XORꞸ 4
¿Kjo ngeje e Jesucristo?
1. ¿Ja mi bʼꞹbʼꞹ e Jesús ma dya bʼe ma e̱je̱ kja ne Xoñijomꞹ?
¿Jama kjaa e Jesús ko yo ntee? (MATEO 11:29; MARCOS 10:13-16)
Ma dya bʼe ma e̱je̱ e Jesús kja ne Xoñijomꞹ, je mi bʼꞹbʼꞹ ajensʼe mi ngeje dʼa anxe (Juan 8:23). O bʼꞹbʼꞹ yo paa ma e Palesito ajensʼe mi bʼꞹntsjɇ, kjanu o unꞹ ro bʼꞹbʼꞹ e Jesús, dya kjo go mbøsʼꞹ ro tsjaa o trʼii ngekʼua kja ne Biblia mama: “Kʼꞹ nʼatjo o Trʼii e Mizhokjimi”. Kʼe trʼii kʼꞹ mamaba ngeje e Jesús kʼꞹ otrʼꞹ go bʼꞹbʼꞹtrjo. Ma go bʼꞹbʼꞹ e Jesús nge ma go mbøsʼꞹ Mizhokjimi, o dyⱥtrʼⱥbi kʼo bʼꞹbʼꞹ ajensʼe ñe kʼo bʼꞹbʼꞹ kja ne Xoñijomꞹ (Juan 1:14). Ma e Jehová mi bʼꞹbʼꞹ kjo nge kʼꞹ mi nee ro penpe na jñaa, mi ngeje e Jesús mi tⱥgⱥ ro maa xipji pje mi nee e Jehová. Ngekʼua ne Biblia mama e Jesús ngeje e “Jñaa”. Xorꞹge kja Proverbios 8:22, 23, 30; Colosenses 1:15, 16.
2. ¿Pje go ne̱e̱ tsjaa e Jesús kja ne Xoñijomꞹ?
E Mizhokjimi o juajnꞹ e María kʼꞹ mi ngeje judía, nukʼꞹ dya bʼe mi chjꞹntꞹ, o tsjapʼꞹ ro nrrunte. E Jesús dya go ñʼee na tata kja ne Xoñijomꞹ, o tata e Jesús bʼꞹbʼꞹ ajensʼe (Lucas 1:30-35). E Jesús go e̱je̱ ngekʼua (1) ro jichi yo ntee jama kjaa e Mizhokjimi, (2) go ne̱e̱ jitsʼkoji jarga soo ra kjaji kʼo nee Mizhokjimi zo ra kjogꞹji nrrumꞹ kʼꞹ na sɇzhi. (3) E Jesús go mama: “xo rba e̱kjo ra tu̱go, ngekʼua ra kjotpʼꞹ o nzhubꞹ na punkjꞹ ntee”. Xorꞹge kja Mateo 20:28.
3. ¿Pjekja o mbøxkꞹgoji e Jesús?
E Jehová dya mi nee ke ro titaji ni ke ro nrru̱ji, mi nee ke ro bʼꞹbʼꞹji nrrexe yo paa. E Mizhokjimi o xipji e Adán: “Ma ri sige ne lulu kʼꞹ kisʼi kja ne zaʼa ri chu̱ge”. Ngekʼua ma e Adán dya ro zii kʼe lulu dya ro nrru̱u̱ xe ro bʼꞹntrjodya (Génesis 2:16, 17; 5:5). Ne Biblia mama: “E Adán o tsjaa kʼo na sʼoo. Ngekʼua je ba teʼekʼua in nzhubꞹ kja ne Xoñijomꞹ. Je akjanu ba mbꞹrꞹ kʼꞹ ri tu̱ji”. ¿Kjo xe ro soo ke e Jehová xe ro pjøsʼꞹ yo ntee ngekʼua dya kja ra tu̱ji? Ja̱a̱, go nrrⱥjⱥ dʼa ntee kʼꞹ ro mbøxkꞹgoji (Éxodo 21:29, 30). Xorꞹge kja Romanos 5:12; 6:23.
¿Kjo nge kʼꞹ ro mbøxkꞹgoji? Dya soo ra mbøxkꞹgoji dʼa ntee kʼꞹ kjaa kʼo na sʼoo nzakjazgoji. Kʼꞹ soo ra mbøxkꞹgoji ngekʼua dya kja ra tu̱ji nge dʼa ntee kʼꞹ dya kjaa kʼo na sʼoo. Ma ri tu̱ji nge nzakja ma ri ngo̱trʼꞹji na nguenrra ke ri pɇsʼiji. Pe dya soo ra tsjo̱trʼꞹji kʼo na sʼoo kʼo kjaji yo ntee ngekʼua dya kja ra nrru̱ji. Xorꞹge kja Salmo 49:7-9.
4. ¿Pjekja go nrru̱u̱ e Jesús?
E Mizhokjimi me sʼiyazgoji ngekʼua o nrrⱥjⱥ kja ne Xoñijomꞹ e Jesús ro ne̱e̱ mbøxkꞹgoji. E Jesús dya mi pɇsʼi pekado ngekʼua angeze dya ro nrru̱u̱, pe me sʼiyazgoji ngekʼua o jyɇzi ro mbotrʼꞹji akjanu ra soo ra mbøxkꞹgoji ngekʼua dya kja ra tu̱ji. Xorꞹge kja Juan 3:16; Romanos 5:18, 19.
Jñanrra ne video ¿Pjenga go nrru̱u̱ e Jesús?
5. ¿Ja je bʼꞹbʼꞹdya e Jesús ñe pje na kjaa?
E Jesús ma go mimi kja ne Xoñijomꞹ o mbøsʼꞹ yo ntee kʼo mi supjre, mi jokꞹ kʼo mi sodye, kʼo ya bi nrru̱u̱ tsjapꞹ ro mimiji na yeje. Kʼua janzi gua mbøsʼꞹ yo ntee ma go mimi kja ne Xoñijomꞹ je xo rga kjanu ra mbøsʼꞹ yo ntee ma ra manda kja o Reino Mizhokjimi (Mateo 15:30, 31; Juan 5:28). Ma e Jesús go nrru̱u̱, e Jehová o xosꞹ o tsjapꞹ ro bʼꞹbʼꞹ na yeje. Dya kja mi ngeje na ntee nzakjazgoji, mi ngeje na anxe (1 Pedro 3:18). Kjanu o maa ajensʼe ja bʼꞹbʼꞹ e Jehová o tebʼenu jesta ma ro xipji e Mizhokjimi ro manda (Hebreos 10:12, 13). Nudya, o disipulo e Jesús xipjiji yo ntee ke e Jesús bʼꞹbʼꞹdya ajensʼe a go mbꞹrꞹ go mandanu. Xorꞹge kja Daniel 7:13, 14; Mateo 24:14.
Nudya, dya kja ra mezhe ra pjꞹrꞹ ra manda kja ne Xoñijomꞹ ra chjotꞹ yo ntee kʼo kjaji kʼo na sʼoo. Yo ntee kʼo kjaji kʼo mama e Jesús me ra mⱥji ra nga̱ra̱ji kja ne Xoñijomꞹ kʼꞹ me rga zøø. Xorꞹge kja Salmo 37:9-11.
