Ta ese hehuni herevana ta de hamaoromu?​— * Baibel ese hehuni herevana ta e gwauraiamu ‘hehuni’ hereva helaḡana. Ia na helaḡa badina ia na Dirava amo. Danu, ta asi dibana dainai, ia na hehuni herevana. Aneru danu e urava una hehuni herevana bae dibaia. Oi o uramu una hehuni herevana ba diba?​—

Ini aneru be e urava dahaka bae diba?

Idaunegai, Dirava ese tau bona hahine ginigunadia e karadia. Ladadia na Adam bona Heva. Dirava ese uma hairana ta ladana Eden e henidia bae noholaia. Bema Adam bona Heva ese Dirava bema kamonai henia, idia bona natudia ese tanobada ibounai na paradaiso ai bema halaoa una uma hairana heḡereḡerena. Bena idia na Paradaiso ai bema noho hanaihanai. To, o helalotaomu Adam bona Heva be dahaka e kara?​—

Adam bona Heva ese Dirava e gwau-edeede henia dainai, hari ita na dia paradaiso ai. To Dirava na e gwa ia ese tanobada ibounai baine haharaia, bona taunimanima iboudiai na bae mauri hanaihanai bona bae moale. Dirava ese una be ede be havaraia tomamu? Nega daudau lalonai taunimanima na asi dibadia, una na hehuni.

Iesu tanobada ema neganai, una hehuni herevana na taunimanima e hadibadia. Ia na e gwa una hehuni herevana na Dirava ena Basileia. Iesu ese e hamaorodia una Basileia bainema totona bae ḡuriḡuri. Una Basileia ese ina tanobada na paradaiso ai baine halaoa.

O moalemu una hehuni herevana ome diba dainai?​— Ba helalotao, Iehova e kamonai heniamu taudia sibodia mo Paradaiso ai be nohomu. Baibel ese Iehova e kamonai henia taudia momo sivaraidia e gwaurai. O uramu idia sivaraidia ba diba?​— Idia be daidia bona ede baita tohotohodia toma.