, 3) Iehova ese unu abidadama Kristen taudia na e durudia bona ita danu be durudamu.​—⁠Salamo 37:18, 19 ba duahi.

16. Dahaka dainai baita laloamu reana Iehova ese iseda tomadiho na se laloa badamu?

¹⁶ Ta buruka ta laomu neganai, reana ta hemamimu eda hesiai ḡaukara Iehova enai na e maraḡimu. King David e buruka neganai reana unu e hemami toma. (Sal. 71:9) Iehova ese ita be ede baine duruda toma?

17. Taihu ta ladana Jheri ena ekspiriens amo dahaka ta dibamu?

¹⁷ Mani taihu ta ladana Jheri ena ekspiriens aita laloa. Ia na e hamaoroa Kingdom Hall ai maintenance training hebouna ta baine lao henia to ia na se ura bainela. Ia na e gwa: “Lau na buruka bona vabu, dia una mo to egu goada bona diba na dia heḡereḡere Iehova ena hesiai ḡaukara ai baina ḡaukaralai totona. Bainala  na asi anina.” Hanuaboi ai, ia na Iehova e ḡuriḡuri henia. Murina dinanai ia na una maintenance training ela bona Kingdom Hall ai e kau neganai, ia na dounu e lalohadaiva una hebou ai baine vaira namo eiava. Una hebou e heabiva lalonai, tadikaka ta ena tok lalonai e hahedinaraia bema ita na mai laloda idoinai ida baita uramu Iehova ese baine hadibada, una na mai anina bada. Jheri na e gwa: “Na lalo una na baina karaia diba ḡauna. Na taiva badina na laloparara Iehova ese egu ḡuriḡuri na e haerelaia. Vaitani e hadibaguva lau ese ḡau ta baina karaia diba bona e hamaoroguva ikarana dalana baine hadibagu. Una dina ai una hebou do se matama neganai, lau na na gari, bona na lalomanoka. To, una hebou e ore neganai, lalogu na e goada bona na lalo Iehova vairanai egu mauri na mai anina bada.”

18. Ena be ta buruka ta laomu, to edena dalai Baibul ese e hahedinaraiamu Iehova ese ia ta toma henia dihomu karana e laloa badamu?

¹⁸ Ta buruka ta laomu lalonai, namona na baita helalotao Iehova ese ita na dounu be ḡaukaralaidamu. (Sal. 92:12-15) Iesu ese ita na e hadibadamu herevana eda diba eiava goada na dia bada, to Iehova ese ena hesiai ḡaukara ai ta karamu ḡaudia na e lalodia badamu. (Luka 21:2-4) Una dainai oi ba karaia diba ḡauna mo ba laloa bada na namo. Heḡereḡere, Iehova ba herevalaia, emu tadikaka taihu daidiai ba ḡuriḡuri, bona ma haida ba hagoadadia Iehova ena hesiai ḡaukara bae goadalaia totona. Iehova ese e abida daemu ia ida ta ḡaukara heboumu na dia ta karamu ḡaudia daidiai, to mai eda ura ida ia ta badinaiamu dainai.​—⁠1 Kor. 3:5-9.

19. Roma 8:38, 39 ena hahegoada herevana be dahaka?

¹⁹ Ita na ta moalemu badina Iehova ta toma henia dihomu. Ia ese ita e havarada na iena ura baita karaia, bona ia itoma henina diho karana dainai eda mauri na baita moalelaiamu. (Apok. 4:11) Ena be taunimanima ese se laloda badamu, to Iehova ese ita na e laloda badamu. (Heb. 11:16, 38) Bema ta goreremu, moni ḡaukara idavarina na e aukamu, eiava buruka dainai metau idauidau ta haheaukalaimu, namona na baita diba ḡau ta ese eda lalokau Tamada gubai ena amo basine bibida oho diba.​—⁠Roma 8:38, 39 ba duahi.