KĨTHOOMO KĨA ĨKŨMI NA BITANO
Njĩra Ĩrĩa Yagĩrĩte ya Kũthaathayia Mũrungu
1. Nũũ ũbuĩrĩte gũtwĩra njĩra ĩrĩa yagĩrĩte ya kũthaathayia Mũrungu?
NDINI inyiingĩ ciugaga nĩ iritanaga ũmma bwegiĩ Mũrungu. Ĩndĩ bũu bũtĩũmbĩka, tontũ ndini iritanaga mantũ jarĩ mwanya mono jegiĩ Mũrungu nũũ, na ũrĩa tũbuĩrĩte kũmũthaathayia. Tũũmba kũmenya atĩa njĩra ĩrĩa yagĩrĩte ya kũthaathayia Mũrungu? Nĩ Jehova wenka ũũmba gũtwĩra ũrĩa tũbuĩrĩte kũmũthaathayia.
2. Nĩatĩa ũũmba kwiritana njĩra ĩrĩa yagĩrĩte ya kũthaathayia Mũrungu?
2 Jehova natweete Bibiria kenda tũũmba kwiritana njĩra ĩrĩa yagĩrĩte ya kũmũthaathayia. Kwou iritane Bibiria na Jehova agagũteethia ũgunĩke nĩ mooritani jaawe tontũ eena bata na ũũgwe.—Isaya 48:17.
3. Mũrungu arĩenda tũthithia atĩa?
3 Antũ bamwe baugaga Mũrungu etĩkagĩĩria ndini cionthe, ĩndĩ ũu tĩu Jesũ aatũritanĩre. Aaugĩre: “Ti o muntu uria umbitaga Mwathani, Mwathani, ugakuruka unenene bwa Iguru; indi no uria uthithagia uria Baaba uria uri Iguru eendaga.” Kwou nĩtũkũbatara kwiritana wendi bwa Mũrungu nĩmbi na rĩu tũbũthithie. Bũu nĩ ũntũ bwa kũjũkia na ũrito tontũ Jesũ aang’uanithanĩrie antũ barĩa batĩathĩkagĩra Mũrungu na auni ba waatho, ‘baria bagitaga mantu ja irema.’—Mathayo 7:21-23.
4. Jesũ aaugĩre atĩa bwegiĩ kũthithia wendi bwa Mũrungu?
4 Jesũ oonanĩrie rĩrĩa tũkwenda kũthithia wendi bwa Mũrungu, gũkethĩrwa na irigĩĩria. Aaugĩre: “Kurukeni na mwiriga jumuceke; untu mwiriga ni jumwarie na njira ni imbarie iria iitaga guntu kuria kuuragirwa; na baria bakurukaga ku ni babaingi. Nikwithirwa mwiriga ni jumuceke na njira ni impinyanu iria iitaga mwoyone; na antu baria bamionaga ni baakai.” (Mathayo 7:13, 14) Njĩra ĩmpinyanu, kana njĩra ĩrĩa yagĩrĩte ya kũthaathayia Mũrungu, ĩtongagĩĩria mwoyone jwa kenya na kenya. Njĩra ĩrĩa mbariĩ, kana njĩra ya kũthaathayia Mũrungu ĩrĩa ĩtĩagĩrĩte, ĩtongagĩĩria gĩkuũne. Ĩndĩ Jehova atĩkwenda muntũ kinya ũrĩkũ akua. Naejaga o muntũ wonthe kaanya ga kwiritana bũmwegiĩ.—2 Petero 3:9.
NJĨRA ĨRĨA YAGĨRĨTE YA KŨTHAATHAYIA MŨRUNGU
5. Nĩatĩa ũũmba kũmenya barĩa bathathaagia Mũrungu na njĩra ĩrĩa yagĩrĩte?
5 Jesũ aaugĩre no tũmenye barĩa bathathaagia Mũrungu ũrĩa kwagĩrĩte. Tũthithagia ũu na njĩra ya gũcũnkũũna kĩrĩa betĩkĩtie na kĩrĩa bathithagia. Aaugĩre: “Bukabamenya ni untu bwa maciara jao.” Na acooka auga: “Muti jumwega juciaraga maciara jamega.” (Mathayo 7:16, 17) Kũu tĩ kuuga barĩa bathathaagia Mũrungu nĩ baboojũru. Ĩndĩ atumĩkĩri ba Mũrungu rĩonthe bageragia kũthithia jarĩa jagĩrĩte. Rĩu tiga twone kĩrĩa gĩgatũteethia kũmenya barĩa bathathaagia Mũrungu na njĩra ĩrĩa yagĩrĩte.
6, 7. Nĩkĩ ũthaathayia bwa mma bũthingatagĩĩra Bibiria? Nĩatĩa ngerekano ya Jesũ ĩgũtũritana?
6 Ũthaathayia bwetũ bũbuĩri kũthingatagĩĩra Bibiria. Bibiria yugaga: “O ruteto runthe ruria ruri Maandikone, ruria rwekirwe ni Murungu nkorone ya muntu uria warwandikire, niru kiguni gia kuritana antu nakio, na gia kumenyithagia antu wiyia bwao, na gia kubakaanagia, o na gia kuboonagiiria beetage na miitire iria yagirite ya wagiru; nikenda o muntu uria urumagiira Murungu aagagire mono, na atuurage athuraniritwe mma, wa kuritanaga ngugi iria njega.” (2 Timotheo 3:16, 17) Mũtũmwa Paũlo aandĩkĩĩre Akristũ: “Riria twabureteere ruteto rwa Murungu, butarwitikiirie ta rwari rwa antu, indi bwarwitikiirie o ta ruri ruteto rwa Murungu (o uria ruri rwa mma).” (1 Athesalonike 2:13) Ũthaathayia bwa mma bũthingatagĩĩra Rũteto rwa Mũrungu Bibiria. Bũtĩthingatagĩĩra mathũgaanio ja antũ, nkuagaya, kana mantũ jangĩ.
7 Jarĩa jonthe Jesũ aaritanaga, jaathingatagĩĩra Rũteto rwa Mũrungu. (Thooma Johana 17:17.) Jamaingĩ naagwetaga Maandĩko. (Mathayo 4:4, 7, 10) Atungatĩri ba Mũrungu ba mma bathingataga ngerekano ya Jesũ, na jonthe jarĩa barĩtanaga jathingatagĩĩra Bibiria.
8. Nĩmbi Jesũ aatũritanĩre bwegiĩ kũthaathayia Jehova?
8 Tũbuĩrĩte kũthaathayia Jehova wenka. Kuuma 6:3 yugaga: “Ni Ni ndeejiriire Iburahimu, na Isaaka, na Jakubu; ndi Murungu Mwene inya yonthe; indi-ri, ntamenyerwe nibo riitwa ri riakwa JEHOVA.” Jesũ neendaga antũ bamenya Mũrungu wa mma wengwa nũũ, na naabaritanaga riĩtwa rĩa Mũrungu. (Thooma Johana 17:6.) Jesũ aaugĩre: “Thathayia [Jehova, NW] Murungu waku, na umwathikagire We Wenka.” (Mathayo 4:10) Kwou, tũrĩ atungatĩri ba Mũrungu tũthingatagĩĩra ngerekano ya Jesũ. Tũthathaagia Jehova wenka, tũgatumĩra riĩtwa rĩawe, na tũkaritana bangĩ riĩtwa rĩa Mũrungu na ũrĩa agatũthithĩria.
9, 10. Nĩatĩa twonanagia nĩtwendene?
9 Nĩtũbuĩrĩte kwenda antũ kuuma nkorone. Jesũ aaritanĩre aritwa baawe beendanage. (Thooma Johana 13:35.) Gũtĩkũmakania naarĩa tuumĩte, mĩkarĩre yeetũ, kana kethĩra tũrĩ itonga kana nkĩa. Kwendana gwetũ kũbuĩrĩte gũtũma twĩthĩrwa na ngwatanĩro ta ataana na aarĩ ba baaba. (Akolosai 3:14) Kwou tũtĩĩtaga ndweene kana tũũraga antũ bangĩ. Bibiria yugaga: “Untune buria butumaga aana-ba-Murungu bamenyewa o na kinya aana-ba-nkoma ni bubu: ati o muntu uria utithithagia untu buria bwagirite, atiithagirwa aumite kwa Murungu; kana uria utiendaga mutanethe.” Na ĩkoongeera: “Na ti ta uria Kaini aari wa uria mui, riria ooragire mutana-wa-ng’ina.”—1 Johana 3:10-12; 4:20, 21.
10 Tũtumagĩra ĩgiita, inya, na into bietũ birĩa tũrĩna bio gũteethania na gwĩkanĩra inya. (Ahibirania 10:24, 25) Tũthithagĩria “antu bonthe jaria jaagirite.”—Agalatia 6:10.
11. Nĩkĩ tũgwĩtĩkia wonokio bũũmbĩkaga akĩ gũkũrũkĩĩra Jesũ?
11 Nĩtũbuĩrĩte kwathĩkĩra Jesũ tontũ wonokio bũũmbĩkaga akĩ gũkũrũkĩĩra we. Bibiria yugaga: “Wonokio butionora kiri ungi kinya uriku; ni untu ri, guti riitwa ringi kinya ririku guku nthi, riria rieei antu, riria riagirite ria gutwonokia.” (Mathithio 4:12) Kĩthoomone kĩa 5 kĩa iuku rĩrĩ, nĩtwairitanĩre Jehova aatũmĩre Jesũ kũrita mwoyo jwawe jũrĩ ĩkũũri tontũ bwa antũ barĩa aathĩki. (Mathayo 20:28) Jehova nathuurĩte Jesũ aathana arĩ Mũnene wa nthĩgũrũ. Kĩu nĩkĩo gĩtũmi Bibiria ĩtwĩraga no mwanka twathĩkĩre Jesũ kethĩra nĩtũkwenda gũtũũra kenya na kenya.—Thooma Johana 3:36.
12. Nĩkĩ tũtiitonyithanagia na siasa?
12 Tũtĩbuĩrĩte gwitonyithania na siasa. Jesũ ataitoonyithania na siasa. Rĩrĩa aagambithagua, eerĩre Pilato mũnene wa Roma: “Unene bwakwa ti bwa guku nthi.” (Thooma Johana 18:36.) O ta Jesũ, tũrĩ etĩkĩkua kĩrĩ Ũnene bwa ĩgũrũ bwa Mũrungu, na tontũ bũu kinya tũkethĩrwa tũtũũraga kũ, tũtiitonyithanagia na siasa. Ĩndĩ Bibiria ĩtweete waatho ‘twigague baria baathanaga,’ ũu nĩ kuuga thirikarĩ. (Aroma 13:1) Nĩtwathĩkagĩra mawaatho ja nthĩgũrũ ĩrĩa tũkaraga. Ĩndĩ nĩ mma, rĩrĩa waatho bwaregana na waatho bwa Mũrungu twigerekanagia na atũmwa barĩa baaugĩre: “Itubwirite twi gwikiira [kana kwathĩkĩra] Murungu nkuruki ya antu.”—Mathithio 5:29; Mariko 12:17.
13. Nĩmbi tũtũmagĩĩria yegiĩ Ũnene bwa Mũrungu?
13 Twĩtĩkĩtie Ũnene bwa Mũrungu nĩbu bunka bũkathiria mathĩĩna ja nthĩgũrũ. Jesũ aaugĩre “nkuma iji injega ya unene,” ĩrĩngĩtũmĩĩrua nthĩgũrũne yonthe. (Thooma Mathayo 24:14.) Gũtĩ thirikarĩ ya muntũ yũũmba kũthithia kĩrĩa Ũnene bwa Mũrungu bũgatũthithĩria. (Zaburi 146:3) Jesũ aatũritanĩre tũrombage bwegiĩ Ũnene bwa Mũrungu rĩrĩa aaugĩre: “Unene bwaku bwije; Uria wendete gwe buthithague nthi iji, Ta uria buthithagua kuu Iguru.” (Mathayo 6:10) Bibiria ĩtwĩraga Ũnene bwa Mũrungu bũkathiria thirikarĩ cionthe cia antũ nabu “bukarungama o kenya na kenya.”—Danieli 2:44.
14. Nĩ baaũ wĩtĩkĩtie nĩbathathaagia Mũrungu na njĩra ĩrĩa yagĩrĩte?
14 Nyuma ya gũcũnkũũna mantũ jaja, ciũrie: ‘Nĩ baaũ bathigatagĩĩra Bibiria ũritanine bwao? Nĩ baaũ bamenyithagia bangĩ bwegiĩ riĩtwa rĩa Mũrungu? Nĩ baaũ bendeene kamma na betĩkĩtie Mũrungu naatũmĩre Jesũ atwonokia? Nĩ baaũ batitonyithanagia na siasa? Nĩ baaũ batũmagĩĩria thirikarĩ ya Mũrungu nĩyo yonka yũũmba kũthiria mathĩĩna?’ Nĩ Akũũjĩ ba Jehova akĩ.—Isaya 43:10-12.
NĨATĨA ŨKATHITHIA?
15. No mwanka tũthithie atĩa kenda Mũrungu etĩkĩĩria ũthaathayia bwetũ?
15 Bũtĩng’ani akĩ gwĩtĩkia Mũrungu arĩ o. Kinya irundu bithũũku nĩbiĩtĩkĩtie Mũrungu arĩ o, ĩndĩ bitĩmwathĩkagĩra. (Jakubu 2:19) Kethĩra nĩtũkwenda Mũrungu etĩkĩĩria ũthaathayia bwetũ, no mwanka tũthithie ũrĩa augaga tĩ gwĩtĩkia akĩ arĩ o.
16. Nĩkĩ tũbuĩrĩte kũrega ndini ya ũrongo?
16 Kenda Mũrungu etĩkĩĩria ũthaathayia bwetũ, no mwanka tũrege ndini ya ũrongo. Kĩroria Isaya aandĩkĩre: “Umeni gatigati kao, eeni baatheru.” (Isaya 52:11; 2 Akorintho 6:17) Nĩkĩo tũbuĩrĩte kũregana na gĩntũ kĩonthe kĩa ũthaathayia bwa ũrongo.
17, 18. ‘Babiloni Mucii Juria Munene’ nĩmbi, na nĩkĩ kũregana naju nĩ ũntũ bwa kũthithua na mpwĩ?
17 Ndini ya ũrongo nĩmbi? Nĩ ndini o yonthe ĩrĩa ĩtũritanaga tũthaathayie Mũrungu na njĩra ĩrĩ mwanya na Rũteto rwaawe. Bibiria ĩĩtaga ndini cionthe cia ũrongo ‘Babiloni Mucii Juria Munene.’ (Kugwurirwa 17:5) Nĩkĩ? Mooritani jamaingĩ ja ũrongo ja ndini jaambĩrĩĩrie mũciĩ jwa Babiloni, nyuma ya Ĩkondoria rĩa ntukũ cia Nuhu. Mooritani jau ja ũrongo jaatambĩre nthĩgũrũne yonthe. Ngerekano, antũ barĩa baatũũraga Babiloni baarombaga ikundi bia mĩrungu ĩthatũ. Kinya naarua, ndini inyiingĩ iritanaga Mũrungu nĩ Ũithatũ, ĩndĩ Bibiria ĩritanaga carũrũkũ kũrĩ na Mũrungu ũmwe wa mma, Jehova, na Jesũ nĩ Mũtaana waawe. (Johana 17:3) Antũ barĩa baatũũraga Babiloni kinya nĩbetĩkĩtie kũrĩ gĩntũ kiumaga ndeene ya muntũ gĩgeeta na mbere gũtũũra nyuma ya mwĩrĩ gũkua, na gĩntũ kĩu no kĩthangĩke mwankine. Bũu tĩ mma.—Tega Nteto Irĩa irĩ Mũthia, 14, 17, na 18.
18 Mũrungu naroretie ndini cionthe cia ũrongo ikathirua rua. (Kugwurirwa 18:8) Nũkwona nĩkĩ kuuma ndinine ya ũrongo nĩ ũntũ bwa kũthithua na mpwĩ mono? Jehova nakwenda ũthithia ũu mbere ya ũcereerwa.— Kugwurirwa 18:4.
Watumĩkĩra Jehova amwe na antũ baawe, ũkaa ũmwe wa nja ya nthĩgũrũne yonthe
19. Nĩatĩa Jehova agakũmenyeera wathithia ĩtua rĩa kũmũtumĩkĩra?
19 Wathuura kuuma ndinine ya ũrongo na gũtumĩkĩra Jehova, bamwe ba acoore baaku kana antũ ba nja no baremwe gũciũkĩrwa nĩ ĩtua rĩaku na kinya no bakũũmĩrie ũtũũro. Ĩndĩ Jehova atĩgũtiganĩria. Ũkaa ũmwe wa nja ya nthĩgũrũne yonthe ya mamirioni ja antũ barĩa bendeene kamma, na ũkethĩrwa na wĩrĩgĩĩro bwa gũtũũra kenya na kenya nthĩgũrũne ĩnjerũ ya Mũrungu. (Mariko 10:28-30) Kwombĩka bamwe ba acoore na antũ ba nja barĩa bakũrigagĩĩria ũtĩgatũmĩkĩre Jehova, nyumene bakeenda kwĩritana Bibiria.
20. Nĩkĩ nĩ ũntũ bwa bata kũthaathayia Mũrungu na njĩra ĩrĩa yagĩrĩte?
20 Rua mono, Mũrungu akathiria ũthũũku bunthe na Ũnene bwawe bwathane nthĩgũrũne yonthe. (2 Petero 3:9, 13) Rĩu rĩkethĩrwa rĩrĩ ĩgiita rĩĩthongi atĩa! Bonthe bakathaathayia Jehova na njĩra ĩrĩa akwenda tũmũthaathayia nayo. Kwou nĩ ũntũ bwa bata ũjũkie ĩtagaaria nandĩ na ũthaathayie Mũrungu na njĩra ĩrĩa yagĩrĩte.
