Isaia 25:1-12
25 Iehova e, oi na egu Dirava;baina imodaimu, oi ladamu baina hanamoa;badina be oi ese kara hereadia vada o kara,gunaguna o lalo hatalai karadia,heabidadama karadia bona kara momokanidia.
2 Badina be hanua na vada o hasenua,hanua mai maḡuna na vada o ḡiḡia dobi;idau taudia edia pavapava rumana na hanua ta ai basie gwauraia lou.basie haginia lou ela bona hanaihanai.
3 Taunabunai, goada besedia ese bae imodaimu;asi edia hebogahisi besedia hanuadia ese oi garimu bae gari.
4 Badina be oi na ogoḡami tauna ena gabu aukana ema bona hari,e dabumu tauna ena gabu aukana ena hisihisi ai,hemetai gabuna lai gubana amo,bona ikerukeru gabuna siahu amo;badina be asi edia hebogahisi taudia edia badu nalai gubana ese haba e hohoamu na heto,
5 eiava siahu ḡaraḡarana tano kaukauna ai na heto.Oi ese idau taudia edia heloḡo-heloḡo o tuiamu;siahu na ori ese e hakerukeruamu na heto,asi edia hebogahisi taudia edia ane na unu o tuia tomamu.
Iehova ena ororo
6 Ina ororo ai Iehova Sabaota ese aria namo-hereana baine karaia, bese iboudiai adia: vine-ranuna negarina, aniani gaihodia, vine-ranuna asi nurinurina.
7 Ina ororo ai danu ia ese bese iboudiai e ḡovadia ahumu, bona basileia iboudiai e sese-ahulaidiamu, ḡauna baine habuaia tari.
8 Ia ese mase baine ha-orea ela bona hanaihanai; Ḡaubada Iehova ese irurumata na vaira iboudiai amo baine dahu oho, bona ena bese taudia edia hemarai na tanobada idoinai amo baine abia oho; badina be Iehova vada e hereva.
9 Una dina ai, idia na baeto: A itaia, ina na eda Dirava; vada ta naria, baine hamaurida helaoreana. Ina na Iehova; vada ta naria; baita moale, ena hahenamo baita moalelaia.
10 Badina be Iehova imana na ina ororo latanai baine hetao kau; bona Moab na ena gabu ai baine moia tao, rei kakoro na boromakau taḡedia e haboumu gurina ai e hemoi taomu na heto.
11 Bogaraginai, ia imana baine toi roro, nahu tauna ese imana e toi roromu na heto. A Iehova ese ena hekokoroku bona ena ima-dibaka baine hamaraḡidia.
12 Ena maḡu gabudia aukadia na ia ese baine ḡiḡidia dobi, baine hamorudia, tano ai baine tahodia dobi, ḡahu ai baine taodia tari.
