KĨTHOOMO KĨA 03
No Wĩtĩkie Bibiria?
Bibiria nĩejanaga mawĩrane jamaingĩ na kĩrĩra gĩkiingĩ. Kwombĩka no wende kũmenya mono jarĩa ĩritanaga, na mbuga no wĩthĩrwe ũgĩkĩraga. No wĩtĩkie mawĩrane na kĩrĩra kuumania na iuku rĩĩkũrũ ũu? Kamma no wĩtĩkie ũrĩa Bibiria yugaga bwegĩe kũgwĩrĩrua ũtũũro nandĩ na ĩgiita rĩĩjĩte? Mamirioni ja antũ nĩjathithĩtie ũu. Ka twone kethĩra kinya gwe no ũmĩĩtĩkie.
1. Bibiria rĩ, nĩ iuku rĩa mantũ ja mma kana nĩ ja kũthũgaanĩrua?
Bibiria yugaga ĩrĩ-na “nteto cia mma.” (Mutumiiria 12:10) Ĩaragĩĩria mantũ jarĩa jegie antũ bongwa. (Thooma Luka 1:3; 3:1, 2.) Anahistoria babaingĩ na anasayansi begie mĩtũũrĩre ya antũ na mĩkarie yaao, nĩ boombĩte kũrikithia atĩ, tariki cia gĩtũmi, antũ, gũntũ, na mantũ jarĩa jataarĩrĩĩtue Bibiriene nĩ ja mma.
2. Nĩkĩ tũũmba kuuga atĩ Bibiria ĩtĩkũrũki nĩ ĩgiita?
Kaingĩ, Bibiria nĩĩgwetaga mantũ jarĩa jataijĩĩwe rĩrĩa yaandĩkagwa. Ngerekano, nĩyaragĩĩria mantũ ja kĩsayansi. Jamaingĩ ja jarĩa yaugĩĩte jegie mantũ jau, nĩjaarigicaga antũ mono. Amwe na bũu sayansi ya kĩnandĩ nĩrikithĩtie atĩ jarĩa Bibiria yuugĩte, nĩ jamma. Rĩonthe nĩ jakwĩrĩgĩĩrĩka, nandĩ na “kenya na kenya.”—Zaburi 111:8.
3. Nĩkĩ tũbuĩri gwĩtĩkia jarĩa Bibiria yuugĩte jegie ĩgiita rĩĩjĩte?
Bibiria ĩrĩ na ũroria * bũrĩa bwaragĩĩria “mantu jaria jatathithua.” (Isaya 46:10) Nĩyeranĩrĩte mantũ jamaingĩ mbere ya jakarĩka ĩtĩgwatia. Kinya nĩĩtaarĩrĩtie mantũ maniini-maniini jarĩa jagũkarĩka nthĩgũrũne naarua. Kĩthoomone gĩkĩ, tũgacũnkũũna moororia jamwe ja Bibiria. Nĩ joojũrĩte na njĩra ya kũrigaria!
ĨNJA NKŨRŨKI
Iritane ũrĩa sayansi ya kĩnandĩ ĩgwatanagĩra na Bibiria, na ũcũnkũũne jamwe ja moororia ja Bibiria jarĩa jagũkucĩĩria.
4. Sayansi nĩ ĩgwatanagĩra na Bibiria
Karaaja, antũ babaingĩ ibetĩkĩĩtie atĩ nthĩgũrũ ka yaakarĩrĩte gĩntũ. Tega VIDIO.
Ona ũrĩa iuku rĩa Ayubu rĩaugĩĩte gĩntũ ta mĩaka 3,500 mĩthiru. Thooma Ayubu 26:7, rĩu bwarĩĩrie kĩũria gĩkĩ:
-
Nĩkĩ biugo atĩ nthĩgũru “icuuritue iguru riritheri” nĩ bia kũrigaria?
Nĩ mwanka mĩakene ya 1800, nĩrĩo mũthiũrũũko jwa rũũjĩ nthĩgũrũne jwombĩre kũmenyekana bwega. Amwe na bũu, ona ũrĩa Bibiria yaugĩte mĩaka ngiri inyiingĩ mĩthiru. Thooma Ayubu 36:27, 28, rĩu bwarĩĩrie biũria bibi:
-
Nimbi ĩgũgũkucĩĩria bwegie ũrĩa Bibiria ĩtaarĩrĩĩtie na njĩra ĩmpũthũ mũthiũrũũko jwa rũũjĩ?
-
Rĩ, Maandĩko jau wathooma nĩ jagwĩkĩra wĩtĩkio bwaku inya kĩrĩ Bibiria?
5. Bibiria nĩyaaroretie mantũ ja gĩtũmi
Thooma Isaya 44:27–45:2, rĩu bwarĩĩrie kĩũria gĩkĩ:
-
Nĩ mantũ jamaniini jarĩkũ Bibiria yaaroretie mĩaka 200 mbere ya kwĩnyangua kwa Babiloni?
Bibiria nĩĩrikithagia atĩ Mũnene Kurusu wa Ũajemi na mbũũtũ yaawe nĩbaaciindĩre Babiloni mwakene jwa 539 M.M.J. * Baagarũrĩre mũuro jũrĩa jwakaragia muciĩ jũu. Nyuma ya gũtonya mũciĩ jũu bakũrũkĩĩrĩre mpingĩro irĩa ciarugũri, barajũgwata batĩrũĩte. Naarua kũrĩ nkũrũki ya mĩaka 2,500 nyumene, Babiloni nĩ magaanjo. Nandĩ, cũnkũũna ũrĩa Bibiria yaaroretie.
Thooma Isaya 13:19, 20, rĩu bwarĩĩrie kĩũria gĩkĩ:
-
Nĩatĩa ũroria bũbũ bwojũrĩrue?
Magaanjo ja Babiloni naarĩa Iraki ntukũne cietũ
6. Bibiria nĩyaaroreetie mantũ jarĩa tũkwona ntukũne cietũ
Bibiria ĩtwĩraga tũrĩ “matukune ja muthiro.” (2 Timotheo 3:1) Ona ũrĩa Bibiria yaaroretie bwegie ntukũ cia mũthiro.
Thooma Mathayo 24:6, 7, rĩu bwarĩĩrie kĩũria gĩkĩ:
-
Nĩatĩa Bibiria yaatarĩrĩĩtie ũrĩa mantũ jarĩngĩ kwĩthĩrwa jakari ntukũne cia mũthiro?
Thooma 2 Timotheo 3:1-5, rĩu bwarĩĩrie bĩũria bibi:
-
Nĩatĩa Bibiria yaatarĩrĩĩtie mĩkarie ya antũ babaingĩ ntukũne cia mũthiro?
-
Kĩrĩ mantũ jaja nĩ bũrĩkũ ũcionerete?
ANTŨ BAMWE BAUGAGA: “Bibiria nĩ iuku rĩa ngono cia ũrongo na mantũ ja kũthũgaanĩrua.”
-
Kũringana naagwe, nĩmbi ĩgũkũrikithĩria nkũrũki atĩ no twĩtĩkie Bibiria?
NA NJĨRA ĨNKUĨ
Historia, sayansi, na ũroria bionthe birikithagia atĩ no wĩtĩkie Bibiria.
Gũcookera
-
Bibiria rĩ, nĩ iuku rĩa mantũ ja mma kana nĩ jakũthũgaanĩrua?
-
Nĩ mantũne jarĩkũ Bibiria ĩgwatanagĩra na sayansi?
-
Ũrĩthũgaania Bibiria nĩĩroragia mantũ já kagiita kejĩte? Nĩkĩ ũgwĩtĩkia, kana nĩkĩ ũtĩgwĩtĩkia?
CŨNKŨŨNA
Kũrĩ o Bibiria ĩatĩĩtie bwegie mantũ ja sayansi?
“Sayansi rĩ, Nĩĩgwatanagĩra na Bibiria?” (Thooma intanetine)
Kũrĩ na ũrikithia bũrĩkũ atĩ tũrĩ “ntukune cia muthiro”?
“Mambo 6 Yaliyotabiriwa Katika Biblia Yanayotimia Sasa” (Mnara wa Mlinzi, Mei 1, 2011)
Iritane ũrĩa ũroria bwa Bibiria bwegie Wathani bwa Ũgiriki bwojũrĩre.
Iritane ũrĩa ũroria bwa Bibiria bwatethererie muntũ mũrũme ũmwe kwĩthĩrwa na mwonere jũmwega jwegie Bibiria.
