Salamo 37:1-40
37 Lalomu na basine hekwarahi kara dika taudia daidiai,kara kerere taudia danu basio vaḡeḡe henidia.
2 Badina be asi vanahana bae utudia, rei na heto;bae kakoro, au raudia na heheto.
3 Iehova bavabidadama henia, kara namo ba kara;bena tano ai ba noho, mai mainomu ida.
4 Iehova ba moalelaia;oi lalomu ena ura ia ese baine henimu.
5 Oiemu dala idoinai Iehova imana ai bavatoa;ia bavabidadama henia, ia ese baine ḡaukaralaia.
6 Oi igwaurai-maoromu ia ese baine hahedinaraia diari na heto;oiemu kara maoromaoro danu dina tubua na heto.
7 Iehova enai ba laḡa ani,ia ba naria mai haheaukamu ida;Ialomu basine hekwarahi, ena ḡaukara ai e taḡamu tauna dainai,eiava ena lalo-hadai dikadia anidia e karamu tauna dainai.
8 Badu baine mia, daḡedaḡe ba rakatania.Lalomu basio hahekwarahia: una na kara dika e havaraiamu.
9 Badina be kara dika taudia na bae henege daure;a Iehova e nariamu taudia ese tano bae abia.
10 Asi vanahana kara dika tauna baine puki;ena gabu ba tahua, to basio davaria.
11 A manau taudia ese tano bae abia;maino ena harihari-bada idia ese bae moalelaia.
12 Kara dika tauna ese kara maoromaoro tauna ihadikana daladia e haeromu,gadigadina e hahedai heniamu;
13 a Ḡaubada ese kara dika tauna e kirikirilaiamu,badina be e itaiamu, ena dina be maimu.
14 Kara dika taudia ese dare e veridia lasimu,bona edia peva e marediamu,ogoḡami taudia bona e dabumu taudia ialadia totona,bona kara maoromaoro taudia iala-masedia totona.
15 Edia dare na sibodia kudoudia ai bae vareai,bona edia peva bae kwaidu.
16 Kara maoromaoro tauna ena ogoḡami esekara dika taudia hutuma edia taḡa e hereaiamu.
17 Badina be kara dika taudia imadia na bae kwaidu,a Iehova ese kara maoromaoro taudia e haginidia toremu.
18 Iehova ese asi edia kerere taudia edia dina dibana,idia ahudia bae mia hanaihanai.
19 Haida ese asie hahemaraidiamu dika negadia ai,bona doe negadia ai bogadia e kunumu.
20 A kara dika taudia na e mase oremu;Iehova inaina loḡora na rei gabudia hairaidia na heto,idia na e boiomu, kwalahu ai e boio vaitanimu.
21 Kara dika tauna na e abi torehaimu, bena ihalouna asi dibanaa kara maoromaoro tauna na mai ena harihari-bada ida e henimu.
22 Badina be Iehova ese e hanamodiamu taudia ese tano bae abiaa baine ihi-ihiraidia taudia na bae henege daure.
23 Tau namona ena ae-raka na Iehova ese e reḡuamu,bona ena dala e moalelaiamu tauna na ia ese e haginiamu.
24 Ia na baine keto, to basine moru dobi;badina be Iehova ese ia imana amo e dogoa taomu.
25 Lau be gunaguna na eregabe, harihari vada na buruka;a lau ese nega hata kara maoromaoro tauna ta vada e baia na do asina itaia,eiava natuna na aniani e noi hegame ai do asina itaia.
26 Ia na nega iboudiai e hariharimu bona e heni torehaimu,bona ia natuna na taunimanima ihanamodia taudia ai vada ela.
27 Kara dika ba rakatanidia, kara namo ba kara;bena ba noho hanaihanai.
28 Badina be Iehova na kara maoromaoro e ura heniamu;ena helaḡa taudia na basine rakatanidia.Kara maoromaoro taudia na bae mauri hanaihanai;a kara dika taudia natudia na bae henege daure.
29 Kara maoromaoro taudia ese tano bae abia,bae noholaia hanaihanai.
30 Kara maoromaoro tauna uduna ese aonega herevadia e gwauraimu,ia malana ese hahemaoro herevadia e gwauraimu.
31 Ena Dirava ena taravatu na lalona ai;ia aena na se dedimu.
32 Kara dika tauna ese kara maoromaoro tauna e itaia taomu,ia iala-masena dalana e tahuamu.
33 Iehova ese ia imana ai basine negea,bona bae hahemaoro henia negana ai baine rudia, basie revaia.
34 Iehova ba naria, iena dala ai ba raka,bena baine abimu dae, tano na bavabia oiemu;kara dika taudia ihabua-taridia danu ba itaia.
35 Kara dika tauna vada na itaia, e lao hereava,e tubu badabadava, Lebanon ai sida auna ta na heto;
36 Ma na raka hanai, ia na lasihia;na tahua, to asina davaria.
37 Asi ena kerere tauna ba haeroa, bona kara maoromaoro tauna ba itaia,badina be dokona ai ia ese maino baine abia.
38 A kara dika taudia na bae mase ore,dokona ai bae henege daure.
39 Kara maoromaoro taudia ihamauridia na Iehova ena amo;ia na edia hahemauri gabuna, hekwarahi negadia ai.
40 Iehova ese e durudiamu bona e hamauridiamu;ia ese kara dika taudia imadia amo e hamauridiamu, e harohodia maurimu,badina be idia ese ia e abidadama heniamu.
