E Mizhokjimi o juajnꞹ ntee ke ro mimiji jama nee angeze, je bi ñe̱je̱ kja o trʼii e Abrahánkʼo. E Mizhokjimi go xipji jarba minji. E Jehová go mama mi nge o jñiñi o jñuspʼꞹ “Israel”. Nrrexe kʼo ntee kʼo mi ka̱ra̱ kja ne Xoñijomꞹ nge angezeji ro mimiji jama nee e Jehová (Salmo 147:19, 20). E Jehová ro jichi kʼo israelita pje ro tsjaji ngekʼua ro mbøsʼꞹji kʼo ntee kʼo mi ka̱ra̱ji nrrexe nu Xoñijomꞹ. Xorꞹge kja Génesis 22:18.

E Palesito ajensʼe o juajnꞹ kʼo israelita ngekʼua ro ngeji o “testigoji” ro jichiji kʼo ntee jaga kjaa angeze (Isaías 43:10). Ri xorꞹji kja ne Biblia ke kʼo israelita ma mi kjaji kʼo mi mama e Jehová, mi ka̱ra̱ji na joo (Deuteronomio 4:6). Kʼo jñiñi kʼo bʼɇxtrjo mi bʼꞹbʼꞹ kja kʼo israelita ro jñanrraji jama tsjaji kʼo israelita ga kjanu ro mba̱ra̱ji jama nge e Jehová. Xorꞹge kja Isaías 43:12.

Ma go kjogꞹ kʼo paa kʼo israelita dya kja go tsjaji texe kʼo ma joo ngekʼua e Mizhokjimi dya kja go nee kʼo nteekʼo, go juajnꞹ nʼaño ntee mi ngeji kʼo ntee kʼo mi trjꞹntʼꞹ axꞹtrjꞹ e Jesús (Mateo 21:43; 23:37, 38). Nudya, yo paa yo ri ka̱ra̱jidya yo ntee kʼo mimiji jaga nee Mizhokjimi ngeje yo testigo e Jehová. Xorꞹge kja Hechos 15:14, 17.

E Jesús o xipji kʼo mi trjꞹntrʼꞹji axꞹtrjꞹ ro jichiji yo ntee kjo nge e Jehová, akjanu ro chøtrʼꞹji ntee kʼo mi nee ro tsjaji kʼo mi mama angeze (Mateo 10:7, 11; 24:14; 28:19, 20). E Jehová nee ke yo ntee ra mba̱ra̱ji kʼo na kjuana ngekʼua yo paadya yo testigo e Jehová jichiji na punkjꞹ ntee pje mama ne Biblia kja nrrexe nu  Xoñijomꞹ, jama nee e Jesús. Ro zⱥdʼⱥ kʼꞹ ro janrrajikʼo ma a ra nguarꞹ nrrexe yo na sʼoo kʼo kjaji kja ne Xoñijomꞹ (Apocalipsis 7:9, 10). Yo ntee kʼo kjaji kʼo nee e Jehová chjꞹma chjꞹma xampjaji pje ra xorꞹji, ma jmurꞹji ⱥrⱥji pje mama ne Biblia, nukʼo pjøsʼꞹji ra mimiji na joo. Kʼo xorꞹji nge kʼo xorꞹji nrrexe kja ne Xoñijomꞹ. Ma jmurꞹji zengua o kjuarmaji, onꞹji pje kjaji, ma pa̱ra̱ji pje kʼo go kjogꞹ na kjuarma pjøsʼꞹji. Xorꞹge kja Hebreos 10:24, 25.

Kja kʼe kjɇɇ 1870, go bʼꞹbʼꞹ ntee kʼo o mbꞹrꞹji go xorꞹji pje mama ne Biblia, o pjechiji ke e Jesús mi xipji o disipulo ro maa jichiji yo ntee o Reino e Mizhokjimi. Je ba kjanu go mbꞹrꞹ go tsjajikʼo kja texe ne Xoñijomꞹ. Kja kʼe kjɇɇ 1931, o jñuspʼꞹji testigo e Jehová. Xorꞹge kja Hechos 1:8; 2:1, 4; 5:42.

Kja kʼe siglo dʼaja kja ne Xoñijomꞹ mi bʼꞹbʼꞹ bʼɇzo kʼo mi xipjiji kʼo kjuarma jargua pepji ñe jango ro jmurꞹji, mi pa̱ra̱ji ke e Jesús nge nu mi manda kja yo kongregasion (Hechos 16:4, 5). Nzakja mi jingua, nudya yo testigo pɇsʼiji bʼɇzo kʼꞹ otrʼꞹ axojñi. Pjøsʼꞹji yo ntee kʼo pepjiji kja yo opjisina kʼꞹ xiji Betel kʼꞹ bʼꞹbʼꞹ kja texe ne Xoñijomꞹ. Kja yo opjisina bʼꞹbʼꞹ ntee kʼꞹ opjꞹji xiskuama kja mas de 600 idioma. Yo kjuarma kʼꞹ otrʼꞹ axojñi pjøsʼꞹji ñe jichiji ko ne Biblia pje ra tsjaji ñe jarga minji yo kjuarma. Nrrexe ne Xoñijomꞹ bʼꞹbʼꞹ ngumꞹ nuja jmurꞹji, bʼꞹbʼꞹ mas de sien mil kongregasion. Kja yo kongregasion jango jmurꞹji yo testigo e Jehová bʼꞹbʼꞹ kjuarma kʼo otrʼꞹ axojñi, nukʼo ga pjøsʼꞹji yo kjuarmakʼo. Xorꞹge kja 1 Pedro 5:2, 3.

Nzakja kʼo apostole mi jingua, yo testigo e Jehová poji kja o ngumꞹ yo ntee jichiji pje mama ne Biblia akjanu na punkjꞹ ntee xo ra tsjajikʼo ra mbøsʼꞹji nʼaño ntee (Hechos 20:20). Pjøsʼꞹji yo ntee kʼo me nee ra mba̱ra̱ji pje mama Mizhokjimi. Yo testigo e Jehová ri sʼiyaji in kjuarma ñe in kju̱ʼu̱ kʼo poji ja ni jmurgojme, in Mizhokjimigojme Jehová me nezgoji (2 Tesalonicenses 1:3). Me ri mⱥkjoji ma ri kjagoji kʼo mama e Jehová ñe ma ri pjøsʼꞹji yo ntee. Xorꞹge kja Salmo 33:12; Hechos 20:35.