1, 2. ¿Pje ma trʼønꞹ kjaa yo ntee?

YO TSʼITRʼI kjaji na punkjꞹ trʼønꞹ. Ma pje kʼo øngꞹji, ri trjꞹtꞹji kʼo nee ra mba̱ra̱ji, zø ga kjanu, angezeji xi øngꞹji: “¿Pjenga?”. Ri xipjiji pjenga kjogꞹ ga kjanu, pe angezeji xi øngꞹji: “¿Pe pjenga?”.

² Texezꞹji zø kja ri tsʼitrʼiji o ya na nozgøji, ri kjagøji na punkjꞹ trʼønꞹ, nzakja pje ra siji, pje ra jeji o pje kʼo ra tomꞹji. Xo bʼꞹbʼꞹ trʼønꞹ kʼo xenrra na mubi ke ri kjatsʼɇgøji, nzakja pjenga ri bʼꞹnkøjiba ñe pje ra kjogꞹ kʼo paa kʼo ra e̱je̱. Pe ma dya ri tøtrʼꞹji kʼo ri nee ra pa̱ra̱ji, po ra jɇziji ra jodʼꞹjikʼo.

3. ¿Pjenga na punkjꞹ ntee mbeñeji ke dya søø ra chøtrʼꞹji kʼo nee ra mba̱ra̱ji?

³ Po ri ønꞹji, ¿kjo søø ra tøtrʼꞹji kja ne Biblia yo ri nee ra pa̱ra̱ji? Bʼꞹbʼꞹ ntee ke manji ja̱a̱, pe xo manji ke texe kʼo mama ne Biblia me na sʼɇzhi ra tendioji. Kʼo ntekʼo, manji ke ngextrjo yo xøpꞹte ñe yo mbøkjimi søø ra mba̱ra̱ji yo mama ne Biblia. Xo bʼꞹnkʼo tseji ra tsjaji trʼønꞹ, ra manji kʼꞹ dya pa̱ra̱ji. Nutsʼkʼe, ¿pje gi mbeñe?

4, 5. ¿Pje ma trʼønꞹ kʼo na mubi ri kjatsʼɇgøji? ¿Pjenga na joo ri sido ri jyodʼꞹ kʼo gi nee ri pjechi?

⁴ Po i kjatsʼɇge trʼønꞹ nzakja: “¿Pjenga ri bʼꞹnkøjiba kja ne xoñijomꞹ? ¿Pje ra kjogꞹzgøji ma ra tu̱ji? ¿Ja ga kjaa Mizhokjimi?”. E Jesucristo go mama: “Sido ri dyøtkʼeji Mizhokjimi, ra dyakʼeji. Sido ri jyodʼꞹji Mizhokjimi, ri chøtkʼeji kʼꞹ ni jyonkʼeji. Sido ri matʼꞹji Mizhokjimi, ra dyⱥtkʼeji” (Mateo 7:7). Ngekʼua, dya ri jyɇzi ri jyodʼꞹ kʼo gi nee ri pa̱ra̱.

⁵ Ma sido ri jyodʼꞹ kʼo gi nee ri pa̱ra̱, ri chøtrʼꞹgekʼo kja ne Biblia (Proverbios 2:1-5). Yo ri xørꞹge kja ne Biblia  dya na sʼɇzhi ri meya. Kʼo ri pjechige ra mbøxkʼꞹ ri mⱥjⱥ rgi minkʼe yo padya ñe yo ba e̱je̱. Bʼꞹbʼꞹ na trʼønꞹ kʼꞹ me kjapꞹ ra søxi o mꞹbʼꞹ yo ntee, ra nujidya pje mama kja nu Biblia.

6. ¿Pjenga na punkjꞹ ntee mbeñeji ke e Mizhokjimi dya nezgøji?

⁶ Na punkjꞹ ntee mbeñeji ke e Mizhokjimi dya nezgøji. Manji ke ma ri sʼiyazꞹji, dya ro mimiji ga kjanu. Mbeñejikʼo nangeje janrraji ma potka chu̱ji yo país, yo ntee me ꞹmbꞹji o minteji ñe dya pje pɇsʼiji me juenji. Xo janrraji ke yo ntee me sødyeji, me supjreji ñe tu̱ji. Ngekʼua manji ma Mizhokjimi me nezgøji, ¿pjenga dya kjuatꞹ yo na sʼoo yo bʼꞹbʼꞹ kja ne xoñijomꞹ ngekʼua dya kja ra supjreji?

7. a) ¿Pje jizhi yo xøpꞹte kja yo religión? b) ¿Pjenga ri pa̱rgøji ke e Diosi dya kjaa yo na sʼoo yo na kjogꞹ kja ne xoñijomꞹ?

⁷ Yo ntee mbeñeji ke e Mizhokjimi dya nezgøji nange nge kʼo jizhi yo xøpꞹte kja yo religión. Ma kjogꞹji kʼo na sʼoo, kʼo xøpꞹte kja yo religión manji nge e Mizhokjimi kʼꞹ mi nee ga kjanu. Ma manjikʼo kjapꞹji ke yo ntee ra mbeñeji ke e Diosi kjapꞹ ra supjre yo ntee. Pe ne Biblia mama ke e Diosi dya penkegøji kʼo na sʼoo. Kja Santiago 1:13 mama ke e Mizhokjimi dya kjakꞹji kʼo na sʼoo, mama ga kjaba: “Ma kjo kʼo ra [mbeñe] ra tsjaa kʼo na sʼoo, dya ra mama ke nge Mizhokjimi kʼꞹ kjapꞹ ra tsjaa kʼo na sʼoo. Nangeje me na joo Mizhokjimi, dya kjo søø ra ñʼꞹnbꞹ o mꞹbʼꞹ Mizhokjimi ra tsjaa kʼo na sʼoo. Mizhokjimi dya xo ñʼꞹnbꞹ o mꞹbʼꞹ na ntee ra tsjaa kʼo na sʼoo”. Zø e Diosi dya kʼasʼꞹ yo na sʼoo yo na kjogꞹ, dya xo nge kʼꞹ kjakꞹji ra kjogꞹji nrrumꞹ (xørꞹ Job 34:10). * Ra nuji na ejemplo ngekʼo ra meyajiyo.

8, 9. ¿Pje ma ejemplo pjøxkꞹji ra pa̱ra̱ji kʼꞹ dya nge e Diosi kʼꞹ penkegøji yo nrrumꞹ?

 ⁸ Mbeñe yo mamaba. Na trʼii mi bʼꞹbʼꞹ kja o ngumꞹ o tata ñe o nana. Kʼe tata me mi nee kʼe trʼii, mi zopjꞹ ngekʼo ro mimi na joo. Pe kʼe trʼii dya go tsjapꞹ nguenrra o tata, dya kja mi nee ro mimi kja o ngumꞹ kjanu o mbedye go maa. Pe ma go bʼꞹbʼꞹ na je̱e̱ go tsjaa kʼo na sʼoo ngekʼo o kjogꞹ na punkjꞹ nrrumꞹ. Nutsʼkʼe ¿pje i mange? ¿Kjo nge o sʼokʼꞹ texe kʼo na sʼoo kʼꞹ o kjogꞹ kʼe trʼii? ¿Nge nu tata nange o jyɇzi ro mbedye kja o ngumꞹ? ¡Iyo! (Lucas 15:11-13). Nzakja kʼe tata, e Diosi dya kʼasʼꞹ yo ntee ma nee ra tsjaji kʼo na sʼoo, ngekʼo ma ra kjogꞹji nrrumꞹ dya ra jyombeñeji ke e Diosi dya nge kʼꞹ penkegøji yo na sʼoo. Dya na joo ra manji kʼꞹ nge e Mizhokjimi kʼꞹ kjaa kʼo na sʼoo.

⁹ Kʼo ro xørꞹji, kjakꞹji ra meyaji pjenga e Mizhokjimi dya bʼe kjuatꞹ yo na sʼoo. Kja nu xørꞹ 11 ri pjechi kʼo mama ne Biblia ja ga kjadyakʼo. Pe dya ri jyombeñe ke e Mizhokjimi me sʼiyazꞹji, angeze dya penkegøji yo nrrumꞹ kʼꞹ ri pɇsʼiji. Ngextrjo angeze søø ra jokꞹ yo nrrumꞹ yo na kjogꞹ kja texe nu xoñijomꞹ (Isaías 33:2).

10. ¿Pjenga ri pa̱rgøji ke e Mizhokjimi ra jokꞹ kʼo ya sʼodʼꞹ yo na sʼonte kja ne xoñijomꞹ?

¹⁰ Me santo e Diosi (Isaías 6:3). Nujyo nee ra mama kʼꞹ angeze me jyaxtjo, me na joo ñe me na zøø kʼo kjaa, dya mbeñe kʼo na sʼoo. Ngekʼo ri pa̱rgøji na joo ke ra tsjaa texe kʼo mama. Bʼꞹbʼꞹ paa ma ri kjaji yo na sʼoo, pe e Mizhokjimi dya nge nzakjazgøji. Dya kjo søø ra kjuatꞹ yo na sʼoo yo bʼꞹbʼꞹ kja ne xoñijomꞹ, ni yo manrro ke me na jonte søø ra tsjajikʼo. Pe e Diosi me na zɇzhi, søø ra tsjaa texe. Angeze nee ra jokꞹ texe kʼo ya sʼodʼꞹ yo na sʼonte, ixta kjuatꞹ na joo texe yo na sʼoo (xørꞹ Salmo 37:9). *

11. ¿Ja ga zøʼø e Diosi ma janrra ke ri supjreji?

¹¹ ¿Ja ga zøʼø e Diosi ma janrra yo na sʼoo yo na kjogꞹ kja ne xoñijomꞹ ñe ma janrra yo nrrumꞹ kʼꞹ gi pɇsʼige? Ne Biblia mama ke e Diosi me joo ga zøʼø ma kjogꞹ kʼo na joo (Salmo 37:28). Angeze nuu ma kjogꞹ kʼo na joo ñe ma kjogꞹ kʼo na sʼoo kja ne xoñijomꞹ. Me sichʼi kja o mꞹbʼꞹ ma yo ntee me supjreji. Mi jingua mi bʼꞹbʼꞹ na punkjꞹ kʼo ma sʼoo kja ne xoñijomꞹ, dya mi bʼꞹbʼꞹ kjo ro tsjaa kʼo ma joo, ngekʼo ma e Diosi o jñanrrakʼo, “me go zichʼi kja o mꞹbʼꞹ” (Génesis 6:5, 6). Yo padya e Diosi xo sichʼi kja o mꞹbʼꞹ ma janrra yo na sʼoo yo bʼꞹbʼꞹdya kja ne xoñijomꞹ (Malaquías 3:6). Ne Biblia mama ke e Diosi ixi na kjuana me nezgøji (xørꞹ 1 Pedro 5:7).

12, 13. a) ¿Pjenga ri sʼiyaji yo in minteji ñe ri pjøskøji ma supjreji? ¿Ja ga søgøji ma ri janrrgøji kʼꞹ me supjre yo ntee? b) ¿Pjenga ngextrjo e Diosi søø ra ngꞹsʼꞹ texe yo na sʼoo yo bʼꞹbʼꞹ kja ne xoñijomꞹ?

¹² Kja ne Biblia mama ke e Mizhokjimi o dyⱥkøji ja ga kjaa angeze (Génesis 1:26). Ngekʼua, kʼua ja ga zøʼø angeze xo ri søgøji ga kjanu ñe søø ra kjaji nzakja angeze. Ma nutsʼkʼe me ki sentio kja in mꞹbʼꞹ ma gi janrra ke me supjreji yo na jonte, xe nrra sentio kja o mꞹbʼꞹ Mizhokjimi ma janrrakʼo. ¿Pjenga ri mangøjikʼo?

¹³ Ne Biblia mama ga kjaba: “Mizhokjimi me sʼiyazꞹji ri texeji” (1 Juan 4:8). Texe kʼo kjaa e Mizhokjimi, kjaa nange me sʼiyazꞹji. Ri potka sʼiyaji nange e Mizhokjimi otrʼꞹ o sʼiyazgøji. Mbeñe yo mamaba: Ma ro søø ri tsjaa, ¿rgui tsjꞹsʼꞹ yo na sʼoo ñe rgui kjuatꞹ yo na sʼonte kʼo kjapꞹ ra supjre yo ntee? Ja̱a̱, nange me ki sʼiya yo ntee. E Diosi søø ra ngꞹsʼꞹ texe yo na sʼoo, ra tsjaa ga kjanu nange me na zɇzhi ñe me nezgøji. Ri pa̱rgøji ra zⱥdʼⱥ texe yo jñaa  kʼo mama e Jehová, nzakja kʼo mama ne xiskuama nu ja pjꞹrꞹ. Pe ma ri nee ra ejmegøji yo ra tsjaa e Mizhokjimi, otrʼꞹ ni jyodʼꞹ ra pa̱ra̱ji na joo kjo nge angeze.

14. ¿Pje ni chju̱u̱ e Diosi? ¿Ja ga pa̱rgøji ke e Diosi nee ke ra nⱥmbʼⱥji o trju̱u̱?

¹⁴ Ma ri nee ri jogebi na ntee, otrʼꞹ ri xipji pje ni chju̱zge. Nuʼma ¿pje ni chju̱u̱ e Diosi? Na punkjꞹ religión jizhiji ke o trju̱u̱ ngeje Mizhokjimi o Jmuʼu ajensʼe, pe nujyo dya nge o trju̱u̱. Nge nzakja ma ri mange “rey” o “presidente”, pe dya nge o trju̱u̱ kʼe bʼɇzo kʼꞹ xiji ga kjanu. E Diosi xitsʼkøji pje ni chju̱u̱, kja Salmo 83:18 mama ga kjaba: “Ngekʼua texe yo ntee ra mba̱ra̱ji ke ni chju̱tsʼkʼe Jehová, ixi ngextrjotsʼkʼe me na notsʼkʼe kja texe ne xoñijomꞹ”. E Diosi ni chju̱u̱ Jehová. Kʼo bʼɇzo kʼo go dyopjꞹji ne Biblia, ixko kjogꞹ siete mil ba jñusʼꞹji o trju̱u̱. E Jehová nee ke ri pa̱rge na joo o trju̱u̱ ñe ri ñⱥmbʼⱥ, ma ri tsjagekʼo, ri jogebi angeze.

15. ¿Pje nee ra mama o trju̱u̱ e Mizhokjimi Jehová?

¹⁵ O trju̱u̱ e Mizhokjimi jitsʼkøji ja ga kjaa angeze. Kʼe trju̱u̱ Jehová, nee ra mama ke angeze søø ra tsjaa texe kʼo ni jyodʼꞹ ngekʼua ra zⱥdʼⱥ texe kʼo mama  ñe texe kʼo nee, dya kjo søø ra tsʼasʼꞹ. Ngextrjo e Jehová pɇsʼi kʼe trju̱u̱. *

16, 17. ¿Pje nee ra mama ne jñaa: a) “søø ri tsjage texe”? b) “gi mandage, gi bʼꞹbʼꞹge texe yo paa”? c) “bi dyⱥtrʼⱥ texe”?

¹⁶ Kʼua ja nzi ro nuji, kja Salmo 83:18 mama ja ga kjaa e Jehová: “Ixi ngextrjotsʼkʼe me na notsʼkʼe kja texe ne xoñijomꞹ”. Kja Revelación o Apocalipsis 15:3, (TNM)  mama ga kjaba: “Me na nojo ñe me na zøø nu kʼo bi dyⱥtrʼⱥge Mizhokjimi Jehová, me na zɇtsʼige søø ri tsjage texe. Me na joo texe kʼo i kjage ñe na kjuana kʼo i mange, ngetsʼkʼe gi mandage, gi bʼꞹbʼꞹge texe yo paa”. ¿Pje jitsʼkøji ne jñaa “søø ri tsjage texe”? Kʼꞹ ngextrjo e Jehová me na zɇzhi, dya bʼꞹbʼꞹ naja nzakja angeze. Nu jñaa “gi mandage, gi bʼꞹbʼꞹge texe yo paa”, jitsʼkøji kʼꞹ e Jehová dya tu̱u̱, bʼꞹbʼꞹtrjo texe yo paa. Kja Salmo 90:2 mama ke e Jehová bʼꞹbʼꞹ ndeze mi jingua, yo padya ñe kʼo paa kʼo ra e̱je̱. ¡Me na joo ja ga nge e Jehová!

¹⁷ Ngextrjo e Jehová go dyⱥtrʼⱥ texe. Kja Apocalipsis 4:11 mama ga kjaba: “Nutsʼkʼe ngetsʼkʼe in Jmutsʼꞹgøjme ñe in Mizhokjimitsʼꞹgøjme. Ngetsʼkʼe bi dyⱥtʼⱥ texe yo bʼꞹbʼꞹ, texe yo kjaa. Mi ñege kʼꞹ ro bʼꞹbʼꞹyo, ngekʼua bi dyⱥtʼⱥyo. Ngekʼua ni jyodʼꞹ texeji ra matʼkʼꞹgeji, ra mamaji kʼꞹ me  na nojotsʼꞹge nangeje me na zɇtsʼige; bi dyⱥtʼⱥge texeyo”. Kʼua ja nzi ga mamaba ngeje e Jehová kʼꞹ go dyⱥtrʼⱥ texe yo anxe, yo seje, yo tanseje, texe yo lulu yo kisʼi kja yo zaʼa ñe texe yo pje nrre jmo̱o̱.

18. ¿Pjenga mama na punkjꞹ ntee ke dya søø ra joji Mizhokjimi? ¿Pje mama ne Biblia?

¹⁸ Na punkjꞹ ntee ma ga mba̱ra̱ji kʼꞹ me na nojo e Jehová, kʼꞹ me na zɇzhi ñe kʼꞹ me na je̱e̱ ja bʼꞹbʼꞹ, me su̱ji ñe manji, “¿pjenga ra nezgøjikʼꞹ?”. Pe ¿je ga kjanu ga mbeñe Mizhokjimi? Iyo. Me nezgøji xo nee ke ra joji angeze. Ne Biblia mama ke “dya je̱e̱ bʼꞹbʼꞹ Mizhokjimi ko nuzgøji” (Hechos 17:27). E Mizhokjimi mama ke ma nutsʼkʼe ri chɇzhi a jmii ‘angeze xo ra chɇzhi in jmige’ (Santiago 4:8).

19. a) ¿Pje ra kjaji ngekʼua ra joji e Mizhokjimi? b) ¿Ja nge kʼo nrra i nepege nza texe kʼo kjaa e Jehová?

¹⁹ ¿Pje ri tsjaa ngekʼo ri jogebi e Jehová? E Jesús o dyøtꞹ Mizhokjimi ga kjaba: “Sido ra bʼꞹbʼꞹtjoji nangeje pa̱kʼa̱ji, nutsʼkʼe ngetjotsʼꞹge i Mizhokjimige kʼꞹ na kjuana. Sido ra bʼꞹbʼꞹtjoji nangeje xo pa̱ka̱ji, nutsʼkø e Jesucristo gui chⱥkjⱥgø kja ne xoñijomꞹ” (Juan 17:3). Ma sido ri xørꞹ kʼo mama ne Biblia ri pjechi na joo ja ga kjaa e Jehová ñe e Jesucristo. Ga kjanu søø ri mimi texe yo paa. Ya ro pjechiji ke “Mizhokjimi sʼiyazgøji ri texeji” (1 Juan 4:16). Pe xi bʼɇxtrjo na punkjꞹ pje ra pjechiji ja ga kjaa angeze. Ne Biblia mama ke e Jehová me juentsʼe yo ntee, me na jonte, dya tsʼi ni mbɇkuɇ, mama kʼo na kjuana ñe me sʼiyazgøji dya jɇzgꞹji (Éxodo 34:6). E Jehová kjaa kʼo me na joo ñe perdonaozꞹji yo na sʼoo yo ri kjaji (Salmo 86:5). Me pɇskøji paciencia ñe me sʼiyazꞹji ngekʼo dya ra jyɇzgꞹji (Romanos 2:4; Revelación 15:4, TNM). Kʼo ri xørꞹ kja ne Biblia ra mbøxkʼꞹ ri pa̱ra̱ na joo ja ga kjaa e Mizhokjimi.

20-22. a) ¿Ja rga søø ra joji e Mizhokjimi ma dya søø ra janrraji angeze? b) ¿Pje ri tsjaa ma ra xitsʼiji ke ri jyɇzi ri xørꞹ nu Biblia?

 ²⁰ ¿Ja rgi jogebi e Mizhokjimi ma dya søø ri jñanrra angeze? (Juan 1:18; 4:24). Ma ri xørꞹge kja ne Biblia kʼo go tsjaa e Jehová mi jingua ñe yo na kjadya, ri unkʼe nguenrra kʼꞹ na kjuana bʼꞹbʼꞹ Mizhokjimi ñe kʼꞹ søø ri jogebi angeze (Salmo 27:4; Romanos 1:20). Ma xi ri pjechi ja ga kjaa e Jehová me ri sʼiyage angeze ñe ri jogebi na joo.

²¹ Xo ri pjechi kʼꞹ e Jehová nge in Tatazgøji ajensʼe nange dʼakꞹji ra mimiji (Mateo 6:9). Yo tata neji ke o trʼiji ra bʼꞹnji na joo, ke dya pje ra bʼɇzhiji je xo ga kjanu ga nee e Jehová ke me ra mⱥji rga minji (Salmo 36:9). Ne Biblia mama ke søø ra joji na joo e Jehová (Santiago 2:23). ¡Me ri dyⱥtrjoji ma ri pa̱rgøji ke e Jehová nge kʼꞹ go dyⱥtrʼⱥ texe ñe nee ke ra joji angeze!

²² Ra bʼꞹbʼꞹ ntee kʼꞹ dya ra jyɇtsʼkʼi ri xørꞹ nu Biblia, pe dya ri tsjapꞹ nguenrra. Po ra xitsʼiji ga kjanu nange dya neji ke ri potꞹ in religión. Pe dya ri jyɇzi kjo ra tsʼaskʼꞹ ri jogebi e Jehová. Dya kjo bʼꞹbʼꞹ kʼꞹ ri jogebi na joo, ngextrjo e Mizhokjimi.

23, 24. a) Ma dya i pa̱ra̱ kʼo mama ne Biblia, ¿pjenga na joo ri tsjaa trʼønꞹ ngekʼo ra mbøxkʼꞹji? b) ¿Pje ra nuji kja nu xørꞹ kʼꞹ ba e̱je̱?

²³ Ma dya ri meya texe yo ri xørꞹ kja ne Biblia, dya ri tseje ri tsjaa trʼønꞹ ngekʼua ra mbøxkʼꞹji ri pjechi na joo kʼo gi nee. E Jesús o mama ke ni jyodʼꞹ ra kjaji nzakja yo tsʼitrʼi kʼꞹ dya kjapꞹji me pa̱ra̱ji. Angezeji kjaji na punkjꞹ trʼønꞹ (Mateo 18:2-4). E Mizhokjimi nee ke ri chøtrʼꞹ texe kʼo gi nee ri pa̱ra̱. Ri xørꞹge na joo ne Biblia ngekʼua ri pjechi kʼo na kjuana kʼo mama Mizhokjimi (xørꞹ Hechos 17:11).

²⁴ Ngextrjo ma ri xørꞹ ne Biblia ri chøtrʼꞹ kʼo na kjuana ja ga kjaa Mizhokjimi. Kja nu xørꞹ nu ba e̱je̱ ra nuji pjenga dya bʼꞹbʼꞹ na libro nzakja ne Biblia.