Dirava ena Basileia (Kingdom) na guba gavamanina. Una gavamani ese tanobada gavamanidia iboudiai gabudia baine abi. Bona unai gavamani ese Dirava ena ura guba ai bona tanobada ai baine karaia. Dirava ese ena gavamani, o Basileia, unu baine ḡaukaralaia toma, na sivarai namona. Kahirakahira, Dirava ena Basileia ese taunimanima edia ura ḡaudia iboudiai baine havara, bona tanobada besedia iboudiai baine hatamonadia.​—Daniel 2:44; Mataio 6:9, 10; 24:14, duahidia.

Iehova ese Natuna, Iesu Keriso, e abia hidi King ai e halaoa, Dirava ena Basileia baine lohiaia totona.​—Apokalupo 11:15 duahia.

Dirava Natuna na King maorona, badina ia na hariharibada bona hereva momokani e badinaia aukamu tauna. (Ioane 1:14) Danu, Iesu ena siahu na heḡereḡere, taunimanima baine durudia totona. Ia na mase amo e toreisi lou murinai, guba ela. Bona unuseniai, ia na Iehova idibana kahana ai e helai diho, bona e henarimu, ela bona Dirava ese siahu o maoro baine henia, baine lohia matama totona. (Heberu 10:12, 13) Oibe, Dirava ese Iesu siahu e henia, baine lohia dainai, kahirakahira, Iesu ese una siahu baine ḡaukaralaia, bena guba amo tanobada baine lohiaia.​—Daniel 7:13, 14 duahidia.

Grup eiava orea ta ladana, “helaḡa taudia” na Iesu ida guba ai bae lohia. (Daniel 7:27) Unu helaḡa taudia ginigunadia na, Iesu e abidadama heniava aposetolo taudia. Una  nega amo ema bona hari, Iehova ese helaḡa taudia ma haida, Ia e abidadama heniamu tataudia bona hahinedia, doini e abidia hidimu. Iesu heḡereḡerena, idia danu lauma tauanina ai bae toreisi lou.​—Ioane 14:1-3; 1 Korinto 15:42-44, duahidia.

Taunimanima hida be guba baela? Iesu ese e gwauraidiamu, “seri maraḡi.” (Luka 12:32) Idia iboudiai na 144,000. Idia na Iesu ida tanobada bae lohiaia.​—Apokalupo 14:1 duahia.

Dirava ena Basileia na laḡani 1914 ai e lohia matama. * Iesu ese King dagina e abia neganai, maoromaoro Satana bona ena demoni na tanobada ai e tahodia dobi. Satana na e badu dikadika dainai, tanobada ibounai latanai, dika bada e havaraia. (Apokalupo 12:7-10, 12) Una laḡani amo ema bona hari, taunimanima e hahisidiamu ḡaudia vada e bada e laomu. Tuari, hitolo, gorere, bona tano mareremarere na ‘toa’​—una toa ese e hadibadamu, Dirava ena Basileia na kahirakahira ina tanobada baine lohiaia.​—Luka 21:7, 10, 11, 31 duahidia.

Dirava ena Basileia na haroro ḡaukarana amo, bese idauidau vada e hatamonadiamu. Manau taudia milioni momo ese Iesu na edia King ai vada e halaoamu. Dirava ena Basileia ese tanobada oromana dikana baine haorea neganai, ia ese unu manau taudia baine gimadia. Bema taunimanima e uramu una Basileia amo namo bae davaria, namona na hari Iesu ikamonai henina karana bae dibaia.​—Apokalupo 7:9, 14, 16, 17 duahidia.

Basileia na laḡani 1,000 lalonai baine lohia neganai, ia ese Dirava ena ura ḡauna tanobadai baine havaraia. Anina na, tanobada idoinai na paradaiso ai bainela. Laḡani 1,000 dokonai, Iesu ese Basileia na Tamana baine henia lou. (1 Korinto 15:24-26) O uramu Basileia sivaraina be daika enai ma ba herevalaia danu?​—Salamo 37:10, 11, 29 duahidia.