Aposetolo Edia Kara 19:1-41
19 Apolo na Korinto ai e nohova negana ai, Paulo gunika kahana amo e lasi, Efeso ai e kau; Iesu ibadinana taudia haida unuseni ai ma e davaridia.
2 Bena ia ese e nanadaidia, eto, Iesu o abiabiraia negana ai Lauma Helaḡa danu o abia a? Idia e haere, eto, Lasi, Lauma Helaḡa herevana na do asia kamonai.
3 Ma e nanadaidia lou, eto, Dahaka bapatisona o abia? Idia eto, Ioane ena bapatiso.
4 Paulo eto, Ioane ese helalo-kerehai bapatisona mo taunimanima e henidia; bona e hamaorodia danu ia murina amo bainema tauna na bae abiabiraia, Iesu bunai.
5 Una hereva e kamonai, bena Lohiabada Iesu ladana ai bapatiso ma e abia.
6 Bena Paulo ese imana na idia latadiai e ato kau negana ai, Lauma Helaḡa na idia latadiai vada e diho. Bena idia na gado idau-idau ai e hereva, bona e peroveta danu.
7 Taudia iboudiai gwauta-rarua sisivana.
8 Paulo na dubu ai e dae kau loulouva, hua toi davana e haroro loulouva mai haheaukana ida, Dirava ena basileia herevadia e hahedibalaiva, taunimanima lalodia e aniva.
9 A haida ese lalodia e ha-aukadia, e gwau edeede, bona dala matamatana e ḡonaḡonalaia hutuma vairadiai. Taunabunai Paulo ese e rakatanidia, Iesu ibadinana taudia danu e hakaudia oho; bena dina iboudiai Turano ena hahediba rumana ai e hahedibava.
10 Laḡani rua unu e kara tomava; taunabunai Asia tanona ai e nohova taudia, Iuda taudia bona Helene taudia, iboudiai ese Lohiabada ena hereva e kamonaiva.
11 Siahu karadia hereadia danu Dirava ese Paulo imana amo e karava;
12 taunabunai muko bona rami Paulo tauna ena amo e laohai, gorere taudia dekediai, bena edia gorere vada e doko bona lauma dikadia ese e rakatanidia.
13 A Iuda taudia haida, vaia lauma dikadia ilulu-ohodia karadia e loalaiva taudia, ese Iesu ladana e hatoa matama, lauma dikadia ese e bolodia taudia latadiai, eto, Paulo ese e harorolaia tauna Iesu ladana ai a haḡanimuimu.
14 Skeva, Iuda tauna bona hahelaḡa tauna ta, natuna mamaruanedia hahituosi unu e kara tomava.
15 Bena lauma dikana ese e haere henidia, eto, Iesu na mai dibagu, Paulo danu dibagu, a umui be daidia?
16 Bena hari lauma dikana ese e boloa tauna na idia latadiai e roho kau, e hadareredia bona e dadabadia, ela bona idia na una ruma amo e heau lasi, asi dabuadia bona mai berodia ida.
17 Iuda taudia bona Helene taudia Efeso ai e nohova ese harina e kamonai, bena gari ese iboudiai e butudia tao. Iboudiai ese danu Lohiabada Iesu ladana e imodaia.
18 Bona kamonai taudia hutuma danu ema, edia kara e gwaurai hedinarai;
19 bona babalau taudia dia gagadoi edia buka e habou, taunimanima iboudiai vairadiai e gabu. Buka davadia e hagau, davadia silver monidia gerebu ima.
20 Taunabunai, Lohiabada ena hereva vada e vara rohorohova bona e kwalimuva.
21 Una murinai Paulo lalona e hadaia, Makedonia bona Akaia tanodia amo baine raka hanai, bena Ierusalem bainela. Eto, Unu bainala guna, gabeamo Roma baina ha itaia.
22 Bena ia ese iduruna taudia rarua, Timoteo bona Erasto, Makedonia e siaidia lao; a ia sibona Asia kahana ai e nohova.
23 Una negana ai heloḡo-heloḡo dia maraḡi e vara, Iesu ena dala dainai.
24 Badina binai: tau ta ladana be Demetrio, silver iḡaukaralaina tau, dirava hahinena ladana Diana ena silver dubudubudia e karava; unu amo ena ḡaukara oreana taudia ese moni diaḡau e abiva.
25 Ia ese idia bona ḡaukara heḡereḡeredia e karava taudia e haboudia, eto, Tatau e, dibamui ina ḡaukara amo eda moni ta abimu;
26 bona o itaiamu bona o kamonaimu danu, ina tau Paulo ese taunimanima hutuma bada lalodia e animu, bona e hakaudia sirimu, dia Efeso ai mo, a Asia tanona idoinai; danu, e tomamu taunimanima imadia ese e kara diravadia na dia dirava korikori.
27 Ina na ita e hadikadamu. Eda moni idavarina ḡaukarana taunimanima ese bae dadaraia. Bona dia una mo: dirava hahinena, Diana, ena dubu danu bae dadaraia; oibe, Asia idoinai bona tanobada taudia ibouboudiai e toma henia dihomu diravana dagina herea-daena baine heabi oho.
28 Idia ese una hereva e kamonai negana ai e badu dikadika, e lolo loulou, eto, Efeso diravana, Diana, na herea mikamika.
29 Hanua idoinai heloḡo-heloḡo vada e bada. Bena idia iboudiai e heau ela herarai rumana, mai lalodia tamona; Makedonia taudia rarua danu, Gaio bona Aristako, Paulo ena laolao ai e bamoava taudia, vada e dabaidia tao, e dabuidia lao.
30 Bena Paulo ena ura be baine raka vareai hanua taudia dekediai, to Iesu ibadinana taudia ese e rua.
31 Asia lohiadia haida be Paulo turana; idia ese danu gwaukau e siaia, e noia, herarai rumana ai basine raka vareai eto.
32 Haida ese hereva ta e lololaiava, ma haida hereva ta; bena hebou na e heloḡo ahuahuva dainai hutuma na hebou badina asi dibadia.
33 Bena haida na lalodia eto hebou badina be Alesana, badina be Iuda taudia ese taunimanima vairadiai e doria laova. Taunabunai, Alesana ese imana ai e taodia ahu, taunimanima baine haere henidia eto.
34 To idia ese e itaia, ia na Iuda tauna, bena iboudiai hereva tamona e lololaia loulouva ela bona hora rua sisivana; eto, Efeso diravana, Diana, na herea mikamika.
35 Bena hanua ena toretore tauna ese hutuma e hatuidia, eto, Efeso taumui e, daika tanobada ai asi dibana Efeso na Diana badana ena dubu igimana, bona Deo ena amo e moru ḡauna danu igimana.
36 Ini hereva be asi igwau-tubudia, taunabunai ba noho namonamo, basio kara havara-havara, una be namo.
37 Badina be ini o hakaudia mai taudia na dia dubu ai asie dadidadi; eda dirava hahinena danu asie hadikaia.
38 Taunabunai, Demetrio mai ena ḡaukara taudia ida lalodia baeto tau ta ese vada e hadikadia, hahemaoro rumadia vada eme hekeho, gavana danu noho: benaini, bae hahebade heheni.
39 A bema idau hereva ta mia, hebou korikori ai bae herevalaia.
40 A hari dina ena heloḡo-heloḡo dainai bae habadelaida be baita kerere; badina be ina heloḡo-heloḡo na asi anina, bona ina hebou badina na basita gwauraia diba.
41 Ia e hereva vaitani, bena e haḡanidia bae karoho.
