Iobu 33:1-33
33 Iobu e, harihari eregu a kamonai;egu hereva iboudiai ba hakala henidia.
2 A itaia, udugu na kehoamu,bona malagu udugu ai e herevamu.
3 egu hereva ese egu lalo-maoromaoro na e gwauraiamu,bona bibinagu dibadia ḡaudia na e gwauraimu mai momokanidia ida.
4 Dirava ena lauma ese vada e karagu,bona Siahu-idoinai Diravana laḡana ese vada e hamaurigu.
5 Bema mai emu haere dalana, ba haere henigu;vairagu ai emu hereva ba haerodia namonamo bona ba gini tutuka.
6 A itaia, lau na oi heḡereḡeremu Dirava vairanai;lau danu raro taba ta amo e karagu.
7 A itagu, garigu basio gari;imagu na basina taoa tari metau latamu ai.
8 Momokani, o gwaurai herevadia vada na kamonai;emu hereva reḡedia danu vada na kamonai.
9 O tomu: Lau na ḡoeva dae, asi egu kerere ta;lau na ḡoeva herea, asi egu kara havara ta;
10 matona, ia ese i’inai-henigu dalana e tahuamu,ia inaina ai e halaogumu;
11 lau aegu na hekahi-tao auna ai e kahi tao,bona egu dala iboudiai e hasinadodiamu.
12 A itaia, ina hereva ai oi na dia maoro.Lau ese baina haere henimu;Dirava ese taunimanima na e hereadiamu.
13 Dahaka dainai ia o lodu heniamu,o tomu “Egu hereva davadia se gwauraimu”?
14 Badina be Dirava ese dala ta amo e herevamu, eiava dala rua amo,to taunimanima na lalodia asie pararamu.
15 Nihi ai, eiava hanuaboi mata-hanaina ai,taunimanima e mahuta hedavauhemu negana ai,edia mahuta ḡaudia latadiai e mahutamu lalonai,
16 ia ese taunimanima taiadia e hakiraradiamu,bona sisiba herevadia amo e hagaridiamu,
17 taunimanima na edia kara amo baine hakaudia siribona edia heaḡi baine abia oho helaoreana.
18 Idia laumadia na guri amobona edia mauri danu dare ena hahemase amo e rauadiamu.
19 Taunimanima na hisihisi ese matana e hakanimu ena mahuta ḡauna latanai,bona turiana danu e hisihisi louloumu;
20 una dainai ena mauri ese aniani e dadaraiamu,bona uduna ese aniani namodia se ura henidiamu.
21 Tau-anina vada e varoda-varoda ela bona basine heita diba,bona turiana, gunaguna asie itadiava, na e hedinaraimu.
22 Laumana ese guri eha kahi heniamu,bona ena mauri ese mase taudia edia noho gabuna e raka henia kahimu.
23 Aneru ta, aneru daha bogaragidia amo, na ia bona Dirava padadiai bema gini,taunimanima ena dala maorona bema gwaurai henia;
24 bena bema bogaia hisi, bema toma:A hamauria, guri lalonai basine diho;lau ese ia idavalaina ḡauna vada na davaria;
25 bena hidiona baine matamata, eregabe tauna na heto,bona eregabena ena goada dinadia baine lou henidia.
26 Bena taunimanima ese Dirava e ḡuriamu,bena Dirava ese e abia daemu,bona ia ese Dirava vairanai e raka vareaimu mai moalena ida.
Ia ese taunimanima na ena hahemauri sivaraina e hamaorolaidiamu,
27 taunimanima vairadiai ane e abimu, e tomu:Lau na kara dika na karaia, bona kara maoromaoro na hagagevaia,bona davagu se henigu;
28 ia ese laumagu na e hamauria, guri ai basine diho;egu mauri ese diari baine itaia.
29 A itaia, Dirava ese ini kara iboudiai na taunimanima ta e kara heniamu,nega rua eiava toi,
30 laumana na guri amo baine hakaua loubena mauri diarina baine itaia helaoreana.
31 Iobu e, a hakala, a kamonai henigu;eremu, lau baina hereva.
32 Bema mai emu hereva, ba haere henigu;a hereva, lau na uramu maoromu baina gwaurai.
33 Bema lasi, a hakala henigu;basio hereva, bena lau ese aonega baina hadibalaimu.
