Kuwe biro bedo e piny ok kokalo kuom kinda mar dhano to kokalo kuom Pinyruodh Nyasaye, ma en sirkal manie polo ma itayo gi Yesu Kristo. Ne ane gima Muma puonjo e wi geno majaberni.

1. Nyasaye biro miyo ‘lwenje orum nyaka giko piny,’ ka ochopo singo mare mar kelo “kuwe obed e wi piny e kind joma oyiego!”—Zaburi 46:9; Luka 2:14.

2. Pinyruodh Nyasaye biro locho e wi piny duto koa e polo. (Daniel 7:14) Obiro golo pogruok mantie e kind pinje ma en gima osekelo ywaruok mang’eny ahinya.

3. Yesu ma en Jaloch mar Pinyruodh Nyasaye, iluongo ni “Ruodh Kuwe,” kendo obiro neno ni “kuwe ok nowe medore ameda.”—Isaiah 9:6, 7.

4. Jo mohero dhawo ok noyienegi dak e bwo pinyruodh Nyasaye nikech ‘chuny [Nyasaye] osin kod ng’at mohero tim mager.’—Zaburi 11:5; Ngeche 2:22.

5. Nyasaye puonjo jotichne kaka ginyalo dak gi kuwe. Nikech puonjgo, Muma wacho ni ji biro ‘kawo ligengini ma gingo eka ginilosgo leu kwer, kod tongegi ginithedh ratonge: oganda ok noting’ ligangla ne oganda machielo, kendo ok ginipuonjre wach lweny nyaka chieng’.’—Isaiah 2:3, 4.

Gie sani, Joneno mag Jehova milionde puonjore kaka ginyalo kelo kuwe. (Mathayo 5:9) Kata bed ni wawuok e ogendini mopogore opogore kendo wadak e pinje makalo 230, ok wa dhaw gi ng’ato ang’ata.