KĨTHOOMO KĨA 57
Nĩ Matagaaria Jarĩkũ Ũbuĩrĩte Kũjũkia Ũkeja Kũthithia Wĩyia Bũũrito?
Kinya ũkeja kwĩthĩrwa wendete Jehova mono na ũkeja kwĩthĩrwa ũgĩciũmagia mono ũtĩkathithie ũntũ bũrĩa bũũmba kũmwigithia bũũthũũku, magiita jamwe ũkamwatĩria. Amwe na bũu meyia jamwe nĩ jamarito nkũrũki ya jangĩ. (1 Akorintho 6:9, 10) Ũkeja kũthithia wĩyia bũũrito, riikana atĩ Jehova atĩratiga gũkwenda; arĩna wendi bwa gũkũrekera na gũgũtethia
1. Nĩatĩa tũbuĩrĩte kũthithia nĩkenda Jehova atũrekera?
Barĩa bendete Jehova nĩbaigagua bũũthũũku mono rĩrĩa bamenya atĩ bakũthithia wĩyia bũũrito. Ĩndĩ nĩbaboragĩrua nĩ wĩrane bũrĩa Jehova aaere antũ baawe: “Kinya meeyia jenu jakeethirwa jari mwakanu, jakaa jameru o ta nkamia.” (Isaya 1:18) Tũkeja kwirira kuuma nkorone, Jehova agatũrekera buru. Nĩatĩa tũũmba kwirira? Nĩtwigagua bũũthũũku mono nkorone nĩ ũntũ bũrĩa tũthithĩtie, na tũgatigana nabu buru, na tũkerenca Jehova atũrekere. Rĩu, nĩtũciũmagia kũgarũra mathũgaanio jamathũũkũ kana mathithio jarĩa jaatũtongererie kũthithia wĩyia, na rĩu tũkageria gũtũũra kũringana na mawaatho ja Jehova jamatheru.—Thooma Isaya 55:6, 7.
2. Nĩatĩa Jehova atumagĩra akũrũ gũtũtethia rĩrĩa twathithia meyia?
Rĩrĩa twathithia meyia jamarito, Jehova atwĩraga ‘twite akuru’ ba kĩũthũrano. (Thooma Jakubu 5:14, 15.) Akũrũ barĩa beki nĩbendete Jehova na ngˈondu ciawe. Nĩbaritani ũrĩa bomba gũtũtethia gũcookia ngwatanĩro ĩnjega amwe na Jehova.—Agalatia 6:1.
Nĩatĩa akũrũ batũtethagia rĩrĩa twathithia wĩyia bũrĩto? Akũrũ baĩrĩ kana bathatũ bagatũtethia kũmenya naarĩa twatĩtie, bagĩtumagĩra ũtaaro bwa Bibiria. Kinya bagatwaa mendekethia na ũtaaro bũrĩa bũgũtwagĩra gũtũtethia nĩkenda tũtĩgatonye wĩyiene kaĩrĩ. Bomba gũtwĩkĩra mĩanka ya kwingia twanya tũnna kĩũthũranone kagiita gagakai mwanka ũcoore bwetũ na Jehova bũgĩte inya kaĩrĩ. Kenda bakaria kĩũthũrano gĩtĩkathũũkue nĩ muntũ ũrĩa wĩĩtie, akũrũ nĩbathũranaga muntũ ũrĩa ũthithĩtie wĩyia bũrĩto na ngwatanĩro ya kĩũthũrano, kethĩra atĩrairira kamma.
ĨNJA NKŨRŨKI
Iritane ũrĩa tũũmba kwonania nkaatho tontũ bwa ũrĩa Jehova atũtethagia rĩrĩa twathithia wĩyia bũũrito.
3. Kuumbũra meyia jeetũ nĩgũtũtethagia gũcookia ũcoore bwetũ amwe na Jehova
Wĩyia o bunthe bũrĩa tũthithagia nĩbwigithagia Jehova bũbũĩ, kwou nĩ kĩrĩwe tũbati kuumbũra. Thooma Zaburi 32:1-5, rĩu bwarĩĩrie kĩũria gĩkĩ:
-
Nĩkĩ bũrĩ ũntũ bwa gĩtũmi kuumbũra meyia jeetũ kĩrĩ Jehova antũa kũgeria kũjaitha?
Amwe na kuumbũra meyia jeetũ kĩrĩ Jehova, nĩtwigagua bũbwega rĩrĩa twacwaa ũtethio kuuma kĩrĩ akũrũ. Tega VIDIO, rĩu bwarĩĩrie kĩũria gĩkĩ kĩthingatĩte.
-
Kĩrĩ vidio, nĩatĩa akũrũ baatetherie Canon gũcookera Jehova kaĩrĩ?
Nĩtũbuĩrĩte kwaria mma na kwĩra akũrũ mantũ jonthe; barĩo nĩkenda batũtethia. Thooma Jakubu 5:16, rĩu bwarĩĩrie kĩũria gĩkĩ:
-
Nĩatĩa kwĩra akũrũ mantũ jonthe gũtũmaga bwĩthĩrwa bũrĩ bũbũũthũ gũtwaa ũtethio bũrĩa tũkũbatara?
Umbũra wĩyia bwaku, ĩĩra akũrũ ba kĩũthũrano ũmma, na wĩtĩkĩĩrie ũtethio bwa Jehova bwa wendo
4. Nĩatĩa kwathũrana mwĩyia na ngwatanĩro ya kĩũthũrano gũtethagia?
Muntũ ũrĩa ũthithĩte wĩyia bũũrito akeja kũrega kũthingata moritani ja Jehova, atĩĩta na mbere kũgwatanĩra na kĩũthũrano. Neka athũranagwa na ngwatanĩro ya kĩũthũrano, na kwou tũtĩũmba kũgwatanĩra nawe kana kinya kwaria nawe. Thooma 1 Akorintho 5:6, 11 na 2 Johana 9-11, rĩu bwarĩĩrie kĩũria gĩkĩ:
-
O ta ũrĩa mũthega jwimbithagia mũtu jwa kũthithia mũgate, nĩatĩa kũgwatanĩra na mwĩyia ũtĩkwenda kwirira kũũmba kũthũũkia kĩũthũrano?
Babaingĩ barĩa bethĩrĩtwe baathũrani na ngwatanĩro ya kĩũthũrano, nĩbacookete kĩũthũranone tontũ ĩkanũkia rĩrĩa baaei kinya kethĩra nĩrĩabaigithirie ũrũrũ, nĩrĩabatetherie gũcookerwa nĩ mathũgaanio. (Zaburi 141:5) Tega VIDIO, rĩu bwarĩĩrie kĩũria gĩkĩ kĩthingatĩte.
-
Kĩrĩ vidio ĩjĩ, nĩatĩa Sonja aagunĩkĩre arĩkwathũranwa na ngwatanĩro ya kĩũthũrano?
Nĩatĩa mũbango jwa kwathũrana mwĩyia na ngwatanĩro ya kĩũthũrano . . .
-
jwonanagia gĩtĩĩo kĩrĩ riĩtwa rĩa Jehova?
-
jwonanagia atĩ Jehova nĩwa ĩota na wendo?
5. Jehova natũrekagĩra rĩrĩa twairira
Jesũ naatumĩĩre ngerekano ya gũtũtetheeria kũmenya ũrĩa Jehova aigagua rĩrĩa muntũ airira. Thooma Luka 15:1-7, rĩu bwarĩĩrie kĩũria gĩkĩ:
-
Nĩatĩa ũntũ bũbũ bũgũkũritana bwegie Jehova?
Thooma Ezekieli 33:11, rĩu bwarĩĩrie kĩũria gĩkĩ:
-
Nĩ ũntũ bũrĩkũ bwa gĩtũmi tũbuĩrĩte kũthithia nĩkenda twonania atĩ nĩtwirirĩte kamma?
O ta mũrĩĩthi, Jehova namenyagĩĩra mono ngˈondu ciawe
ANTŨ BAMWE BAUGAGA: “Nĩngũkĩra ndeera akũrũ ba kĩũthũrano atĩ nĩnthithĩtie wĩyia, bambathũrana na ngwatanĩro ya kĩũthũrano.”
-
Nĩatĩa ũũmba kwĩra muntũ ũrĩa ũkwigua ũu?
NA NJĨRA ĨNKUĨ
Tũkeja kũthithia wĩyia bũũrito, tũkairira kuuma nkorone, na tũgatua tũtĩthithia mantũ jau kaĩrĩ, Jehova agatũrekera.
Gũcookera
-
Nĩkĩ bũrĩ ũntũ bũbwega kuumbũra meyia jeetũ kĩrĩ Jehova?
-
Nĩatĩa tũkũbatara kũthithia nĩkenda meyia jeetũ jarekerwa?
-
Kethĩra nĩtũthithĩtie wĩyia bũũrito, nĩkĩ tũbuĩrĩte gũcwaa ũtethio kuuma kĩrĩ akũrũ ba kĩũthũrano?
CŨNKŨŨNA
Ona ũrĩa muntũ mũrũme ũmwe aagunĩkĩre kuumania na kĩao kĩa Jehova kĩrĩa gĩtaarĩrĩĩtue kĩrĩ Isaya 1:18.
Nĩatĩa mũbango jwa kwathũrana mwĩyia na ngwatanĩro ya kĩũthũrano jũgunaga bonthe barĩa bakũringithua nĩ ũntũ bũu?
Iritane ũrĩa ũũmba gũtaarĩĩria muntũ ũtĩ Mũkũũjĩ wa Jehova, bwegie mũbango jwa kwathũrana muntũ na ngwatanĩro ya kĩũthũrano.
Kĩrĩ rũgono “Nĩndabataraga Gũcookera Jehova,” iritane ũrĩa muntũ mũrũme ũmwe ũrĩa watiganĩĩte na ũmma aigĩrue Jehova arĩũmũtetheeria gũcooka kĩrĩ ũmma kaĩrĩ.
“Bibiria Nĩgarũraga Ũtũũro” (Mnara wa Mlinzi, Ĩpurũ 1, 2012)
