XØRꞸ 7
¿Pje ri tsjage ma ri su̱ge ñe ma gi soʼo ke dya kjo ra mbøxkʼꞹ?
¿Gi janrra ne tsʼitrʼi nu kuatrʼꞹba? Bʼꞹntsjɇ, ñetsʼe ke me su̱u̱ ñe otrjo kjo ra mbørꞹ. ¿Bʼꞹbʼꞹ paa ma gi soge ga kjanu?... Ndexezꞹji bʼꞹbʼꞹ paa ma ri sogoji ga kjanu. Kja ne Biblia mama ke mi jingua mi bʼꞹbʼꞹ ntee kʼo mi pɇpiji e Jehová. Angezeji me mi sʼiyaji e Jehová, pe ma go kjogꞹji kʼo na sʼoo me go zu̱ji, mi soji ke mi bʼꞹntsjɇji ke mi otrjo kjo ro mbøsʼꞹji. E Elías go zoʼo ga kjanu, mo ra xørꞹji pje go kjogꞹkʼꞹ.
E Jezabel mi nee ro mbøtrʼꞹ e Elías
E Elías go mimi mi jingua ma dya bʼe ma e̱je̱ e Jesús kja ne Xoñijomꞹ. Kʼo paakʼo, e Acab mi manda a Israel, nu male mi chju̱u̱ Jezabel. Dya mi matrʼꞹbi kjimikʼo, angezebi mi xørpꞹbi e Baal, nukʼꞹ mi ngeje na mizhokjimi kʼꞹ dya ma kjuana. Ngekʼua, na punkjꞹ israelita xo mi kjaji ga kjanu, mi xørpꞹji e Baal. Kʼe reina Jezabel me ma sʼoo, mi nee ro mbøtrʼꞹ ndexe kʼo ntee kʼo mi ⱥtⱥji e Jehová. E Elías mi kjaa kʼo mi nee e Jehová, ngekʼua e Jezabel mi nee ro mbøtrʼꞹ. Ma rgui ngetsʼkʼe e Elías, ¿pje rgui tsjage?...
Ma e Elías go mba̱ra̱kʼo me ko pizhi, go zu̱u̱ ro mbøtrʼꞹji ngekʼua go kʼueñe go maa na je̱e̱, go ma tsjo̱jo kja na cueva. Angeze mi pa̱ra̱ ke e Mizhokjimi Jehová dya mi jɇzi mi pjøsʼꞹ. ¿Pjekja go zu̱u̱ma?... Go jyombeñe kʼo go tsjaa e Mizhokjimi. Nzakja ma e Elías go dyøtꞹ Mizhokjimi ro mbejñe sibi, angeze go dyⱥtⱥ, go tsjaa ja nzi ba dyøtꞹ e Elías. E Jehová me na zɇzhi go mbøsʼꞹ e Elías.
¿Ja ba mbøsʼꞹ e Jehová e Elías?
Ma e Elías go zⱥtrʼⱥ kja kʼe cueva, e Jehová go dyønꞹ: “¿Pje i kjageba?”. Nukʼua e Elías go ndꞹrꞹ ba mama: “Ndexe kʼo ntee kʼo mi ⱥtkʼⱥ ya mbøtrʼꞹjikʼo, ngextrjozgo xe ri bʼꞹntrjo, pe nudya a na jongoji nee ra mbøtrʼkꞹji ngekʼua me ri su̱go”. E Elías mi mbeñe ke ya bi mbøtrʼꞹji ndexe kʼo ntee kʼo mi ⱥtⱥji e Mizhokjimi. Nukʼua e Jehová go xipji e Elías: “Nutsʼkʼe i mbeñe ke ya ngextrjotsʼꞹ gi kejme, pe iyo dya nge ga kjanu, a Israel xe ka̱ra̱ siete mil ntee kʼo ⱥtkⱥgo. Dya ri su̱ge, ri pɇsʼigo na bʼɇpji ke ri tsjage”. ¿Ja ba zoʼo e Elías ma go dyⱥrⱥ Mizhokjimi ba xipjikʼo?... ¡Ja̱a̱, me ko mⱥjⱥ!
Kʼo go kjogꞹ e Elías, ¿pje nge kʼo ri pjechiji?... Bʼꞹma bʼꞹbʼꞹ paa ma ri sogoji nzakja angeze, bʼꞹma me ri su̱goji pje ra kjogꞹzꞹji. Ma ri soge ga kjanu, ¿pje ri tsjage? Dya ga joo ke ri su̱ge, dya gi bʼꞹntsjɇ, na punkjꞹ nu kʼo i joge sʼiyaji e Jehová, angezeji xo sʼiyatsʼꞹ ra mbøxkʼꞹji. Xo bʼꞹbʼꞹ e Jehová, angeze me na zɇzhi ra mbøxkʼꞹge ma pje ri tsjogꞹ. ¿Ja gi sogedya ke i pa̱rgekʼo?...
