KRISTEN EDIA MAURI
Baibul Istadilaina Goadagoada Tauna ai Baola Dalana
O uramu Daniel heḡereḡerena hahetoho neganai Dirava bavabidadama henia, a? Daniel ese Dirava ena Hereva, bona peroveta hereva dobudia na e stadilaiva. (Da 9:2) Baibul ba stadilaia goadagoada karana ese baine durumu diba hanaihanai Dirava bavabidadama henia totona. Edena dala ai? Stadi karana dainai bo abia daemu Iehova ena gwauhamata na be ḡuḡurumu. (Ios 23:14) Danu be durumumu emu lalokau Dirava enai bo habadaiamu, bena una ese be hagoadamumu kara maorona ba karaia totona. (Sa 97:10) To edena dala ai una ba hamatamaia na namo? Mani ini heduru herevadia ba lalo.
-
Dahaka baina stadilai na namo? Stadi ai ba karaia hanaihanai ḡauna namona ta na, kongrigeisen heboudia totona ba heḡaeḡae. Pura ta ta ena Baibul duahiduahi amo namo bo abi dibamu bema nega bo atomu so lalopararalaimu herevadia ba tahu totona. Haida na Baibul ena peroveta herevadia ma haida, o Dirava ena lauma huahuadia ta ta, eiava aposetolo Paulo ena misinari laolaona, o Iehova ese e havara ḡaudia e stadilaimu. Bema dina ta lalonai Baibul ena henanadai ta o laloamu, ba torea diho bona emu stadi negana ai ba tahua.
-
Ede kahai baina hetahu? Dala haida ba diba totona, vidio ladana Dirava Ena Hereva Baita Tahua Totona Baine Duruda Tuludia ba itaia. Emu diba ba tohoa totona, Daniel karoa 7 ai e hahedinarai daḡedaḡe ḡaudia ese e laulaulai tanobada basileia badadia ba tahu.
-
Egu stadi ai hora hida baina ato? Stadi hanaihanai karana ese baine durumu lauma dalanai ba goada totona. Ba hamatamaia neganai, nega kwadoḡi lalonai ba karaia diba, bema ba ura neganai, bena taina ruana emu stadi negana ba halataia diba. Dirava ena Hereva istadilaina karana na e hehuni dava bada kohudia itahuna karana na heto; dava bada kohudia momo bo davarimu neganai, bo uramu dounu ba hetahu! (Her 2:3-6) Emu ura Dirava ena Hereva ai na be badamu, bona Baibul istadilaina karana na bo karaia hanaihanaimu.—1Pe 2:2.
DANIEL KAROA 7 AI E HAHEDINARAI DAḠEDAḠE ḠAUDIA ESE DAHAKA E LAULAULAI?
HENANADAI MA HAIDA:
Daniel 7:8, 24 be ede e ḡuḡuru toma?
GABEAI BAINA KARAIA ḠAUNA:
Apokalupo karoa 13 ai e hahedinarai daḡedaḡe ḡaudia ese dahaka e laulaulai?
