KĨTHOOMO KĨA 47
Rĩ, Nwithuranĩrĩte Nĩkenda Ũbatithua?
Nũrĩĩkĩtie kwiritana mantũ jamaingĩ jegie Jehova gũkũrũkĩĩra wiritani bwaku bwa Bibiria. Kwombĩka nũthithitie mogarũrũku nĩkenda ũtumĩra jarĩa wiritanĩte. Amwe nou, kwombĩka kũrĩ na ũntũ bũgũkũrigĩĩria nĩkenda ũtĩkairite kĩrĩ Jehova na ũbatithua. Kĩthoomone gĩkĩ, tũkarĩĩria mantũ jamwe jarĩa jarigagĩĩria antũ batĩkabatithue na ũrĩa ũũmba kũjacinda.
1. Nĩ mantũ jang’ana ũbuĩrĩte kũmenya mbere ya kũbatithua?
Kenda ũbatithua, nũkũbatara kũmenya “mantu jaria jari ja mma.” (1 Timotheo 2:4) Kũu tĩkuuga no mwanka ũmenye macookio jonthe ja biũria bia Bibiria mbere ũbatithua. Kinya Akristũ barĩa babatithĩtue mĩaka ĩmingĩ, no betaga na mbere kwiritana. (Akolosai 1:9, 10) Ĩndĩ no mwanka ũciũkĩrwe nĩ moritani ja mũsingi ja Bibiria. Akũrũ ba kĩũthũrano bagagũtethia kũmenya kethĩra ũrĩna ũmenyo bwa kũng’ana.
2. Nĩ matagaaria jarĩkũ ũbuĩrĩte kũjũkia mbere ũbatithua?
Mbere ũbatithua, no mwanka ‘wirire na ugaruke.’ (Thooma Mathithio 3:19.) Kũu nĩkuuga kwigua bũũthũũku tontũ bwa meyia jarĩa wanathithia na kũromba Jehova akũrekeere. Kinya nũkũbatara kũregana buru na mĩĩtĩre ĩmĩthũũku, na gũtũũra kũringana na njĩra ĩrĩa ĩgwĩragia Jehova. Nkũrũkĩ, ũkambia kũgwata mbaru mantũ ja kĩũthũrano na njĩra ya gwĩta mĩcemanione ya kĩũthũrano, na kũgwata mbaru ũtungatĩri ũrĩ mũtũmĩĩria ũtĩrabatithua.
3. Nĩkĩ ũtĩbuĩrĩte kũrekeeria ũguaa bũkũrigĩĩria?
Antũ bamwe nĩbakĩraga baremwa kwingia wĩrane bũrĩa beekĩre kĩrĩ Jehova. Nĩ mma, magiita jamwe ũkathithia maatia, o ta ũrĩa antũ arũme na antũ aka etĩkua barĩa bagweti Bibiriene baathithĩrie. Ĩndĩ Jehova atĩĩrĩgagĩĩra athathayia baawe bethĩrwa barĩ baboojũru. (Thooma Zaburi 103:13, 14.) Nagwĩragua rĩrĩa wathithia jonthe jarĩa ũkũũmba! Agagũtethia kĩnya gwe. Kamma, Jehova natũrikithagĩria atĩ, gũtĩ ũntũ ‘bumbikia gutwathurana na wendani bwawe.’—Thooma Aroma 8:38, 39.
ĨNJA NKŨRŨKI
Ona ũrĩa ũũmba gũcinda ũntũ kĩnya bũrĩkũ bũrĩa bũũmba gũkũrigĩĩria ũtĩkabatithue, gũkũrũkĩĩra kũmenya Jehova bwega na gwĩtĩkĩĩria ũtethio bwawe.
4. Menya Jehova bwega nkũrũki
Nĩ ũmenyo bũng’ana ũkũbatara kwĩthĩrwa nabu bwegie Jehova mbere ya ũbatithua? Nũkũbatara kwĩthĩrwa na ũmenyo bũrĩa bũgagũtethia ũmwenda na wenda kũmũgwĩria. Tega VIDIO nĩkenda wona ũrĩa antũ arũme na antũ aka nthĩgũrũne yonthe, barĩa bethĩrĩtwe bakiiritana Bibiria bombĩte kũthithia ũu. Rĩu bwarĩĩrie kĩũria gĩkĩ kĩthingatĩe.
-
Kĩrĩ vidio, nĩmbi biatetherie antũ bamwe kwithuranĩra nĩkenda babatithua?
Thooma Aroma 12:2, rĩu bwarĩĩrie biũria bibi:
-
Rĩ, kũrĩ ũntũ ũrĩna nkanja nabu bwegie jarĩa Bibiria ĩritanaga, kana kethĩra Akũũjĩ ba Jehova nĩbaritanaga ũmma?
-
Kethĩra nĩu, nĩatĩa ũũmba kũthithia bwegie ũntũ bũu?
5. Cinda mantũ jarĩa joomba gũkũrigĩĩria ũtĩkabatithue
Rĩrĩa twathuura kwirita kĩrĩ Jehova na kũbathithua, twinthe nĩtũtirimanaga na mantũ jamoomũ. Kenda wona ngerekano, tega VIDIO, rĩu bwarĩĩrie biũria bibi bithingatĩte.
-
Kĩrĩ vidio, nĩ irigĩĩria bĩrĩkũ Narangerel aabataraga gũcinda nĩkenda atumĩkĩra Jehova?
-
Nĩatĩa wendo bwawe kĩrĩ Jehova bwamũtetherie gũcinda irigĩĩria biu?
Thooma Njuno 29:25 na 2 Timotheo 1:7, rĩu bwarĩĩrie kĩũria gĩkĩ:
-
Nĩmbi bĩtwejaga ũcamba bwa gũcinda irigĩĩria?
6. Ĩrĩgĩĩra Ũtethio bwa Jehova
Jehova agagũtethia nĩkenda ũmũgwĩria. Tega VIDIO, rĩu bwarĩĩrie biũria bibi bithingatĩte.
-
Kĩrĩ vidio, nĩmbi biatũmĩre mũritwa ũjũ wa Bibiria atĩkajũkie ĩtagaaria o rĩo rĩa kũbatithua?
-
Nĩmbi airitanĩre biramũtethia gwĩkĩra inya wĩrĩgĩĩro bwawe kĩrĩ Jehova?
Thooma Isaya 41:10, 13, rĩu bwarĩĩrie kĩũria gĩkĩ:
-
Nĩkĩ ũũmba kwĩthĩrwa na mma atĩ womba kũũjũria wĩrane bũrĩa wĩkaga rĩrĩai wairita kĩrĩ Jehova?
7. Onania nkaatho nkũrũki tontũ bwa wendo bũrĩa Jehova akwonetie
O ũrĩa ũgeta na mbere kũthũgaanĩria nkũrũki ũrĩa Jehova akwendete, nou ũkethĩrwa na nkaatho nkũrũki, na wende ũmũtumĩkĩra kenya na kenya. Thooma Zaburi 40:5, rĩu bwarĩĩrie kĩũria gĩkĩ:
-
Nĩ itharimo birĩkũ Jehova akwete birĩa mono mono ũgwĩragĩrua?
Kĩroria Jeremia neendete Jehova na Rũteto rwawe, na kinya naarĩ na nkaatho mono tontũ bwa wendeeri bwa gwĩtanĩrua na riĩtwa rĩa Jehova. Augĩre: “Nteto ciaku iraa nkeru o na kugwirua gwa nkoro yakwa, amu mbitagwa na riitwa riaku, igwe Murungu wa njuuri.” (Jeremia 15:16) Cookia biũria bibi:
-
Nĩkĩ bũrĩ wendeeri bwa mwanya kwĩthĩrwa ũrĩ ũmwe wa Akũũjũ ba Jehova?
-
Rĩ, nũkwenda kũbatithua ũrĩ ũmwe wa Akũũjĩ ba Jehova?
-
Rĩ, kũrĩ ũntũ kĩnya bũrĩkũ bũgũkũrigĩĩria ũtĩkabatithue?
-
Ũrĩthũgaania nĩatĩa ũkũbatara kũthithia nĩkenda ũkinyĩra mworoto jwa kũbatithua?
ANTŨ BAMWE BAUGAGA: “Nĩngũkĩra ndemwa kũũjũria mantũ jonthe jarĩa ndaciĩtĩrie nkathithia mbere mbatithua.”
-
Kwombĩka ũu nĩu ũkwigua?
NA NJĨRA ĨNKUĨ
Ũrĩna ũtethio bwa Jehova, womba gũcinda mantũ jonthe jarĩa joomba gũkũrigĩĩria ũtĩkabatithue.
Gũcookera
-
Nĩ ũmenyo bũng’ana bwa Bibiria ũkũbatara kwĩthĩrwa nabu nĩkenda ũbatithua?
-
Nĩ mogarũrũku jarĩkũ ũũmba kũbatara kũthithia mbere ya ũbatithua?
-
Nĩkĩ ũtĩbuĩrĩte kũrekeeria uguaa bũkũrigĩĩria kũbatithua?
CŨNKŨŨNA
Cũnkũũna nĩmbi bibuĩrĩte kwĩthĩrwa birĩ mũsingĩ jwaku jwa gũtũma wenda kũbatithua.
“Rĩ, Nwithuranĩrĩte Nĩkenda Ũbatithua?” (Mnara wa Mlinzi, Machi 2020)
Iritane ũrĩa ũũmba gũcinda mantũ manna jamoomũ jarĩa joomba gũkũrigĩĩria ũtĩkabatithue.
“Nĩmbi Bikũndigĩĩria Ntĩkabatithue?” (Mnara wa Mlinzi, Machi 2019)
Iritane ũrĩa muntũ mũrũme ũmwe oombĩre gũcinda mantũ manna jamarito nĩkenda abatithua.
Mberene, muntũ mũrũme ũgwĩtwa Ataa naaremagwa kũjũkia ĩtagaaria rĩa kũbatithua. Ona nĩmbi biamũtetherie nĩkenda ajũkia ĩtagaaria rĩu rĩa gĩtũmi.
