Texezꞹji ri pɇpjiji ngekʼua ra søø ra unꞹji kʼo ra nestaji in pjamilia ngekʼua dya pje ra bʼɇtsʼpʼiji (Proverbios 30:8). Ne Biblia mama ke ma ra jꞹ̱goji merio dya pje ra bʼɇtsʼkʼoji, dya nge kʼꞹ me ra negoji yo merio, pe ri nestaji merio ngekʼua ra søø ra uiñiji in pjamilia ñe dya pje ra bʼɇtsʼpʼiji (Eclesiastés 7:12). Ra bʼꞹbʼꞹ paa ma dya ri pɇsʼige merio, pe dya ri chu̱gebi (Efesios 4:32). Dya ri mbeñe ke ni suu o ni xira sʼodʼꞹ texe ne merio, ri ñubi ja rgi pjørꞹbi in merio.

NE BIBLIA MAMA GA KJABA: “Ma kjo kʼo nee ra jyⱥbʼⱥ na ngumꞹ, ni jyodʼꞹ otrʼꞹ ra tsjaa nguenda, kjo ra zⱥsʼⱥ kʼꞹ rgui kjuatꞹ kʼe ngumꞹ” (Lucas 14:28). Ma pje kʼo ri nee ri chomꞹ, otrʼꞹ ri ñabi ni suge o ni xira, nza yetsʼkui ri tsejmebi ja rgi sʼodʼꞹbi in merio (Amós 3:3). Ma ri ñagebi, ri mangebi pje nesta ri chomꞹbi ñe janzi merio i pɇsʼibi ngekʼua ri søø ri chomꞹbikʼo (Proverbios 31:16). Ra bʼꞹbʼꞹ paa kʼꞹ ri pɇsʼige na punkjꞹ merio, bʼꞹma ri mange: ¡Søø ra tomꞹ ndexe kʼo ri nego! Pe dya ri mbeñe ga kjanu, ri pjønguenda ja rgi sʼodʼꞹ in merio ngekʼua dya ri chu̱sʼꞹ nguenda. Kʼo ri tsjage, ri ñuu janzi merio i pɇsʼi ñe janzi merio ri søø ri sʼodʼꞹ (Proverbios 21:5; 22:7).

TSJAGE KʼO MAMABA:

• Juankʼebi yo merio yo ri tsjontrʼꞹbi ñe yo ri chomꞹbi kʼo ni jyonkʼꞹbi, ma xi ra mbonkjꞹ merio, ri ñagebi pje ri tsjapꞹbi

• Ma gi nuu kʼꞹ dya soo in merio, ri pjørꞹ ngøñi, ⱥjnⱥ ñe ri pɇpji in juajma ngekʼua ri pɇsʼi pje ri sige, ga kjanu dya ri ma chomꞹ

NE BIBLIA MAMA GA KJABA: “Ri negojme ra kjagojme kʼꞹ na joo kja a jmii Mizhokjimi [Jehová]; xo ñeje kja a jmii yo bʼɇzo” (2 Corintios 8:21, NTD). Ma i pɇsʼi bʼɇpji, xipji ni suge o ni xirage janzi merio kjontʼkʼꞹji ñe janzi merio i sʼodʼꞹ nzi dʼa paa.

Ma pje kʼo gi nee ri chomꞹ kʼo na mizhi, ri ñaa ko ni suu o ni xira, dyønꞹ ma nuu na joo kʼo gi nee ri tsjaa o iyo (Proverbios 13:10). Ri ñugebi pje ri tsjapꞹbi yo merio yo i pɇsʼibi, ma ri tsjagebi akjanu dya ri chu̱gebi ri bʼꞹnkʼebi na joo. Yo merio yo i to̱nkje dya ngextrjo in tsjakje, xo ngeje o merio in pjamilia (1 Timoteo 5:8).

TSJAGE KʼO MAMABA:

• Ma ri ñage ko ni suu o ni xira ri mangebi janzi merio søø ri sʼodʼꞹge ma i bʼꞹntsjɇ

• Ñage ko ni suu o ni xira ja rgi pjørꞹgebi in merio, dya ri chebʼe ma kja ra sⱥjⱥ yo nrrumꞹ