1 Hanua Pavapavadia 17:1-24
17 Elia, tau Tisbe, Gilead ai e nohova tauna ta, ese Ahaba e hereva henia, eto, Iehova, Israel Diravana, vairanai na ginimu Diravana, e maurimu heḡereḡerena, hunu bona medu basie diho ini laḡani lalodiai, a lauegu hereva dainai mo bae diho.
2 Bena Iehova ena hereva na ienai e kau, eto,
3 Ini amo a raka oho, mairiveina kahana baola, sinavai maraḡina ladana Keriti isena ai ba komu; una na Ioridane mairiveina kahana ai.
4 Sinavai ranuna do ba inua; bona galo vada na haḡanidia, idia ese bae ubumu unuseni ai.
5 Taunabunai, ia na ela, Iehova ena hereva heḡereḡerena e kara, sinavai maraḡina Keriti isena ai e nohova, Ioridane mairiveina kahana ai.
6 Daba ai, galo ese ana aniani bona vamu e mailaiva, bona adorahi ai danu ana aniani bona vamu e mailaiva; sinavai ranuna danu e inuva.
7 A nega taina vada ela, bena sinavai maraḡina e kororo, badina be medu na se dihova una tano ai.
Elia na Sarepata ai
8 Bena Iehova ena hereva na ienai e kau, eto,
9 A tore isi, Sarefata, Sidono kahana hanuana ta, baola, unuseni ai ba noho. A itaia, lau ese vabu ta unuseni ai vada na haḡania, baine ubumu.
10 Taunabunai, ia na e tore isi, Sarefata ela; hanua ikoukouna badinai e kau, bena vabu ta e itaia, rakuraku audia e gogova. Bena e boi henia, eto, Ranu kuri ta a mailaia, aina inua.
11 Baine mailaia eto, bena ma e boi henia, eto, Aniani taina imamu ai a mailaia.
12 A hahine na eto, Iehova, emu Dirava, e maurimu heḡereḡerena, asi egu aniani maedana; flaoa sina taina mo tohe ai, bona dehoro taina kavabu ai. Harihari rakuraku audia siri rua na gogomu, bainala, aniani baina nadua, lau bona natugu merona amai; baia ania, bena vada baia mase.
13 Bena Elia ese e hamaoroa, eto, Asio gari; aola, emu hereva heḡereḡerena ba karaia. To guna dikea ta ba gabua, lauagu ba mailaia; una murinai oi bona natumu amui ba gabu.
14 Badina be Iehova, Israel Diravana, na ini e gwau tomamu: flaoa tohena na anina basine ore, bona dehoro kavabuna na basine kaurakaura, ela bona Iehova ese medu na tanobada ai baine hadihoa dinana baine kau.
15 Bena hahine na ela, Elia ena hereva heḡereḡerena e karaia; bena ia bona Elia bona hari hahine ena ruma taudia na dina hoho e anianiva.
16 Flaoa tohena na anina se ore, bona dehoro kavabuna na se kaurakaura, Iehova ena hereva Elia uduna amo e gwauraia heḡereḡerena.
17 Una murinai, hari ruma biaguna hahinena natuna e gorerea; mero ena gorere e bada e laova, ela bona laḡana e ore.
18 Bena hahine ese Elia e hamaoroa, eto, Dirava ena tau e, dahaka egu ai o karamu? Egu kara dika ihelalolaina bona natugu ihamasena totodia vada oma.
19 Elia ese e hereva henia, eto, Natumu a henigu. Bena ia ese hahine kemena amo e abia, e rosia lao, ela bona atai daiutuna, ena hekure gabuna; bena ena mahuta ḡauna ai e kurea.
20 Bena ia ese Iehova e boi henia, eto, Iehova, egu Dirava e, oi ese hari vabu, dekenai na nohomu hahinena, latanai hahedika vada o hadihoa, natuna vada o alaia mase, a?
21 Bena nega toi ia ese hari mero latanai e goru kau, bona Iehova e tai henia, eto, Iehova, egu Dirava e, ina mero laumana na ba henia lou.
22 Bena Iehova ese Elia gadona e kamonai; bena hari mero laumana na e lou, bena e mauri lou.
23 Bena Elia ese mero e abia, atai daiutuna amo e diholaia ruma ai, bena sinana e henia. Elia eto, A itaia, natumu vada eme mauri.
24 Hahine ese Elia e hamaoroa, eto, Harihari name diba oi na Dirava ena tau, bona Iehova ena hereva oi udumu ai na momokani.
