KĨŨRIA KĨA 7
Nthithie Atĩa Rĩrĩa Ngwatĩkwa Menyana Kĩmwĩrĩ?
NĨATĨA ŨŨGWE ŨŨMBA KŨTHITHIA?
Ũthũgaania: Ndeene ya mĩeri ĩĩrĩ akĩ, Heather nethĩrĩtwe arĩ na ũcoore na Mike, ĩndĩ ariigua teka amũmenyete ĩgiita rĩraaja mono. Batũmanagĩra ntũmwa inkuĩ rĩonthe, bakaaria mathaa jamaingĩ thimũne, kinya ũmwe no athirĩkĩĩrie ũrĩa ũngĩ akwenda kuuga! Ĩndĩ nandĩ Mike nakwenda bũngĩ nkũrũki ya kwaranĩria.
Mĩeri ĩĩrĩ ĩkũrũkĩte, Mike na Heather beethĩrĩtwe bakĩgwatana njara na gũcũncana bũũkai. Heather atĩkwenda gũkũrũkithia au. Ĩndĩ atĩkwenda batigana na Mike. Gũtĩ ũngĩ ũtũmaga Heather aigua athoongi na arĩ wa bata. Na tĩ ũu akĩ, Heather arĩciĩra, ‘Nĩtwendene na Mike . . . ’
Mĩaka yaaku ĩkethĩrwa ĩng’ani kwĩthĩrwa ũrĩ na ũcoore na mũthaka, ũrĩngĩthithia atĩa nyuma ya au ũrĩngĩĩthĩrwa nĩgwe Heather?
AMBA ŨTHŨGAANIE!
Kũmenyana kĩmwĩrĩ nĩ kĩewa kuuma kĩrĩ Mũrungu, kĩa barĩa akĩ bagũrene. Kũthithia ũu bũtĩgũrene, nĩ kwĩnyangia kĩewa kĩu. Nĩ ta kũjũkia nguũ ĩnthongi waaei, na kũmĩethia gĩtame gĩa kwangũra nyomba
Ũkeeja kuuna waatho bwa mantũ ja wĩthĩre ta kũthũngũtha kuuma kĩbariine ĩgũrũ, ũkoona maumĩĩra jamathũũku. No u gũgakara wauna waatho bwegie mĩtugo, ta bũrĩa buugaga: “Bwathukanage na uthungiiri.”—1 Athesalonike 4:3.
Maumĩĩra ja kuuna waatho bũu nĩ jarĩkũ? Bibiria yugaga: “Muntu uria uthungagiira ni mwiri jwawe jungwa eeagia.” (1 Akorintho 6:18) Nĩatĩa bũu bũrĩ mma?
Acũnkũũni nĩbamenyete atĩ antũ babaingĩ babeethĩ barĩa bamenyanĩte kĩmwĩrĩ batĩgũranĩte, nĩbacionerete ũntũ bũmwe kana nkũrũki kĩrĩ jaja.
-
GŨCUMBŨKA. Antũ babaingĩ babeethĩ barĩa bamenyanĩte kĩmwĩrĩ mbere ya kũgũrana, baugaga kaaba batĩngĩthithia u.
-
KWAGA GWĨTĨKANIA. Nyuma ya kũmenyana kĩmwĩrĩ, o ũmwe ambagĩĩria gũciũria, ‘Nũũ ũngĩ aamenyana kĩmwĩrĩ nawe?’
-
KUUNĨKA NKORO. Aarĩ babaingĩ nĩbaigagua bakĩenda mũntũ ũrĩa ũkabamenyeera, na tĩ kũbatumĩra. Ataana babaingĩ batĩkucagĩĩrua ta au mbere, nĩ mwarĩ ũrĩa wetĩkĩĩria kũmaama nabo batĩgũrene.
-
Bwa gĩtũmi buru: Wetĩkĩĩria kũmenyana kĩmwĩrĩ mbere ya mũranũ, neka ũgũciagĩra gĩtũmi na njĩra ya kwĩnyangia gĩntũ kĩa bata. (Aroma 1:24) Mwĩrĩ jwaku nĩ jwa bata mono, ũkoroenda kũjwĩnyangia!
Onania wĩna mĩĩtĩre ĩmĩriku bwa kũng’ana ‘kwathukanaga na uthungiiri.’ (1 Athesalonike 4:3) Rĩu, kethĩra ũkagũrana kana ũgũrwe, nĩrĩo ũkamenyana kĩmwĩrĩ. Na ũkoomba kũgwĩrĩrua buru ũntũ bũu ũtĩgũcumbũka, kwirira, kana ũgwatwa nĩ imwe cia thĩĩna irĩa ciumanagia na kũmenyana kĩmwĩrĩ mbere ya mũranũ.—Njuno 7:22, 23; 1 Akorintho 7:3.
ŨRĨONA ATĨA?
-
Muntũ ũkwendete kamma-rĩ, no agwikie ũgwatine, na enda wigua bũthũũku?
-
Muntũ ũgũkũmakĩra kamma-rĩ, no akũgerie ũthũũkia ngwatanĩro yaaku na Mũrungu?—Ahibirania 13:4.
