Esekiel 9:1-11
9 Bena ia ese taiagu ai e lolo, mai gao badana ida, eto, Hanua ihabua-tarina taumui e, a raka kahira, ta ta mai emui ala-ala ḡaudia imamui ai.
2 Bena na itaia, tatau tauratoi na atai ikoukouna, mirigini kahana e vaira heniamu ḡauna, kahana amo ema, ta ta mai edia ala-ala ḡaudia imadia ai. Ma tau ta danu idia ida ema; ia na dabua aukana e hahedokilaia, toretore ḡaudia vainana danu e daharaia. Bena idia na e raka vareai, ihaboulaina patana, auri labora-labora ḡauna, badibadinai e gini.
3 Una negana ai Israel Diravana hairaina na kerubi daedia, vaia e miava gabuna, amo e dae, dubu raka-vareaina e lao henia; bena ia ese hari dabua aukana e hahedokilaia bona toretore ḡaudia vainana e daharaia tauna na e boi henia.
4 Iehova ese e hamaoroa, eto, Ierusalem hanuana ba rakaia hanai, kara dika-rohorohodia iboudiai, hanua lalonai e karamu, na e taitailaidiamu bona e ḡanaḡanalaidiamu taudia bagudia ai toa ba kara.
5 Bena na kamonai, ia ese unu haida e hamaorodia, eto, Ia murinai hanua ba rakaia hanai, bavala-ala; basio haḡeredia bona basio bogadia hisi;
6 iahu bavaladia mase, bona uhau, ulato, memero, kekeni, bona hahine danu; a baguna mai toana tauna ta basio daua toho. Egu gabu helaḡana amo ba matamaia. Taunabunai idia ese unu hanua tau-badadia dubu vairanai nohodia ediai e matamaia.
7 Bena ia ese ma e hamaorodia, eto, Dubu ba hamiroa, bona maḡudia na mase tau-anidia amo ba hahonudia. A raka lasi! Taunabunai, idia na e raka lasi, hanua na e daea.
8 Idia e daea negana ai, lau na sibogu na nohova, bena na goru diho, na tai, nato, Ḡaubada Iehova e, emu badu ḡaraḡara Ierusalem latanai iseina ai na Israel orena idoinai ba habuadia tari a?
9 Bena ia ese e hamaorogu, eto, Israel bona Iuda besedia edia kerere na bada herea; tano na rara ai e honumu, bona hanua na hahemaoro karadia gageva-gagevadia ai e honumu. Badina be idia na e tomu “Iehova ese tano vada e rakatania; Iehova na se heitamu”.
10 A lau be basina haḡeredia bona basina bogadia hisi, a edia kara heḡereḡeredia ai na tubuadia ai baina kara.
11 Bena hari dabua aukana e hahedokilaia bona toretore ḡaudia vainana e daharaia tauna ese hereva ma e loulaia, eto, O haḡanilaigu heḡereḡerena ai vada na karaia.
