Ũthũgaania: Tim agĩcethaga na acoore baawe, akaringa mũbira na jũkooraga kĩoni kĩa ngaarĩ ya mũtũũri.

Ũrĩngĩĩthĩrwa nĩgwe Tim, ũrĩngĩthithia atĩa?

WĨNA MANTŨ JATHATŨ JA KŨTHITHIA:

1. Ũmatũke.

2. Uuge nĩ ũngĩ watũma.

3. Wĩre mũtũũri kĩrĩa gĩkarĩkĩre, na wiritĩre kũrĩya ngarama.

No wigue ũkĩenda gũtaara ũntũ bwa mbere. Ĩndĩ rĩonthe kũrĩ itũmi bibiega bia gwĩtĩkĩĩria maatia jaaku—kinya jethĩrwa jegie kũũraga kĩoni kĩa ngaarĩ, kana ũntũ bũngĩ.

1. Nĩbu ũntũ bũrĩa bwagĩrĩte.

   Bibiria yugaga: “Twendaga gutuura turi na miitire imithongi mantune jonthe.”​—Ahibirania 13:18.

2. Antũ nĩ bonaga kũũthi nkũrũki kũrekera barĩa betĩkagĩĩria maatia jaao.

   Bibiria yugaga: “Uria withaga irema riawe atikatharimwa, indi uria uumburaga meeyia jawe na kujatiga akaigigiirua kiao.”—Njuno 28:13.

3. Bwa gĩtũmi nkũrũki, nĩbũgwĩragia Mũrungu.

   Bibiria yugaga: “Mumaramari nathuuragwa ni Mwathani, indi witho bwawe bugwurairwa baria baagirite.”—Njuno 3:32.

Karina mwarĩ wa mĩaka 20, aagererie kwitha riciti ya baini ya kũũgĩyia ngaarĩ, kenda ĩthe atĩkoone. Ĩndĩ atĩngĩũmba kũmiitha buru. Karina ariuga: “Nyuma ya mwaka jũmwe, baaba noonere riciti ĩu ĩrĩ na riĩtwa rĩakwa. Nĩndatonyere thĩĩnene ĩnene!”

Kĩthoomo? Karina ariuga: “Kwitha maatia ga kwimbagia mantũ. No jagakũthingata nyumene!”

Bibiria yugaga: “Itugiitaragua ni mantu jamaingi.” (Jakubu 3:2) Na ta ũrĩa twona, gwĩtĩkĩĩria maatia jaaku o rĩo, nĩ ũntũ bũkwonania kwinyiiyia na ũgimaru.

Ĩtagaaria rĩa jaĩrĩ nĩ kwiritana kuumania na maatia jaaku. Mwarĩ ũgwĩtwa Vera ariuga: “Ngeragia kwona o ĩatia ta njĩra ya kwiritana, na nkareka rĩaa kĩthoomo kĩrĩa gĩganteethia kwaa muntũ ũmwega, na kũthithia mantũ na njĩra ya mwanya rĩu rĩngĩ.” Gatwone ũrĩa ũũmba kũthithia ũu.

Ũkũromba baaboku bikibiki na wamĩthũũkia. Nĩatĩa ũkathithia?

• Ũkire na wĩrĩgĩĩre baaboku atĩmenya.

• Wĩre baaboku bũrĩa bungwa gũkarĩkĩre.

• Wĩre baaboku ũrĩa gũkarĩre, ĩndĩ uuge nĩ muntũ ũngĩ ũtũmĩre.

Ũkũgwa kĩgerio nĩũntũ ũtakĩthomeere. Nĩatĩa ũkathithia?

• Uuge nĩ kĩgerio kĩroomi.

• Wĩtĩkĩĩrie nĩ gwengwa ũratũmĩre ũgwaa kĩgerio.

• Uuge mwarimũ ka agũkwoneera.

 Nandĩ thũgaanĩria mantũ jau, na wijũkie ũrĩ (1) baaboku na (2) mwarimũ waaku. Kethĩra nĩ wetĩkĩrĩĩrie maatia jaaku, ũrĩona baaboku na mwarimũ waaku barĩngĩkũjũkia atĩa? Ũrĩngĩitha maatia jaaku-rĩ, barĩngĩkwona atĩa?

Nandĩ thũgaanĩria ĩatia rĩrĩa wathithĩrie mwaka mũthiru na ũcookie biũria bibi.

Ĩatia rĩarĩ rĩrĩkũ? Nĩatĩa waathithĩrie?

• Gũtĩwe ndeera.

• Ndaigwatĩrie muntũ ũngĩ.

• Ndetĩkĩrĩĩrie o rĩo.

Kethĩra ũtetĩkĩrĩĩrie ĩatia rĩaku, waigĩrue atĩa nyumene?

• Bwega—gũtĩwe wamenyere!

• Nĩ ndacumbũkĩre—kaaba ndĩrĩngĩaria ũmma.

Kwĩ-u ũrĩngĩthithia bwega nkũrũki?

Ĩatia rĩaku rĩakũritanĩre atĩa?

Nĩkĩ bamwe batĩĩtĩkagĩĩria maatia jaao?

Antũ bagakũjukia atĩa kethĩra rĩonthe ũgeragia kwitha maatia jaaku, ĩndĩ kethĩra nwĩtĩkagĩĩria maatia jaaku nĩatĩa bagakũjukia?—Luka 16:10.