“Bʼꞹma ma gi ñuge ne Biblia ixki nrrijeme. Ma dya gi pa̱ra̱ ja rgi xørꞹ” nge kʼo mama dʼa trʼii ke ni chju̱u̱ Will.

 ¿Gi nee ri pa̱ra̱ ja rgi maja ma ri xørꞹ ne Biblia?. Ne skuama ra mbøxkʼꞹ.

•  Kjijñige ja ga kjaa yo gi xørge

•  Xe ri jyodʼꞹge yo jñaa

•  Nujyo mama yo dyaja trʼii

 Kjijñige ja ga kjaa yo na xørge, søø ri tsjage yo mamaba:

1.   Juajnꞹge pje ri xørꞹ kja ne Biblia. Søø ra ngeje kʼo o kjogꞹ o kʼo mama dʼa Evangelio o yo søø ri dyⱥrⱥ yo ya i bʼꞹbʼꞹ kja jw.org.

2.   Xørge yo i juajnꞹ. Søø ri xørꞹtsjɇge o ko nu jin pjamilia o yo jobi. Dʼaja søø ra nⱥdʼⱥ yo na kjogꞹ, yo dyaja søø ra xørꞹji yo mama yo dyaja ntee.

3.   Ma gi nee søø ri tsjage yo mamaba:

   •   Dyⱥtrʼkʼe dʼa dibujo o pje nrre ma dibujo kʼꞹ søø ra mbezhe ja gua kjogꞹyo. Jñusʼꞹge na jñaa kʼꞹ ra mama ja ba tsʼaa yo o kjogꞹ.

   •   Dyⱥtrʼⱥge dʼa esquema (jñusʼꞹge janzitrjo jñaa kʼꞹ na mubi ko dʼa dibujo). Nzakja ma ri xørge ja ba tsjaa dʼa ntee kʼe na joo ba dyⱥtʼⱥ e Mizhokjimi søø ri jñu̱sʼꞹ ja ma kjaa, ja ma ngeje ñe ja ba intsjimi e Yose.

   •   Pezhegedyayo ja ba tsʼaa. Ñuu ja nrre rgi tsjapꞹ. Søø ri mamage ja ba zøyo ñe tsjapꞹ trʼonꞹ yo ntee yo jo nuji ja ba kjogꞹ.

   •   Ma dʼaja kʼꞹ mi bʼꞹbʼꞹnu o tsjaa kʼo na sʼoo, kjijñigedya ke nʼaño rga nguarꞹ. Nzakja, kjijñi ja ba tsjaa e Pedro kʼꞹ go ngⱥdʼⱥ ke mi pa̱ra̱ e Jesús (Marcos 14:66-​72). ¿Ja rba nrrꞹrꞹ e Pegro ma o xipjiji ke angeze mi pa̱ra̱ e Jesús?

   •   Ma gi nee ri pezhge ja rgi tsjijñige ke o kjogꞹ na relato kʼo mama nu biblia, søø ri jñusʼꞹge, xo ri dyopjꞹ kʼo bi pjechige. (Romanos 15:4).

 Ma ri ñuge nrrexe yo kjogꞹ kja na relato søø ri chøtrʼkʼe yo perlas kʼo dya jñetse. Bʼꞹma, naja o yeje jñaa jitsʼkøji kʼo me na mubi.

 Søø ri jyɇtsʼpi kʼo mama kja Mateo 28:7 ñe Marcos 16:7.

•    ¿Pjenkja e Marcos o mama ke e Jesús nrrajme ro søø ro jñanrra yo discípulos “xo [...] e Pegro”?

•  Kʼo ra mbøxkʼꞹ: E Marcos dya o bʼꞹbʼꞹnu, mantrʼkje ngeje e Pegro kʼꞹ go mbechpe.

•  Jñaa kʼꞹ na mubi: ¿Pjenkja e Pegro go zøø na joo ma o mba̱ra̱ ke e Jesús nrro mi nee ro jñanrratrjo? (Marcos 14:66-​72). ¿Ja ba jichi e Jesús e Pegro ke mi ngeje dʼa jobi kʼꞹ na kjuana? ¿Ja rgi søø ri xⱥpkʼe ja ma kjaa e Jesús ma gi nee ri pjezhge dʼa jobi kʼꞹ me na joo?

 Ma gi kjijñi ja ba kjogꞹ yo mama ne Biblia ñe xe ri jyodʼꞹ yo jñaa, nuʼma me ri mⱥjⱥ ma ri xørꞹ ne Biblia.