KRISTEN EDIA MAURI

Pura Hebouna Ena Kaha Matamatana

PLAY

January 2018 ai, pura hebouna ai be hahedinaraimu kahadia haida na, ba stadilai herevadia (study notes) bona laulau (media), una na Intanet amo New World Translation of the Holy Scriptures (nwtsty) ba stadilaia kahana; ena be una ba stadilaia kahana na emu gado ai do asie hahanaia. Una kaha ese be durumumu emu hebou ḡaudia ba heḡaeḡaelai namonamo. Mai anina bada ḡauna na, una kaha ese baine durumu Tamada lalokauna, Iehova, ba raka henia kahi totona!

BA STADILAI HEREVADIA

Ba stadilai herevadia kahanai, Baibul siridia momo ese e herevalai kastom, tano, bona gado e ḡaukaralaimu daladia e hahedinarai.

Mataio 12:20, NWT

Wiki mai kwalahuna: Idaunegai ruma momo lalodiai e ḡaukaralaiava uro lamepa maraḡina ta, olive oela amo e hahonuava. Wiki ese oela e dodoava bena lahi e arava. Grik gado ai ina hereva “wiki mai kwalahuna,” anina na wiki ta na kwalahuna mo e daemu, badina gidana na mia to lahina na e maraḡi e laomu eiava e bodo. Isaia 42:3 ese Iesu ena hebogahisi karana e perovetalaia; ia ese manau bona lalomanoka taudia edia helaro na baine hagoadaia.

Mataio 26:13

Momokani: Grik gado herevana, a·menʹ na Heberu gado ʼa·menʹ amo e hahanaia, bona anina na “unu baine vara toma,” eiava “momokani.” Nega momo Iesu ese una hereva e ḡaukaralaiava, hereva ta matamana, gwauhamata ta, eiava peroveta herevana ta ena namo baine hahedinaraia totona, unu amo baita abia dae una hereva na momokani. Iesu ese ina hereva “momokani,” o amen, na toretore helaḡadia ai e ḡaukaralaia. Ioane ena Evanelia lalonai, ina hereva (a·menʹ a·menʹ) na nega rua e ḡaukaralaia neganai, Iesu ena hereva na ini e hahanaia toma, “momokani vaitani.”—Ioa 1:51.

LAULAU

Laulau idauidau, vidio asi regedia, bona katun vidiodia ese Baibul ai e herevalai ḡaudia e hahedinarai.

Betefage, Olive Ororona, bona Ierusalem

Ina vidio kwadoḡina ai Ierusalem ilao henina dalana na ist kahana amo e hahedinaraia. Hari ina negai et-Tur hanuana—una na Baibul negadiai e gwauraiava Betefage hanuana—amo ela bona Olive Ororona dorina. Betania na Betefage ena ist kahanai, Olive Ororona ena ist hekei dihona kahanai. Ierusalem ai, Iesu bona ena hahediba na nega momo e laova Betania ai e nohova, hari una taoni ladana na el-ʽAzariyeh (El ʽEizariya ), Arabic gado ai una lada anina na “Lasaro ena Gabu.” Iesu na nega momo Mareta, Maria, bona Lasaro edia ruma ai e nohova. (Mt 21:17; Mr 11:11; Lu 21:37; Ioa 11:1) Iesu na edia ruma amo Ierusalem e laova neganai, ia na hari vidio ai e hahedinaraia dalana e badinaiava. Nisan 9, 33 C.E. ai, Iesu na doniki ta doruna ai e helai bona Olive Ororona amo Ierusalem bainela neganai, reana Betefage dalana e badinaia.

Betania dalana amo ela Betefage
Betefage
Olive Ororona
Kidron Kourana
Dubu Helaḡa Ororona

Ikoko ta Ae Geduna Turiana ai

Ina laulau ai, ae geduna turiana ai ikoko ta e vareai laulauna, una ikoko ena lata na 11.5 sentimita. Laḡani 1968 ai, akioleji taudia ese not Jerusalem ai tano ta e geia neganai una turia korikorina e davaria, bona una na Roma edia negai e nohova tauna ta turiana. Akioleji edia hetahu karana amo e hamomokania ikoko na e ḡaukaralaiva au ai tau ta bae hamasea totona. Roma edia soldia ese Iesu Keriso na au ta ai e hasatauroa neganai reana ikoko unu bamodia e ḡaukaralai. Una turia na nadi mauana ta, ladana ossuary, lalonai e davari, mase tauna tauanina na kahu ai e laova neganai ia turiana na una maua lalonai e udava. Una ese e hahedinaraia au ta ai e hasatauroa tauna na bae guria diba.—Mt 27:35.

EDA KRISTEN MAURI BONA HESIAI ḠAUKARA–HEBOU PEPANA