KʼO PAA ma mi ka̱ra̱ rey kʼo mi manda a Samaria ñe a Jerusalén, e Mizhokjimi o ñeme profeta ro na̷dʼa̷ji o jñaa angeze. Mi bʼu̷bʼu̷ ntee kʼu̷ dya mi neeji kʼo profeta pje nrre mi kjapu̷ji kʼo na sʼoo. Kʼo profeta mi enchʼeji kja o mu̷bʼu̷ o jñaa e Mizhokjimi, ngekʼua kʼo profeta dya mi su̱u̱ji kʼo ntee. Ra nugojidya pje mi na̷dʼa̷ji kʼo profeta.

1. Ma o chjotu̷ji kʼo babilonio e Jerusalén. Na punkju̷ profeta nzakja e Isaías ñe e Jeremías o zopju̷ji kʼo ntee, go manji ke e Jerusalén ro chjotu̷ji, dya kja ro nga̱ra̱ nteenu, na punkju̷ paa ma kja o za̷dʼa̷ kʼo jñaa kʼo bi manji. O zu̷bu̷ e Jeoba kʼo nteekʼo, nange mi manji mi matrʼu̷kjimi pero dya ma kjuana, mi kjaji kʼo na sʼoo mi matrʼu̷ kʼo tsʼita ñe kʼo tsʼinana, xo mi obu̷ji ko kʼo nrrinxu kʼo ix mi ka̱ra̱ kja kʼo lo̷si jakʼo mi bʼu̷bʼu̷ kʼo tsʼita ñe kʼo tsʼinana, ma pje mi po̷ʼo̷ji dya mi su̷tʼu̷ji na joo mi ponu̷ji, dya mi pjosʼu̷ kʼo mi tsʼiprobe dya mi kjapu̷ji justicia, mi kjapji chu̱ʼu̱ ko o minteji (2 Reyes 21:10-15; Isaías 3:1-8, 16-26; Jeremías 2:1–3:13).

2. Ma o nzhogu̷ji a Jerusalén. E Mizhokjimi o mama ke ma ro za̷dʼa̷ kʼo setenta kje̷e̷ kʼu̷ ro nga̱ra̱ji a Babilonia, kʼo ntee ro nzhogu̷ji na yeje a Jerusalén ro mbeñeji e Jeoba, nrro ro jya̷bʼa̷ji kʼe templo ja mi matrʼu̷jikjimi Jeoba (Jeremías 46:27; Amós 9:13-15). O kjogu̷ komo dosciento kje̷e̷ ante ke ro za̷dʼa̷ kʼo jñaa kʼo bi mama kʼe profeta Isaías, ix ko mama ro ngeje e Ciro ro nrro̱mpu̷ kʼe rey a Babilonia ñe ro xipji kʼo israelita ro nzhogu̷ji a Jerusalén. E Isaías o mama jargua tsjapu̷ e Ciro ngekʼua ro ngichi a Babilonia (Isaías 44:24–45:3).

3. Ma ro sa̷ja̷ kʼe Mesías ñe jargua kjaa. Kʼe profeta Miqueas o mama kʼe Mesías ro musʼu̷ji a Belén (Miqueas 5:2). Kʼe profeta Zacarías go mama kʼe Mesías dya ro kjapu̷ na nojokʼu̷, ma ro za̷trʼa̷ a Jerusalén ro cha̷ga̷trjo na tsʼiburru (Zacarías 9:9). Kʼe profeta Isaías o mama ke ma ro e̱je̱ kʼe Mesías zo me ro sʼiya kʼo ntee, angezeji dya ro neeji (Isaías 42:1-3; 53:1, 3). Ro tsjapu̷ji ro supjre na punkju̷ ro mbotrʼu̷ji, e Mizhokjimi ro xosu̷ ro bʼu̷bʼu̷trjo na yeje. Kʼe profetakʼu̷, o mama ro nrru̱u̱ kʼe Mesías ngeje kʼu̷ rgui ngu̷zʼu̷ in pekadoji (Isaías 53:4, 5, 9-12).

4. Ma ra manda kʼe Mesías. Yo gobierno kʼo bʼu̷njiba kja ne Xoñijomu̷ dya pjechiji jarga mandaji. Kʼe Mesías me xo rga jonte, ra mboxkʼu̷goji ngekʼua ra mimiji na joo ñe dya kja ra kjaji chu̱ʼu̱ (Isaías 9:6, 7; Jeremías 10:23). Ma ra manda kʼe Mesías ndeze ajensʼe kja ne Xoñijomu̷, ra ñu̷nbu̷ o mu̷bʼu̷ kʼo ntee ra dya̷ta̷ji Mizhokjimi, kʼo añimale kʼu̷ na sate dya kja pje ra tsjakʼoji (Isaías 11:3-7). Yo ntee dya kja ra zodyeji (Isaías 33:24). Dya kja ra nrru̱u̱ji (Isaías 25:8). E Jesús ra xosu̷ yo ntee yo ya nrru̱u̱ nrro ra mimitrjo na yeje (Daniel 12:13).

(Nu kʼo gua e̱je̱ba xo ri jyodʼu̷ kja kʼe libro Isaías, Jeremías, Daniel, Amós, Miqueas ñe Zacarías.)