Jachuech noseketo chike matayo weche kend chon ahinya kata kapok sirkande mag piny ochako keto chikegi matayo kend. Buk mokwongo e Muma nyisowa niya: “Dichwo nowe wuon gi min, mi nopadre gi chiege mi ginibedi ringruok achiel.” (Chakruok 2:24) Kaluwore gi buk moro miluongo ni Vine’s Expository Dictionary of Biblical Words wach molok ni “chiege” e dho Hibrania en “wach ma nyiso mana ng’ama dhako kende.” Yesu ne owacho ayanga ni kend onego bed e kind “dichwo gi dhako.”—Mathayo 19:4.

Omiyo, Nyasaye ne dwaro ni kend obed riwruok mosiko e kind dichwo gi dhako. Ne ochue chwo gi mon mondo gikonyre ka ng’ato ka ng’ato kuomgi chopo dwaro mag nyawadgi e gik ringruok, weche nindruok kod bedo gi nyithindo.