Isaya 34:1-17
34 Eni baka-mafuti, shweneni muyehi mangana muzibe,Tolilileni mwamubwa, eni miyati ya banu.
Lifuti-libu na byoshe byashulaho bitolilile,Lifuti na byoshe byakalamo bitolilile.
2 Mwafwa butenu bwa Yehova bunepukila baka-mafuti boshe,Co nalubalela maswalale babo boshe.
Abanyongesa,Abatsiya.
3 Banu babo baje banatsi bakabombila kuti,Cuku ca bibimbi byabo cikakakumukila mwilu,Minkinda ikasosonyoka mwafwa ya maninga abo.
4 Maswalale ba mu melu boshe bakabola,Co melu bakawazenga ngwe libulu lya kuzenga.
Maswalale babo boshe bakajujwamaNgwe liputa lya kujujwama lije liwa ku muti wa binyuNa bushuka bwa mukuyu bwa kwikwiya buje buwa ku muti wa mukuyu.
5 “Mwafwa mukwale wange ujabama mu maninga mu melu.
Usikumukila hali Edomu kwa kumusompa,Usikumukila ha banu banjinayongola kunyongesa.
6 Yehova ali na mukwale, ukajabama mu maninga.
Ukajabama mu mazi,Na maninga a bana ba bimanga ba nkomba na bimembe,Na mazi a ku binso bya bimanga ba nkomba.
Mwafwa Yehova ali na mulambu mu Bozila,Atsiya banu babangi mu lifuti lya Edomu.
7 Bingombe ba nkomba ba mu shwata bakatsila hamo nabo,Bana ba bingombe ba nkomba bakatsila hamo na baje bali na nzili.
Lifuti lyabo likajabama mu maninga,Co likungu lyabo likajabama mu mazi.”
8 Mwafwa Yehova naka litangwa lya kulinga shambandinga,Naka mwaka wa kwana kashitiko baje banalingile mwamubi Siyone.
9 Bana ba bindonga bayo* bakatenguluka kupwa tala,Likungu lyayo likapwa saufa,Co libu lyayo likapwa ngwe tala ije ili na kwenya.
10 Otu tuhya kutukazimi mutanya nameme butsiki,Bwisi bwatwo butwalelelaho kukakama myaka yoshe.
Itwalelelaho kupwa ngundu kutunda ku cisemwa cimo kuya ku cisemwa cikwabo.
Naumo wahi akaitamo myaka yoshe.
11 Limbondo na ciningi bakakalamo,Co binkungulu na makololo nabo bakakalamo.
Njambi akaiseteka na mukole wa kusetekesaKulumbununa ngwabo ikasala mupulungwa na kupwa ngundu.
12 Naumo wahi ku banu bayo ba bulemu ibakapwisa mwene,Co bamyata bayo bakapwa bangoco.
13 Mingonga ikamena ha tuposhi twayo twa kukola,Biputa bya mambimbo na tunjata bikamena mu myela yayo ya kukola.
Ikapwa mwela wa kubutama bimbanje,Ikapwa cipatanga ca banyamalanda.
14 Tusitu ba mu mambo bakaliwana na tusitu baje bakolula,Co bimembe ba mu shwata bakasana bakwabo.
Eyo, byambamba bakakalamo na kuwanamo mwela wa kuhwimina.
15 Manyoka ba lumbisi bakatungilamo mashwa na kumbililamo mayaki,Co bakawatetula na kunyungilila bana babo.
Eyo, biselele bakalikungulwilamo, babali-babali, ndemba na cali, ndemba na cali.
16 Tondeseseni mu libulu lya Yehova na kulitanda mu kutambeka.
Naumo wahi akajeneka kukalako,Kukwesi ndemba akajeneka cali, co kukwesi cali akajeneka ndemba,Mwafwa kanwa ka Yehova kakeko kanana eli lishiko,Co sipilitu yendi ikeyo inabakungulwila hamo.
17 Ikeye nabatela ñela,Co liboko lyendi likelyo linapeselesa mwela wabo wanabana.
Ukapwa wabo myaka yoshe,Bakakalamo ku bisemwa byoshe.
Majwi a kwinikila
^ Cisholoka kulumbununa Bozila, nganda ya Edomu.
