Ndeze mi jingua, e Jehová mi nee ke yo pjamilia ro jmurꞹji kja o ngumꞹji ngekʼua yo tata ro jichiji o pjamilia o jñaa Mizhokjimi, ga kjaba texeji ro sʼiyaji e Jehová (Deuteronomio 6:6, 7). Yo paa yo ri ka̱ra̱jidya, yo ri testigojme e Jehová xo ri kjagojme ga kjanu. Chjꞹma chjꞹma nzi dʼa pjamilia xørꞹ pje mama ne Biblia kja o ngumꞹ, yo tata pjøsʼꞹji o trʼii, xørꞹji skuama kʼo pjøsʼꞹ yo tata ñe yo nana. Yo ntee yo bʼꞹntsjɇji juajnꞹji na paa nu ngoʼo, xørꞹji ne Biblia.

Ga kjaba mba̱ra̱ji ja rga minji na joo ja ga nee Mizhokjimi. Ne Biblia mama ga kjaba: “Chɇzhgeji a jmii Mizhokjimi; angeze xo ra chɇzhi kja in jmigeji” (Santiago 4:8). Ma ra xørꞹji ne Biblia ra pa̱ra̱ji ja ga kjaa e Jehová ñe pje ra tsjaa axojñi. Ngekʼua ma ri jmurge kja in nzunge ko in pjamiliage søø ri xørꞹgeji ne Biblia, søø ri sido kʼo mama kʼe skuama kʼꞹ ni chju̱u̱ nu ja jitsʼkøji ja rga minji ñe ja rga pɇpiji Mizhokjimi. Nzi natsʼꞹji søø ri xørꞹji janzi versículo, kjanu ri tsjapꞹ trʼønꞹ in pjamiliage ngekʼua ra mamaji ja ga kjaa kʼo mama ne Biblia.

Ma ri xørꞹ ne Biblia ko in pjamilia ra ñetsʼe gi sʼiyage, xo angezeji ra sʼiyatsʼꞹ. Na joo ke yo tata ñe yo nana ra jichiji o trʼiji pje mama o Jñaa e Mizhokjimi, ga kjaba yo trʼii xo ra jyodʼꞹji o tata ñe o nana ra ñaji. Dya ra guɇnchʼiji o tsʼitrʼiji, me ra mⱥji rga jichiji, ga kjaba angezeji me xo ra mⱥji ma ra xørꞹji ne Biblia. Yo tata søø ra juajnꞹji tema kja yo xiskuama La Atalaya ñe ¡Despertad! o kja Internet kja jw.org. Ma yo pjamilia sʼiji tsʼitrʼi, yo tata søø ra jyodʼꞹji pje ra xørꞹji ngekʼua yo tsʼitrʼi ra pjechiji ja rga ndꞹrꞹji ma pje ra dyønꞹji kja kolejio. Na joo ma ra jñandaji kja Internet dʼa programa kja JW Broadcasting, søø ra ngichʼiji kja (tv.jw.org) ñe nudyakʼua ri søø ri ñaji pje bi meyaji. Xo søø ra to̱nji yo cántico kʼo ra to̱nji kja reunión. Yo tata søø ra jyodʼꞹji pje ra siji ma ra nguarꞹji ra xørꞹji yo skuama.

Chjꞹma chjꞹma, dya ri jyɇzi ri xørꞹge ne Biblia ko in pjamilia, ga kjanu jmanchʼa jmanchʼa angezeji ra jyodʼꞹji ra xørꞹji ne Biblia. Ma nutsʼkʼeji a gui juajnꞹji na paa nu ngoʼo kʼꞹ ri xørꞹji ne Biblia, ri dyøtꞹji e Jehová, angeze ra mbøxkʼꞹgeji ngekʼua chjꞹma chjꞹma ri tsjagejikʼo (Salmo 1:1-3).

• ¿Pjekja ri juajnꞹji na paa ke ra xørꞹji o Jñaa e Mizhokjimi ko texe in pjamilia?

• Yo tata, ¿ja rga jichiji o trʼiji ma ra xørꞹji ne Biblia ngekʼua me ra mⱥji?